YOHANA 8

1nebutswa Yesu yatsia Khusikulu sia Miseituni. 2Litukhu elialondakhwo mumabwebwe niyenjila mu Hekalu khandi. Abandu bosi betsa khuye, niyekhala hasi, nachiaka okhubebaal'la. 3Abebaali ba Malako nende Abafarisayi nibamuler'ra omukhasi owali nanyooywe mubuheyi, nibamura imbeli womukanda. 4Nibabool'la Yesu, “Omukhasi uno yanyooywe naheyanga habwene nahabwene. 5Mumalako kefwe Musa yakhulaka mbu khwire abafwana mbwo namachina. Khe nawe oboolanga mbwena khuye?”#Abal. 20:10; Okhuka. 22:22-24 6Ne eliene yili baboola khulwo okhumuteema, khe batoole esifune siokhumusitaka. Nebutswa Yesu yenama hasi nahandika mumaloba nesitere sisie.

7Nabo olwa barelel'la okhumureeba, yatikulukha nababool'la, “Uyo osili okhukholakhwo tsimbi khwinywe, arange okhumulasa lichina.” 8Ma niyenama hasi khandi nahandika mumaloba. 9Nabo, nyinga bahul'la yako baswekha nibatsia simulala, simulala okhuchiachila khumukhulundu okhwola khuwokhumal'likha. Yesu nasikala yenyene, ne omukhasi tsana nasisinjiyeho. 10Yesu natikulukha, namureeba, “Omukhasi abakhuyaal'lenje bali hena? Abulaho kata mulala okhukhalachiiye esiina?” 11Namukalusia, “Omwami, sialiho kata mulala tawe.” Yesu namubool'la, “Nase sikhukhalachila esiina tawe, tsia ouwo, nebutswa okhurula luno orakhola tsimbi khandi tawe.”]#8:11 Amahandiko kandi amakhulu sikali nebiasia bia 53 nende 8:1-11 tawe.

Yesu niye obulafu bwesibala

12Khandi Yesu yal'loma khu Bafarisayi. “Ise nise obulafu bwesibala. Ounonda ise sialachenda musiilima tawe, nebutswa alaba nobulafu bwobulamu.”#Mat. 5:14; Yoh. 9:5

13Abafarisayi nibamubool'la, “Ibe wekobokhelanga omwene, ne obukobokheli bubwo sibuli obwatooto tawe.”#Yoh. 5:31 14Yesu yabakalusia nababool'la “Kata nimba nindekobokhelanga omwene, obukobokheli bwanje nobwatooto, sichila ndamanya ahandarula, nende ahanzitsanga. 15Inywe mukhalakanga esiina esinamubili, ise sikhalachilanga omundu tawe. 16Ne nimba nikhalachilanga omundu esiina okhukhalaka khwanje nokhwatooto, sichila sindi sienyene khubwanje tawe, nebutswa khuli nende Papa owaruma. 17Kahandikwa mu Malako kenywe mbu obukobokheli bwabandu babili nobwatooto. 18Ise ndekobokhelanga, khandi Papa owaruma yangobokhelanga.”

19Kho nibamureeba, “Papa uwo tsana ali hena?” Yesu nabakalusia, “Inywe simumanyile ise, kata simumanyile Papa khandi tawe. Mulaba nimwamanya, khane khandi mwamanya Papa.”

20Amang'ana yaka yabool'la habali mbahanilanga esihanwa, olwa yali niyebaalanga mu Hekalu. Ne siyaliho omundu wosi owamufumila tawe, sichila inyinga yiye yali nesili okhwola.

Simunyala okhutsia ahanzitsanga tawe

21Yesu nabool'la Abafarisayi khandi, “Ise rulangaho; ne muliruna ise nebutswa mwakhafwile mutsimbi tsienywe. Ise ahanzia inywe simunyala okhwitsayo tawe.” 22Abayahudi nibaboola, “Yetsa okhweyira omwene nohomba? Okhuba aboolanga, Ahanzia inywe simunyala okhwitsayo tawe.” 23Nababool'la, “Inywe muli abehasi, nase ndi owomwikulu; inywe muli abomusibala muno, ise sindi owomusibala muno tawe. 24Kho ndamubool'la, mwakhafwile mutsimbi tsienywe. Nimuba nimurasubila ‘Ise Nise ye’ mwakhafwile mutsimbi tsienywe.” 25Khe nibamureeba. “Niwe wina?” Yesu nabakalusia, “Kali singa ndamubool'la okhurulana olwokhuranga. 26Ndi namang'ana amenji akokhuboola khukenywe nende okhumukhalachila esiina. Nebutswa owaruma nowatooto; ne amang'ana akandali okhuhul'la okhurula khuye niko akamboolanga musibala.”

27Sibamanya Yesu al'lomanga khu Samwana tawe. 28Kho Yesu nababool'la, “Nyinga muliachikha Omwana wo Mundu khumusalapa nilwo olwa mwakhamanye ‘Ise Nise ye’; ma mulimanya mbu sikholanga ling'ana liosi khubwanje tawe, nebutswa mboolanga aka Papa yanzibaal'la okhuboola. 29Naye niye owaruma ma ali halala n'nase, siyandekhanga sienyene tawe; sichila kholanga amatukhu kosi akayanzilwe khuye.” 30Abandu abenji abahulila Yesu naboola amang'ana yaka, basubila khuye.

Akatooto kalamukhola abalakhule

31Kho Yesu nabool'la Abayahudi abali nibasubiye khuye, “Inywe nimuba nimuhulila amebaalo kanje, mwakhaba abechi banje batooto. 32Nenywe mwakhamanye akatooto, nako akatooto kakhamukhola okhuba abalakhuule.” 33Nibamukalusia “Khuli abolwibulo lwa Aburahamu, khusili okhubakhwo abahambe bomundu wosi tawe, nawe oboolanga mbwena, ‘Muliba abalakhuule?’ ”#Mat. 3:9; Lk. 3:8 34Yesu nababoolela, “Mubool'langa tooto, siomundu okholanga tsimbi nomuhambe wetsimbi. 35Omuhambe siamenyanga munyumba amatukhu kosi tawe, omwana ye amenyanga amatukhu kosi. 36Khe omwana naba namukhola abalakhuule, mulaba abalakhuule tooto. 37Ndamanya muli abolwibulo lwa Aburahamu, ne murunanga okhunzira, sichila ling'ana lianje silinyooye obweyangu mwinywe tawe. 38Yaka mboolanga akandalola khu Papa, ne nenywe akamwahulila khu papa wenywe niko aka muboolanga.”

39Nibamukalusia, mbu “Papa wefwe ni Aburahamu.” Yesu nabakalusia mbu “Mulaba nimuli abaana ba Aburahamu, khane mukholanga emilimo chia Aburahamu yakhola. 40Kosi aka mal'le okhukhola, nokhumubool'la akatooto aka ndahul'la okhurula khu Nyasaye nebutswa murunanga okhunzira. Yako sikali niko aka Aburahamu yakhola tawe. 41Inywe mukholanga aka papa wenywe yakhola.” Nibamubool'la, “Nyasaye mwene niye Papa wefwe yenyene, ne khuli abaanabe abahabwene.”

42Yesu nababool'la, “Nyasaye alaba nali niye Papa wenywe, mwakhanyanzile ise, sichila ise ndarula owa Nyasaye ninzitsa hano. Sindaitsa khubwanje, nebutswa niye owaruma. 43Busina muramanyilisia okhuboola khwanje? Kali sichila simunyala okhwefwila okhuhul'la amang'ana kanje tawe. 44Muli aba papa wenywe Es'sieno ne muyanzanga okhulonda okhwekomba khwa papa wenywe. Yalinji omwiri wabandu okhurula mukhuchiaka khwesibala ne siasinjilanga mukatooto tawe sichila akatooto sikali muye tawe. Nyinga aboolanga obubehi, aboolanga khu keimela yiye sichila nomubehi, khandi niye samwana obubehi bwosi. 45Nebutswa sichila mboolanga akatooto, simumbuchil'langa tawe. 46Niwinakhwo khwinywe owakhamanyia mbu esiina sietsimbi siifwilanga? Nimba nimubool'la akatooto, busina simusubilanga tawe? 47Uyo oli owa Nyasaye ahulilanga amang'ana ka Nyasaye. Nebutswa inywe simuli aba Nyasaye tawe, ne niko akachila simunyala okhuhul'la tawe.”

Yesu nende Aburahamu

48Abayahudi nabo nibamureeba mbu, “Sikhuboolanga habwene mbu oli Omusamaria khandi wasienwa?” 49Yesu nakalusia mbu, “Ise sindasienwa tawe, nebutswa mbelesianga Papa wanje oluyali ne inywe munjaayanga. 50Ise sinderun'nanga obukhongo bwanje omwene tawe, nebutswa aliho mulala oburunanga khandi akhalakanga niyangobokhela. 51Mubool'langa tooto, omundu naba nafumila obwibaali bwanje siyakhafwe kata hati.”

52Abayahudi nibamubool'la, “Luno khwakhamanya mbu wasienwa! Aburahamu yafwa, khandi abaroobi bafwa, olwa nawe oboolanga mbu omundu naba nafumila obwibaali bubwo siyakhafwe kata hati tawe. 53Aburahamu papa wefwe halala nende abaroobi bafwa; nawe sionyala okhwekhola omukhongo okhubayomba tawe. Wekholanga okhuba wina?” 54Yesu nakalusia, “Nikaba ndefumianga omwene, ifuma yanje sieli esindu tawe. Oumbelesianga oluyali ni Papa wanje owe inywe muboolanga ni Nyasaye wenywe. 55Kata nimuram'manyile ise ndamumanya. Nindakhabooye mbu simanyile Papa tawe, khe ndakhaba omubehi singa inywe. Nebutswa ise ndamumanya ne mbulilanga amang'ana kaake. 56Papa wenywe Aburahamu yali okhusangala okhulola litukhu lianje; nalilola ma nalema omwoyo.”

57Abayahudi bamubool'la, “Ibe kata osili okhuhela emihika amakhumi karano, nawe walola Aburahamu?” 58Yesu nababool'la, “Mubool'langa tooto, Aburahamu nasili okhwibulwa, ise ndali nindiho.” 59Nibabukula amachina mbu bamulasile, nebutswa Yesu niyebisa narula mu Hekalu.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

YOHANA 8: EBAIBO

Highlight

ಶೇರ್

ಕಾಪಿ