YOHANA 19

1Nilwo olwa Pilato yafumila Yesu, namuriaba nolukhoba. 2Ne abasikari nibasinga ingara yamahwa, nibara khumurwe kukwe, nibam'bikha esitambaya esisembe; 3nibetsa ahembi khuye, nibaboola, “Siesibwa, Omwami wa Bayahudi!” Nibamwala tsimbi.

4Pilato narula esioba khandi nababool'la, “Lole, ndamuleera esioba aha muli kho mumanye sinduutsi esikha muye tawe.” 5Ma Yesu narula esioba nabikhilwe olusimbi lwamahwa nende esitambaya esisembe. Pilato nababool'la, “Lole, omundu tsana ngwoyu!” 6Olwa abesaalisi abakhongo nende abalindi be Hekalu bamulola, bahanzuukha nibaboola, “Abambwe! Abambwe!”

Pilato nababool'la, “Mum'bukule abene, m'mubambe; sichila ise sindutsi esikha muye tawe.”

7Abayahudi nibamukalusia, “Ifwe khuli nomuse, ne khumuse kwefwe yiku ahel'le afwe, sichila yekholanga Omwana wa Nyasaye.”

8Nyinga Pilato yahul'la yako, yamala naria okhusila. 9Nakalukha munyumba yokhuyala omuse nareeba Yesu, “Warula hena?” Nebutswa naye Yesu siyamukalusia. 10Pilato namubool'la, “Siol'loma n'nase tawe? Witsul'le mbu ise ndi nobunyali bwokhukhulakhuula khandi obwokhukhubamba.”

11Yesu namukalusia, “Siwakhabakhwo nobunyali bwosi khwise noraheywe na Nyasaye tawe. Khulwe yako, owayireye mumakhono kaako ali nesikha okhuyomba.” 12Olwa Pilato yahul'la yako yaruna okhumulakhuula. Nebutswa Abayahudi nibahanzuukha nibaboola, “Noba nolakhula omundu uno, khe sioli omulina womuruchi wa Roma tawe.” Omundu owekholanga omuruchi abetsanga omusuku womuruchi wa Roma. 13Olwa Pilato yahulila amang'ana yako, yahinia Yesu esioba, niyekhala khundebe yobukhalachi habundu ahalangwanga “Hamusinji kwa machina,” (Mu Luheburania eliira liaho lili mbu “Gabatsa.”) 14Olwene yilwo yali esaa yakhasasaba khwitukhu liokhwerechekhela Epasaka. Pilato nabool'la Abayahudi, “Omuruchi wenywe ngwoyo!”

15Nabo nibahanzukha, nibaboola, “Yerwe! Yerwe! Abambwe khumusalapa!” Pilato nabareeba mbu “Mwenyanga okhubamba omuruchi wenywe?” Abesaalisi abakhongo nibakalusia mbu, “Sikhuli nende omuruchi narali Omuruchi wa Baroma yenyene.” 16Ma Pilato namuhaana mumakhono kabwe mbu abambwe khumusalapa.

Yesu Ubambilwe

(Mat. 27:32-44; Mk. 15:21-32; Lk. 23:26-43)

17Kho nibamubukula Yesu naye narula, omwene nachinjile omusalapa kwe okhwola habundu ahalangwa mbu “Habundu he Sihanga,” (Mu Luheburania halangwanga “Gologotsa.”) 18Habwene yaho nibamubambilaho khumusalapa, khandi nibabamba abeebi babili halala n'naye, mulala elubeka ne oundi elubeka undi; Yesu nali hakari wabwe. 19Khandi Pilato nahandika olwanzilo nasunga ikulu khumusalapa, ne akahandikwa kali “Yesu Munasariti Omwami wa Bayahudi.” 20Abayahudi abenji basoma khwo olwanzilo tsana sichila aha Yesu yabambilwa hali ahembi nelitookho. Ne amang'ana kalwo kahandikwa mu Luheburania, mu Lulatini nende mu Luyunani. 21Abesaalisi abakhongo nibabool'la Pilato, “Orahandika, ‘Omwami wa Bayahudi’ tawe; nebutswa ohandiche mbu ‘Omundu uyu yaboola, Ise ndi Mwami wa Bayahudi.’ ”

22Pilato nabakalusia, “Aka mandichile seyele okhukahandika.”

23Inyuma wokhubamba Yesu khumusalapa, abasikari babukula tsingubo tsitsie nibatsikabana mubituma bine, siomusikari esituma silala. Khandi babukula ekanzo yiye, ne ekanzo yiyo siyaali nende obwongan'no tawe, yali eyalukhwa bulukhwa okhurula ikulu okhwola hasi. 24Abasikari nibabool'lana mbu “Khurachirandula tawe, nebutswa khuchikhupile imbulu, khulole nebe eya wina.” Yaka kekhola mbwo khe Amahandiko Amatsienukhu kahesibwe mbu,

“Bali okhukabana tsingubo tsianje,

ne ekanzo yanje nibachikhupila imbulu.”#Etsisa. 22:18

25Ahembi nomusalapa kwa Yesu bali mbasinjiyeho nyina Yesu, nende omukhaana wabwe Mariamu mukha Kiliopa, nende Mariamu Magadalena. 26Yesu yalola mama uwe, nende omwechi owayayanza; nibasinjiiye ahembi; kho nabool'la mama uwe; “Mama, lola, uyo niye omwanawo.”

27Ma nabool'la omwechi tsana, “Lola, uyo niye mama uwo.” Ne okhurula esaa yene yiyo omwechi yamuhila amenye ingo uwe yene.

Okhufwa khwa Yesu

(Mat. 27:45-56; Mk. 15:33-41; Lk. 23:44-49)

28Yesu yamanya mbu kosi kamal'le okhuhesibwa luno, kho mbu Amahandiko kahesibwe, yaboola “Ndi nobuluho.”#Etsisa. 69:21; 22:15

29Olutaabo lwali niluliho, kho nibara khulubinu ingofuma niyitsuuye indulwe nibachira khulubinu ma nibamuha anywe. 30Yesu yanywa esilulu ma naboola, “Luhweye!”

Niyenamia omurwe kukwe hasi ma nafwa.

Omusikari yafumira mumbafu mwa Yesu nelifumo

31Kho abakhongo ba Bayahudi bareba Pilato abahuchil'le okhufunaka ebilenje biabandu abali nibabambilwe, nokhuhinia emibili chiabwe khumusalapa. Bakhola mbwo sichila liali ndili litukhu liokhwerechekhela Esabato, ne sibuli obulahi emibili okhuhonga khumusalapa khwitukhu lie Sabato tawe. Esabato eyali neli ahembi okhwola yali inzienukhu. 32Kho abasikari nibatsia okhufunaka ebilenje biomundu owokhuranga nende ebio oundi owali okhubambwa halala n'naye. 33Nebutswa nyinga boola khu Yesu, balola mbu useyele okhufwa, kho sibafunaka ebilenje bibie tawe. 34Mulala khubasikari yabo yafumira mumbafu mwa Yesu nende lifumo ne nonoho amatsahi nende amaatsi nikarulamwo. ( 35Naye owalola yako nikekholanga, ukaribuye mbu nenywe khandi musubile. Aka yaribula nakatooto khandi omwene umanyile mbu aboolanga akatooto.) 36Amang'ana yaka kekhola mbu akahandikwa kahesikhe, mbu, “Likumba lilie sililifunakwakhwo kata elala tawe.”#Okhur. 12:46; Obub. 9:12; Etsisa. 34:20 37Khandi lihandiko lindi liaboola mbu, “Balimuhengakhwo uyo owa bafumira.”#Sak. 12:10; Okhub. 1:7

Okhuyabilwa khwa Yesu

(Mat. 27:57-61; Mk. 15:42-47; Lk. 23:50-56)

38Olwe inyuma wamang'ana yako, Yosefu owarula mwitaala lia Arimatsia, (Yali omwechi wa Yesu, nebutswa yamulondanga masilisi sichila yaria abakhongo ba Bayahudi,) yasaba Pilato omunwa okwokhubukula omubili kwa Yesu. Pilato namuhuchil'la. Kho natsia nabukula omubili kukwe nahila. 39Khandi Nikodemu owali okhutsiakhwo khu Yesu butukhu olwa mbeli natsia nende Yosefu, naleera manemane nende tsisubili nibitsokan'ne ebihela singa etsikilo amakhumi kataru singa kwali omwima kwa Bayahudi mumang'ana kokhuyabila.#Yoh. 3:1-2 40Nibabukula omubili kwa Yesu, nibakuboha neingubo yekatani halala namafura akahunya esuswa singa ifwo ya Bayahudi yokhuyabila abafu obweli. 41Ne habundu aha Yesu yabambilwa yaho haliho olwibulo; haluyia tsana sialiho esilindwa esiyia esiomundu yali nasili okhurebwakhwo mwo tawe. 42Khulwa mbu liali litukhu eliokhwerechekhela Esabato ne sichila esilindwa yisio siali ahembi, bayabilamwo Yesu.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

YOHANA 19: EBAIBO

Highlight

ಹಂಚಿಕೊಳ್ಳಿ

ಕಾಪಿ