YOHANA 18

Okhutilwa khwa Yesu

(Mat. 26:47-56; Mk. 14:43-50; Lk. 22:47-53)

1Olwa Yesu yali namal'le okhusaaya yikhu, yarula nende abechi baabe, niyambukha omuchela kwa Kidironi. Ne ebwene yiyo omukunda kwaliyo; Yesu niyenjila mukwene yikwo, nende abechi baabe. 2Yudasi (niye owamusiemana) yali niyamanya habundu tsana; sichila Yesu yatsitsangaho nende abechi baabe hali khase. 3Kho Yudasi yatsia m'mukunda tsana nomukanda kwabasikari nende abarumikhili abarula khubesaalisi abakhongo nende Abafarisayi, nibali nende etsitaya, nende ebiyayi ne bali nibachinjile ebilasan'nwe biabwe. 4Yesu yamanya amang'ana kosi aketsa okhwekhola khuye, kho yarula nareeba mbu, “Murunanga wina?”

5Nabo nibakalusia mbu “Yesu owe Nasareti.” Yesu nababool'la “Nise uno.” Yudasi owamusiemana tsana yali nasinjiye halala n'nabo. 6Nyinga yababool'la “Nise uno,” bali okwesundukhila emikongo nibakwa hasi bosi.

7Khandi Yesu nabareeba mbu “Murunanga wina?” Nabo nibakalusia mbu, “Yesu owe Nasareti.”

8Yesu nabakalusia mbu, “Nise owatsana. Kho nimuba nimurunanga ise, lekhe yaba batsie owabatsia.” 9Yaboola amang'ana yaka kho kahesikhe singa obwa yaboola: “Papa yaba abawamba abulakhwoho owali okhukora.”

10Simoni Petero yali nolukanga, nalutsomola, naremaka esirwi siomukhono omusaatsa siomurumikhili wo Mwesaalisi Omukhongo. Naye omurumikhili uyo yalangwa Maliko. 11Kho Yesu nabool'la Petero, “Kalusia olukanga lulwo mulwola! Ndakhabula okhunywa khus'sanda siokhusalila esia Papa yambeye noho?”#Mat. 26:39; Mk. 14:36; Lk. 22:42

Yesu yahilwa imbeli wa Anasi

12Khe omukanda kwabasikari yikwo halala nende omwemeli wabwe nende abalindi ba Bayahudi bafumila Yesu nibamuboha. 13Nibamuhila owa Anasi mbelio. Okhuba yali nali samwana mukha Kayafa, owali Omwesaalisi Omukhongo omuhika yikwo. 14Kayafa niye owebaalila Abayahudi, mbu kahel'le Omundu mulala afwile abandu bosi.#Yoh. 11:49-50

Petero yambakhana Yesu

(Mat. 26:69-70; Mk. 14:66-68; Lk. 22:55-57)

15Simoni Petero nende omwechi undi balonda Yesu. Ne omwechi uyo yali niyamanyikha khu Mwesaalisi Omukhongo, kho natsia nende Yesu munyumba yesiina eyo Mwesaalisi Omukhongo; 16Nebutswa Petero yali nasinjiye hamuliango esioba. Ma omwechi undi uyo, owali niyamanyikha khu Mwesaalisi Omukhongo, yarula nabool'lana nende omulindi womuliango, nalera Petero mukari. 17Khe omukhaana owalindanga hamuliango nabool'la Petero “Ibe sioli mulala khubechi bomundu uyu noho?” Petero namukalusia, “Ise sindi omundu uwe tawe.” 18Obusindu bwali mbuliho; kho abarumikhili nende abalindi bali mbasinjiyeho, nibabwa'ne omulilo nikwanga'alaye amanda; ma bali niboranga omulilo. Kho Petero yali nasinjiye ho halala n'nabo niyoranga omul'lo.

Omwesaalisi Omukhongo nareeba Yesu akamang'anake

(Mat. 26:59-66; Mk. 14:55-64; Lk. 22:66-71)

19Omwesaalisi Omukhongo namwitsotsa Yesu akabechi baabe nende okhwibaala khukhwe. 20Yesu namukalusia, “Ise ndabooyenge amang'ana kanje habulafu khubandu bosi. Obwibaali bwanje bwabeyenge mutsisanakoki nende mu Hekalu aha Abayahudi bosi bebunjikhanga halala. Sindaboola khwo ling'ana liosi masilisi tawe. 21Kho busina ibe urebanga? Orebe abandu abali okhuhulila amang'ana kandababool'la. Abene yabo bamanyile akandaboola, obareebe.”

22Nyinga Yesu yali niyakhaboola mbwo, mulala khubalindi abali nibasinjiiye elubeka, namukhupa oluhi, naboola, “Wakhakalusia Omwesaalisi Omukhongo mbwo?” 23Yesu namukalusia, “Nimba nimbooye obubi, ribula obubi bwatsana, nebutswa nimba nindi habwene mukambooye, ukhupachile busina?”

24Kho Anasi namuruma nabohelwe khu Kayafa Omwesaalisi Omukhongo.

Petero amwambakhana Yesu khandi

(Mat. 26:71-75; Mk. 14:69-72; Lk. 22:58-62)

25Simoni Petero yali nasisinjiyeho niyoranga omul'lo. Abandi nibamubool'la, “Nawe sioli mulala khubechi bomundu uyu?” Nebutswa Petero yambakhana naboola, “Sindi omwechi uwe tawe.” 26Mulala khubarumikhili bo Mwesaalisi Omukhongo, owoluyia lwanga omundu wa Petero yali okhuremaka esirwi, naboola, “Sindali okhukhulola ibe halala n'naye m'mukunda?” 27Petero niyambakhana khandi. Ne habwene yaho etaywa nelakula.

Yesu yahilwa imbeli wa Pilato

(Mat. 27:1-2,11-14; Mk. 15:1-5; Lk. 23:1-5)

28Mukamba tsuli bahinia Yesu okhurula munyumba ya Kayafa nibatsia n'naye munyumba yomuse. Abakhongo ba Bayahudi sibainjila munyumba yomuse tsana tawe, okhuba sibayenya okhweyononia nomusilo tawe, nebutswa mbu babe abanyala okhulia lisabo lie Pasaka. 29Pilato narula esioba khubo, okhubareeba “Muyaalanga omundu uyu khwing'ana sina?” 30Nibamukalusia, nibamubool'la, “Omundu uyu alaba narali omukholi wobubi khane sikhumuler're imbeli uwo tawe.”

31Pilato nababool'la, “Kho mubukule, mumukhalachile esiina abene singa omuse kwenywe kuli.” Abayahudi nibamukalusia, “Ifwe sikhuhuchil'lwanga okhwira omundu kata mulala tawe.” 32Yaka kekhola kho amang'ana ka Yesu yaboola, akokhumanyia singa obwalifwa kahesikhe.#Yoh. 3:14; 12:32

33Pilato niyenjila munyumba yomuse khandi, nalanga Yesu, namureeba, “Ibe oli Omwami wa Bayahudi?” 34Yesu namukalusia, “Obooye yilio khululwo, nohomba obooleywe nabandu bandi amag'ana kanje?”

35Pilato namukalusia mbu, “Nase khali Omuyahudi nohomba? Abolwibulo lwenywe nende nabakhulundu babesaalisi abakhongo nibo abakhuleer're imbeli wanje; wali okhukhola sina?”

36Yesu namukalusia, “Obwami bwanje sibuli obwesibala yisi, bulaba mbuli obwesibala yisi, khane abarumikhili banje bakhalwana, mbule okhurebwa mumakhono ka Bayahudi. Tooto obwami bwanje sibuli obwe hano tawe.” 37Ma Pilato namureeba, “Kho oli omuruchi khane?” Yesu namukalusia, “Ibe oboolanga ndi Omuruchi. Yako niko akachila ninzibulwa, ma ninzitsa musibala, ndoole okhukobokhela akatooto. Siomundu oli owatooto yambulilanga ise.”

38Pilato namureeba, “Akatooto tsana nisina?”

Yesu yakhalachilwa okhufwa

(Mat. 27:15-31; Mk. 15:6-20; Lk. 23:13-25)

Naye nyinga yaboola yaka, yarula natsia esioba khubandu khandi nababool'la, “Sinyooye obubi bwosi obwokhumukhalachila tawe. 39Nebutswa muli nende esiimo mbu Ise muboholol'le omundu mulala litukhu lie Pasaka. Mwenya muboholol'le Omwami wa Bayahudi noho?” 40Bahanzukha, “Orabohol'la uyu tawe, oboholole Barabba!” (Naye Barabba yali omunuuli.)

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

YOHANA 18: EBAIBO

Highlight

ಹಂಚಿಕೊಳ್ಳಿ

ಕಾಪಿ