YOHANA 17

Yesu abasaayilanga abechi baabe

1Olwa Yesu yali namal'le okhuboola amang'ana yaka yatikul'la tsimoni tsitsie khwikulu, naboola, “Papa, esaa yol'le! Ofumie Omwanawo, mbu Omwana naye akhufumie ibe. 2Okhuba wamuha obunyali khubandu bosi, mbu abahelesie obulamu oburahwaho yabo bosi aba wali okhumuha. 3Nabwo obulamu oburahwaho nibwo yibu; bakhumanye ibe wenyene Nyasaye watooto, khandi bamumanye Yesu Kristo owa waruma. 4Ise ndakhufumia hano musibala, mal'le okhukhola omulimo okwa wamba okhukhola. 5Nawe luno, Papa, ufumie khububwo nobukhongo obwa ndali n'nabwo halala n'nawe esibala sisili okhulombwa.

6“Ndakhuribula ibe khubandu aba wali okhumba khubomusibala. Balinji abandu baabo, nawe wamba mbu baabe abanje. Bafumila ling'ana liilio. 7Luno bamanyile mbu amang'ana kosi aka wali okhumba karula khuibe. 8Ndababool'la amang'ana akawamba; nabo nibakafumila, nibamanya siahene mbu ndarula khuibe, ma nibasubila mbu niwe owaruma.

9“Nase mbasaayilanga. Sisaayilanga abesibala, nebutswa saayilanga abawamba yaba; sichila nabandu baabo. 10Bosi abali abanje nabaabo ne abaabo bosi nabanje; ne oluyali lwanje lumanyibwanga mubo. 11Nase sindi musibala khandi tawe, nebutswa yaba bo basili musibala, ne ise nzitsanga owooli. Papa Omutsienukhu, obalinde mubunyali obweliira lilio, elia wali okhumba mbu baabe mulala, singa obwa ibe n'nase khuli mulala. 12Nyinga ndabeyenge halala n'nabo, ndabalindilenge mubunyali bweliira lilio, elia wali khumba. Nase ndabalindilenge ne abulaho mulala khubo owakora, narali omwana owakhalachilwa okhukora, kho Amahandiko kahesikhe.#Etsisa. 41:9; Yoh. 13:18 13Nebutswa ngalukhanga khuibe, ne yaka mboolanga musibala mbu betsule nobusangali bwanje mumioyo chiabwe. 14Ndabahelesia amang'ana kaako; ne abomusibala bababihil'lwa, sichila bo sibali abomusibala tawe, singa obwa nase rali owomusibala tawe. 15Sisaayanga obabukule okhurula musibala tawe, nebutswa mbu obasoole okhurula khumubi. 16Sibali abesibala, singa obwa nase rali owesibala. 17Obatsienule mukatooto; amang'ana kako niko akatooto. 18Singa obwa waaruma ise musibala, nase nimbwo mbarumanga musibala. 19Ne khulwabwe ndetsienula omwene khuibe, nawe obatsienule mukatooto.

20“Sisaayilanga yaba bonyene tawe, nebutswa yabo khandi abaliisubili ise okhubir'ra mumang'ana kabwe. 21Saayanga mbu bosi babe mulala, singa obwe ibe, Papa, obetsanga mwise, nase nimbetsanga mwibe, kho nabo babe mwifwe; kho esibala sisubile mbu khane niwe owaruma. 22Ndabahelesia oluyali olwa wambelesia kho babe mulala, singa obwa ise n'nawe khuli mulala: 23ise mbe mubo, nawe obe mu ise, kho bahambanibwe kupu babe mulala; mbu abomusibala bamanye mbu nibe owaruma, khandi wabayanza singa obwa wanyanza ise.

24“Papa, nyenyanga yabo abawamba babe halala n'nase ahamba nindi, kho baabe abanyala okhulola obukhongo bwanje, obwa ibe wamba, sichila wali okhunyanza esibala nisisili okhulombwa. 25Papa wobulunji, esibala sisiakhumanya ibe tawe, nebutswa ise ndakhumanya; khandi yaba bamanya mbu wali okhuruma. 26Ndakhubisula khubo, khandi ndatsilil'la okhukhola mbwo, kho obuyanzi obwa wanyanza bubetsenge mubo nase khandi mbetsenge mubo.”

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

YOHANA 17: EBAIBO

Highlight

ಹಂಚಿಕೊಳ್ಳಿ

ಕಾಪಿ