YOHANA 20

Okhusimukukha khwa Yesu

(Mat. 28:1-8; Mk. 16:1-8; Lk. 24:1-12)

1Khwitukhu liomwihonga Mariamu Magadalena yahuuna hasilindwa mbusili butukhu, nalola lichina (eliali ndikaliywe esilindwa) nilihinibwe khusilindwa. 2Kho natsia tsimbilo, niyoola khu Simoni Petero, nende khumwechi undi owa Yesu yali niyayanza, nababool'la mbu “Bahinisie Omwami, musilindwa, ne sikhumanyile aha bamureye tawe.”

3Kho Petero narula, halala nende omwechi undi uyo, nibatsia enasilindwa. 4Nibelukha bombi, ne omwechi undi uyo nayomba Petero, naranjil'la okhwola hasilindwa. 5Niyenama nahenjel'la musilindwa, nalola tsingubo tsiekatani nitsieyalisiisiemwo, nebutswa siyainjilamwo tawe. 6Ma Simoni Petero naye niyoolaho namulondanga, ye niyenjila musilindwa. Nalola tsingubo tsiekatani nitsieyalisiisiemwo, 7nende esitambaya esiali khumurwe kwa Yesu. Esitambaya tsana sisiali nisikon'ne netsingubo tsiekatani tawe, nebutswa siali nisifumbilwe nisibiikhilwe lukano. 8Ma omwechi undi uyo owali naranjiliye okhwola hasilindwa naye niyenjilamwo; nalola ma nasubila.

( 9Bali nibasili okhumanyilisia akahandikwa, akaboolanga mbu kamuhel'le asimukukhe okhurula mubafu.) 10Ma abechi bamala nibahunzukha owabwe khandi.

Yesu yalolekha khu Mariamu Magadalena

(Mat. 28:9-10; Mk. 16:9-11)

11Mariamu yali nasinjiye hasilindwa nalakayanga. Ne olwa yali mwilakaya, niyenama nahenga musilindwa; 12nalola abamalaika babili abebikhile tsingubo tsindafu nibekhaye homubili kwa Yesu kwali nikwalisibwenge, mulala hamurwe ne undi enabilenje. 13Abamalaika nibamureeba, “Omukhasi, olakayanga busina?” Nabakalusia, “Bahil'le Omwami wanje, ne simayile habamureye tawe!” 14Olwa yaboola yaka, nasukhana emukongo nalola Yesu usinjiyeho; ne siyamanya ni Yesu tawe. 15Yesu namureeba, “Omukhasi, olakayanga busina? Orunanga wina?”

Naye, nakalanga en'no nomulindi womukunda, namubool'la, “Noba noli niwe omubukuye, mbool'la ahomureye, nase ndakhamubukula.” 16Yesu namubool'la, “Mariamu!” Naye niyesebukha, namubool'la mu Luheburania, “Raboni!” (Elibetsanga, “Omwibaali.”) 17Yesu namubool'la, “Orandumbakhwo tawe okhuba sili okhwanichila owa Papa; nebutswa tsia khubamwabo banje, obabool'le, Ise nzanichilanga khu Papa wanje, ouli Papa wabwe, Nyasaye wanje khandi Nyasaye wabwe.” 18Mariamu Magadalena natsia nabool'la abechi mbu uluutsi Omwami khandi singa obwa yali namubooleye amang'ana yako.

Yesu yalolekha khubechi baabe

(Mat. 28:16-20; Mk. 16:14-18; Lk. 24:36-49)

19Kwali omukolooba kwelitukhu liomwihonga yilio, abechi bali nibebunjikhile munyumba halala, ne emiliango chiali nichikaywe sichila bali nibariye abemeli ba Bayahudi. Ma Yesu niyetsa, nasinjila hakari wabwe, nababool'la, “Emilembe chibe khwinywe!” 20Olwa yamala okhuboola yako, nabamanyia amakhono kaake nende mumbafu mwe. Abechi yabo nibayanza okhusila okhulola Omwami. 21Yesu nababool'la khandi, “Emilembe chibe n'nenywe; singa obwa Papa yaaruma, nimbwo nase murumanga inywe mbwo.” 22Nyinga yaboola yako mbwo, yabahel'la emiiya, naboola, “Mubukule Omwoyo Omutsienukhu. 23Nimulekhela abandu tsimbi tsiabwe, balalekhelwa; nimurabbalekhela tawe sibalalekhelwa tawe.”#Mat. 16:19; 18:18

Yesu yeemanyia khu Tomasi

24Tomasi, mulala khubechi likhumi nababili, owalangwa Mukhwana, siyali halala nabechi bandi olwa Yesu yetsa yilwo tawe. 25Kho abechi bandi bamubool'la, “Ifwe khuluutsi Omwami!” Ne naye nababool'la, “Ise sindakhasubila khwo nisili okhulola tsimbala tsiemisimari mumakhono kaake, nindiilamwo nesitere sianje mutsimbala tsana, ma nimamba mumbafu mumwe nomukhono kwanje tawe.”

26Kho inyuma wamatukhu munane abechi yabo bali halala khandi munyumba, Tomasi nali n'nabo. Emiliango njiba chikaye, nebutswa Yesu niyetsa nasinjila hakari wabwe, naboola; “Emilembe chibe khwinywe.” 27Kho nabool'la Tomasi, “Ra esitere sisio hano olole emikhono chianje, khandi onyiile omukhono kukwo, ohambe mumbafu mwanje. Olekhe honzoni yiyo, ma osubile.” 28Tomasi namukalusia, “Omwami wanje khandi Nyasaye wanje.” 29Yesu namubool'la, “Osubilanga sichila unduutsi? Nabeikhabi abasubilanga mbasili okhundola.”

Lichoomo liesitapu

30Kaliho akamangalimwa kandi amenji aka Yesu yakhola mumoni mwabechi baabe akarahandikwa musitapu yisi. 31Nebutswa yaka kahandikwa mbu musubile Yesu niye Masihi, Omwana wa Nyasaye; kho mukhusubila khwenywe muye mube nobulamu.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

YOHANA 20: EBAIBO

Highlight

ಹಂಚಿಕೊಳ್ಳಿ

ಕಾಪಿ