Yn. 16
16
1“Namubooleele kano, nio mukhalekha lisuubila lienywe tawe. 2Bakhamuonele elala mu chisinakooki, mala siise silecha buli mundu omwiira enywe alebaasia ali nono alikho akholela Wele kimilimo. 3Balikhola bibiindu bino khwinywe sikila se bamanyile ese namwe Paapa wase tawe. 4Ne namubooleele kano nio siise ne sioolile khu nibo khukhola bibiindu bino, mulikhebulila muli nanyoa namuboolela.
Kimilimo kia Roho Omutakatifu
“Se namubooleele bibiindu bino e khurakikha tawe, sikila bele ndi nanywe. 5Ne luno ese ndikho nja khuyo owanduma, ne salikhoo mulala khwinywe oundeeba ali olikho ocha wae tawe. 6Sikila namubooleele enywe luno kimiooyo kienywe kili ne bubeeleli bukali. 7Ne ndikho muboolela bung'ali ndi, buli bulayi khwinywe ese nje, sikila ne khacha tawe Omuyeeti salecha khwinywe tawe. Ne kakhali nenja, ndamuruma eche khwinywe. 8Ne nga akheeche akheekesie babaandu be sibala ali, bali bakhiikha khuloondekhana ne bubwoni, khuloondekhana ne buluungi, ne khuloondekhana nende bukhalaki bwa Wele. 9Bali bakhiikha khuloondekhana ne bubwoni sikila se basuubila ese tawe, 10khuloondekhana ne buluungi, sikila ndikho nja niiko Paapa ali mala enywe se mulambonakho lundi tawe, 11lundi bali bakhiikha khulwe bukhalaki, sikila omwami owe sibala sino akhalakiilwe khale.
12“Ndi ne kamakali ke khumuboolela enywe, ne kakhali siise sino se mukanyala tawe. 13Kakhaba kario, nga Roho owa ng'ali ne echa, owekesianga bung'ali bwa Wele; akhamwekesie bung'ali bwoosi. Sakhaboole khulwe bunyali bwewe omwene tawe, ne kakhali akhalomalome niko aulila, mala akhalomalome ke bibiindu bibiicha. 14Akhambelesie ese luyali sikila akhabukule niko ese ndoma mala akhamuboolele enywe. 15Bioosi nibio Paapa wase ali nabio bili bibiase, ako niko kakila ne mboola ndi Roho akhabukule niko ese muelesie niye mala amuboleele enywe.
Bubeeleli ne busangaafu
16“Mu siise sikeekhe se mulambonakho ese lundi tawe, ne enyuma we siise sikeekhe lundi mulambona.”
17Balala khu beeka bewe bareebana babeene ne babeene bali, “Lino liboola siina? Akhuboolela efwe ali, mu siise sitiiti se khukhamubone tawe, mala enyuma we siise sitiiti khulamubona, ne lundi aloma ali, ‘Sikila ndikho nja niio Paapa ali.’ ” 18Khwako baba ne bareebana bali, “Ne aloma ali, ‘Mu siise sitiiti,’ aba aafunaanisie siina? Se khwamanyile nisio alikho alomalomakho tawe!”
19Yesu amanya niko benya khumureeba, nio ababoolela ali “Ndomile ndi mu siise sikeekhe se mulambona tawe, ne enyuma we siise sikeekhe mulambona. Kano se kali niko mulareebananga tawe ku? 20Ndikho muboolela bung'ali ndi, enywe mulalila ne khukhwiunamila, ne kakhali be sibala balasangaala, enywe mulaba ne bubeeleli, ne bubeeleli bwenywe bulakaluukhana bube busangaafu. 21Omukhasi ne alikho alumwa ali ne bubeeleli sikila esaa yewe eye buchuuni yolile, ne nga omwana nasaalwa, ebilila buchuuni bwewe, ali omusangaafu sikila omwana asaalilwe mu sibala. 22Kali busa kario khwinywe, luno muli ne bubeeleli, ne kakhali khamubone lundi, mala kimiooyo kienywe kikhechule busangaafu nibwo omundu yesi yesi akhamunuula tawe: 23Ndikho muboolela bung'ali ndi nga endaalo eyo ne lioola, se muliisabakho siosi siosi tawe. Paapa akhamuelesie enywe buli nisio enywe musaba mu lisina liase. 24Khukhwola luno se mwamusabilekho sisiindu siosi siosi mu lisina liase tawe. Saba mala mulanyoola, nio busangaafu bwenywe bwoole khukhwichulila elala.
Bukhili khu ke sibala
25“Narumikhiire chisimo khumuboolela enywe bibiindu bino. Ne kakhali esaa elikho yiicha niyo khalomalome ka Paapa khwinywe abuwaanga busa ne kharumikhira chisimo tawe! 26Nga endaalo eyo ne khoole, mukhasabe mu lisina liase; ne mboola ndi, ese se khamusaabile enywe khu niye tawe, 27sikila Paapa omwene amusiima enywe. Amusiima sikila mwasiima ese, mala mwasuubila muli ese nama wa Wele. 28Ese nama wa Paapa ne necha mu sibala, mala luno ndikho ndura khu sibala nja wa Paapa.”
29Nio babeeka bewe bamuboolela bali, “Luno olikho olomaloma busa abuwaanga se olikho orumikhira chisimo lundi tawe. 30Khwamanyile luno khuli ewe wamanya buli siindu: se kali bali wenya omundu okundi akhureebe lireeba tawe. Lino likhukhola efwe khusuubile khuli ewe wama wa Wele.” 31Yesu abakobosia ali, “Enywe luno mwasuubiile? 32Esaa elikho yiicha, mala eli ano khale, niyo enywe mweesi mulasalanisibwa, buli mundu alacha mungo mwewe, ne ese ndarama seng'ene. Ne kakhali ng'ali se ndi seng'ene tawe, sikila Paapa ali nase. 33Namubooleele kano koosi nio mube ne kumuleembe khulwe khuambaasibwa khwise. Be sibala balamunyaasia enywe. Ne ba, banyindaafu! Ese naula sibala.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Yn. 16: LUBUKUSU
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
©Bible Society of Kenya, 2019
