Yn. 15
15
Yesu kumusabibu kwa ng'ali
1“Ese ndi kumusabibu kwa ng'ali ne Paapa wase ali omulimi. 2Niye afunanga buli lusakia mwise lukhaananga kamatuunda tawe, mala asonjolanga buli lusakia lulwaama kamatuunda, nio lube lulayi ne khukhwama kamatuunda kamakali. 3Enywe mwakholwa khale bamiliiu khulwe kamekisio niko namuelesia. 4Menya mu buambaani ne nase, ne nase ndamenya mu buambaani ne nanywe. Lusakia se lunyala lwaama kamatuunda lwong'ene ne lukhali khu musabibu tawe. Mu ngila neng'ene enywe se munyala mwaama kamatuunda ne mukhamenyile mwise tawe.
5“Ese ndi kumusabibu ne enywe muli chisakia chase. Yesi yesi omenya mwise mala ese menye mu niye alaama kamatuunda kamakali, sikila se munyala mwakhola siosi siosi ne mukhali ne nase tawe. 6Yesi yesi okhamenya mwise tawe, amwaatwa aleeyi nga lusakia mala oome. Ne chisakia nga echo chirio, bachibusianga alala mala bachimwaata mu mulilo bachosia. 7Mulaebwa sisiindu siosi siosi nisio mulasaba kaaba bali mulamenya mwise, mala kamakhuwa kase kosi kamenye mwinywe.
8“Luyali lwa Paapa wase lwekesibwa ne nanywe nemwama kamatuunda kamakali ne mu ngila yino mwekela babeeka base. 9Ese namusiima enywe busa nga Paapa ne asiima ese. Menya mu busiime bwase. 10Mwaba ne muria kamalaka kase, mulamenya mu busiime bwase, nga ese sesi naria kamalaka ka Paapa wase mala namenya mu busiime bwewe. 11Namubooleele kano nio ekhoyo yase ebe mwinywe lundi mwesi mube ne khoyo yenywe mubwichufu. 12#Yn. 13.34; 15.17; 1 Yn. 3.23; 2 Yn. 5 Lilaka liase nilieli: Siimana mwabene ne mwabene busa, nga ese ne namusiima enywe. 13Mbao busiime bukali nibwo omundu anyala aba nabwo khu basaale bewe nga khuaana bulamu bwewe sikila nibo tawe. 14Ne enywe muli basaale base, mwaba ne mukhola niko mulaka. 15Ne se ndamulaanga enywe lundi ndi bakholi tawe, sikila omukholi samanyile niko omwami wewe akhola tawe. Ne kakhali, ndamulaanga enywe ndi basaale, sikila namubooleele enywe buli siindu nisio naulila khukhwama khu Paapa wase. 16Enywe se mwandobora ese tawe, ese niye owamurobora enywe, mala namuruma ndi muche mwaame kamatuunda kamakali, lukano lwe kamatuunda kamenya lukali. Khwako Paapa akhamuelesie siosi siosi nisio mukhasabe mu lisina liase. 17Kano nono, niko mulakiilisia enywe, siimana mwabeene ne mwabeene.
Libiila lie sibala
18“Sibala ne simubiila, khebulila muli sianyoa siambiila ese. 19Abanga enywe be sibala andi sibala siamusiima nga babaandu basio. Ne kakhali, namurobora khukhwama mu sibala ne se muli be sibala tawe ako niko kakila sibala ne simubiila enywe. 20#Mat. 10.24; Lk. 6.40; Yn. 13.16 Khebulila niko namuboolela: ‘Se aliio nasioobi omukali khukhila Omwami wewe tawe.’ Baba ne bakhupia ese sibi akhaba enywe mwesi balamupia siibi, ne baba ne baria kamekisio kase balaria akhaba kakenywe kosi. 21Ne bakhamukholele kano koosi sikila muli babase; ne se bamanyile oyo owaanduma tawe. 22Abanga se necha mala mbaboolela tawe, andi se bali ne bubwoni tawe. Nono luno luri se banyala khuba ne sifuno nisio baloma bali siakila khwakhola bubwoni tawe. 23Yesi yesi oumbiila ese abiila akhaba Paapa wase. 24Se bakhabeele ne bubwoni tawe, abanga ese se nakhola mu nibo bibiindu nibio omundu okundi yesi yesi akhakholakho tawe. Nga ne kali, babona nibio nakhola mala bambiila ese ne Paapa wase yesi. 25#Chiny. 35.19; 69.4 Kakhaba kario kano kolaana khukholekha nio kakaandikwa mu Lilaka liabwe koole khuba ng'ali: ‘Bambiila ese ne kakhali se babakho ne sifuno siosi siosi tawe.’ 26Omuyeeti alecha, Roho owama khu Paapa lundi owekesianga bung'ali bwa Wele. Kharume niye khwinywe khukhwama khu Paapa mala akhalome kakaase. 27Ne akhaba enywe mwesi muli baloli base, sikila mwabele nase khukhwama mu khurakikha.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Yn. 15: LUBUKUSU
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
©Bible Society of Kenya, 2019
