Yn. 17
17
Yesu asabila Babeeka bewe
1Enyuma Yesu ne amalile khulomaloma kano, akalama angaaki mala aloma ali, “Paapa, esaa eyo yolile. Elesia Omwana wowo luyali, nio Omwana naye akhuelesie ewe luyali. 2Sikila wamuelesia bunyali khu baandu boosi, nio ole khuana bulamu bwa mindali khwaabo boosi nibo ewe wamuelesia. 3Ne bulamu bwa mindali buli khu khumanya ewe Wele owa ng'ali weng'ene, ne khumanya Yesu Kristo, niye waruma. 4Ese nokesie luyali lwowo khu sibala, ese namalile kimilimo nikio ewe wambelesia ese khole. 5Paapa! Luno mbelesie luyali mu moni chowo, luyali ne lulwene nilwo khwaba nalwo, ese ne nawe sibala ne sikhabaang'anwa tawe.
6“Ese nakhukhola ewe wamanyikhana khwaabo nibo ewe wambelesia khukhwama mu sibala, baba ba bowo mala wambelesia ese. Baria elomo yowo, 7ne luno bamanyile bali, buli siindu nisio ewe wambelesia siaama khwiwe. 8Ese nabaelesia nibo burume nibwo ewe wambelesia ese, mala babwakaanila, bamanyile bali lili ng'ali, ese nama khwiwe, mala basuubila bali ewe wanduma ese.
9“Ese mbasabila nibo, se sabila sibala tawe, ne kakhali sabila abo nibo ewe wambelesia ese sikila bali babowo. 10Boosi nibo ese ndi nabo bali babowo, ne boosi nibo ewe oli nabo bali babase, mala luyali lwase lwakhosisie khubirira mu nibo. 11Ne luno ndikho nicha niio oli, se ndi lundi mu sibala tawe, ne nibo bali mu sibala. Paapa Omutakatifu! Baliinde bulayi mu bunyali bwe lisina liowo, lisina nilio ewe wambelesia ese, nio babe siindu silala busa nga ewe ne nase ne khuli siindu silala. 12#Chiny. 41.9; Yn. 13.18 Nga naba ne siili nabo, nabaliinda bulayi ne bunyali bwe lisina liowo, lisina nilio wambelesia ese. Nabaliinda ne se aliio mulala khu nibo owatiba tawe, nakhali omwana we butibi oyo nio liiandiko liole khuba ng'ali. 13Ne luno ese ndikho nicha niio oli mala mboola bibiindu bino mu sibala nio boole khuba ne liliekhoya liase mu miooyo kiabwe mu bwichufu. 14Nabaelesia burume bwowo, mala sibala siababiila, sikila se bali be sibala sino tawe, nga ese sesi nekhali owe sibala tawe. 15Se ndikho khusaba ewe obarusie mu sibala tawe, ne kakhali khusaba obalinde bulayi khukhwama khu Mumayaanu. 16Nga ese nekhali owe sibala tawe, bosi se bali be sibala tawe. 17Bakhole babe batakatifu khulwe bung'ali, elomo yowo niyo bung'ali. 18Nabaruma nibo mu sibala nga ewe wesi ne wanduma ese mu sibala. 19Ne sikila nibo, ese nerusia samwene khwiwe, nio akhaba nibo bosi boole khukhwirusia ng'ali khwiwe.
20“Se mbasabila nibo bong'ene tawe, ne kakhali akhaba abo bosi basuubila mwise sikila burume bwabwe. 21Saba ndi boosi babe siindu silala. Paapa! Nibo boole khuba mwifwe, nga ewe ne oli mwise ne ese mwiwe. Boole khuba siindu silala nio be sibala basuubile bali ewe wanduma ese. 22Nabaelesia luyali lulwene nilwo ewe wambelesia ese, nio boole khuba siindu silala nga ewe ne nase khuli. 23Ese mbe mu nibo ne ewe mwise, nio boole khubeela elala siindu silala, nio babaandu be sibala bamanye bali ewe wanduma ese lundi ewe wabasiima nibo nga ne wasiima ese. 24Ewe Paapa wambelesia ese babaandu bano mala nenya babe nase niio ndi, nio boole khubona luyali lwase, luyali nilwo ewe wambelesia ese, sikila wasiima ese ebweeni we sibala ne sikhabaang'anwa tawe. 25Paapa Omuluungi! Babaandu be sibala se bakhumanyile ewe tawe, ne kakhali ese khumanyile, mala bano bamanyile bali ewe wanduma ese. 26Nakhukhola ewe wamanyikha, mala ndachiililila khukhola ndio, nio busiime nibwo ewe oli nabwo khwise bwoole khuba mu nibo, nio akhaba sesi noole khuba mu nibo.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Yn. 17: LUBUKUSU
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
©Bible Society of Kenya, 2019
