Yn. 18
18
Yesu aambwa
(Mat. 26.47-56; Mk. 14.43-50; Lk. 22.47-53)
1Enyuma we lisaba lino, Yesu, arekukha ne babeeka bewe bacha engelekha we luluuchi lwa Kiduroni. Khakuunda khe kimirongooro khabao nikho baandu baolelangao, mala Yesu ne babeeka bewe bachaamo. 2Yuda, omuchaami, abeele amanya niio khakuunda akho khaba, sikila Yesu aakaananilangao ne babeeka bewe biise bikali. 3Nio Yuda ne kumukaanda kwe basikari be bubwami bwe Barumi, ne balala khu baliindi be Lukaangu ba barumwa ne basaayi bakhulu ne Bafarisayo, bacha mu khakuunda akho; baba babanuule bulwaani lundi basutile chitaa ne chinjaso. 4Yesu amanya buli siindu sisiaba ne sicha khumwikholekhakho, nio eseenda ebweeni mala abareeba ali, “Naanu niye enywe mulikho muyiima?”
5Bamukobosia bali, “Yesu owa Nasareti.”
Ababoolela ali, “Niise.” Yuda, omuchaami, aba emileo ne nabo. 6Nga Yesu ne ababoolela ali, “Niise,” besenda enyuma mala bakwa aasi. 7Yesu abareeba lundi ali, “Naanu niye enywe mulikho muyiima?” Baboola bali, “Yesu owa Nasareti.”
8Yesu ababoolela ali, “Muboolele khale ndi niise. Nono, mwaba ne mulikho mumbenja ese, lekha babaandi bano bache.” 9(Aboola kano nio niko aba aboola kolaane khuba ng'ali: “Paapa, se natibiakho akhaba mulala khu nibo ewe wamba tawe.”)
10Simoni Petero aaba ne mbalu, akichoola mala arema nasioobi owo Omusaayi Omukhulu Lukali liiru lie lubeka luseecha liakwa aasi. Lisina lia nasioobi oyo liaba bali Maliko. 11#Mat. 26.39; Mk. 14.36; Lk. 22.42 Yesu aboolela Petero ali, “kobosia embalu yowo mu sibaabi! Ewe wibaasia oli, ese se nyala nanywa sikoombe sie sinyaasio nisio Paapa wase ambelesie tawe?”
Yesu ebweeni wa Anasi
12Nio basikari be bubwami bwe Barumi ne omukhulu wabwe ne baliindi be Siyuda baamba Yesu, bamuboa, 13banyoa bamuyila khu Anasi, raraawe owa mukha Kayafa owaba Omusaayi Omukhulu Lukali kumwiiko okwo. 14#Yn. 11.49-50 Kayafa aba niye owakaambila Bayaudi be bunyali ali buli bulayi omundu mulala afwiile babaandu boosi.
Petero ekaana Yesu
(Mat. 26.69-70; Mk. 14.66-68; Lk. 22.55-57)
15Simoni Petero ne omweeka okundi baloonda khu Yesu. Omweeka okundi oyo aba amanyikhana khu Omusaayi Omukhulu Lukali owe Lukaangu, nio acha ne Yesu khu luuya lwe nju eyo Musaayi omukhulu, 16Petero arama enje we silibwa. Nio omweeka okundi chana owamanyikhana khu Omusaayi Omukhulu Lukali arura enje, alomaloma no mukhaana we a silibwa oliinda silibwa mala afukiilila Petero khukhwingila mukari. 17Omukhaana we mu silibwa areeba Petero ali, “Ewe wesi se oli mulala khu beeka bo Mundu oyo tawe ku?” Petero amukobosia ali, “Se ndi mulalakho tawe.”
18Bakholi ne baliindi baba babwanile kumulilo mala baba bemile bakubotookhelele, baba boora sikila embeo yabao. Nio Petero acha emao nabo ne ora.
Omusaayi Omukhulu Lukali Areeba Yesu
(Mat. 26.59-66; Mk. 14.55-64; Lk. 22.66-71)
19Omusaayi Omukhulu Lukali areeba Yesu kamareeba khu beeka bewe ne ke kamekisio kewe. 20Yesu amukobosia ali, “Ese buli lwosi ndomalomanga abuwaanga khu buli mundu; kamekisio kase koosi ne kisianga mu chisinakooki ne mu Lukaangu, niio babaandu boosi bebuusianga. Khaaboolakho sisiindu siosi siosi mu bwikisi tawe. 21Siina sikila nono ne mundeeba ese? Reeba babaandu ba bambulila. Khemubareebe niko nababoolela. Nibo bamanyile niko nalomaloma.” 22Nga Yesu aloma kano, mulala khu baliindi amupa luui mala aloma ali, “Olomaloma oriena khu Omusaayi Omukhulu Lukali!” 23Yesu amukobosia ali, “Naaba ne mboolile sisiindu siosi siosi sibi, boolela ano buli mundu, sibele siina. Ne naaba ne ndi ng'ali mu niko ndomile, siina sikila ne ukhupa?” 24Nio Anasi ayila Yesu nasiili omuboe, khu Kayafa Omusaayi Omukhulu Lukali we Lukaangu.
Petero ekaana Yesu lundi
(Mat. 26.71-75; Mk. 14.69-72; Lk. 22.58-62)
25Petero aba oora kumulilo. Nio babaandi bamuboolela bali, “Ewe wesi se oli mulala khu beeka bo mundu oyo tawe ku?”
Ne Petero ekaana lundi ali, “Se ndi mulalakho tawe.”
26Mulala khu nasioobi bo Omusaayi Omukhulu Lukali we Lukaangu, omulebe wo mundu niye Petero arema liiru, amureeba ali, “Ese se khubone ewe ne naye mu khakuunda akho tawe ku?”
27Petero aloma lundi ali, “Tawe.” Ne mala etaaywa ekholiokha.
Yesu areerwa ebweeni wa Pilato
(Mat. 27.1-2,11-14; Mk. 15.1-5; Lk. 23.1-5)
28Makhelebeende babukula Yesu bamurusia munju eya Kayafa bamuyila mwichipi mwo muruki. Bayaudi be bunyali se bengila mwichipi mwo muruki tawe, sikila benya khuba bakwalaafu mu miima kiabwe kie Siyuda nio balie siakhulia sie Pasaka. 29Nio Pilato arura enje abareeba ali, “Muli na masitako sina khu mundu yuno?”
30Bamukobosia bali, “Abanga sakholile kamabi tawe andi se khwamureerire khwiwe tawe.”
31Pilato ababoolela ali, “Nono enywe mwabeene khemumubukule mala mumuyaale khuloondekhana ne Lilaka lienywe.” Nio bamukobosia bali, “Efwe se khufukiililwa khukhwira omundu yesi yesi tawe.” 32#Yn. 3.14; 12.32 [Kano kekholekha nio kamakhuwa niko Yesu aloma koole khuba kang'ali nga ne ekesia lifwa siina nilio alifwa.] 33Pilato akobola mwichipi mala alaanga Yesu amureeba ali, “Ewe oli Omwami we Bayaudi?”
34Yesu akobosia ali, “Lireeba lino liama khwiwe wamwene namwe babaandi bakhuboolele kakaase?”
35Pilato amukobosia ali, “Wibaasia oli ese ndi Omuyaudi? Bali babaandu bowo babeene ne basaayi bakhulu bakhureerire khwise. Okholile siina?”
36Yesu amuboolela ali, “Bubwami bwase se buli bwe khu sibala sino tawe; Bubanga bwe khu sibala sino, andi babeeka base bapane ndekha khuaanwa khu Bayaudi be bunyali tawe. Bubwami bwase se buli bwe aasi ano tawe!”
37Nio Pilato amureeba lundi ali, “Nono, ewe oli Omwami?” Yesu amukobosia ali, “Ewe oloma oli ese ndi Omwami. Nasaalwa mala necha mu sibala, sikila sifuno silala siong'ene nisio khulomaloma khu ke bung'ali. Omundu yesi yesi oli owe bung'ali andekeeresianga.”
38Pilato amureeba ali, “Ne bung'ali nisio siina?”
Yesu akhalakilwa khufwa
(Mat. 27.15-31; Mk. 15.6-20; Lk. 23.13-25)
Nio Pilato arura lundi enje mu baandu mala aloma ali, “Se nyala nanyoola sifuno siosi siosi sie khumukhalakilakho tawe. 39Ne khuloondekhana ne kumwiima nikwo muli nakwo, buli lwosi mulekhulilanga omuboe mu Pasaka. Mwenya mulekhulile enywe Omwami we Bayaudi?”
40Bamukobosia ne luyoka bali, “Tawe, niye tawe! Khwenya Barabasi!” (Barabasi aba omunuuli).
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Yn. 18: LUBUKUSU
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
©Bible Society of Kenya, 2019
