Luglaa 32
32
Jekɔb n ɛɛ sirya ú chem Ɛsau ni wia
1Jekɔb ni u diahina maa n kaa kpa ŋmɛnɛɛ di ra kaali la, Kɔraawiizi mɛlikazi wa chem ba ni. 2Jekɔb n wa na baa u ŋɔ, “Kɔraawiizi ni u mɛlikazi chɔɔllɛ keŋ!” U faa dau de sɔŋ Mahanam.#32:2 Mahanam zɛɛrɛ Chɔɔribɔra anɛɛ.
3A guŋ saŋa hiŋ, Jekɔb faa lizi balaa baŋhina, bá feli la u kpɛɛma Ɛsau be, Ɛdɔm hɛri. 4Denii u ŋɔ ba be, “Ií la ga ŋɔ n dɔɔri Ɛsau be, dí u balii Jekɔb la n du u naara Laban be di birgi la ra jaamuu werge maa. 5U dɔɔ nauna, kauzi, peeza, buuna ani balaa kpila maanii filaŋkeŋ. Awiarɛ u tili ŋɔ ya wa kalii lugɔ u ra bau. Ka u ra suŋŋiibuu lugɔ í lɛɛu ani bɔsɔna.”
6A huŋhunna bir ba Jekɔb be di wa ŋɔ, “Yaa la i kpɛɛma Ɛsau benii. U ra bau di kpogli baala kalfaanaazu bá wa chem i ni.”
7Jekɔb n wa nuu guŋ, ɔnsii ni biinichɔg lawuu, u lau u diahina ni u peeza, nauna ani u nyugmazi la maa bɔnni bɔra anɛɛ. 8U faa fɛwɔɔrɛ lugɔ di Ɛsau ni u laallɔɔra la wa kpegli bɔkpaŋ, ka baŋhina waa wer chɔ di lɛɛ bahinaa.
9Denii Jekɔb kaa suŋŋi wiizi di ŋɔ, “Kɔraawiizi la n naabaal Abraham ni n mɛɛ Aizik n faa ra hum, hinuu ŋɔ n be, ‘Bir la i himmaa hɛri ni i nɛra be, n daŋ gil i nyɛɛli.’ 10Maa dɛg winanaa la hiŋ ɛɛwɛ tɛŋ ani wibii la hiŋ dɔɔwɛ tɛɛ mìŋ́ i balii. Saŋa la miŋ lii n hɛri di gi Jɔɔdan muu la, maa kummaa kpoglee di n daŋkpala bɛŋ lɛi. Ka filaŋkeŋ, n kuna jaa du bɔra anɛɛrɛ. 11N na suŋŋiibuu, lɛɛŋ di lii n kpɛɛma Ɛsau be. N na ɔmuu lugɔ u daŋ wa kpu n ni n haana ni biizi maa. 12Ka i ŋɔwɔɔrɛ, ‘N daŋ gil i nyɛɛli wibii maa, di gil ń naanna wazi di du kpil alugɔ muuzeŋ hɛɛhriichaa baŋ wàá wer kur la.’ ”#Lug 22:17
13Denii Jekɔb chɔɔ bɔr la un duwɛɛ la, hɔpizi u lizi u sela aŋhina ú kpa ga sunzi Ɛsau. 14U faa lizi buniinazi kalfaanɛɛ, bubala tokko, peniinazi kalfaanɛɛ ani pebala tokko, 15di kaa lizi nyɔgmaniinazi tokko ni kpɔrgɔ ni a biizi, naniinazi tokkoanɛɛ ni nabala ge fi, kauniinazi tokko ani a bala ge fi di jaa. 16U gil a sela maa du a sugezi, ú balaa hiŋ bɛl ra binni a suge bɛl maa ni. U ŋɔ ba be, “Ií tɔ see di ra vol, di gilɛɛ ra dugli dɔŋa.”
17Denii Jekɔb kaa ŋɔ u balii la n tɔ see la be, “Di i wa chem n kpɛɛma Ɛsau ni u pɛɛzii, lee i ra lanɛi? Anɛɛ baliirɛ hinnɛi? Anɛɛ selaa tɔ i see maa kennei? 18Ŋɔ u be lugɔ u balii Jekɔb kunaa u kpa di ra ba ú wa tɛɛ u dɔɔri Ɛsau. U haa du harbɔɔ di ra ba.” 19Gunnɛ Jekɔb faa ŋɔ tɛɛ a senɔɔna sugesugezi la maa di wa kaali, di karfi baa lugɔ di ba wa chem Ɛsau ni, ba maa ŋɔ wikpaŋ la uŋ ŋɔwɛɛ la tɛu. 20Dí ba bɛl maa ge ɔɔ liizi di ŋɔ lugɔ Jekɔb du harbɔɔ di ra ba. U ra fɛu lugɔ sela la unna sunzi Ɛsau la daŋ wer bir Ɛsau nfɛrɛ mɔɔ, ka u haa wa chem u ni, ú vii lɛɛ baa ani bɔsɔna. 21Gunnɛ u faa ɛɛ di gil ba kpa a kunsunzaa tɔ see, ka waabuu himmaa faa haa chɔɔ ba chɔɔribɔr hiŋ a hamuŋa ni.
Jekɔb ni mɛlika n yoowe wia
22A hamuŋa hiŋ, Jekɔb izi di lau u haana banɛɛ, u hahjigzi banɛɛ ani u biizi fidikpaŋ di gi Muu Jabɔk. 23Uŋ wa gillɛ ba gi a muu la, u gil ba jaa paa u kuna maa ge di gi. 24Awia, Jekɔb bɛŋ jaa ka de. Denii baal bɛl ba u be, u nuu yoo guŋŋ di ra ba hɔpizaa. 25A baal n wa binnɛɛ lugɔ wàá wer kpegli Jekɔb la, u lɔ u kɛra, u kpuzi. 26Denii a baal ŋɔ, “Gil n kaali, bɔr chaanɔɔrɛ.” Ka Jekɔb ŋɔ, “Màá gil i kaali, di haŋ kissee lɛi.”
27Denii a baal pɛɛzuu, “I sɔnnɛ ɛrɛɛ?”
U ŋɔ, “N sɔnnɛ Jekɔb.”
28A baal ŋɔ, “Filaŋkeŋ i sɔŋ waa kaa di Jekɔb. Ba daŋ jaa ra yirii Izrɛl,#32:28 Izrɛl zɛɛrɛ U ni Kɔraawiizii ra yoo. dikuubɛɛwiai, i ni Kɔraawiizi ani baala yoowoo, ka ba waa wette bá kpeglii.”
29Jekɔb ge bir pɛɛzuu, “Ka i ge sɔnnɛ ɛrɛɛ?”
A baal ŋɔ, “Ɛrɛɛ wiarɛ i ra nyiŋŋi i zum n sɔnɛi?” Denii u kissuu.
30Uŋ wa kissuu tuŋ, Jekɔb dau de sɔŋ Pɛniɛl,#32:30 Pɛniɛl zɛɛrɛ Kɔraawiizi siwee. dikuubɛɛwiai, u na Kɔraawiizii siwii ni, ka waa siuwɛ. 31Wiizi n wa futtɛ, u lii a Pɛniɛl di kaa ra kaali. U faa ra dugzuu dikuu a baal n lɔ u kɛra la wia. 32Haali ni zinaa, Izrɛl hina waa sɛɛwɛ ra hee sel maa kɛra, dikuu uŋ lɔ Jekɔb kɛra wia.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luglaa 32: vag
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.