Luglaa 33
33
Jekɔb n chem Ɛsau ni wia
1Jekɔb n wa ŋɔ u binni, di Ɛsau ni u baala kalfaanaazu labuu gaa ba. U jaa bargi u biizi tɛɛ Lia ni Rachɛl ni u hahjigzi banɛɛ la, 2di gil u hahjigzi banɛɛ la ni ba biizi tɔ see, Lia ge ni u biizi hiŋ, ka Rachɛl ni Joosɛf jaa tɔ har. 3Denii Jekɔb jaa tɔ see di ra chem u kpɛɛma ni. Unna chem u ni la, u tognuu naa buniidaanɛɛ. 4Ka Ɛsau chɔ di chem u ni, di faami u baŋaa, ka suuzuu. Ba wii du dɔŋa. 5Denii Ɛsau binni di na haana la ni ba biizi la, di pɛɛzi, “Lee hinaa kennei?”
Jekɔb ŋɔ, “Biizi naabuu Kɔraawiizi suŋ i balii ni, di tɛu.”
6Denii u hahjigzi la ni ba biizi feli wa togni jaamuu. 7Lia ge ni u biizi hiŋ wa togni jaamuu mɔɔ ka Joosɛf ni Rachɛl ge wa togni jaamuu.
8Ɛsau kaa pɛɛzi, “Ka suge la miŋ chem u ni lau? U ge zɛɛrɛ ɛrɛɛ?”
Jekɔb ŋɔ, “I sunzaarɛ n kpa ra ba ń wa tɛi, ka í lɛɛŋ ani bɔsɔna.”
9Ka Ɛsau bir ŋɔ, “N niwee, n dɔɔ aŋhinaa werge. Awia, kpogli i kuna.”
10Denii Jekɔb ŋɔ, “Akai, di n wia parii, amɔ, í lɛɛ a kuna. I nai ɛɛwɔɔ lugɔ miŋ na Kɔraawiizi, dikuu hiŋ lɛɛŋ ni biinihuŋŋu wia. 11Jaande maa, lɛɛ n sunzaa naa, dikuubɛɛwiai, Kɔraawiizi nɔŋŋimbuu di tɛŋ kunla maa minna nyiŋŋi.” Dikuu Jekɔb haa ra suŋŋuu werge maa la wia, u jaa wa sɛɛ di lɛɛ a kuna.
12Ɛsau n wa lɛɛa la, u ŋɔ, “Too, guŋwaa, ya ra la, n daŋ tɔ i see.”
13Denii Jekɔb bir ŋɔ u be, “N dɔɔri, n biizi naa baŋhina haa du jigzii, n peeza ni nauna gba aŋhina dɔɔ biifullii. Di i ra duŋŋaa kpegzi ni, hɔpizikpaŋ gba, a daŋ siuzi. 14Awia, tɔ see di ra la, ka ya kpogli a biizi ni a sela bɔɔiih di ra ba. Gunla maa, yaa daŋ wa huuzii Ɛdɔm.”
15Ɛsau ŋɔ, “Guŋwaa, n daŋ gil n baala naa baŋhina i be.”
Ka Jekɔb ŋɔ, “Akai, a kukkɔɔrɛ. N dɔɔri, haa gil n wia parii.” 16Awia, a hɔl hiŋ, Ɛsau kaa bir kaali Ɛdɔm. 17Ka Jekɔb waa ni u balaa faa vol di wa hel Sukɔf, u ma u dia ka du pampannizi di tɛɛ u sela ge. Awia, u dau de sɔŋ Sukɔf.#33:17 Sukɔf zɛɛrɛ Pampannizi.
18Jekɔb n faa lii Mɛsɔpɔtemia la, u wa hel bolzeŋ Sɛkɛm n du Keenan hɛri labuu ni bɔsɔna, di chɔɔ dugli a bolzeŋ.#Lug 28:15 19Jekɔb n faa chɔɔ de la, u kpa saliŋhuŋŋa kebisau kalfa, di yau a hɛri lii Sɛkɛm mɛɛ Hamɔ naanna be.#Lug 12:6 20Denii u faa kuari mbusu lizibɔr de, di ra yir de Ɛl Ɛlɔhi Izrɛl.#33:20 Ɛl Ɛlɔhi Izrɛl zɛɛrɛ Kɔraawiizi la Izrɛl hina n na hum.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luglaa 33: vag
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.