Luglaa 34
34
Daina pumaa wia
1Denii a hɔl bɛl Lia ni Jekɔb biihaaŋ Daina izi di la ú ga jaami a hɛri haana. 2Hamɔ la n ɛɛ Hivi hinuu, di ɛɛ de koori biibaal Sɛkɛm nau, di pumuu. 3Sɛkɛm bampirii faa jaa lau Daina, u ra nyiŋŋuu, di ra fɔrguu. 4Haali u ŋɔ u mɛɛ be, dí u nyiŋŋuu tɛu, ú kpa.
5Jekɔb n wa nuuwɛ lugɔ ba chɔgi u biihaaŋ Daina, di u biibaala faa haa du pir di ra binni ba sela. Awia, u faa siigi ka ra kpaŋ ba balaa. 6Sɛkɛm mɛɛ Hamɔ jaa ba Jekɔb be, ú nuu ŋɔ wia. 7Jekɔb biibambizi n wa nuu guŋ, ba lii pir di ba. Ba biine chɔgi werge, ba baana ra fuuh werge maa, dikuu gunla Sɛkɛm n pum Jekɔb biihaaŋ Daina, di du Izrɛl hina hiihzi wia, dikuubɛɛwiai, guŋ waa dɛkkɛ. 8Denii Hamɔ ŋɔ Jekɔb ni u biibaala be, “N biibaal Sɛkɛm ra nyiŋŋi i biihaaŋ labuu werge maa. Awia, ii gil u kpau. 9Ií gil ya ɛɛ nuukpaŋ, ii biizi yuu yaa biizi, yaa ge biizi paagi ii ge biizi.
10Di guŋ ɛɛwɔ, i daŋ wer du yaa be, yaa hɛri naa bɔr la maa hinna nyiŋŋi, di ra di soochi, di dɔɔ kuna.”
11Denii Sɛkɛm jaa suŋŋi Jekɔb ni u biibaala, di ŋɔ, “Di ii sɛɛwɔ n kpa Daina, n daŋ tɛɛ ia kunla maa iinna nyiŋŋi. 12Ií bagliŋ kunla iinna nyiŋŋi, haali di a kim mag gunla maa, ka n daŋ turgi, di ii daŋ sɛɛ ń kpau.”
13Jekɔb biibaala faa ŋɔ wiarɛ di dar Sɛkɛm ni u mɛɛ Hamɔ, dikuu gunla Sɛkɛm n chɔgi ba niuhambie Daina la wia. 14Awia, ba faa ŋɔ Sɛkɛm ni u mɛɛ Hamɔ be, “Yaa wàá sɛɛ, dikuubɛɛwiai, Sɛkɛm waa u hɛŋ teŋŋe. A daŋ ɛɛ yaa hiihzi werge maa lugɔ Daina yuu baal la n waa u hɛŋ teŋŋe. 15Yaa daŋ sɛɛ, di ii sɛɛwɔ lugɔ ii du yaa duula, di teŋri ii biibaala maa hɛna. 16Di ii wetto ɛɛ guŋ, yaa daŋ wer ra kpa dɔŋa biihaana, di so dɔŋa be, di ɛɛ kpaŋ. 17Di ii waa sɛɛ teŋri i hɛna waa, yaa daŋ kpa yaa niuhambie kaali.”
18Denii Hamɔ ni u biibaal Sɛkɛm n wa nuu guŋ, ba na lugɔ guŋ wessoo. 19Sɛkɛm hahzi manaŋ di ɛɛ gunla maa baŋ ŋɔwɛɛ la, dikuubɛɛwiai, u faa ra nyiŋŋi Dainaa ni u bampirii maa. Di faa kaa ɛɛ nɛr la u lulla maa n na tɔgzi ge.
20Guŋ wia, u ni u mɛɛ faa la a bol nabɔnzi be a bol dominuuzeŋ, di ga lizi amaniye tɛɛ baa. 21Ba ŋɔ, “Nɛra naa wia wessoo. Awia, ií gil bá so a hɛri di ra di soochi. A hɛri kannɔɔ lugɔ ba daŋ wer so u biini. Yaa daŋ wer di ra paagi ba biihaana, bá ge ra paagi yaa hora. 22Ama, ba wàá sɛɛ so yaa be, yaa ni baa ɛɛ kpaŋ, di yaa waa yaa hɛna teŋree alugɔ baŋ teŋri ba hora la. 23Ií na, di yaa sɛɛwɔ di teŋri yaa hɛna, ba sela naa ni ba kundɔɔlaa naa maa daŋ birgi yaa hora. Awia, ii gil ya sɛɛ guŋ, bá so yaa be.” 24Denii a bolzeŋ nɛra maa sɛɛ gunla Hamɔ ni u biibaal Sɛkɛm n ŋɔwɛɛ la. A baala maa jaa teŋri ba hɛna.
25Aŋ wa ɛɛ hɔpizaa ahoro, di ba bɔra haa ra wii baa, Jekɔb biibaala banɛɛ, Simɛɔn ni Levi n ɛɛ Daina niubambizi, kpa ba tokobizi di zuu a bolzeŋ di pig baa, di kpuuzi ba baala maa nyaamm. 26Di faa kpu Sɛkɛm ni u mɛɛ Hamɔ gba di jaa, ka lau ba niuhambie Daina lii Sɛkɛm dia biini di kaali. 27Jekɔb biizi la n kawɛɛ la maa faa izi, di gbaari a bol kummaa, dikuu baŋ pum ba niuhambie de, di chɔguu la wia. 28Ba lauri ba peeza, ba nauna, ba kauzi, di paagi kunla maa baŋ nawɛɛ a bolzeŋ ni ba kooni biine maa. 29Ba paagi ba daama, di lauri ba haana ni ba biizi ani ba diini kuna maa. 30Jekɔb ŋɔ Levi ni Simɛɔn be, “Ií nyiŋŋi wiarɛ tɛŋ la. Keenan hina ni a Pɛriz hina n du hɛri naa biini maa, daŋ jaa kpaŋ birgi ba dɔm. Yaa waa kpil. Di ba izoo ɛɛ nuukpaŋ di ŋɔ ba yoo yaa, ba daŋ kpuuzi yaa nyaamm.” 31Uŋ wa ŋɔ guŋ, ba ŋɔ, “Amɔ, a dɛkkɔ uŋ ɛɛ yaa niuhambie lugɔ sɛnsɛnniaa?”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luglaa 34: vag
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.