Luglaa 31
31
Jekɔb n chɔwɛɛ lii Laban be wia
1Jekɔb nuu Laban biibaala n na ŋɔ, “Jekɔb fini yaa mɛɛrɛ, di lɛɛ u kundɔɔlaa maa. Yaa mɛɛ benii Jekɔb na u daama maa.” 2Jekɔb jaa na lugɔ u ni Laban waa kaa du sum. 3Denii Kɔraawiizi ŋɔ Jekɔb be, “Izi, di bir la i mɛɛ waa hɛri, i lulla be. N daŋ du i be.”
4Jekɔb yir Rachɛl ni Lia, bá ba bɔr la unna binni u sela la. 5Denii u ŋɔ ba be, “Filaŋkennaa, n ni ii mɛɛ waa kaa du sum. Ka Kɔraawiizi la n mɛɛ n na hum la waa du n benii. 6Ií zum gunla miŋ hummɛ ni n fɔŋŋa maanii, 7ka u finimbuu di lau n kinturgaa birgi bufi. Ama, Kɔraawiizi waa sɛɛwɛ ú ɛɛŋ wichɔgii maa. 8Di u haŋ wa ŋɔ, ‘Sela la maa n niŋ lɛgzi daŋ ɛɛ i kinturgaa,’ a sela maa ɔɔ wa lul a lɛgzaarɛ, di u kaa wa ŋɔ, ‘A piizaa maa daŋ ɛɛ i kinturgaa,’ a sela maa ɔɔ kaa ra lul a piizaarɛ. 9Awia, Kɔraawiizii lɛɛ ii mɛɛ sela tɛŋ.
10A sela deezaa saŋa n wa helle la, n chɔɔwɔɔ di deezi di na lugɔ bubala la n na deezaa la maa piizɔɔrɛ, di chɛssi gɛɛ di lɛgzi. 11A deeza biini, Kɔraawiizi mɛlika yiriŋ, ‘Jekɔb!’ N sɛɛ, di ŋɔ, ‘Minuu keŋ.’ 12U ŋɔ n be, ‘Na, bubala la maa n na deezaa la piizɔɔrɛ, di chɛssi gɛɛ di lɛgzi, dikuubɛɛwiai, n na gunla maa Laban n na ɛɛibuu. 13Minuu Kɔraawiizi la n faa ba i be Bɛtɛl, bɔr la hiŋ ɛɛ ɔlivi nuu di waari bii bɛl ni, ka ŋɔ nua tɛŋ labuu. Awia, ɛɛ sirya di bir kaali hɛri la baŋ lulii la.’ ”#Lug 28:18
14Denii Rachɛl ni Lia maa ŋɔ, “Yaa waa kaa dɔɔ kapɛttɛ maa yaa mɛɛ be, yaa n niŋ di. 15U kpogli yaabuu alugɔ hɔɔhra. Waa yaa ra ɛɛ lugɔ u himmaa biizi. U yoo yaabuu, di di kebee la maa baŋ turguu la. 16Daama la maa Kɔraawiizi n lɛɛ yaa mɛɛ be di tɛi la, ɛɛ yaa ni yaa biizi horaa. Awia, ɛɛ gunla maa Kɔraawiizi n ŋɔ i be la.”
17Denii Jekɔb gil u haana ni u biizi maa tinni nyugmazi. 18U duŋŋi sela la maa, di kpa kuna la un nawɛɛ Mɛsɔpɔtemia la, di tɔ see, ú la u mɛɛ Aizik be, Keenan hɛri. 19A saŋa, di Laban laŋŋɔ ú ga fuŋ u peeza huna. Rachɛl ge ŋmɛɛ u mɛɛ dia vuga. 20Jekɔb faa dar Laban, waa sɛɛwɛ u zum lugɔ u ra chɔu. 21Jekɔb kpa u daama la maa di lii chɔ, ba ga gi Muu Yufretis, di ra la Giliad giŋgimee hɛri.
Laban n dau Jekɔb luge wia
22Ba kaalaa hɔpizaa ahoro hɔllɛ, ba ŋɔ Laban be lugɔ Jekɔb chɔwɔɔ. 23Denii u lau u lulla di ra duŋŋi Jekɔb luge. Ba duŋŋi u luge guŋŋ hɔpizaa aniidaanɛɛ, di ga huuzuu Giliad giŋgimee hɛri. 24A hamuŋa ni, Kɔraawiizi ba Laban be deeza biini, di wa ŋɔ, “A du tau, di gilɛɛ waa ŋɔ winanaa gɛɛ wichɔgaa maa di ra tɛɛ Jekɔb.”
25Laban n wa huuzi Jekɔb, di u baŋ u tanti diini Giliad giŋgimee hɛri la, u ge chɔɔ de.
26Laban ŋɔ Jekɔb be, “Bɛɛ i ɛɛ gunnɛi? I darimbuu di lauri n biihaana lugɔ baŋ lauri nɛra laal biini, di ra chɔ. 27Ɛrɛɛ wiarɛ i suahzi di ra chɔi? N daŋ vii gil nɛra ba, di wa yigzi kuna, di lɔ kemzi, di yir yira di sa ni bɔsɔna mɔɔ, ka i vii haa lii. 28Haa gillɛ n faami n biihaana ni n naanna, ka ta baa ŋmɛnɛɛ. Gɛnni wiarɛ i ɛɛ la. 29N dɔɔ fɔŋŋaa min niŋ vii ɛɛi wichɔgaa. Ka dɛɛla hamuŋa ni, Kɔraawiizi la i mɛɛ n na hum la ba n benii deeza biini, di wa ŋɔ, ‘A du tau, di gilɛɛ waa ŋɔ winanaa gɛɛ wichɔgaa maa di ra tɛɛ Jekɔb.’ 30N zummɔ lugɔ i bɔra ra nyurguu i la bol, ka ɛrɛɛ wiarɛ i kaa ŋmɛɛ n dia vugai?”
31Denii Jekɔb ŋɔ, “N hahzoore lii, dikuubɛɛwiai, n faa ra ɔmuu lugɔ i daŋ foozi i biihaana. 32Di i wa na i vuga nɛr maa be, kpu a hiŋ. N kaa ra ŋɔ i benii yaa lulla naa see lugɔ í himmaa pigzi na, di i wa na i kummaa n be, í kpa.” Jekɔb n ŋɔ gunla, di waa zummɛ lugɔ Rachɛllɛ ŋmɛɛ a vuga.
33Awia, Laban feli zuu Jekɔb tanti dia di pigzuu, di kaa lii zuu Lia ni ba balaa banɛɛ la ge diini, waa kummaa nawɛɛ. Denii u kaa zuu Rachɛl ge tanti dia. 34Rachɛllɛ faa ŋmɛɛ a vuga, di kpaa du bɔɔti biini, di du u nyugma kara zɛɛ di so a ni. Laban n wa zuu u tanti dia la, Rachɛl tinni so a ni. Uŋ faa jaa ɛɛ gunla, Laban pigzi a tanti dia maa, ka wàá nawɛɛ.
35Denii Rachɛl ŋɔ, “N mɛ, gilɛɛ waa na baaŋ, miŋ waa wette izi chi i see la, n na ɛɛ doŋaa.” Awia, Laban faa pigzi a tanti dia maa, ka waa u dia vuga la nawɛɛ.
36Denii Jekɔb baaŋ fuuh, u pɛɛzi Laban, “Bɛɛ wichɔgiirɛ n ɛɛinɛi, i ra duŋŋi n lugei? 37Hiŋ binni n kuna maa biini, bɛɛ i na u ɛɛ i horei? Kunla hiŋ nawɛɛ u ɛɛ i kuŋ, kpau lii yaa lulla naa maa see bá na, di zum unla hor n summɛ.
38N du i benii binni tokko, di hum di ra tɛi, di ra binni i sela, ka bɛl maa ŋmɛnɛ maa haa waa mizɛɛ. N ŋmɛnɛ maa haa waa i pebal gba heewe. 39Haali di sechɔgii wa lau bɛl maa, an turgi u kinnɛ. Maa ɔɔ kpau ba i na gba. I ɔɔ giluu n turgi unla maa baŋ ŋmɛɛwɛ, haali di hamuŋaa gɛɛ di wibaŋa gbaa. 40Wiizi ɔɔ kpumbuu wibaŋa ni, waari ge kpuŋ hamuŋa, maa ɔɔ wer n chɔ dɔɔ. 41Gunnɛ a du, ka n hum tɛi a binni tokko naa biini maa. Binni fidaanaazuu n kpa di hum tɛi, ka kpa i biihaana banɛɛ, di kaa kpa binni anumbɛl ge di hum, ka i tɛŋ sela. Haali i lau n kinturgaa birgi, naa bufi. 42Na, di Kɔraawiizi la n mɛɛ Aizik n na hum ani u ge mɛɛ Abraham n faa ra hum la wia lɛi, i daŋ vii duŋŋiŋ ta, di haŋ tɛɛwɛ kummaa. Ama, Kɔraawiizi zum tɔɔrɔɔ la maa miŋ diweere, di na gunla maa miŋ kuuhwɛ. Awiarɛ u hau i ni, dɛɛla hamuŋa ni la.”
Jekɔb ni Laban nuukpaŋ wia
43Laban n wa nuu guŋ, u ŋɔ Jekɔb be, “Haana naa ɛɛ n biihaanaa, biizi naa ge ɛɛ n biizi, sela naa ɛɛ n sela. Kuna naa maa hiŋ dɔɔwɛ naa ɛɛ n horaa. Ka ɛrɛɛ ń ɛɛ zinaa, dikuu n biihaana naa ni biizi la baŋ lullɛ wiai? 44Awia, gil n nii ɛɛ nuukpaŋ filaŋkeŋ, ú ɛɛ daansɛɛ kuŋ yaa baaŋ.”
45Denii Jekɔb kpa bii bɛl di baŋ, 46ka ŋɔ u lulla be, “Ií chaali bia dau kululu.” Baŋ wa ɛɛ guŋ tuŋ, Jekɔb ni Laban maa so a bia zɛɛ di di. 47Laban faa dau de sɔŋ, Jɛga Sahaduta,#31:47 Jɛga Sahaduta zɛɛrɛ Daansɛɛ pii Aram hina mɔɔri biini. Jekɔb ge dau de sɔŋ, Galiid.#31:47 Galiid zɛɛrɛ Daansɛɛ pii Hibru mɔɔri biini. 48Laban ŋɔ, “A pii naabuu niŋ ɛɛ yaa nuukpaŋ dɔɔi naa daansɛɛ kuŋ.” 49Ba faa kaa ra yir de, Mizpa,#31:49 Mizpa zɛɛrɛ Tauduura diijaŋ. dikuubɛɛwiai, Laban faa ŋɔwɔɔrɛ, “Kɔ́raawiizi ra du yaa maa tau, di yaa wa bargi dɔŋa be. 50Di i waa tɔɔri n biihaana naa gɛɛ di kaa kpa haana baŋhina jaa, haali nɛr maa n waa hoo yaa be naa gba, a liizi lugɔ Kɔraawiizii ɛɛ yaa daansɛɛ hiŋ.” 51Laban kaa ŋɔ Jekɔb be, “Pii naabuu keŋ, bii la miŋ baŋŋɛ n nii baannɛ keŋ. 52Pii naa ni bii naa ɛɛ daansɛɛ kunaa. Bɛl maa wàá ka bɛri a ni, di ga ɛɛ u dɔŋ wichɔgii maa.” 53Laban kaa ŋɔ, “N na jaami Kɔraawiizi la i naabaal Abraham n faa ra hum la ni unla u mɛɛ Nahɔ n faa ra hum labuu, lugɔ ú tɔɔri unla maa n niŋ wa kpa wichɔgii maa ɛɛ u dɔŋhiŋ.”
Denii Jekɔb hɛɛhzi Kɔraawiizi la u mɛɛ Aizik n na hum la lugɔ u danna hiŋ a nua. 54U kaa kpu sel di lizi mbusu tɛɛ Kɔraawiizi a giŋgimee hɛri, di yir u lulla bá ba wa di. Baŋ wa diwee tuŋ, ba maa chɔɔ de a hamuŋa ni. 55Hɔɔŋ waa pizi chɔɔzimpikke ni, Laban izi di faami u naanna ni u biihaana, ka dibi tɛɛ baa, ka bir kpo.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luglaa 31: vag
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.