Luglaa 30
30
1Rachɛl n wa nawɛɛ lugɔ waa biizi ra lul la, u kpɛɛma Lia wia jaa ra wii u ni werge maa, u ŋɔ u jaari Jekɔb be, “Di hàá wer gil n lul bie, guŋwaa n daŋ siu.”
2Uŋ wa ŋɔ gunla, Jekɔb baaŋ fuuh, u pɛɛzuu, “Minuu Kɔraawiiziaa? Waabuu tɔ i lulaa.”
3Denii Rachɛl ŋɔ u be, “Guŋwaa, gil i ni n balii Bilha chɔɔ. Aŋhinabe, u daŋ wer lul biizi tɛŋ.” 4Awia, u kpa Bilha tɛɛ u jaari, u nuu chɔɔ. 5Bilha kpogli hia di lul biibaal. 6Rachɛl dau u sɔŋ, Dan.#30:6 Dan zɛɛrɛ Kɔraawiizi tɛmbuu bilii. U faa ŋɔwɔɔrɛ, “Kɔraawiizi lizimbuu hiihzi biini, di nuu n wiisuŋŋaa, di tɛŋ biibaal.”
7Denii Bilha kaa wa kpogli hia, di lul biibaal tɛɛ Jekɔb. 8Rachɛl kaa dau u sɔŋ, Naftali.#30:8 Naftali zɛɛrɛ Naari. U kaa ŋɔ, “N ni n kpɛɛma ra naau dikuu biizi wia. Ka n tamɔɔ lugɔ minuu jaa ra tɔ see ani biizi lulaa.”
9Lia ge n wa nawɛɛ lugɔ waa kaa ra kpogli hia la, u ge lau u balii Zilpa di tɛɛ u jaari, ú ɛɛ u haaŋ. 10Denii Zilpa ge lul biibaal tɛɛ Jekɔb. 11Lia ŋɔ, “N nyuu summɔɔ werge maa.” Awia, u dau u sɔŋ, Gad.#30:11 Gad zɛɛrɛ Nyusum. 12Denii Zilpa kaa lul biibaal tɛɛ Jekɔb. 13Lia kaa ŋɔ, “N dɔŋahina haana daŋ ŋɔ n nuu sumaa.” Awia, u dau u sɔŋ, Asɛ.#30:13 Asɛ zɛɛrɛ Nuu suma.
14Mia kumaa saŋa, Rubin la koo di ga na daalunne la n na hiini haana ba ra lul, di kia ba wa tɛɛ u maa Lia. Denii Rachɛl suŋŋuu dí u tɛu aŋhina.
15Ka Lia na baaŋ di ŋɔ, “Hiŋ foozi n jaari la, i bɔra waa sɔɔnɛɛaa? I daŋ kaa wer foozi daalunne la n biibaal n wa tɛŋ la geaa?”
Rachɛl ŋɔ, “Di i tɛŋ lunne naa, n daŋ gil i ni Jekɔb chɔɔ hamuŋa naa.”
16Awia, Jekɔb n wa lii koo di ra ba, Lia lii chem u ni, di ŋɔ, “N nii daŋ chɔɔ hamuŋa naa, dikuubɛɛwiai, n kpa n biibaal daalunnee turgi i kim tɛɛ Rachɛl.” Awia, u ni Jekɔb chɔɔ a hamuŋa hiŋ.
17Kɔraawiizi nuu u wiisuŋŋaa, di gil u kpogli hia, di lul u biibambinuehiŋ tɛɛ Jekɔb. 18Denii Lia ŋɔ, “Kɔraawiizi turgi n kinnɛ, dikuu miŋ kpa n balii tɛɛ n jaari u ɛɛ u haaŋ wia.” Awia, u dau u ge sɔŋ, Isaka.#30:18 Isaka zɛɛrɛ Kinturgaa.
19U kaa kpogli hia di lul biibaal, ba ɛɛ banumbɛl di tɛɛ Jekɔb. 20Lia ŋɔ, “Kɔraawiizi tɛmbuu kunnanii. Filaŋkeŋ, n jaari danna tɔgziŋ, dikuu miŋ lul biibaala banumbɛl tɛu wia.” Awia, u dau u ge sɔŋ, Zɛbulɔn.#30:20 Zɛbulɔn zɛɛrɛ Tɔgzaa.
21Saŋa bɛl n wa helle, u lul biihaaŋ, di dau u sɔŋ Daina.
22Denii Kɔraawiizi nuu Rachɛl ge wiisuŋŋaa, di pilli u lulaa. 23U kpogli hia di lul biibaal. Uŋ wa lullɛ la, u ŋɔ, “Kɔraawiizi lizimbuu hiihzi biini.” 24U jaa dau u sɔŋ Joosɛf,#30:24 Joosɛf zɛɛrɛ ú kaa jaaŋ. di ŋɔ, “Kɔ́raawiizi kaa jaambuu biibaal.”
Jekɔb sela wazaa wia
25Rachɛl n wa lul Joosɛf la, Jekɔb ŋɔ Laban be, “Taŋ ŋmɛnɛɛ ń bir kaali n bol. 26Gil n kpogli n haana ni n biizi maa miŋ kuu ba wia di humii la, di ra la. I zum gunla miŋ humii maguu.”
27Laban ŋɔ, “Jaande maa, gilɛɛ giliŋ ka kaali. N pɛɛzɔɔrɛ di na lugɔ Kɔraawiizi kissimbuu werge maa, dikuu hiŋ du n be wia. 28Kim la maa miŋ diwee, bagliŋ ń turgii.”
29Jekɔb ŋɔ u be, “I zum gunla maa miŋ hummɛ tɛi maguu, di na gunla miŋ binni i sela ni a wazi werge maa. 30Miŋ ballɛ, di a waa kpil. Ka filaŋkeŋ, i jaa ɛɛ dɔɔnnɛ werge maa. I himmaa zum lugɔ Kɔraawiizi kissiibuu werge maa, dikuu n wia. Filaŋkennaa, saŋa bɛɛ ń ge ɛɛ wii bɛl tɛɛ n diahinai?”
31Laban pɛɛzuu, “N turgii aŋmɛnɛi?”
Ka Jekɔb ŋɔ, “Gilɛɛ tɛŋ kummaa. Ama, di i daŋ ɛɛ wikpaŋ naa tɛŋ, n daŋ haa ra binni i sela ni. 32Waabuu keŋ. Gil n binni i sela biini, di ligzi peeza la maa n chɛssɛɛ gɛɛ di lɛgzi, pebizi la n biree ani buuŋ la maa n chɛssɛɛ gɛɛ di lɛgzi, á ɛɛ n kinturgaa. 33Gunnɛ niŋ gil i zum lugɔ wibii maa, n wia dɔɔ wibiire. Di i wa na buuŋ gɛɛ peezi maa n sela biini u ɛɛ u huŋŋu, u yemmaa waa lɛgzɛɛ, gɛɛ pebii maa n waa biree, amɔ, guŋwaa n ŋmɛɛubuu.”
34Denii Laban sɛɛ di ŋɔ ú ɛɛ gunla uŋ ŋɔwɛɛ la. 35A hɔl himmaanii Laban ligzi bubala la maa n lɛgzɛɛ gɛɛ di piizi, buniinazi la maa n chɛssɛɛ gɛɛ di lɛgzi ani pebibiŋŋe maa, di gil u biibaala ra binnaa. 36Denii u ni u biibaala nɔɔnaa di vol hɔpizaa ahoro di kaali bɔɔnɛɛ, ba waa kaa dugli Jekɔb. Ka Jekɔb waa haa ra binni Laban sela la n kawɛɛ la ni.
37Denii Jekɔb teŋri daazi aŋhina kela, di piili a hɛga yeŋa, a daazi bɔhuŋŋa nyiizi, 38di kpaa baŋzi bɔra la Laban sela la n na nyɔɔ nii. Di a sela wa ballɔ á wa nyɔɔ nii la saŋaa a ra deezi. 39A ɔɔ jaa ra deezi ka ra binni a kela. Awia, a ɔɔ jaa ra lul, a biizi piizi gɛɛ di chɛssi gɛɛ di lɛgzi.
40Jekɔb ɔɔ bargi peeza la di lii buuna la ni, di gil a siwee chaŋ Laban hora la n lɛgzɛɛ di biri la. Gunnɛ u ɛɛ di na u himmaa peeza, di lii Laban hora biini. 41A seniinazi la n kpekke la haŋ wa ŋɔ a deezi maa, Jekɔb ɔɔ kpa daalɛgzaa labuu di baŋzi a see. 42Ama, u faa waa ɔɔ ra ɛɛ a sela la waa n gɛrgɛɛ la guŋ. Awia, anla n gɛrgɛɛ la birgi Laban hora, ka waabuu hora ɛɛ a kpega. 43Uŋ faa ɛɛ gunla, guŋ gil u dɔɔ sela werge maa, di birgi dɔɔŋ, di dɔɔ yoma, nyugmazi ani kauzi werge maa.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luglaa 30: vag
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.