Luglaa 29
29
Jekɔb n ba Laban dia wia
1Denii Jekɔb kaa kpa ŋmɛnɛɛ di ra kaali, di ga hel wiifurii hina hɛri, 2di na kɔlɔŋ bɛl, di peezaa chɔɔ sugezi bɔra ahoro, di dugluu, dikuubɛɛwiai, a kɔlɔnnɛ ba ɔɔ dɔɔ nii di ra tɛɛa. Bii la ge n tɔ a kɔlɔŋ nua la faa kannɔɔ. 3Di a peeza maa wa chaalɔɔ, penɔɔna ɔɔ billi a biirɛ, ka ɛɛ nii tɛɛa, a nyɔɔ, ka ba bir billuu tɔ a kɔlɔŋ nua.
4Jekɔb la a penɔɔna be di ga pɛɛzi baa, “N dammuzi, lee ii liiyɛi?”
Ba ŋɔ, “Harannɛ yaa lii.”
5U kaa pɛɛzi baa, “Ií zum Nahɔ naana la banna yir Laban laa?”
Ba ŋɔ “Ɛɛh, yaa zumuubuu.”
6Jekɔb kaa pɛɛzi, “U du alaanfiaa?”
Ba ŋɔ, “Ɛɛh, u du alaanfia. Na, u biihaaŋ Rachɛllɛ nɔɔni peeza di ra ba la.”
7Jekɔb ŋɔ, “Wiizi haa kannɔɔ, peeza tɔi haa waa helle. Ií ɛɛ nii tɛɛa, ka gil á la gaa di.”
8Denii ba ŋɔ, “See a peeza maa n chaalɛɛ, bá billi a bii lii a kɔlɔŋ nua, ka ya tɛɛa nii.”
9Jekɔb ni baa n na ŋɔ wia la, di Rachɛl nɔɔni u mɛɛ peeza di wa hel. U faa ɛɛ biihaannɛ ka ra nɔɔni a peeza. 10Rachɛl n faa ɛɛ u naara biihaaŋ la, a peeza ge ɛɛ u naara hora la wia, u la ga lau a bii billi ha, ka ɛɛ a nii tɛɛ a peeza a nyɔɔ. 11Uŋ wa tɛɛa tuŋ, u la ga faami Rachɛl, ka ra chɛɛhgi. 12Denii u ŋɔ u be lugɔ u ɛɛ u mɛɛ lullii, di kaa ɛɛ Ribɛka ge biibaal. Awia, Rachɛl faa chɔ manaŋ di ga kali u mɛɛ.
13Laban n wa nuu u naara Jekɔb wia, u hahzi manaŋ di lii chem u ni, di koruu di jaamuu, ka lawuu ba dia. Baŋ ballɛ la, Jekɔb jaa bagli gunla maa n du de tɛu. 14Denii Laban ŋɔ ni bɔsɔna, “N challɛ hiŋ.”
Jekɔb du de baagu bir.
Jekɔb n kpa Lia ni Rachɛl wia
15A hɔl bɛl, Laban ŋɔ u be, “A waa dɛkkɛ hiŋ kuu yaa n ɛɛ lulla wia di hum ra tɛŋ pɛɛpɛɛ. Awia, aŋmɛnɛɛ i ra nyiŋŋi n na turgiinei?” 16Laban ge dɔɔ biihaana banɛɛ. Nabɔma hiŋ sɔnnɛ Lia, u niwee ge sɔnnɛ Rachɛl. 17Lia siwee faa wesso. Ama, Rachɛl waarɛ faa mawɛɛ nɛnnɛ, di kaa ɛɛ toloori.
18Jekɔb n faa ra nyiŋŋi Rachɛl wia la, u ŋɔ, “Di i daŋ kpa Rachɛl di tɛŋ, n daŋ hum tɛi binni aniidaanɛɛ.”
19Laban sɛɛ di ŋɔ, “Miŋ kpau tɛi bɔmbɔ, miŋ kpau tɛɛ nɛbɛl. Awia, so n be ɛŋ.” 20Denii Jekɔb faa jaa hum binni aniidaanɛɛ di tɛɛ Laban, ka ú kpa Rachɛl. Dikuu un faa ra nyiŋŋuu werge la wia, u binni lugɔ a saŋa faa waa nɛɛ u be.
21A hɔpizii n wa helle ú kpau la, u ŋɔ Laban be, “Filaŋkeŋwaa, n tuŋ n humaa. Awia, kpa n haaŋ tɛŋ.” 22Laban daali haŋfalli diuzenaa, di yir nɛr maa ba ba wa di. 23Ka bɔr n wa biree, Laban lau Lia ga tɛɛ Jekɔb u nuu chɔɔ. 24Laban lau u yoŋhaaŋ Zilpa tɛɛ Lia, ú ɛɛ u balii. 25Ka hɔɔŋ wa pizɛɛ, Jekɔb ŋɔ u binni di Liarɛ u nuu chɔɔ la. U ŋɔ Laban be, “Beedee wideere i ɛɛŋ kennei? N kuu Rachɛl wiarɛ di humii, ka ɛrɛɛ i jaa dariŋ kennei?”
26Denii Laban ŋɔ, “Yaa naabaala wiirɛ lugɔ a waa dɛkkɛ yaa n felee kpa yaa biihambijiga tɛɛ baal, ka ka u kpɛɛma. 27Awia, di kanyitti, di i daŋ kaa sɛɛ hum binni aniidaanɛɛ jaa, n daŋ kpa u ge gba jaai. Di Lia haŋfalwia wa tunnɔ, yawa nua wa bɛri, i daŋ wer kpa Rachɛl ge jaa.”
28Jekɔb kaa sɛɛ lugɔ u daŋ hum a binni aniidaanɛɛ, ka kpa Rachɛl jaa. A yawa nua hiŋ n wa bɛrɛɛ, Laban kaa kpa Rachɛl ge tɛu. 29Laban faa kaa kpa u yoŋhaaŋ Bilha di tɛɛ Rachɛl ge, u ɛɛ u balii. 30Jekɔb ni Rachɛl ge faa kaa chɔɔ. U ra nyiŋŋuu werge maa di kaali Lia. Aŋ ɛɛ gunla, u faa sɛɛ di hum a binni aniidaanɛɛ di jaa.
Jekɔb biizi wia
31Kɔraawiizi n wa nawɛɛ lugɔ Jekɔb waa Lia ra nyiŋŋi nɛnnɛ la wia, u tɛu lulaa, ka Rachɛl waa haa waa wette ú lul. 32Lia n kpogli hia la, u lul biibaal, ba dau u sɔŋ, Rubin.#29:32 Rubin zɛɛrɛ Kɔraawiizi na n biinichɔgrɛ. U faa ŋɔwɔɔrɛ, “Kɔraawiizi na n biinichɔgrɛ. N jaari daŋ jaa nɔŋŋi n ge.” 33Tama n wa jaawɛ, u kaa kpogli hia di kaa lul biibaal, ba dau u ge sɔŋ Simɛɔn.#29:33 Simɛɔn zɛɛrɛ Unla n na nuu wia. U kaa ŋɔ, “Kɔraawiizi nuuwɔɔ n jaari n wan nɔŋŋɛɛ, u kaa tɛŋ biibaal jaa.” 34Uŋ wa lul nɛɛhiŋ la, u kaa kuari kpogli hia di kaa lul biibaal, Jekɔb dau u ge sɔŋ, Levi.#29:34 Levi zɛɛrɛ Kpawaa. Uŋ wa luluu la, u jaa ŋɔ, “Filaŋkeŋwaa, n jaari daŋ jaa nɔŋŋiŋ, dikuu miŋ lul biibaala bahoro tɛu wia.” 35Haali aŋ ɛɛ gunla ka u kaa kpogli hia. Uŋ wa ŋɔ u lul, u kaa lul biibaal, ba kaa dau u ge sɔŋ, Juda.#29:35 Juda zɛɛrɛ Chɔlaa. Denii u jaa ŋɔ, “N daŋ jaa chɔli Kɔraawiizi werge maa.” Denii u lulaa jaa tuŋ.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Luglaa 29: vag
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.