यॊहनस 7
7
येसुस अरा येसुसी भईर
1इबड़ा ही ख़ॊख़ा येसुस गलिलेया नू धर्मेसी कत्था तेंगा कुद्दा हेलरस। आस यूदेया नू तेंगा कुद्दा मल बेद्दा लगियस, एन्देरगेका यहूदी मुद्धर आसिन पिटा गे बेद्दा लगियर। 2अक्कु यहूदीर ही कुमबा परब हेद्दे अंड़सकी रहचा।#लौव्य 23:34; व्य 16:13 3औंगे येसुसी भईर आसिन बाचर, “ई अड्डन अम्बा ती यूदेया कला, होले नीन ननू निंग्है अजगुत नलखन असन निंग्है चेलर ऎरा ओंगोर। 4ओर्तोस कोहाँ आल मना बेद्ददस होले, आस नूख़्रना ती नलख मल ननोस। नीन एन्ने नलख गुट्ठिन नना लगदय होले, सौंसे ख़ॆख़ेल निंग्है पत्त नू अख़'आ नेकअन।” 5येसुसी भईर हूँ गा आसी मइय्याँ मल पत्ताचर।
6ख़ने येसुस आरिन बाचस, “अक्कुन गूटी एंगा गे ठौका बेड़ा मल अंड़सकी र'ई, लिकिन उर्मी बेड़ा गा निमा ठौका र'ई। 7ई सौंसार ही आलर निमन हींड़'आ पोलनर, लिकिन आर एंगन हींड़नर, एन्देरगेका ऎन आरिन तेंगदन का आर मलदौ नलख गुट्ठी नन्नर। 8नीम ई परब नू कला। ऎन अक्कु ई परब नू मल कादन, एन्देरगेका अक्कुन गूटी एंगा गे ठौका बेड़ा मल अंड़सकी र'ई।” 9येसुस इबड़ा कत्थन बाचस ती आस गलिलेया नू रहे केरस।
10लिकिन आसी भईर परब नू केरका ख़ॊख़ा येसुस हूँ केरस, लिकिन हरकटनुम मला नूख़ुर नुख़ुरनुम केरस। 11आ परब नू यहूदी मुद्धर आसिन बेद्दा लगियर अरा “आ आलस एसन?” एन्ने मेना लगियर। 12अरा गोंहड़ा नू आलर ढ़ॆर कत्था आसी पत्त नू तम्है नू कले कले कछनख्र'आ लगियर। जोक्क आलर ब'आ लगियर, “आस दौ आलस”, लिकिन नन्नर ब'आ लगियर “मला, आस आलारिन भेंवाब'अदस।” 13अन्नु हूँ यहूदी मुद्धर ही इलिच्क'आ ती नॆ हूँ आसी पत्त नू हरकट मल ब'आ लगियर।
येसुस परब नू सिखाब'अदस
14लिकिन परब ही मझी बेड़ा नू येसुस धर्मेसी मन्दिर ही चाली नू केरस ती सिखाब'आ हेलरस। 15ख़ने यहूदीर हैकट मंजर ती ब'आ हेलरर, “ईस गे बिगर सिखिरकम इवंदा लूर एकासे बरचा?” 16ख़ने येसुस आरिन आनाकिर्ताचस, “एंग्है सिखाब'अना एंग्है मल्ली, ईद एंगन तइय्का धर्मेस ती बर'ई। 17नेकईम धर्मेसी मनेन नना बेद्ददस होले, आस ई सिखाब'अना ही पत्त नू अख़'ओस का ईद धर्मेस तरती र'ई का महले ऎन एंग्है ती ब'अदन। 18नॆ तंग्है तरती ब'अदस आस तंगा गे मईन बेद्ददस। लिकिन नॆ तंग्है तइय्युस गे मईन बेद्ददस, आस मानिम जॊगे आलस र'अस, अरा आस नू फंगटिया कत्था मलकी। 19मूसस निमा गे नॆग चिच्चस, अन्नु हूँ निम्है नू नॆ हूँ नॆग लेक्खा मल ऎकदर। होले एन्देरगे एंगन पिटा बेद्ददर?”
20ख़ने ख़ॊंड़रका आलर आसिन बाचर, “नीन नाद रस्का आल हिकदय, ऎम निंगन पिटा मल बेद्ददम।” 21येसुस आरिन बाचस, “ऎन ओन्टा अजगुत नलख ख़न्न ऎख़्रना उल्ला नू नंजकन, आद ती नीम हैकट मन्दर। 22मूसस निमन खतना#7:22 यहूदी धरम नू ख़द्दर कुन्द्रका ही आठवाँ उल्ला नू कुक्को ख़द्दारिन नॆत ही सुध मना गे अरा आर धर्मेसी मन्नन ऎद'आ गे खतना नन्नर। इय्या ख़द्दर ही उम्बुलना ही टीप ता चपटन खंडनर। नना गे पॆसका चिच्का ती नीम ख़न्न ऎख़्रना उल्ला नू हूँ ख़द्दासिन खतना नन्दर। लिकिन मानिम नू खतना ही पॆसकन मूसस मल चिच्चस, ईद पुरखा बंगर ती बर'आ लगी।#लौव्य 12:3; उत्प 17:10 23मूसासी नॆगन मल चाड़ा गे नीम ख़न्न ऎख़्रना उल्ला नू हूँ ख़द्दासिन खतना नन्दर होले, ऎन ओर्तो आलासिन उर्मी मॆदन ख़न्न ऎख़्रना उल्ला नू कोड़े नंजकन ख़ने, नीम एंग्है गने एन्देरगे खींस मन्दर?#यॊ 5:9 24मुंही ऎरा ती नेंवई अमा नना, लिकिन ठौका ठौका नेंवई नना।”
येसुस मसीस का?
25तहाँ येरुसलॆम नू र'ऊ जोक्का आलर ब'आ लगियर, “ई आलस आसिम मलदस का नॆकन आर पिटा गे बेद्दा लगनर। 26ऎरा! ईस गा हरकट कछनख्रदस, अरा आर ईसिन एन्देर हूँ मलम ब'अनर, एन्देर मानिम नू नम्है मुद्धर सोचनर का ईसिम मसीस? 27लिकिन नाम ईसिन अख़दत का ईस एस्तस। एकाबारी मसीस बर'ओस, आ बारी नॆ हूँ बल्लोर आस एस्तस।”
28ख़ने येसुस धर्मेसी मन्दिर नू सिखाब'अनुम रहचस ती जॊर ती बाचस, “हाँ, एंगन नीम अख़दर अरा इदिन हूँ अख़दर ऎन एस्तन। लिकिन ऎन एंग्है मने ती मल बरचकन, एंग्है तइय्युस मानिम र'अस, आसिन नीम बलदर। 29लिकिन ऎन आसिन अख़दन, एन्देरगेका ऎन आसी गुस्ते बरचकादन, अरा आसिम एंगन तइय्यस।”
30तहाँ जोक्क आलर येसुसिन हें'आ बेद्द लगियर, लिकिन नॆ हूँ आसिन धर'आ गे मुन्द मल बरचर, एन्देरगेका अक्कुन गूटी आसी ठौका बेड़ा मल अंड़सकीचा। 31लिकिन ख़ॊंड़रका आलर ती बग्गेर आसिन पत्ताचर। अरा अबड़र बाचर, “मसीस बरदस ख़ने, आस ई आलस नंजका ती कोड़हे अजगुत नलख ननोस का?” 32फरिसीर असन ख़ॊंड़रका आलर आसी पत्त नू इबड़ा कत्थन टुरुफुसरनन मेंजर। ख़ने मुध नैगर अरा फरिसीर जोक्क धर्मेसी मन्दिर ख़ापू सैनारिन आसिन हें'आ गे तइय्यर।
33येसुस बाचस, “ऎन जोक्क उल्ला लेका निम्है गने र'ओन, फेन एंग्है तइय्युस गुसन किर्रिम बि'ओन। 34नीम एंगन बेद्दोर, लिकिन मल ख़क्खोर, अरा ऎन एसन र'अदन असन नीम बर'आ पोल्लोर।” 35ख़ने यहूदी मुद्धर ताम तामिम बाचर, “ईस एक्सन क'ओस, ख़ने नाम ईसिन बेद्दा पोल्लोत? ईस नन्ना राजी गुट्ठी नू युनानीर मझी नू उज्जू नम्है आलर गुसन क'ओस ती युनानीरिन सिखाब'ओस का? 36‘नीम एंगन बेद्दोर, लिकिन मल ख़क्खोर, अरा ऎन एसन र'अदन असन नीम बर'आ पोल्लोर’ एन्ने ईस गा ब'अदस। इदही माने एन्देर?”
37परब ही छेद्दे उल्ला मुध उल्ला नू येसुस इज्जस ती जॊरसरिया बाचस, “नीकईम ओनक'आ सार'आ लगदर होले, एंग्है गुसन बरा ती ओना।#लौव्य 23:36 38नेम्हा पुथी ब'अना लेक्खा एंग्है मइय्याँ पत्त'उसी जिया ती उज्जना चि'ऊ अम्मु ख़ाड़ लेक्खा बाह'ओ उरखो।”#यहेज 47:1; जक 14:8 39तंग्है मइय्याँ पत्त'ऊ आलर ख़ॊख़ा ख़क्खना नेम्हा बॊलतासी पत्त नू गा येसुस एन्ने बाचस। अक्कु गूटी नेम्हा बॊलतस मल चीरकी रहचस, ईगेका येसुस अक्कु गूटी तंग्है महबा नू मल चॊदकाचस।
40ख़ने इबड़ा कत्थन मेंजका ती गोंहड़ा ती जोक्कोर बाचर, “मानिम नू ई आलस बरना धर्मेसी कत्था तिंगुस हिकदस।” 41अरा नन्नर बाचर, “ईस मसीस हिकदस।” लिकिन अउर जोक्कोर बाचर, “मसीस गलिलेया ती मल बर'ओस। 42नेम्हा पुथी एन्ने ब'ई, ‘मसीस दाऊद बॆलासी खुटी ती बर'ओस, अरा दाऊद रहचका बॆतलहेम पद्दा ती बर'ओस।’”#2सामु 7:12; मीका 5:2 43ख़ने येसुसी चड्डे गोंहड़ा केरेंग कोटेंग मंजा। 44जोक्कोर आसिन हें'आ बेद्दा लगियर, लिकिन नॆ हूँ आसिन धर'आ गे मुन्द मल बरचर।
यहूदी मुद्धर ही मल पत्त'अना
45तहाँ धर्मेसी मन्दिर ख़ापू सैनर मुध नैगर अरा फरिसीर गुसन बरचर ख़ने, आर आरिन मेंजर, “नीम येसुसिन एन्देरगे मल ओन्द्रकर।” 46धर्मेसी मन्दिर ख़ापू सैनर आनाकिर्ताचर, “नॆ हूँ ई आलस लेक्खा एन्ने कछनख्रकन ऎम इकला हूँ मल मेंजकम!” 47ख़ने फरिसीर आरिन बाचर, “नीम हूँ ठगरकर केरकर का? 48एकअम अक्स'उर महले फरिसीर आसिन पत्ताचका र'अनर का? 49लिकिन इबड़ा आलर गा नॆगन बलनर अरा सरपारका आलर।”
50निकोदॆमोस नॆ मुन्द माख़ा बारी येसुस गुसन भेंट मंजचकाचस, अरा आर ही मधेतस रहचस। आस आरिन बाचस,#यॊ 3:1,2 51“नम्है नॆग ओर्तोसिन आस ती बेगर मेंजका ती अरा आस एन्देर नंजकादस एन्ने बेगर अक्का ती आसिन नेंवई मल ननी।” 52ख़ने आर आसिन आनाकिर्ताचर, “नीन हूँ गलिलेया ता आलय का? नेम्हा पुथिन पढ़'अरकी ऎरा, ख़ने अख़'ओय क'ओय का गलिलेया ती धर्मेसी कत्था तिंगुस मल बरदस।” [53तहाँ ओर्मर तम्है तम्है एड़पा केरर।
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
यॊहनस 7: KURUXBSI
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
