यॊहनस 8
8
नन्ना आलस गुसन काना पाप नू धर्रका मुक्का
1येसुस गा जैतून मन्न परता केरस। 2अरा पैरी बारी आस धर्मेसी मन्दिर चाली नू अउरिम बरचस। ख़ने ओर्मा आलर आसी गुसन बरचर, अरा आस उक्कियस ती आरिन सिखाब'आ हेलरस। 3आ बारी यहूदी नॆग सिखाब'उर अरा फरिसीर नन्ना आलस गुसन काना पाप नू धर्रका ओन्टा मुक्कन अइय्या ओन्द्रर। अरा अदिन गोंहड़ा ही मुन्दहारे इजताचर। 4अरा येसुसिन बाचर, “अना गुरु, ई आली नन्ना आलस गुसन काना पाप नन्नुम धर्रकी र'ई। 5नॆग नू मूसस नमन पॆसकादस, एन्ने मुक्कारिन पखना ती लोड़ग'आ पिटा। अक्कु नीन एन्देर ब'अदय, ऎम एन्देर ननोम?”#लौव्य 20:10; व्य 22:22-24 6अबड़र आसिन बिढ़'आ गे एन्ने मेना लगियर का आसी मइय्याँ इन्द्रिइम बदी नना गे अड्डा ख़क्खोर।
लिकिन येसुस ख़ॊलख़रस ती अंगली ती ख़ॆख़ेल नू लिख'आ हेलरस। 7अरा आर आसिन मेन्ना बारी रहचर ख़ने, आस चॊचस ती बाचस, “निम्है नू नॆ पाप मल्ला नंजका आर मुन्द लोड़ग'आ।” 8अरा अउरिम आस ख़ॊलख़रस ती ख़ॆख़ेल नू लिख'आ लगियस।
9आर आसी ब'अनन मेंजर ती कोहाँ ती सन्नी ओर्त ओर्त गुच्छरर केरर। येसुस लेका असन रहचस, अरा आ मुक्का मझी नू इज्जकी रहचा। 10तहाँ येसुस चॊचस ती अदिन मेंजस, “अनय आली, अबड़र एंहों? नॆ हूँ निंगन दंडे ही नेंवई मल नंजर का?” 11आद बाचा, “उर्बायो, नॆ हूँ मला।” तहाँ येसुस अदिन बाचस, “ऎन हूँ दंडे ही नेंवई मल नन्दन, कलय, अरा अक्कु ती पाप नन्नन अम्बय चि'ई।”]#8:11 पच्चा ख़ेक्खा ता लिख्रका पच्चा पुथी गुट्ठी नू यॊ 7:53-8:11 मल जोड़रकी र'ई।
येसुस उज्जना चि'ऊ बिल्ली
12तहाँ येसुस अउरिम आलर गने कछनख्र'आ हेलरस, अरा बाचस, “ऎन ख़ॆख़ेल ही बिल्ली हिकदन। एकास एंग्है गने चॊंख़्रदस आस इकला हूँ ऊख़ा नू मल र'ओर, लिकिन आस उज्जना चि'ऊ बिल्लिन ख़क्खोस।”#मत्ता 5:14; यॊ 9:5 13ख़ने फरिसीर आसिन बाचर, “नीनिम निंग्है पत्त नू गोवाह चि'अदय, होले निंग्है गोवाह आबोन ऎम मल इंझ्र'आ ओंग्दम।”#यॊ 5:31
14ख़ने येसुस आरिन बाचस, “ऎन ऎनिम एंग्है पत्त नू गोवाह चिच्चकन, अन्नु हूँ एंग्है गोवाह मानिम र'ई, एन्देरगेका ऎन एस्ते बरचकन अरा एसन कादन ऎन अदिन अख़दन। लिकिन नीम बलदर का ऎन एस्ते बरचकन महले एसन कादन। 15नीम आलर नन्ना लेक्खा नेंवई नन्दर, लिकिन ऎन गा नॆख'आनिम नेंवई मल नन्दन। 16लिकिन ऎन नेंवई ननोन होले, एंग्है नेंवई ठउकम र'ई, एन्देरगेका ऎन ओर्तेलेका ती नेंवई मल नन्दन, एंगन तइय्का एम्बस हूँ एंग्है गने र'अस। 17निम्है नॆग नू हूँ लिख्रकी र'ई ‘दुई आलर ही गोवाह ओन्टेम उक्की होले, आद मानिम र'ई।’#व्य 19:15 18ओन्टा गा ऎन एंग्है पत्त नू गोवाह चि'अदन, अरा दोसर गा एंगन तइय्का एम्बस एंग्है पत्त नू गोवाह चि'अदस।”
19तहाँ आर येसुसिन मेंजर, “एसन र'अस निम्बस?” ख़ने आस बाचस, “नीम ऎन नॆ हिकदन महले एम्बस नॆ हिकदस अदिन बलदर। लिकिन नीम एंगन अक्कर होले, एम्बासिन हूँ अख़'ओर दने।” 20येसुस धर्मेसी मन्दिर नू सिखाब'अना बारी भंडार एड़पा गुसन इज्जस ती इबड़ा कत्थन बाचस। लिकिन नॆ हूँ आसिन मल हॆंचर, एन्देरगेका अक्कु गूटी आसी ठौका बेड़ा मल अंड़सकी रहचा।
21फेन येसुस अउरिम आरिन बाचस, “ऎन कादन अरा नीम एंगन बेद्दोर, अन्नु हूँ निम्है पाप गुट्ठी नू खे'ओर। एक्सन ऎन कादन असन नीम बर'आ पोल्लोर।” 22औंगे यहूदी मुद्धर मेंजर, “ईस तान तंगन पिटोस का? औंगेम ‘एक्सन ऎन कादन असन नीम बर'आ पोल्लोर’ एन्ने ब'अदस का?”
23येसुस अउरिम आरिन बाचस, “नीम किय्यातर, ऎन गा मइय्याँ ता हिकदन। नीम ई ख़ॆख़ेल ही हिकदर, ऎन गा ई ख़ॆख़ेल ही मलदन। 24औंगे नीम निम्है पाप गुट्ठी नू खे'ओर एन्ने ऎन बाचकन। नॆ बर'ऊ र'अस आस ऎनिम हिकदन एन्ने नीम मल पत्त'ओर होले, नीम निम्है पाप गुट्ठी नू खे'ओर।” 25ख़ने आर आसिन मेंजर, “नीन एका ओर्तय?” येसुस बाचस, “अदन दिम ऎन ऒरे तिम निमा गे तिंगनुम तिंगनुम बरचकन। 26ऎन निम्है पत्त नू तेंगा गे अरा नेंवई नना गे ढ़ॆर कत्था र'ई। एंगन तइय्युस मानिम र'अदस, आस गुसते ऎन एन्द्रन मेंजकन अबड़ा कत्थन लेका ख़ॆख़ेल नू तेंगदन।”
27तम्है बंगासी पत्त नू दिम आस तेंगा लगदस, एन्ने आर मल बुझ्रर। 28ख़ने येसुस आरिन बाचस, “एकाबारी नीम मनवा ख़द्द एंगन मइय्याँ अरगत'ओर, आ बारी अख़'ओर का ऎन आसिम हिकदन नॆ बर'ऊ रहचस। अरा ऎन ऎनिम एन्देर हूँ मल नन्दन, लिकिन एन्द्रन एम्बस एंगन सिखाबाचस, अदन दिम ऎन निमन ब'अदन एन्ने हूँ अख़'ओर। 29नॆ एंगन तइय्यस आस एंग्है गने र'अस। आस एंगन ओर्तेलेका मल्ला अम्बिका, एन्देरगेका एकदा आसिन खुसमारत'ई अदिनिम ऎन उर्मी उल्ला नन्दन।” 30आस इबड़ा कत्था ही पत्त नू ब'आ लगियस ख़ने, ढ़ॆर बग्गे आलर आसिन पत्ताचर।
पाप ती छछिन्द
31तहाँ येसुस तंगन पत्ताचका अबड़ा यहूदीरिन बाचस, “नीम एंग्है कत्था नू बन्चका र'ओर होले, नीम मानिम नू एंग्है चेला मनोर। 32अरा नीम मानिमन अख़'ओर, अरा मानिम आबो निमन छछिन्द ननो।” 33ख़ने आर आसिन बाचर, “ऎम अब्राहमसी बनस ता हिकदम, ऎम इकला हूँ नॆख'आ हूँ बिट्ठी ननू जॊंख़ मल रहचकम। अन्ने होले ऎम छछिन्द मनोम एन्ने नीन एकासे ब'आ ओंग्दय?”#मत्ता 3:9; लूक 3:8
34ख़ने येसुस आरिन बाचस, “ऎन निमन मानिमन ब'अदन, नॆ पाप नन्नर आर पाप ही जॊंख़ र'अनर। 35ओर्त बिट्ठी ननू जॊंख़स गे ओन्टा एड़पा नू उर्मी उल्ला अड्डा मल र'ओ, लिकिन ख़द्दस गा उर्मी उल्ला आ एड़पा ता दिम र'अदस। 36औंगे ऎन ख़द्दन निमन छछिन्द नन्दन होले, नीम मानिम नू छछिन्द मनोर। 37ऎन अख़दन का नीम अब्राहमसी बनस हिकदर, अन्नु हूँ नीम एंगन पिटा गे बेद्ददर, एन्देरगेका नीम एंग्है सिखाब'अनन मल इंझ्रदर। 38ऎन एम्बस गुसन रहचकन ख़ने, एन्दरन ऎन ईरकादन, अबड़न ऎन निमा तेंगदन। नीम निम्बस ती एन्दरन मेंजकादर अदिन नन्दर।”
39ख़ने आर बाचर, “अब्राहमस दिम एम्बस।” येसुस गा आरिन बाचस, “नीम मानिम नू अब्राहमसी ख़द्दर र'अदर होले, अब्राहमस एन्देर एन्देर नलख नंजस आ नलख गुट्ठिन ननोर दने। 40लिकिन नीम गा एंगन पिटा बेद्ददर, इगेका ऎन धर्मेस ती मेंजका मानिमन निमन तिंकादन। अब्राहमस इकला हूँ एन्ने नलख मल नंजस। 41नीम निम्है निम्बस नंजका नलखन दिम नना लगदर।” ख़ने आर येसुसिन बाचर, “ऎम नन्ना आली गुसन काना ही पाप ती कुन्द्रका ख़द्दम मलदम। एम्है ओर्तेलेका एम्बस र'अस आस धर्मेस।”
42ख़ने येसुस आरिन बाचस, “मानिम नू धर्मेस निम्है बंगस रहचस होले, नीम एंगन हूँ चोन्हा ननोर दने, एन्देरगेका ऎन धर्मेस ती बरचका र'अदन, अरा अक्कु इसन र'अदन। ऎन एंग्है मने ती मल बरचकादन, धर्मेस दिम एंगन तइय्कादस। 43ऎन एन्देर ब'अदन अदिन नीम एन्देरगे बुझुर'आ पोलदर? ईद ई चड्डे का एंग्है सिखाब'अनन नीम मल इंझ्रदर। 44नीम निम्है बंगस सैतान ही र'अदर। अरा निम्है बंगासी मने गुट्ठिन पूरा नना बेद्ददर। आस गा ऒरे तिम पिटू रहचस। आस नू मानी मलकी, औंगे मानी आस नू इज्जकी र'आ पोल्ला। आस ठक'ओ बारी आसी मानी सुबहा आबोन ऎद्ददस, एन्देरगेका आस ठकवा हवदस, अरा ठकना गुट्ठी ही बंगस हवदस। 45औंगे ऎन मानिमन ब'अना चड्डे, नीम एंगन मल पत्त'अदर। 46ऎन पाप नंजकन एन्ने एंग्है मइय्याँ बदी नन्ना ती अदन पुरुब नना नीम ओंग्दर का? ऎन मानिम तेंगदन होले, नीम एन्देरगे एंगन मल पत्त'अदर? 47एकास धर्मेसी आलस र'अदस, आस धर्मेसी कत्थन मेन्दस। नीम इदगे मल मेन्दर का नीम धर्मेसी आलर मलदर।”
अब्राहमस ती येसुस कोहँस
48तहाँ यहूदीर बाचर, “ऎम एन्देर ब'अदम आद मानिम हिके, नीन समारिया ता आलय हिकदय, अरा नीन नाद ती रस्का आलय हिकदय।” 49ख़ने येसुस बाचस, “ऎन नाद ती रस्का आलन मलदन। ऎन एम्बासिन मईन नन्दन, लिकिन नीम एंगन हींड़दर। 50ऎन एंगा गे मईन मल बेद्ददन, लिकिन एंगा गे अदन बिद्दू ओर्तोस र'अस, आसिम नेंवई ननू र'अदस। 51ऎन निमन मानिम ब'अदन, नेकईम एंग्है कत्थन पॆस्रदस होले, आस इकला हूँ मल खे'ओस।”
52ख़ने यहूदीर आसिन बाचर, “ऎम अक्कुन अक्कम का नीन नाद ती रस्का आलय हिकदय। अब्राहमस केच्चस अरा धर्मेसी कत्था तिंगुर हूँ केच्चर। लिकिन नीन ब'अदय का ‘नेकईम एंग्है कत्थन पॆस्रदस होले, आस इकला हूँ मल खे'ओस।’ 53नीन एम्है बंगस अब्राहमस ती कोहँस हिकदय का? आस केच्चस, अन्नेम धर्मेसी कत्था तिंगुर हूँ केच्चर। नीन निंगन नॆ सोचदय?” 54येसुस आनाकिर्ताचस, “ऎन ऎनिम एंगन मईन ननोन होले, एंग्है मईन एन्देर हूँ मल्ली। लिकिन एंगन मईन ननुस एम्बस हिकदस, अरा नीम ब'अदर आस निम्है धर्मेस। 55अरा नीम आसिन मानिम नू बलकर, लिकिन ऎन आसिन अख़दन। अन्नु हूँ ऎन आसिन बलदन ब'ओन होले, ऎन हूँ निम्है लेक्खा ठकवा मनोन। लिकिन ऎन आसिन अख़दन, अरा आसी कत्थन पॆस्रदन। 56निम्है बंगस अब्राहमस एंग्है उल्लन ऎरा ओंगोन ब'अरकी नगदे खुसमारस, अरा आस अदन ईरियस ती रिझ्रस।” 57ख़ने यहूदीर आसिन बाचर, “अक्कुन गा निंग्है पचास बछर हूँ अरगी मना, अन्नु हूँ नीन अब्राहमसिन ईरकादय का!” 58येसुस बाचस, “ऎन निमन मानिम ब'अदन, अब्राहमस कुन्द्रस ती मुन्द तिम ऎन र'अदन।” 59इदन मेंजर ती आर आसिन लोड़ग'आ गे पखना गुट्ठी पेत्तर। लिकिन येसुस नूख़्रस ती धर्मेसी मन्दिर ती गुच्छरस केरस।
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
यॊहनस 8: KURUXBSI
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
