Gen 48
48
UJakobe ubusisa uJosefa lamadodana akhe
1Kwathi emva kwalokhu kwathiwa kuJosefa: Khangela, uyihlo uyagula. Wasethatha amadodana akhe amabili uManase loEfrayimi. 2Kwatshiwo lakuJakobe ukuthi: Khangela, indodana yakho uJosefa iyeza kuwe. UIsrayeli waziqinisa, wavuka wahlala embhedeni. 3UJakobe wathi kuJosefa: UNkulunkulu uSomandla wabonakala kimi eLuzi elizweni laseKanani, wangibusisa,#Gen 28:13, 14 4wathi kimi: Khangela, ngizakukwandisa ube labantwana abanengi, ngikwenze ube yizizwe ezinengi, nginike inzalo yakho lelilizwe emva kwakho, libe yilifa elingapheliyo. 5Khathesi amadodana akho amabili, owawazalela elizweni laseGibithe ngingakafiki kuwe eGibithe, angawami; uEfrayimi loManase njengoRubeni loSimeyoni bazakuba ngabami. 6Inzalo yakho owayizala emva kwabo ingeyakho; izakubizwa ngebizo labafowabo ukuze badle ilifa labo. 7Minake, ekusukeni kwami ePadani‐Arama, ngafelwa nguRaheli endleleni, elizweni laseKanani, sisekhatshana leEfrathi; ngammbela khona ngasendleleni eya eEfrathi, eliliBetlehema.#Gen 35:16–19
8UIsrayeli ebona amadodana kaJosefa wathi: Ngobani laba? 9UJosefa wathi kuyise: Ngamadodana ami, anginika wona lapha uNkulunkulu. Wathi: Asondeze kimi ngiwabusise. 10Amehlo kaIsrayeli ayesefiphele ngenxa yobudala bakhe engaselakubona. UJosefa wawasondeza; wawanga, wawagona. 11UIsrayeli wathi kuJosefa: Ngangingathembi ukubona ubuso bakho, kodwa uNkulunkulu ungivumele ukuba ngibone lenzalo yakho njalo. 12UJosefa wasewasusa emadolweni akhe, wathi mbo ngobuso phansi. 13UJosefa wabathatha bobabili, ngesandla sakhe sokunene wambeka uEfrayimi ngakwesokhohlo sikaIsrayeli, langesandla sakhe sekhohlo wambeka uManase ngakwesokunene sikaIsrayeli, wabasondeza kuye. 14UIsrayeli waselula isandla sakhe sokunene, wasibeka ekhanda likaEfrayimi lanxa engomncinyane, lesandla sakhe sekhohlo wasibeka ekhanda likaManase, ephambanisa izandla zakhe, ngoba uManase wayelizibulo. 15Wasembusisa uJosefa wathi:
UNkulunkulu abahamba phambi kwakhe okhokho bami oAbrahama loIsaka,
uNkulunkulu ongondle ekuhambeni kwami konke kuze kube lamuhla,
16isithunywa esingikhulule kokubi konke, sibusise abafana;
ibizo lami lebizo labokhokho bami oAbrahama loIsaka libe ngelabo;
bande babe banengi emhlabeni.
17UJosefa esebonile ukuthi uyise ubekile isandla sakhe sokunene ekhanda likaEfrayimi, kwaba kubi kuye; wasibamba isandla sikayise ukuba asisuse ekhanda likaEfrayimi asibeke ekhanda likeManase. 18UJosefa wathi kuyise: Kakungabi njalo, baba, ngoba lo ulizibulo; beka isandla sakho sokunene ekhanda lakhe. 19Kodwa uyise wala wathi: Ngiyazi, ndodana yami, ngiyazi; laye uzakuba yisizwe abe mkhulu; kanti umfowabo omncinyane uzakuba mkhulu kulaye, lenzalo yakhe ibe yizizwe ezinengi. 20Wababusisa ngalolosuku wathi:
Nxa abantu bakoIsrayeli bebusisa abanye bazakuthi:
UNkulunkulu kakwenze ube njengoEfrayimi lanjengoManase.
Ngalokho wasembeka uEfrayimi ngaphambi kukaManase.#Heb 11:21 21UIsrayeli wathi kuJosefa: Khangela, mina ngiyafa; kodwa uNkulunkulu uzakuba lawe, akubuyisele elizweni laboyihlo. 22Futhi ngikunikile okunye okudlula lokho engakunika abafowenu, ngitsho iShekema engalithatha kumaAmori ngomkhonto langomtshoko wami.
ទើបបានជ្រើសរើសហើយ៖
Gen 48: BE1978
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Society of Zimbabwe 1978