Gen 49
49
UJakobe ubusisa amadodana akhe
1UJakobe wasebiza amadodana akhe wathi: Buthanani ukuba ngilitshele lokho okuzakulehlela ensukwini ezizayo.
2Buthanani, lizwe lina madodana kaJakobe, limlalele uyihlo uIsrayeli.
3Rubeni, wena ulizibulo lami lamandla ami, ingqabutho yamandla ami,
ozigqajayo lolamandla amakhulu.
4Kodwa njengoba uphuphuma njengamanzi, kawuyikuba ngozigqajayo,
ngoba wena wakhwela embhedeni kayihlo, wawona; impela wakhwela kuwo.
5USimeyoni loLevi bayizelamani;
imihedla yabo iyizikhali zokuphanga.
6Moya wami ungangeni emphakathini wabo,
ungahlangani labo emhlanganweni wabo;
ngoba ngolaka lwabo babulala abantu,
ngobudlova babo baquma izinkabi umsipha.
7Kaluthukwe ulaka lwabo ngoba lulamandla,
lentukuthelo yabo, ngoba ilesihluku.
Ngizakubachitha koJakobe,
ngibahlakaze koIsrayeli.
8Juda, abafowenu bazadumisa wena;
isandla sakho sizakuba sentanyeni zezitha zakho;
amadodana kayihlo azakukhothamela phansi phambi kwakho.
9UJuda unjengesilwane;
wenyukile empangweni, ndodana yami,
uguqile, ulele njengesilwane, njengesilwane esisikazi;
ngubani ozakumvusa na?#Nani 24:9; Isam 5:5
10Intonga yobukhosi kayiyikusuka kuJuda,
lodondolo lokubusa phakathi kwenyawo zakhe,
aze afike lowo ofanele lona,
labantu bonke bamlalele.
11Ubophela ithole lakhe likababhemi evinini,
lethole lakhe likababhemikazi evinini elihle.
Ugezisa ingubo zakhe ewayinini,
lezambatho zakhe egazini lezithelo zevini.
12Amehlo akhe azakuba bomvu ngewayini,
lamazinyo akhe abe mhlophe ngochago.
13UZebuluni uzakuhlala ngasolwandle,
abe litheku lemikolo,
umkhawulo wakhe uzakuba ngaseSidoni.
14UIsakari ungubabhemi olamandla,
oqutha phakathi kwezibaya.
15Wabona indawo yokuphumula ukuthi yinhle,
lelizwe ukuthi lilungile,
wagobisa amahlombe akhe ukuba athwale,
waba yisigqili somsebenzi onzima.
16UDani uzakwahlulela abantu bakhe,
engesinye sezizwe zakoIsrayeli.
17UDani kabe yinyoka endleleni,
inhlangwana emkhondweni eluma izithende zebhiza,
ukuze awe nyovane umgadi walo.
18Nkosi, ngilindele ukusiza kwakho.
19UGadi, ixuku labaphangi lizamhlasela,
kodwa yena uzohlasela ezithendeni zabo.
20UAsheri, ukudla kwakhe kuzakuba kunengi,
uzakuveza ukudla kwamakhosi.
21UNafitali uyimpala othukululiweyo ezala abantwana abahle.
22UJosefa ulugatsha oluthelayo ngasemthonjeni,
ingatsha zakhe zikhwela emdulini.
23Abatshoki bamhlupha kakhulu,
bamciba, bamzingela.
24Kodwa idandili lakhe lahlala liqinile,
lamandla ezandla zakhe aqiniswa ngezandla zikaSomandla kaJakobe,
okuvela kuye umalusi, iLitshe likaIsrayeli,
25langoNkulunkulu kayihlo ozakukusiza,
langoSomandla ozakukubusisa ngezibusiso ezivela ezulwini,
lezibusiso ezivela ngaphansi komhlaba,
lezibusiso zamabele lezesizalo,
26izibusiso zamabele lezempoko,
lezibusiso ezivela ezintabeni,
lezinto ezinhle ezivela entabeni ezimiyo kuze kube nininini;
zizakuba phezu kwekhanda likaJosefa,
laphezu kwenkanda yalowo oyisikhulu phakathi kwabafowabo.
27UBenjamini uyimpisi ephangayo:
ekuseni iyadla impango,
kusihlwa iyahlukanisa ekuphangileyo.
28Bonke labo bayizizwe ezilitshumi lambili zakoIsrayeli; futhi lawo ngamazwi kayise awakhuluma kubo lapho ebabusisa; wabusisa ilowo lalowo ngesibusiso sakhe. 29Wabalaya wathi: Sengihamba ngiya kwabaphansi; lingimbele ndawonye labobaba obhalwini olusensimini kaEfroni umHethi, 30obhalwini olusesimini yaseMakaphela eduze leMamre, elizweni laseKanani, uAbrahama owaluthenga kanye lensimu kuEfroni umHethi ibe yindawo yokungcwabela.#Gen 23:3–20 31Lapho babambela khona oAbrahama loSara umkakhe; lapho babambela khona oIsaka loRebeka umkakhe; lami kulapho ngammbela khona uLeya,#Gen 25:9, 10; 35:29 32insimu, lobhalu olukiyo, kwathengwa ebantwaneni bakaHethi. 33Kwathi uJakobe eseqedile ukulaya amadodana akhe, waziqoqela inyawo zakhe embhedeni, wafa, waya kwabaphansi.#Seb 7:15
ទើបបានជ្រើសរើសហើយ៖
Gen 49: BE1978
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Society of Zimbabwe 1978