Gen 47
47
1UJosefa wasengena kuFaro wamtshela wathi: Ubaba labafowethu lezimvu zabo lenkomo zabo lakho konke abalakho baphuma elizweni laseKanani sebefikile elizweni laseGosheni. 2Phakathi kwabafowabo wathatha amadoda amahlanu, wawamisa phambi kukaFaro. 3UFaro wathi kubafowabo: Umsebenzi wenu uyini? Bathi kuFaro: Inceku zakho zingabelusi, thina labobaba. 4Bathi futhi: Sifikile ukuba sihlale elizweni leli; ngoba kalisekho idlelo lemihlambi yenceku zakho elizweni laseKanani, futhi indlala inkulu khona. Ngakho inceku zakho zicela ukwakha elizweni laseGosheni. 5UFaro wasesithi kuJosefa: Uyihlo labafowenu beze kuwe. 6Ilizwe laseGibithe liphambi kwakho; umbeke uyihlo labafowenu esiqintini esihle kulazo zonke, ubabeke elizweni laseGosheni; uba kukhona phakathi kwabo amadoda alamandla, uwabeke abe yizinduna zokwelusa inkomo zami.
7UJosefa wasemletha uyise, wammisa phambi kukaFaro; uJakobe wambusisa uFaro. 8UFaro wathi kuJakobe: Mingaki iminyaka yobudala bakho na? 9UJakobe wathi kuFaro: Iminyaka yobudala bami ilikhulu lamatshumi amathathu; ibe imibi iminyaka yokuphila kwami, milutshwana kuleminyaka yokuhamba kwabobaba. 10UJakobe wasebusisa uFaro, wasuka waphuma. 11UJosefa wabahlalisa oyise labafowabo, wabapha indawo elizweni laseGibithe, esiqintini esihle kulazo zonke, emkhonweni waseRamesesi njengokulaya kukaFaro. 12UJosefa wabondla oyise labafowabo labo bonke abendlu kayise ngokudla njengobunengi babo.
Indlala eGibithe
13Ukudla kwakungasekho elizweni lonke, ngoba indlala yayinkulu; ilizwe laseGibithe lelizwe laseKanani afa yindlala. 14UJosefa wasebutha yonke imali yelizwe laseGibithe lelizwe laseKanani eyayitholakele ngamabele ayethengisiwe, wayiletha endlini kaFaro. 15Kwathi lapho yonke imali isiphelile elizweni laseGibithe laselizweni laseKanani, amaGibithe wonke eza kuJosefa athi: Sinike ukudla; kungani sife usikhangele na? Ngoba isiphelile imali yethu. 16UJosefa wathi: Nginikani imfuyo yenu; ngizalinika ukudla ngemfuyo yenu, uba lingaselamali. 17Basebeletha imfuyo yabo kuJosefa; uJosefa wabathengisela ukudla ngamabhiza langezimvu langezinkomo langabobabhemi. Ngomnyaka lowo wonke wabathengisela ukudla ngemfuyo yabo. 18Kwathi lapho usuphelile lowomnyaka, beza kuye ngomnyaka wesibili bathi kuye: Kasiyikuyifihlela inkosi yethu ukuthi yonke imali yethu isiphelile; lemihlambi yenkomo isingeyenkosi yethu; kakukho okuseleyo phambi kwenkosi yethu, kuphela imizimba yethu lamasimu ethu. 19Sizafelani phambi kwakho thina, lamasimu ethu alobe na? Sithenge thina lamasimu ethu ngokudla, thina sibe yizinceku zikaFaro lamasimu ethu abe ngawakhe; sinike inhlanyelo ukuze singafi, lokuba ilizwe lingachitheki.
20UJosefa wasemthengela uFaro lonke ilizwe laseGibithe, ngoba ilowo lalowo umGibithe wathengisa insimu yakhe, ngoba indlala yayinkulu kubo; lonke ilizwe laba ngelikaFaro. 21Abantu bona wabenza babe yizigqili kusukela komunye umngcele waseGibithe kwaze kwafika komunye. 22Yilizwe labapristi lodwa angalithenganga, ngoba abapristi bazuza isabelo kuFaro, badla isabelo sabo ayebanika sona; ngalokhu kabathengisanga ilizwe labo. 23UJosefa wasesithi ebantwini: Khangelani, lamhla ngilithengile, selingabakaFaro lina lamasimu enu; nansi inhlanyelo yenu yokuba lihlanyele emasimini. 24Kuzakuthi ekuvuneni limnike uFaro okwesihlanu, lezingxenye ezine zibe ngezenu, kube yinhlanyelo yamasimu lokudla kwenu lokudla kwemizi yenu, lokudla kwabantwana benu. 25Basebesithi: Wena usisilisile; asifumane umusa phambi kwenkosi yethu sibe yizigqili zikaFaro. 26UJosefa wenza umthetho mayelana lelizwe laseGibithe omiyo lalamhla wokuthi okwesihlanu kuzakuba ngokukaFaro; isiqinti sabapristi sodwa yiso esasingesiso sikaFaro.
Isifiso sokucina sikaJakobe
27UIsrayeli wakha elizweni laseGibithe, endaweni yaseGosheni; bazizuzela imfuyo khona, bazala, banda kakhulu. 28UJakobe wahlala elizweni laseGibithe iminyaka elitshumi lesikhombisa; iminyaka yobudala bukaJakobe yayilikhulu lamatshumi amane lesikhombisa.
29Kwasekusondela isikhathi sokufa kukaIsrayeli. Wabiza indodana yakhe uJosefa wathi kuye: Uba ngifumene umusa emehlweni akho, ake ubeke isandla sakho ngaphansi kwethangazi lami, ube lomusa leqiniso kimi; ungangimbeli eGibithe;#Gen 49:29–32; 50:6 30kodwa, lapho sengibhubhile njengokhokho bami, ungikhuphe eGibithe, ungimbele emathuneni abo. Wathi: Ngizakwenza njengokutsho kwakho. 31UJakobe wathi kuye: Funga. Wasefunga. UIsrayeli wakhothamela ekhanda lombheda wakhe.
ទើបបានជ្រើសរើសហើយ៖
Gen 47: BE1978
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Society of Zimbabwe 1978