Gen 46
46
UJakobe uya eGibithe
1UIsrayeli wasuka lakho konke ayelakho, wafika eBerisheba, wanikela iminikelo kuNkulunkulu kayise uIsaka. 2UNkulunkulu wakhuluma kuIsrayeli ngemibono yasebusuku wathi: Jakobe, Jakobe! Wathi: Ngilapha. 3Wasesithi: NginguNkulunkulu, uNkulunkulu kayihlo; ungesabi ukuya eGibithe, ngoba ngizakukwenza ube yisizwe esikhulu khona; 4mina ngizakuya lawe eGibithe, ngibuye ngikukhuphe; ekufeni kwakho uJosefa uzavala amehlo akho. 5UJakobe wasesuka eBerisheba. Amadodana kaIsrayeli amthwala uJakobe uyise labantwana bawo labomkawo ngezinqola ayezithumile uFaro ukumthwala. 6Bathatha inkomo zabo lempahla zabo ababezizuzile elizweni laseKanani, bafika eGibithe, uJakobe lenzalo yakhe yonke,#Seb 7:15 7amadodana akhe, lamadodana amadodana akhe, lamadodakazi akhe, lamadodakazi amadodana akhe; yonke inzalo yakhe wayiletha eGibithe.
Inzalo kaJakobe
8La ngamabizo abantwana bakaIsrayeli abafika eGibithe, uJakobe lamadodana akhe, uRubeni izibulo likaJakobe. 9Amadodana kaRubeni ayengoHanoki loPalu, loHezironi loKarimi. 10Amadodana kaSimeyoni ayengoJemuweli loJamini loOhadi loJakini loZohari loShawuli indodana yowesifazana waseKanani. 11Amadodana kaLevi ayengoGerishoni loKohathi loMerari. 12Amadodana kaJuda ayengoEri loOnani loShela loPerezi loZera; kodwa uEri loOnani bafela elizweni laseKanani. Amadodana kaPerezi ayengoHezironi loHamuli. 13Amadodana kaIsakari ayengoTola loPuva loIyobi loShimroni. 14Amadodana kaZebuluni ayengoSeredi loEloni loJaleli. 15Lawo ngamadodana kaLeya awazala kuJakobe ePadani‐Arama kanye lendodakazi yakhe uDina; bonke abantwana bakhe babengamatshumi amathathu lantathu. 16Amadodana kaGadi ayengoZifiyoni loHagi loShuni loEziboni loEriyi loArodi loAreli. 17Amadodana kaAsheri ayengoJimna loIshiva loIshivi loBeriya loSera udadewabo. Amadodana kaBeriya ayengoHeberi loMalikiyeli. 18Lawo ngamadodana kaZilipa, uLabani amnika yena uLeya indodakazi yakhe, awazala kuJakobe, abantwana abalitshumi lesithupha. 19Amadodana kaRaheli umkaJakobe ayengoJosefa loBenjamini. 20UJosefa wazala elizweni laseGibithe uManase loEfrayimi, abazala kuAsenathi indodakazi kaPotifera umpristi waseOni.#Gen 41:50–52 21Amadodana kaBenjamini ayengoBela loBekeri loAshibeli loGera loNamani loEhi loRoshi loMupimi loHupimi loAridi. 22Lawo ngamadodana kaRaheli awazala kuJakobe, abantwana abalitshumi lane. 23Indodana kaDani yayinguHushimi. 24Amadodana kaNafitali ayengoJazeli loGuni loJezeri loShilema. 25Lawo ngamadodana kaBiliha, uLabani amnika yena uRaheli indodakazi yakhe, awazala kuJakobe, abantwana abayisikhombisa. 26Bonke abantu abafika loJakobe eGibithe, abayinzalo yakhe, ngaphandle kwabafazi bamadodana kaJakobe, babengamatshumi ayisithupha lesithupha. 27Amadodana kaJosefa awazala eGibithe ayengabantwana ababili. Bonke abendlu kaJakobe abafika eGibithe babengamatshumi ayisikhombisa.#Seb 7:14
UJakobe labantwana bakhe eGibithe
28UJakobe wasethuma uJuda ngaphambi kwakhe ukuyatshela uJosefa ukuba amhlangabeze eGosheni; bafika elizweni laseGosheni. 29UJosefa esebophele inqola yakhe, waya eGosheni ukumhlangabeza uIsrayeli uyise; wazibonakalisa kuye, wamgona, wakhala isikhathi eside emgonile. 30UIsrayeli wasesithi kuJosefa: Sengingafa lokhu sengikubonile, ngiyazi ukuthi usekhona. 31UJosefa wathi kubafowabo lakubo abendlu kayise: Ngizahamba ngiyemtshela uFaro ngithi: Abafowethu labendlu kababa ababeselizweni laseKanani sebefikile; 32lamadoda angabelusi ngoba abengamadoda afuyileyo; eze lezimvu zawo lenkomo zawo lempahla yawo yonke. 33Kuzakuthi lapho uFaro elibiza esithi: Uyini umsebenzi wenu? 34kalibokuthi: Inceku zakho zingabantu bemfuyo, kusukela ebutsheni bethu kuze kube khathesi, thina labobaba. Ngalokhu lizavunyelwa ukwakha elizweni laseGosheni, ngoba wonke umalusi wezimvu uyanengeka kumaGibithe.
ទើបបានជ្រើសរើសហើយ៖
Gen 46: BE1978
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Society of Zimbabwe 1978