Gen 40
40
UJosefa uchasisa amaphupho
1Kwathi emva kwalezizinto umphathizitsha wenkosi yaseGibithe lomphekizinkwa wayo bona enkosini yabo, inkosi yaseGibithe. 2UFaro wazithukuthelela lezonduna zakhe ezimbili, induna yabaphathizitsha lenduna yabaphekizinkwa. 3Wazifaka entolongweni, indawo lapho uJosefa ayebotshelwe khona, ukuba zilondolozwe endlini yenduna yabalindi. 4Induna yabalindi yazinikela kuJosefa, wazigcina; zalondolozwa nguye khona insuku ezinengi. 5Zombili zaphupha amaphupho ngabusuku bunye, ileyo laleyo yaba lephupho layo. Umphathizitsha lomphekizinkwa wenkosi yaseGibithe ababebotshiwe besentolongweni baphupha amaphupho alencazelo ezehlukeneyo. 6UJosefa wangena kibo ekuseni, wababona benyukumele. 7Wazibuza induna zikaFaro ezazilaye zilondolozwe endlini yenkosi yakhe wathi: Kungani linyukumele lamhla na? 8Zathi kuye: Siphuphile amaphupho, kakho ongawachasisa. UJosefa wathi kuzo: Ukuchasisa kakusikho okukaNkulunkulu na? Ngitshelani wona.
9Induna yabaphathizitsha yamtshela uJosefa iphupho layo yathi kuye: Khangela, ephupheni lami kwakukhona ivini phambi kwami; 10evinini kwakukhona ingatsha ezintathu; lahluma, lakhahlela, amahlukuzo alo aba lezithelo ezivuthiweyo. 11Inkezo kaFaro yayisesandleni sami; ngasengithatha izithelo, ngazikhamela enkezweni kaFaro, ngamnika uFaro inkezo esandleni sakhe. 12UJosefa wathi kuye: Nanku ukuchasiswa kwalo. Ingatsha ezintathu ziyizinsuku ezintathu; 13zingakadluli insuku ezintathu uFaro uzakukuphakamisa, akubuyisele esikhundleni sakho; wena uzamnika uFaro inkezo yakhe esandleni sakhe njengokwenza kwakho kwakuqala lapho wawusengumphathizitsha wakhe. 14Kodwa ungikhumbule lapho usuhlezi kuhle, ungenzele umusa ungibike kuFaro, ukuze angikhuphe kulindlu. 15Ngoba ngebiwa elizweni lamaHeberu, lalapha futhi kangenzanga lutho ukuba bangifake entolongweni.
16Lapho induna yabaphekizinkwa ibona ukuthi kwakulungile ukuchasisa lokho, yathi kuJosefa: Lami ngiphuphile iphupho; bekukhona ekhanda lami izitsha ezintathu zilezinkwa ezimhlophe; 17kwakukhona esitsheni esingaphezulu inhlobo zonke zezinkwa zikaFaro; kodwa inyoni zakudla ukudla esitsheni esisekhanda lami. 18UJosefa waphendula wathi: Nanku ukuchasiswa kwalo. Izitsha ezintathu ziyizinsuku ezintathu; 19zingakadluli insuku ezintathu uFaro uzakuquma ikhanda lakho, akuphanyeke esihlahleni; inyoni zizakudla inyama yakho.
20Kwathi ngosuku lwesithathu, usuku lokuzalwa kukaFaro, uFaro wenzela inceku zakhe zonke idili; walaya ukuba kulethwe induna yabaphathizitsha lenduna yabaphekizinkwa; walaya ukuba induna yabaphathizitsha lenduna yabaphekizinkwa zilethwe phambi kwezinceku zakhe. 21Wayibuyisela induna yabaphathizitsha esikhundleni sayo; yamnika uFaro inkezo esandleni sakhe. 22Kodwa wayiphanyeka induna yabaphekizinkwa, njengokuchasiselwa kwabo nguJosefa. 23Kodwa induna yabaphathizitsha kayikhumbulanga uJosefa, yamkhohlwa.
ទើបបានជ្រើសរើសហើយ៖
Gen 40: BE1978
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Society of Zimbabwe 1978