Gen 41
41
UJosefa uchasisa amaphupho kaFaro
1Kwathi emva kweminyaka emibili waphupha uFaro; wazibona emi ngasemfuleni. 2Kwakhuphuka emfuleni amankomokazi ayisikhombisa, abukekayo anonileyo; adla emihlangeni. 3Kwakhuphuka emfuleni amanye amankomokazi ayisikhombisa emva kwawo, ekhangeleka kubi, ecakile; ema kwamanye amankomokazi okhunjini lomfula. 4Lawo akhangeleka kubi acakileyo adla abukekayo anonileyo. UFaro wasephaphama. 5Walala ubuthongo futhi, waphupha ngokwesibili; khangela, kwakhahlela izikhwebu eziyisikhombisa ohlangeni lunye, ezipheleleyo zilungile. 6Kwakhahlela emva kwazo izikhwebu eziyisikhombisa ezincinyane, zihangulwe ngumoya wasempumalanga. 7Izikhwebu ezincinyane zaginya izikhwebu ezipheleleyo ezilungileyo. UFaro wasephaphama, wabona ukuthi kwakuliphupho nje. 8Kwathi ekuseni umoya wakhe wakhathazeka; wabiza izangoma zonke zaseGibithe lazo zonke izazi. Wazilandisela iphupho lakhe; kodwa kwakungekho muntu owayengamchasisela lona.
9Induna yabaphathizitsha yasikhuluma loFaro yathi: Khathesi ngiyawakhumbula amacala ami. 10Kwathi uFaro esezithukuthelele inceku zakhe, wangifaka endlini yenduna yabalindi ukuba ngilondolozwe khona, mina lenduna yabaphekizinkwa; 11saphupha amaphupho ngabusuku bunye, mina layo. Saphupha, ilowo lalowo waphupha iphupho elilencazelo ezehlukeneyo. 12Kwakukhona kanye lathi insizwa engumHeberu, inceku yenduna yabalindi; sayilandisela amaphupho ethu, yasichasisela wona; kwaba yilowo lalowo ngokwephupho lakhe. 13Kwenzakala njengokusichasisela kwayo; mina inkosi yangibuyisela esikhundleni sami, yena yamphanyeka.
14UFaro wasembiza uJosefa; bamkhupha entolongweni ngokuphangisa; esephucile wafaka ezinye izigqoko, wangena kuFaro. 15UFaro wathi kuJosefa: Ngiphuphile iphupho, kakho ongalichasisa; ngizwile ngawe ukuthi nxa ulandiselwa iphupho, ungalichasisa. 16UJosefa wamphendula uFaro wathi: Kakukho emandleni ami lokho. UNkulunkulu uzamphendula kuhle uFaro. 17UFaro wathi kuJosefa: Ephupheni lami ngangimi okhunjini lomfula; 18khangela, kwakukhuphuka emfuleni amankomokazi ayisikhombisa, anonileyo abukekayo, adla emihlangeni. 19Kwakhuphuka amanye amankomokazi ayisikhombisa emva kwawo, amabi, acakileyo; angizanga ngiwabone amabi njengawo kulo lonke ilizwe laseGibithe. 20Kwathi amankomokazi akhangeleka kubi adla amankomokazi ayisikhombisa okuqala anonileyo. 21Lapho esewadlile kakubonakalanga ukuthi awadlile, ngoba ayelokhu ekhangeleka kubi njengakuqala. Ngasengiphaphama. 22Ngabona kwelinye iphupho lami izikhwebu eziyisikhombisa zikhahlela ohlangeni lunye, ziphelele zilungile; 23kwasekukhahlela emva kwazo izikhwebu eziyisikhombisa ezitshwabheneyo, zizincinyane, zihangulwe ngumoya wasempumalanga. 24Izikhwebu ezincinyane zaginya izikhwebu eziyisikhombisa ezilungileyo. Ngakulandisela izanuse lokhu; kodwa kwakungekho sanuse esasingangichasisela khona.
25UJosefa wasesithi kuFaro: Amaphupho kaFaro ayafanana. Lokho uNkulunkulu asezakukwenza, umazisile khona uFaro. 26Amankomokazi ayisikhombisa alungileyo ayiminyaka eyisikhombisa; lezikhwebu eziyisikhombisa ezilungileyo ziyiminyaka eyisikhombisa. Amaphupho ayafanana. 27Amankomokazi acakileyo akhangeleka kubi akhuphuka emva kwawo ayiminyaka eyisikhombisa; izikhwebu eziyisikhombisa ezincinyane ezihangulwe ngumoya wasempumalanga ziyiminyaka eyisikhombisa yendlala. 28Kuyikho lokhu engikutshiloyo kuFaro ukuthi lokho uNkulunkulu asezakukwenza, ukubonakalisile kuFaro. 29Kuzakuba khona iminyaka eyisikhombisa yenala enkulu kulo lonke ilizwe laseGibithe. 30Emva kwayo kuzakuba khona iminyaka eyisikhombisa yendlala; izakhohlakala inala yonke elizweni laseGibithe; indlala izaliqeda ilizwe. 31Inala kayiyikukhunjulwa elizweni ngenxa yendlala elandelayo, ngoba izakuba nzima kakhulu. 32Ukuba iphupho liphindwe kabili kuFaro kungoba lokhu kumisiwe nguNkulunkulu, futhi uNkulunkulu uzakukwenza masinyane. 33Ngakhoke uFaro kadinge umuntu oqaphelisayo lohlakaniphileyo, ambeke ukuba aphathe ilizwe laseGibithe. 34UFaro kenze nje, abeke ababonisi baphathe ilizwe; balondoloze okwesihlanu kwezithelo zelizwe laseGibithe eminyakeni eyisikhombisa yenala. 35Babuthe konke ukudla kwaliminyaka elungileyo ezayo, babuthele amabele okudla emizini ngokulaya kukaFaro, bawagcine. 36Ukudla lokhu kuzakubekelwa ilizwe ngenxa yeminyaka eyisikhombisa yendlala ezakuba khona elizweni laseGibithe, ukuba ilizwe lingabhujiswa yindlala.
Ukuphakanyiswa kukaJosefa
37Lokhu kwaba kuhle kuFaro lasezincekwini zakhe zonke. 38UFaro wasesithi ezincekwini zakhe: Singamthola yini onjengaye, umuntu okukuye umoya kaNkulunkulu na? 39UFaro wathi kuJosefa: Njengalokhu uNkulunkulu ekutshengisile lokhu konke, kakho oqaphelisayo lohlakaniphileyo njengawe. 40Wena uzaphatha indlu yami, bonke abantu bami bazabuswa ngelizwi lakho; mina ngizakuba mkhulu kulawe esihlalweni sobukhosi kuphela.#Seb 7:10 41UFaro wathi futhi kuJosefa: Khangela, sengikubekile ukuphatha lonke ilizwe laseGibithe: 42UFaro wakhupha indandatho yakhe esandleni sakhe, wayifaka esandleni sikaJosefa, wamambathisa izigqoko zelembu elihle, wamgaxa iketane legolide. 43Wamkhwelisa enqoleni yakhe yesibili; bahamba phambi kwakhe bememeza besithi: Mkhothameleni! Wambeka ukuba aphathe lonke ilizwe laseGibithe. 44UFaro wathi kuJosefa: NginguFaro; ngaphandle kwelizwi lakho kakho umuntu ozakuphakamisa isandla sakhe loba unyawo lwakhe elizweni lonke laseGibithe. 45UFaro wamutha ibizo uJosefa elokuthi nguZafenathi‐Paneya. Wamnika uAsenathi, indodakazi kaPotifera umpristi waseOni, ukuba abe ngumkakhe. UJosefa waphuma, walihamba ilizwe lonke laseGibithe.
46UJosefa wayeleminyaka engamatshumi amathathu mhla esima phambi kukaFaro inkosi yaseGibithe. UJosefa waphuma kuFaro, wadabula ilizwe lonke laseGibithe. 47Eminyakeni eyisikhombisa yenala umhlaba wathela kakhulu. 48Waqoqa konke ukudla kweminyaka leyo eyisikhombisa elizweni laseGibithe, wakubuthela emizini; ukudla kwamasimu azingelezele lowo lalowo umuzi wakubuthela kuwo. 49UJosefa wabutha amabele aba ngangetshebetshebe lolwandle, aba manengi kakhulu waze wayekela ukulinganisa, ngoba engasalinganiseki.
50UJosefa wazala amadodana amabili ungakafiki umnyaka wendlala, ewazala kuAsenathi indodakazi kaPotifera umpristi waseOni. 51UJosefa waqamba ibizo lezibulo wathi nguManase, wathi: Ngoba uNkulunkulu ungenze ukuba ngikhohlwe konke ukuhlupheka kwami lendlu yami yonke kababa. 52Wabiza ibizo leyesibili wathi nguEfrayimi, wathi: Ngoba uNkulunkulu ungenze ukuba ngizale elizweni lokuhlupheka kwami.
53Kwasekuphela iminyaka eyisikhombisa yenala eyayiselizweni laseGibithe. 54Kwasekuqala ukufika iminyaka eyisikhombisa yendlala, njengokutsho kukaJosefa. Kwaba khona indlala emazweni wonke, kodwa elizweni laseGibithe kwakukhona ukudla.#Seb 7:11 55Kwathi ilizwe lonke laseGibithe selilamba, abantu bakhala ngokudla kuFaro. UFaro wathi kiwo wonke amaGibithe: Yanini kuJosefa, lenze lokho azalitshela khona.#Joha 2:5 56Ngakhoke kwathi sekulendlala emhlabeni wonke, uJosefa wasevula zonke iziphala, wathengisela amaGibithe amabele; indlala yayinkulu elizweni laseGibithe. 57Wonke amazwe ayefika kuJosefa eGibithe ukuzathenga amabele, ngoba indlala yayinkulu emhlabeni wonke.
ទើបបានជ្រើសរើសហើយ៖
Gen 41: BE1978
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Society of Zimbabwe 1978