Gen 42
42
Abafowabo bakaJosefa baya eGibithe
1UJakobe esezwile ukuthi kukhona amabele eGibithe, wathi emadodaneni akhe: Kungani likhangelana nje? 2Wathi: Khangelani, ngizwile ukuthi kukhona amabele eGibithe; yehlani liye khona, lisithengele amabele, ukuze sisile singafi.#Seb 7:12 3Abafowabo bakaJosefa abalitshumi baya eGibithe ukuthenga amabele. 4Kodwa uBenjamini, umfowabo kaJosefa, uJakobe kamthumanga labafowabo, ngoba wathi: Funa ehlelwe ngokubi. 5Amadodana kaIsrayeli afika kanye labanye ukuba athenge amabele, ngoba indlala yayikhona elizweni laseKanani.
6UJosefa wayengumbusi welizwe: nguye owayethengisela abantu bonke belizwe; bafikake abafowabo, bamkhothamela ngobuso emhlabathini. 7UJosefa esebabonile abafowabo, wabazi, kodwa wazitshaya ongabaziyo, wabahalada wathi kubo: Liphuma ngaphi? Bathi: Sivele elizweni laseKanani, size ukuthenga ukudla. 8UJosefa wabazi abafowabo, kodwa bona kabamazanga. 9UJosefa wasekhumbula amaphupho awaphupha ngabo, wathi kibo: Lizinhloli, lize ukuba libone ubuthakathaka belizwe.#Gen 37:5–10 10Bathi kuye: Atshi, nkosi; kodwa inceku zakho zize ukuthenga ukudla. 11Sonke singamadodana andodanye; singabantu abaqotho, inceku zakho kazisizo izinhloli. 12Wathi kubo: Atshi bo! kodwa lize ukubona ubuthakathaka belizwe. 13Bathi: Thina zinceku zakho siyizelamani ezilitshumi lambili, amadodana andodanye elizweni laseKanani; khangela, encinyane ikubaba, enye kayisekho. 14UJosefa wathi kubo: Kuyikho lokho engikutshoyo kini, ukuthi: Lizinhloli. 15Kodwa lizahlolwa kulokhu; ngifunga uFaro, kaliyikusuka lapha kuze kufike umfowenu omncinyane. 16Thumani omunye wenu, amlande umfowenu; lizakubotshwa ukuba kuhlolwe amazwi enu, kubonwe ukuthi liqinisile yini; uba kungenjalo, ngifunga uFaro, impela lizinhloli. 17Wabafaka entolongweni ukuba balondolozwe insuku ezintathu.
18UJosefa wasesithi kubo ngosuku lwesithathu: Yenzani lokhu ukuba lisile, ngoba ngiyamesaba uNkulunkulu. 19Uba lingabaqotho, kasale omunye wabafowenu endlini yokulondolozwa kwenu, kodwa abanye bahambe, base amabele kwabakini abalambayo, 20lilethe umnawenu omncinyane kimi ukuba kubonakale iqiniso lamazwi enu, ukuze lingabulawa. Benza njalo. 21Basebekhulumisana besithi: Impela silecala ngomfowethu, ngoba sabona usizi lwenhliziyo yakhe, wasincenga, kodwa kasimlalelanga; ngenxa yalokho sehlelwe yikuhlupheka lokhu. 22URubeni wabaphendula wathi: Kangitshongo yini ukuthi lingezi okubi kuye umfana? Kodwa kalingilalelanga. Ngakho khangelanike, igazi lakhe selibizwa kithi.#Gen 37:21, 22 23Babengazi ukuthi uJosefa uyabezwa, ngoba kwakulomtoliki phakathi kwabo. 24Wabafulathela, wakhala; wabuya waphendukela kubo, wakhuluma labo; wasethatha uSimeyoni phakathi kwabo, wambopha phambi kwabo. 25UJosefa waselaya ukuba amasaka abo agcwaliswe ngamabele, lokuba imali yalowo lalowo ibuyiselwe esakeni lakhe, banikwe umphako wohambo lwabo; kwenziwa njalo. 26Basebesethwesa obabhemi babo amabele abo, basuka lapho. 27Kwathi omunye evula isaka lakhe ukuba anike ubabhemi wakhe ukudla endlini yezihambi, wabona imali yakhe isemlonyeni wesaka. 28Wathi kubafowabo: Imali yami ibuyiselwe; nansi isesakeni lami. Batshaywa luvalo kakhulu, bakhangelana bethuthumela, bathi: Kuyini lokhu uNkulunkulu akwenze kithi na?
29Bafika kuJakobe uyise elizweni laseKanani, bamlandisela konke okwenzakeleyo kubo; 30bathi: Umuntu ongumbusi walelolizwe wasihalada kakhulu, wathi siyizinhloli zelizwe. 31Thina sathi kuye: Singabaqotho; kasisizo izinhloli; 32siyizelamani ezilitshumi lambili, amadodana omuntu munye; enye kayisekho, lenye encinyane ikubaba khathesinje elizweni laseKanani. 33Lowomuntu ongumbusi welizwe wathi kithi: Ngizakubona ngalokhu ukuba lingabantu abaqotho yini; tshiyani omunye wabafowenu kimi, lihambe lise amabele kwabakini abalambayo, 34lilethe umnawenu omncinyane kimi; ng’khona ngizakubona ukuthi kalisizo izinhloli kodwa lingabaqotho, ngilinike umfowenu, lithenge elizweni.
35Kwathi sebethulula amasaka abo, bafumanisa isikhwama semali salowo lalowo sisesakeni lakhe. Lapho bona loyise bebona izikhwama zabo zemali, batshaywa luvalo. 36UJakobe uyise wathi kubo: Liyangamuka abantwana bami; uJosefa kasekho loSimeyoni kasekho, lakhathesi selizakuthatha uBenjamini; konke lokhu kwehlela phezu kwami. 37URubeni wasekhuluma kuyise esithi: Bulala amadodana ami womabili uba ngingambuyisi kuwe uBenjamini; mnikele esandleni sami, ngizambuyisa kuwe. 38UJakobe wathi: Umntanami kayikuhamba lani, ngoba umfowabo sewafa, kusele yena yedwa; uba esehlelwa yingozi endleleni elihamba ngayo, lizakwehlisela endaweni yabafileyo izimvi zami ngosizi.
ទើបបានជ្រើសរើសហើយ៖
Gen 42: BE1978
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Society of Zimbabwe 1978