मेथा 20
20
घुन्डुम दुम्रागी मीलाकगी पे
1“नाम्खे ग्यासी दे ॱङारोक ॱङात्ती सोरी, राङगी घुन्डुमगी दुम्रागी क्षीला मीलाक चारु डुगीन, खीमगी दाक्पो च्योक्रे लाक। 2श्याक्मो च्यीकगी ॱला तेरयेगोला खा क्षाम्दी, खी़ खुङक्याला खोरी घुन्डुमगी दुम्रादु झावालाक। 3छुची घुवा चो़ला खो फीला डी़ घाङला, खी़ लेगा मेगीन मी श्येम्माक्या ठोम्सारु धेता थोवालाक। 4धेनी खी़ खुङक्याला ॱनेवालाक, ‘खेक्याः घुन्डुमगी दुम्रादु सोङ धेनी ॱला तेर घो़गीनगो, ङी खेक्याला तेरु।’ 5होझ्येरी खुङक्या सोवालाक। धेनी धाब्ले छुची च्युङङी धाङ सुम्बाला खो फीला थो़न्दी होदेरेराङ झ्येवालाक। 6धेनी छुची ॱङावा चो़ला, खो फीला थो़न्दी याङ मी श्येम्माक्या लेगा मेताला धेती श्याक्कीनगो थोवालाक। धेनी खी़ खुङक्याला ॱनेवालाक, ‘खेक्या ङीन्घाङ लेगा मेता दुरु घीझ्येरी लारी धेता?’ 7खुङक्याई ॱनेवालाक, ‘मी सी़या हेक्याला ॱलाला लेगा कुगी मीदुक।’ खी़ खुङक्याला ॱनेवालाक, ‘खेक्याः घुन्डुमगी दुम्रादु लेगा झ्यीरु सोङ।’
8“धा घोमो झ्युङी घाङला, घुन्डुमगी दुम्रागी दाक्पोगी़ खोरी ॱङेरपाला भो़री ॱनेवालाक, ‘मीलाकक्याला भो़री, खुङक्याला स्याम्योकने गो चुक्ती, धाङपो थुक्पे ॱलाज्या तेर।’ 9धेनी छुची ॱङावाला होवा मीलाकक्या होरी खुङक्याला ङीन्घाङगी ॱलाज्या जोरपालाक। 10धा धाङपोला हुङगीन मीलाकक्याई, खोराङक्याला देने माङा ॱलाज्या थोप्टु साम्बालाक हीना खुङक्यालाः ङीन्घाङगी ॱलाज्या च्यीगा जोरपालाक। 11धेनी होदे जोरती, खुङक्या खीमगी दाक्पोगोला खा तारी 12ॱनेवालाक, ‘दे स्याम्योकला हुङगीनक्याई छुची च्यीक च्यीगा लेगा झ्येवालाक हीना हेक्या ङीमाला छीक्ती, ङीन्घाङ काल्ले ग्याप्तीया, खेराङगी खुङक्याला हेक्या ढाडा ॱलाज्या तेरी।’ 13धेनी दाक्पोगी़ खुङक्याने च्यीकला लेन ग्याप्पालाक, ‘छोटोओ, ङी ख्यो़ला मेढाङा घीया माझ्ये। ङीन्घाङगी ॱलाज्या देचो़लाराङ, ख्यी़ ङीमुला खेलेन्बा माले? 14राङगी थोप्ताङगो खेरती सोङ। दे स्याम्ला हुङगीन मीलाकक्यालाः, खेक्याला च्योक्रे तेरये ङा दो़दीहो़क। 15ङी हीन्गीनगोला ङा घी झ्यीङी दो़गीनगो, ङा झ्यी ॱमेक्षोक्वाले? ङी ॱङीङजे झ्यीदाङगोला ख्यो़ ठादोक लाङाले?’
16“होझ्येरी स्याम्ला हीन्गीनक्या, एन्ला झ्युङगीलाक धेनी एन्ला हीन्गीनक्या स्याम्ला लेगीलाक।”
राङगी छीवे कोरला येशुगी ॱङो़नस्ये सुम्बा
(मारकु १०:३२-३४; लुका १८:३१-३४)
17धेनी येशु येरुसालेमला फेई घाङला, खोङबागी ङेने च्युङङीक्याला शुरला ठीक्ती, लाम्गाला खोङगी खुङक्याला सुवालाक, 18“ङेन्दाङ, होराङक्या येरुसालेमला डोवालाक। धेनी मी-भु, क्षो़पो़न क्षेक्या धाङ क्षो़ठीमगी ॱलोपो़नक्याई लागला ची ग्याप्कीलाक धेनी खुङक्याई खोला सेयेगी ठीम चेगीलाक। 19धेनी खोला याहुदापा मेन्गीन मीरीकक्याई लागला क्षाले ग्याप्ये धाङ ताजाक श्युरये धाङ ग्याङस्यीङला क्याङयेगी क्षीला, ची ग्याप्कीलाक। हीना ङीमा सुम्बागोला खो सो़न्पो श्याङगीलाक।”
आमा च्यीकगी श्योवा
(मारकु १०:३५-४५)
20धेनी जेबेदीगी भीजाक्याई आमागो, खोरी भीजाक्यामुला येशु डुङदु श्योवा च्यीक पुयेला पी़मु साला चुक्ती धेपालाक। 21धेनी खोङबागी मोला सुवालाक, “ख्यो़ला घी घो़ली ओ?”
धेनी मी़ श्यी़वालाक, “ङी भीजा ॱङीउ देने, खेराङगी ग्यासीदु च्यीक खेराङगी ॱये धाङ च्यीक खेराङगी ॱयो़न स्योकला धेतु च्युक्येला का ॱनाङरो जे।”
22धेनी येशुगी सुवालाक, “ख्यी़ श्युगीनगी दो़नगो ख्यो़ ॱमेस्येलालाक। ङी थुङ घो़गीन दुक्पुगी फोराने खेक्या थुङ थोवाई?”
धेनी खुङक्याई “थुङ थुक्येहो़क” ॱनेरी ॱनेवालाक।
23खोङबागी खुङक्याला सुवालाक, “ङी फोराने खेक्याई थुङगीलाक हीना ङी ॱये धाङ ॱयो़नला धेतु च्युक्कीनगी आङजा ङाला मेक। होदे नी ङी यापगी सी़ क्षीला स्यामदुक होदेगी क्षीलाराङ लाक।”
24धेनी श्येम्मा ङेने च्युगी होदे घोरी घाङला, खुङक्या खुङ पी़न ॱङीउमुला ठो़वालाक। 25हीना येशुगी खुङक्याला राङचारु भो़री सुवालाक, “याहुदापा मेन्गीन मीरीकक्याई पो़न्पोक्या, खुङक्या खाला ठीम झ्यीदालाक धेनी खुङगी मी खाक्क्षेक्याई, खुङक्या खाला वाङ झ्यीदालाक ॱनेरी खेक्या स्येलालाक। 26खेक्या घुङदु देरे झ्युङगीमालाक। हीना खेक्याने क्षे झ्युङङी दो़गीनगो, घीरीगी ॱयोक्पो झ्युङ घो़गुलाक। 27धेनी खेक्याने एम्मा झ्युङङी दो़गीनगो, घीरीगी ढेन्योक झ्युङ घो़गुलाक। 28होझ्येरी मी-भुगोवा श्याप्ची लेन्दु होवा मेन्दा, श्याप्ची श्युरु होवालाक धेनी मी माङागी थारपागी क्षीला, राङगी ॱरोक पुरु होवालाक।”
मी श्यारा ॱङी चो़गा झ्युवा
(मारकु १०:४६-५२; लुका १८:३५-४३)
29धेनी येशु धाङ खोङबागी ङेनेक्या येरीकोने थो़न्दी फेई घाङला, मीछोक क्षे च्यीक खोङबागी स्याबाला डावालाक। 30धेनी लाम्गागी शुरला धेता श्यारा ॱङीगी, येशु होदेने फेई ॱनागीनगो घोरती फेरा ग्याप्ती ॱनेवालाक, “चोवो, दावीदगी से, हेक्याला ॱङीङजे शीया जे!” 31मीछोकगी खुङ ॱङीउला खाबा धो़क ॱनेरी आङजी तावालाक हीना खुङ ॱङीउ ॱयोल्ले फेरा क्षे ग्याप्ती ॱनेवालाक, “चोवो ला, दावीदगी से, हे ॱङीउला ॱङीङजे शीक्रोनाङ!”
32धेनी येशुगी छाम श्या जेदी, खुङक्याला भो़री सुवालाक, “खीकी क्षीला ङा घी झ्यीगीनगो दो़दी हेतो?”
33खुङक्याई श्यी़वालाक, “चोवो, हीकी ॱमीक पेया जेरोनाङ।”
34धेनी येशुगी ॱङीङजे केरी, खुङक्याई ॱमीक खाला क्षाक जेपालाक धेनी लाम्साङ खुङक्याई ॱमीक थोवालाक धेनी खोङबागी स्याम्ला डावालाक।
ទើបបានជ្រើសរើសហើយ៖
मेथा 20: LOY
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
