मेथा 21
21
येरुसालेमदु येशुला फेप्सु
(मारकु ११:१-११; लुका १९:२८-४०; योहान्ना १२:१२-१९)
1धेनी येशु धाङ खोङगी ङेनेक्या येरुसालेमगी ङ्येडामदु फेप्ती, क्युरुस्यीङगी रीदु हो़गीन बेथफागेदु ॱलेप्पालाक। धेनी येशुगी ङेने ॱङीला देरे सुरी झावालाक, 2“खेक्याई दोङदु हो़गीन युदु सोङ धेनी होदुरु ॱलेप्लुङ मेताला, खेक्याई भुङगु च्यीक राङगी भुङटुमुला ताक्ती श्याकश्या ॱङेगीलाक। होदेक्याला टोरी ङीचारु ठीक्ती स्योक। 3धेनी मी रेगी खेक्याला च्यीक रे ॱनाना, खे ॱङीउ देरे ॱनो़, ‘चोवोला देक्या घो़ली।’ धेनी होदेगी खेक्याला लाम्साङ ठीक्तु च्युक्कीलाक।”
4ॱङो़नस्येखेनगी थोक्ने देरे सुङगीनगो डुप्तु च्युक्येला देरे झ्युवालाक,
5“सीयोनगी भोमोला ॱनो़,
‘तो़दाङ, ख्यी़ ग्यावुगो ॱङ्यामच्युङ झ्युरी,
भुङगु खाला, भुङगी भुङटु च्यीक खाला,
ख्यी़चारु फेई।’”#जेकारीयास ९:९
6धेनी ङेने ॱङीउ सोरी, येशुगी सुङगीन च्योक्रे झ्येवालाक। 7धेनी खुङ ॱङीउगी भुङगु धाङ भुङटुगो ठीक्ती, होरी राङगी घोलाकक्या होदेक्या खाला ग्याप्ती धेनी येशु होदे खाला क्षीप्पालाक। 8मीछोक माङक्षेगी राङगी शाङगो़क्या लाम्गाला तीवालाक धेनी श्येम्माक्याई च्याङमागी लोमाक्या चेदी, लाम्गाला टाम्बालाक। 9धेनी खोङबागी दोङ धाङ ग्यापला ग्युक्कीन मीछोकक्याई केक ग्याप्ती ॱनेवालाक,
“दावीदगी सेला होसान्ना#२१:९ होसान्ना ॱनाना ईब्रीपा केकला “को़न्क्षोकला तो़टा” लाक।,
चोवोगी छेनने फेप्कीन, खोङबा घीन्गी झ्यीलाप क्षे!
थोस्योकरु हो़गीनगोला होसान्ना!”#सुङगुर ११८:२५-२६
10धेनी खोङबा येरुसालेमदु फेप्ती ग्याजा घीरीदु “दे सुले?” ॱनेरी ॱमीच्यीकी ढेगे झ्युवालाक। 11धेनी मीछोकक्याई ॱनेवालाक, “दे नी गालीलगी नाजारेतने हीन्गीन, ॱङो़नस्येखेन येशुगो लाक।”
येशु येरुसालेम क्षो़खाङदु फेप्पा
(मारकु ११:१५-१९; लुका १९:४५-४८; योहान्ना २:१३-२२)
12येशु को़न्क्षोकगी क्षो़खाङगी ॱयाक्कुरु फेप्ती, होदुरु छोङ झ्यीगीनक्याला फीला तो़न जेपालाक धेनी ॱङु जेप्गीनक्याई चोक्चे धाङ पुङमु चोङगीनक्याई कुपक्याक्या गुती ॱलोक जेपालाक। 13खोङबागी खुङक्याला सुवालाक, “‘ङी खाङबा नी, ॱमो़लामगी खाङबा ॱनेरी ॱनागीलाक।’#यस्याया ५६:७; येरेमीया ७:११ ॱनेरी सुङरापला ढीक हो़तालाक हीना खेक्याई देला झ्याक्पाक्याई छाङ शो़दुक।”
14श्यारा धाङ श्याक्योकक्या क्षो़खाङदु खोङबागी दोङदु होवालाक धेनी खोङबागी खुङक्याला ढाक्सो़ ॱनावालाक। 15हीना खोङबागी देरे ॱहाङसागीन क्षालेक्या जेगीनगो धाङ टुवाक्याई क्षो़खाङदु “दावीदगी सेला होसान्ना” ॱनेरी केक ग्याप्कीनगो, क्षो़पो़न क्षेक्या धाङ क्षो़ठीमगी ॱलोपो़नक्याई थोरी, खुङक्या श्येताङ लावालाक।
16धेनी खुङक्याई येशुला ढीवालाक, “देक्याई घी ॱनी ख्यी़ घोरी?”
धेनी येशुगी खुङक्याला सुवालाक, “घोरी। ‘टुवाक्या धाङ होमा थुङगीन ॱमाङ्याकक्याई खाने, खेराङगी तो़टा झ्यीदु च्युक्दुक।’#सुङगुर ८:२ ॱनेरी सुङरापला ढीक्टागो खेक्याई नामा ॱमालोक हो़ती?” 17धेनी खुङक्याला भोरती, खोङबा ग्याजाने थो़न्दा जेदी, बेथानीरु फेप्पालाक धेनी होदुरु श्युक्पालाक।
ढेबु मेगीन सेयापगी दोङबो
(मारकु ११:१२-१४,२०-२४)
18ॱङारोक ॱङात्ती येशु ग्याजारु लोक्ती फेई घाङला, खोङबा टेवालाक। 19लाम्गागी शुरला सेयापगी दोङबो शीक्ती, खोङबा होदे डामदु फेप्पालाक हीना होदुरु लोमा माना श्येम्मा घीया ॱमाङेबालाक। धेनी खोङबागी होदेला सुवालाक, “देने ॱहाला ढेबु नामाः ॱमाकेया स्योक!” धेनी लाम्साङ होदे सेयापगी दोङबोगो काम्बालाक।
20ङेनेक्याई दे थोरी खुङक्या ॱहालेरी, खोङबाला श्यी़वालाक, “दे सेयापगी दोङबो घाङगी झ्येरी लाम्साङ काम्बाले?”
21धेनी येशुगी खुङक्याला कालेनदु सुवालाक, “ङा खेक्याला धेन्पाराङ ॱनाहीन, दोक्पा मीझ्यीदा धेपा झ्यीना सेयापगी दोङबो देला घी झ्युङगीनगो च्यीगा झ्यी थुक्ये मेन्दा, दे री देला ‘देने कोक्ती ग्याछो नाङला ल्हीम,’ ॱनेरी ॱनाना होदेरेराङ झ्युङगीलाक। 22खेक्याला धेपा हो़ना, खीकी ॱमो़लामला घी श्यी़ली होदे थोप्कीलाक।”
येशुगी आङजागी कोरला ढीवा
(मारकु ११:२७-३३; लुका २०:१-८)
23धेनी येशु को़न्क्षोकगी क्षो़खाङ नाङदु फेप्ती, होदुरु क्षो़ सुङी घाङला क्षो़पो़न क्षेक्या धाङ मीमाङक्याई गेम्पाक्या, खोङबाचारु च्यारती श्यी़वालाक, “सी़ आङजाने ख्यो़ दे घीरी झ्यीदा धेनी देरे आङजा ख्यो़ला सी़ तेरजो?”
24येशुगी खुङक्याला सुवालाक, “ङाः खेक्याला ढीवा च्यीक ढीयेहीन। धेनी खेक्याई लेन तेरना, ङा आङजा घाने दे घीरी झ्यीदाले ॱनेरी खेक्याला स्येयेहीन। 25योहान्नागी ठी़सो़ दे घाने झ्युवाले? नाम्खे श्यीङखामने झ्युवाले याङना मीने झ्युवाले?”
धेनी खुङक्याई खोराङक्या नाङदु ढो़ झ्येरी देरे ॱनेवालाक, “नाम्खे श्यीङखामने लाक ॱनाना, खी़ होराङला ‘खोला घीझ्येरी धेपा मीझ्यीदा?’ ॱनागुलाक। 26हीना मीने झ्युवालाक ॱनेरी ॱनाना, मी घीरीगी योहान्नाला ॱङो़नस्येखेन लाक ॱनेरी चीरी, होराङ मीछोकला जीयालाक।”
27होझ्येरी खुङक्याई येशुला ॱनेवालाक, “हेक्याला स्येयेमेक।”
धेनी खोङबागी खुङक्याला ॱनेवालाक, “देरे हीन्ना, ङा खेक्याला दे घीरी आङजा घाने झ्यीदाले ॱनेरी ॱमेस्ये।”
भु ॱङीगी पे
28येशुगी सुवालाक, “खेक्याई साम्लो देला घारे हेतो? धा मी च्यीकला भीजा ॱङी हो़तालाक। धेनी खो भीजा क्षेगो चारु सोरी ॱनेवालाक, ‘भीजो, सोरी धीरीङ घुन्डुमगी दुम्रादु लेगा झ्यीले।’ 29भीजागी़ ॱनेवालाक, ‘ङा मेडो।’ हीना स्याम्ला खो ग्यो़पा केरी सोवालाक। 30धेनी आकीगी़ भीजा च्युङाचारु सोरी होदेरेराङ ॱनेवालाक। धेनी खी़ ॱनेवालाक, ‘ङी डोउ।’ हीना खो ॱमासोवालाक। 31धा दे ॱङीउने आकी खाला सी़ ङेन्जो?”
खुङक्याई ॱनेवालाक, “भीजा क्षेगी़।”
येशुगी खुङक्याला सुवालाक, “ङा खेक्याला धेन्पाराङ ॱनाहीन, ठा धुगीनक्या धाङ श्याङचोङमाक्या, खेक्याने एन्ला को़न्क्षोकगी ग्यासीदु डुगीलाक। 32घीझ्येरी ॱनाना ठी़सो़खेन योहान्ना, खेक्याला ढाङतेनगी लाम तो़न्दु होवालाक धेनी खेक्याई खोला धेपा माझ्येवालाक। हीना ठा धुगीनक्या धाङ श्याङचोङमाक्याई, खोला धेपा झ्येवालाक। धेनी खेक्याई दे थोरीयाः, खेक्याई सेम ग्युरती खोला धेपा माझ्येवालाक।”
घुन्डुम दुम्रागी पे
(मारकु १२:१-१२; लुका २०:९-१९)
33येशुगी याङ सुवालाक, “पे श्येम्मा च्यीक ङेन। नाङगी दाक्पो च्यीकगी घुन्डुम दुम्रा च्यीक ताप्ती, छोक श्यीला बार कोरपालाक। धेनी घुन्क्षाङ चीरछे शो़री, थोक्खाङ च्यीक शो़वालाक धेनी होदे दुम्रा बोक्माला तारी, खोराङ यु श्येम्मा च्यीकला सोवालाक। 34धेनी ढेबु धुगीन धी़चो़ हुङाराङ, खी़ खोरी कादा लेन्दु ॱयोक्पोक्याला होदे बोक्माला लेन्गीनक्याचारु तावालाक। 35हीना होदेक्याई खी़ ॱयोक्पोक्याला ठीक्ती सोरी, च्यीकला दुङ च्यीकला से धेनी च्यीकला धोगोङ श्युरपालाक। 36धाब्ले दाक्पोगी़ एम्माने माङा ॱयोक्पोक्याला झावालाक धेनी खुङक्याई होदेक्याला एम्मा च्योक्रे झ्येवालाक।
37“धेनी ‘खुङक्याई ङी भीजाला चीटु’ ॱनेरी, खी़ श्युकला खोरी भीजागो झावालाक। 38हीना होदे बोक्माला लेन्गीनक्याई भीजागोला थोरी देरे ॱनेवालाक, ‘दे नी ग्युज्यीनगो लाक। स्योक, खोला सेदी खी़ थोप्ताङगो होराङ ठोउ।’ 39धेनी खुङक्याई खोला शीम्दी ठीक्ती सोरी, दुम्रा फीला ॱयुक्ती सेपालाक।
40“धा दुम्रागी दाक्पोगो हुङी घाङला, खी़ खुङक्याला घी झ्यीदी हेटु?”
41खुङक्याई ॱनेवालाक, “खी़ होदे ङेन्पाक्याला दुक्पु तारी सेटु धेनी धी़चो़ला खोरी थोप्ताङ ढेबु तेरकीन, मी श्येम्माक्याला होदे दुम्रागो बोक्माला तेरटु।”
42येशुगी खुङक्याला सुवालाक, “खेक्याई सुङरापला दे माढोक हेती,
‘चीक्पो़नक्याई पारी श्याक्सा धोगोङगो,
शुरगी धोगोङ चोगो झ्युदुक।
दे नी चोवोगी जेदाङ लाक धेनी,
दे होरी ॱमीक्वाला याम्साङा दुक।’#सुङगुर ११८:२२,२३
43“होझ्येरी ङा खेक्याला ॱनाहीन, नाम्खे ग्यासी दे खेक्याने ठोक्ती, ढेबु केगीन मीग्युक्याला ॱनाङगीलाक। 44दे धोगोङ खाला गेगीनगो दुबु-दुबुला क्षाक्कीलाक धेनी होदे सी़ खाला ल्हीम्ना, होदेगी खोला ॱलेगीलाक।”
45धा क्षो़पो़न क्षेक्या धाङ फारुसीपाक्याई दे पेक्या, घोरी घाङला खोराङक्याई कोरला सुङी ॱनेरी ॱहाघोरपालाक। 46धेनी खुङक्याई येशुला शीम्येला थापस्यी झ्येवालाक हीना खोङबाला ॱङो़नस्येखेन च्यीक लाक ॱनेरी, चीगीनगोला खुङक्या मीछोकमुला जीक्पालाक।
ទើបបានជ្រើសរើសហើយ៖
मेथा 21: LOY
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
