मेथा 19
19
नाङजाङ खा डागीनगी कोरला ॱलापच्या
(मारकु १०:१-१२)
1धा येशुगी देक्या सुङसारती, खोङबा गालीलने योरदान चाङबुगी ॱहाकीनगी युदेया युदु फेप्पालाक। 2होदुरु मीछोक क्षे च्यीक, खोङबागी स्याबाला डावालाक धेनी खोङबागी खुङक्याई नाजा चो़गा जेपालाक।
3फारुसीपा रीङगा खोङबागी डुङदु होरी, खोङला ताक्चा झ्यीयेला खोङबाला श्यी़वालाक, “मी च्यीकगी राङगी केमीला दो़न्दाक घारे च्यीक हीन्ना खा ढा छोक्कीले?”
4खोङबागी सुवालाक, “‘को़पापोगी एम्मानेराङ, खुङक्याला भु धाङ भोमो को़वा जेगीनगो’#को़पा १:२७ खेक्याई सुङरापला माढोक हो़ती? 5धेनी याङ को़न्क्षोकगी सुङाजे हो़तालाक, ‘होझ्येरी मी च्यीकगी राङगी फामाला भोरती, खोरी केमीमुला क्षाम्दी धेतालाक धेनी खुङ ॱङी स्यारु च्यीक झ्युङालाक।’#को़पा २:२४ 6होझ्येरी धा खुङ ॱङीउ ॱङी मेन्दा च्यीकराङ झ्युङालाक। देरे झ्येरी को़न्क्षोकगी च्यीक ढेगीनगो, मीगी खा ॱमाटा स्योक।”
7धेनी खुङक्याई खोङबाला श्यी़वालाक, “होरे हीन्ना मोशेगी घीझ्येरी नाङजाङ खा डायेगी यीगी ढीक्ती, खी़ मोला फार ताङना ढीक्कीलाक ॱनेरी का ॱनाङाले?”
8खोङबागी खुङक्याला सुवालाक, “खेक्याई सेम ॱरा झ्युरी, मोशेगी नाङजाङ खा डायेगी क्षीला ठीम ॱनावालाक हीना थोक्माने देरे मेतालाक। 9धा ङा खेक्याला ॱनाहीन, दो़लोकगी दो़न्दाक माना श्येमा दो़न्दाक्याई झ्येरी, सु च्यीकगी राङगी केमीमुला खा डारी, भोमो श्येम्मामुला ॱनामा लेन्ना होदेगी लोक्येम झ्यीदालाक।”
10धेनी ङेनेक्याई खोङबाला श्यी़वालाक, “धा मी च्यीकगी राङगी केमीमुला ॱनेछु देरे हीन्ना, ॱनामा मेलेन्दा धेना घागुलाक।”
11हीना खोङबागी खुङक्याला सुवालाक, “मी घीरीगी दे का दे खेलेन ॱमीथुक्कीलाक हीना सी़ क्षीला ॱनाङवालाक, होदेक्याई च्यीगा खेलेन थुक्कीलाक। 12घीझ्येरी ॱनाना रीङगा केने ॱहालाराङ ङ्युकरुम झ्येरी केलालाक धेनी रीङगाला मीगी ङ्युकरुम शोवालाक धेनी रीङगा नाम्खे ग्यासीगी क्षीला राङगी राङला ङ्युकरुम शोलालाक। दे का दे लेन थुप्कीनगी़, दे खे लेन्दास्योक।”
येशु धाङ टुवाक्या
(मारकु १०:१३-१६; लुका १८:१५-१७)
13धा येशुगी क्षाक जेदी ॱमो़लाम जेदास्योक ॱनेरी, मीक्याई टुवाक्या खोङबागी दोङदु ठीक्ती होवालाक। हीना ङेनेक्याई मीक्याला आङजी तारी काक्पालाक। 14हीना येशुगी सुवालाक, “टुवा च्युङाक्याला ङीचारु हुङदु च्युक। खुङक्याला ॱमाकाक घीझ्येरी ॱनाना नाम्खे ग्यासी, खुङक्या च्योक्रे हीन्गीनक्याई क्षीला लाक।”
15धेनी खोङगी राङगी क्षाक, होदेक्या खाला श्या जेदी, होदेने फेप्पालाक।
ख्योक्तोङ क्षुक्पु च्यीक
(मारकु १०:१७-३१; लुका १८:१८-३०)
16धा मी च्यीक येशुगी दोङदु होरी श्यी़वालाक, “ॱलोपो़न ला, थामेपे छेसोकगी क्षीला, ङी ले शाङा घी झ्यीघो़गुले?”
17धेनी खोङबागी खोला सुवालाक, “शाङपो घी हीन्गीनगी कोरला ङाला घीझ्येरी ढीलाले? शाङपो हीन्गीनगो च्यीक च्यीका हो़तालाक। थामेपे छेसोक नाङदु जुये हीन्ना क्षो़ठीमक्या ॱरुङ।”
18मीगी़ श्यी़वालाक, “घीन्गो ॱरुङये?”
धेनी येशुगी सुवालाक, “ख्यी़ ॱरोक ॱमाचे, लोक्येम माझ्यी, कुमा ॱमाकु, पाङपो शोक्पो ॱमातेर, 19राङगी फामाला चीकुर झ्यी#धेप्थो़न २०:१२-१६; काठीम ५:१६-२० धेनी राङगी खीम्चेला राङला च्योक्रे चेवा झ्यी।#लेवी १९:१८”
20धेनी होदे ख्योक्तोङगी़ खोङबाला श्यी़वालाक, “दे घीरी ङी ॱरुङहो़क। धोराङा घी ॱमेछाङाओ?”
21येशुगी खोङला सुवालाक, “ख्यो़ फी़न्सुम छोक्पा झ्युङङी दो़ना, सोरी ख्यो़ला हो़गीन घीरी चोरी उटेक्याला तेर धेनी ख्यो़ला नाम्खे श्यीङखामदु ज्यागा थोप्कीलाक। धेनी होरी ङी स्याबाला डोङ।”
22होदे मी ख्योक्तोङगी़ दे घोरी घाङला, खो सेम्बा क्योरी सोवालाक घीझ्येरी ॱनाना खोला ग्युनोर ॱमीच्यीकी माङा हो़तालाक।
23धेनी येशुगी खोङबागी ङेनेक्याला सुवालाक, “ङा खेक्याला धेन्पाराङ ॱनाहीन, मी क्षुक्पु च्यीकला नाम्खे ग्यासीला जुयेला, ॱमीच्यीकी काल्ले घाक्वा हो़तालाक। 24याङ ङा खेक्याला ॱनाहीन, मी क्षुक्पु च्यीक को़न्क्षोकगी ग्यासीला डोयेला ल्हाक, सेम्चेन ॱनाउ च्यीक खापगी ॱमीउ नाङने जुयेला लेल्हा हो़टु।”
25ङेनेक्याई दे घोरती, खुङक्या ॱमीच्यीकी ॱहालेरी श्यी़वालाक, “धा ॱहाना सुला थारपा थोप थुक्कीले?”
26येशुगी खुङक्याला शीक्ती सुवालाक, “मीक्याने दे झ्युङ ॱमीथुक्कीलाक हीना को़न्क्षोकगी घीरी जे थुक्कीलाक।”
27धेनी पेटोगी लेन श्यी़वालाक, “शीक्ताङ, हेक्याई घीरी भोरती, खेराङगी स्याबाला डाङ हो़क। धा ॱहाना हेक्याला घी थोप्कीले?”
28येशुगी खुङक्याला सुवालाक, “ङा खेक्याला धेन्पाराङ ॱनाहीन, घीरी साबा को़ली घाङला, मी-भु राङगी शीजेगी श्युक्ठीला श्युई घाङला, खेक्या ङी स्याबाला डागीनक्या श्युक्ठी च्युङङी खाला धेती, ईस्राएलगी छोखाक च्युङङी खाला ठीम चेगीलाक। 29धेनी ङी मीङगी क्षीला राङगी खाङबाक्या धाङ पी़नक्या धाङ फामा धाङ टुवाक्या धाङ साश्यीङक्या भोर हो़ना, खोला दाप ग्या थोप्कीलाक धेनी थामेपे छेसोक थोप्कीलाक। 30हीना धान्दा एन्ला हीन्गीन माङक्षे स्याम्मा धाङ धान्दा स्याम्ला हीन्गीन माङक्षे एन्ला झ्युङगीलाक।”
ទើបបានជ្រើសរើសហើយ៖
मेथा 19: LOY
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
