मेथा 18
18
को़न्क्षोकगी ग्यासी नाङदु सु क्षेस्योक
(मारकु ९:३३-३७,४२-४८; लुका ९:४६-४८)
1होदे घाङला ङेनेक्या येशुचारु च्यारती, खोङबाला श्यी़वालाक, “नाम्खे ग्यासी नाङदु क्षेस्योक सुले?”
2धेनी येशुगी टु च्यीकला भो़री, खुङक्याई घुङदु श्याक्पालाक। 3धेनी सुवालाक, “ङा खेक्याला धेन्पाराङ ॱनाहीन, खेक्या सेम ग्युरती, दे टु दे च्योक्रे मीझ्युङना, खेक्या नामा नाम्खे ग्यासी नाङदु जु ॱमीथुक्कीलाक। 4होझ्येरी टु दे च्योक्रे, राङला ॱङ्यामच्युङ शोगीनगो राङ, नाम्खे ग्यासी नाङदु क्षेस्योक लाक। 5दे टु च्योक्रे टु च्यीकला, ङी मीङने खेलेन्ना, होदेगी ङाला खे लेन्दालाक। 6हीना ङाला धेपा झ्यीगीन देरे टुक्याने, च्यीकला धीक्पा झ्यीदु च्युक्ना, होदेगी मीक्पाला क्षुथाकगी धोगोङ क्षे च्यीक ताक्ती, ग्याछो नाङदु भीप्तु च्युक्ना घागुलाक। 7धीक्पा झ्यीदु च्युक्कीन भारचेक्याई क्षीला, दे जीक्तेन दे दुक्वाली! घीझ्येरी ॱनाना भारचे हुङ घोगुलाक हीना सी़ थोक्ने भारचे हुङी, होदेगो दुक्वाली!
8“धेनी ख्यी़ लाक्पा याङमेना काङबागी ख्यो़ला धीक्पा झ्यीदु च्युक्ना, होदे चेदी ॱयुक श्योक। घीझ्येरी ॱनाना लाक्पा ॱङी धाङ काङबा ॱङी खेरती, थामेपे मेला ॱयुक्वालाः, लाक्पा च्यीक धाङ काङबा च्यीका खेरती, थामेपे मीछे नाङदु जुना घागुलाक। 9धेनी ख्यी़ ॱमीकगी ख्यो़ला धीक्पा झ्यीदु च्युक्ना, होदेला तो़न्दी ॱयुक। घीझ्येरी ॱनाना ॱमीक ॱङीगारा खेरती ॱङ्यावागी मेला ॱयुक्वालाः, ॱमीक च्यीक च्यीगा खेरती थामेपे मीछे नाङदु जुना घागुलाक।
लुक तोरतागी पे
(लुका १५:३-७)
10“टु च्युङा देक्याने, च्यीकलाः थोङछुङ माझ्यी घीझ्येरी ॱनाना ङा खेक्याला ॱनाहीन, नाम्खे श्यीङखामदु खुङक्याई भाङछेनक्याई, नाम्खे श्यीङखामदु श्युक्कीन, ङी यापगी श्याल च्योई ज्यालालाक। 11[घीझ्येरी ॱनाना मी-भु तोरतोवाक्याला क्योप्येला फेप्पालाक।]#१८:११ दे लेउ ११ दे एम्मागी गीरीक धेबक्याला मेतालाक।
12“मी च्यीकला लुक ग्या हो़ना, धेनी होदेक्याने च्यीक तोरना, खी़ होदे लुक घुपच्यु-घोरगुला रीला भोरती, होदे तोरतोवा च्यीकगोला चारु डुगी माले? खेक्या घी सामी हेतो? 13धेनी ङा खेक्याला धेन्पाराङ ॱनाहीन, होदे लुकगो ॱङेना, खो लुक ॱमातोरता घुपच्यु-घोरगुने ल्हाक, होदे ॱङेङ्यागी़ क्षीला माङा ङ्यामो घागीलाक। 14होदे च्योक्रे, टु च्युङा देक्याने च्यीया मेताला ताङये, दे नाम्खे श्यीङखामदु श्युक्कीन ङी यापगी थुकोङ मालाक।
धीक्पा झ्यीगीन पी़न
(लुका १७:३)
15“ख्यी़ पी़नगी ख्यी़ ग्यापला धीक्पा झ्यीना, सोरी खेराङ ॱङीउ च्यीगागी घुङदु खी़ नोन्डुगो स्यो़क। धेनी खी़ ख्यो़ला ङेन्ना, ख्यो़ला राङगी पी़न थोप्कीलाक। 16हीना खी़ ख्यो़ला मेङेन्ना, पाङपो ॱङी सुमगी छीक घीरी सावो झ्येरी थाक चेये क्षीला, मी श्येम्मा च्यीक याङना ॱङीरे ख्यो़रीमुला ठीक। 17याङ खी़ खुङक्यालाः मेङेन्ना, होदे लाबगो क्षो़छोकला स्यो़क। धेनी खी़ क्षो़छोकगी खाला मेङेन्ना, खो ख्यी़ क्षीला धेपा मीझ्यीगीन धाङ ठा धुगीनक्या च्योक्रे झ्युङास्योक।
18“ङा खेक्याला धेन्पाराङ ॱनाहीन, खेक्याई जीक्तेनदु घी धामी, होदे नाम्खे श्यीङखामदुवा धाम्गीलाक धेनी खेक्याई जीक्तेनदु घी टोली, होदे नाम्खे श्यीङखामदुवा टोगीलाक। 19याङदा ङा खेक्याला ॱनाहीन, दे जीक्तेनदु, खेक्याने मी ॱङी थी़न्दी घी श्यी़ना, होदे नाम्खे श्यीङखामदु श्युक्कीन ङी यापगी खेक्या क्षीला ॱनाङा जेगीलाक। 20घीझ्येरी ॱनाना ङी मीङगी थोक्ने, मी ॱङी याङना सुम घारु जोमी, होदुरु ङा खुङक्यामुला हुङाहीन।”
घोयाङ तेर ॱमीथुप्कीन ॱयोक्पोगी पे
(लुका १७:४)
21धेनी पेटो होरी येशुला श्यी़वालाक, “चोवो, ङी पी़नगी ङी ग्याप्तु धीक्पा झ्यीना, ङा खोला थेङमा घाजो़ घोयाङ तेरये? थेङमा धी़न थुक्पे?”
22येशुगी खोला सुवालाक, “ङा ख्यो़ला ॱनाहीन, थेङमा धी़न थुक्पे मेन्दा, धी़न्चु थेङ धी़न थुक्पे तेर। 23देरे झ्येरी, नाम्खे ग्यासी दे राङगी ॱयोक्पोक्यामुला ची ताङी दो़गीन ग्यावु च्यीकमुला दुरना ढीक्कीलाक। 24धेनी ची ताङये गो चुई घाङला, मी च्यीकला सेरगी टाङगा तोङ च्यु भुलीङ हो़गीन च्यीक, खी़चारु ठीक्ती होवालाक। 25होदे मीगी़ भुलीङ ज्याङ ॱमाथुवा दाक्पोगी़ खोला खी़ केमी धाङ टुवाक्या धाङ खोला हो़गीन घीरी चोरी, भुलीङ ज्याङयेला का ॱनावालाक। 26होझ्येरी ॱयोक्पोगो पी़मु चुक्ती श्योवा पुवालाक, ‘ङाला शो़पा जेरोझ्यी धेनी ङी खेरी भुलीङ घीरी ज्याङु।’ 27धेनी ग्यावुगो खोला ॱङीङ झ्येरी, खी़ भुलीङगो घोयाङ तेरती खोला तावालाक।
28“हीना होदे ॱयोक्पोगो होदेने सोवालाक धेनी खोने ॱङुगी टाङगा ग्या भुलीङ लेन्ला, खोरी ॱयोक्पो रोवा च्यीकला थुक्पालाक। धेनी खी़ खोला शीम्दी मीक्पा चीरती ॱनेवालाक, ‘ख्यी़ लेन्गीन भुलीङगो ज्योङ!’ 29धा खी़ ॱयोक्पो रोवागो पी़मु साला चुक्ती श्योवा पुवालाक, ‘ङाला शो़पा झ्यीरोझ्यी धेनी ङी ख्यो़ला भुलीङ ज्याङु।’ 30हीना खी़ माङेन्बालाक धेनी खोला भुलीङ माजाङगीन थुक्पे, चो़न्खाङ नाङदु चुक्पालाक।
31“धेनी खी़ ॱयोक्पो रोवा श्येम्माक्याई होदुरु घी झ्युङगीनगो थोरी, खुङक्या ॱमीच्यीकी सेम फाम्बालाक। धेनी सोरी ग्यावुगोला होदुरु झ्युङगीन घीरी स्येपालाक। 32धेनी ग्यावुगी़ खोला भो़री ॱनेवालाक, ‘ॱयोक्पो ङेन्पा ख्यो़, ख्यी़ ङाला श्योवा पुरी, ङी ख्यी़ भुलीङ घीरी सेपी। 33ङी ख्यो़ला ॱङीङजे झ्यीगीन च्योक्रे, ख्यी़याः राङगी रोवाला ॱङीङजे झ्यीघोगुमाले?’ 34धेनी श्येताङ लारी ग्यावुगी़ खोला खी़ भुलीङ घीरी माज्याङगीन थुक्पे, चो़न्खाङगी पो़न्पोगी लाक्पारु ठीम खुरयेला ची ग्याप्पालाक।
35“देरेराङ झ्येरी, खेक्याई खेरी पी़नला सेम नाङने घोयाङ ॱमेतेरना, नाम्खे श्यीङखामदु श्युक्कीन ङी यापगीयाः खेक्याला देरेराङ जेगीलाक।”
ទើបបានជ្រើសរើសហើយ៖
मेथा 18: LOY
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
