John 6
6
Pikan Jesus I Esolok A Dimen Dibon Too
(Matthew 14:13-21; Mark 6:30-44; Luke 9:10-17)
1Idi epalabas i piyen akow da, si Jesus tan disipolos to, bima-sil ired ma baybay na Galilee a engaranan ngo na baybay na Tiberias. 2Et tined ira na chakel a too tep mita riy milagron imag Jesus nonta inpamapteng toy mansekit. 3Timiyed ires Jesus cha chontog, et timokkong ired man. 4Nontan a timpo, chanchaniy piyasta na Hodjos a engaranan na Piyasta na Inda-bas na Anghil cha Hodjos.
5Idi timakmang si Jesus, mita thoy chakel a toon mankokowan alid kad-an to. Et kigwan tod Philip i “Toy pengedaan tayo na mekan i say mepekan a emiin iriy too?” 6Amta walen Jesus i a-magen to, nem inbaga tho man bengat say amtaen to no nengoy konen Philip. 7Insongbat Philip i “Angken mankastos kiya na chegwen dasos a denarii a maytongkal na kakanen cha, nat on-anay ngorechan, angken sanko-tik i a-daen cha.” #6:7 chegwen dasos a denarii Say sa-kin denarius, dagbo na sa-kin too na san-akow a obda.
8Et sema sa-ki iren ma disipolos a si Andrew a ahin Simon Peter, kigwan to i 9“Ajay i nga-ngen dahin gwared si-kathoy dimen tinapay tan chegwen paideng. Nem nat on-anay a pekanen ton emiin ira ja too.”
10Et kigwan Jesus ired ma disipolos to i “Petokkong jo ira ma too.” Chakel i do-bet chiwan, isonga timokkong ired man. Say kabibidang na dalekid man, chanchanin dimen dibo. 11Et ida wen Jesus iwa tinapay a iyansalamat cha Afo Chiyos et inpaiap-ap to ired ma toon ketinokkong chiwan. Inges ngon man i inpasing tod ma paideng. Et engan iriy too ingkathod iyapsel ira. 12Idi iyapsel iren emiin, kigwan Jesus cha disipolos to i “Koskos joy ebay-anan say nagwariy maykawas.” 13Et kiyoskos cha ma biyay-anan na tood ma dimen tinapay a kiyakan cha, et pino thoy sawal na chegwen basket.
14Idi mita na tooy milagron imag Jesus, kigwan cha i “Sigoradon sejay i profiten emangkesked a onmothok alid ja dobong.” 15Nem si Jesus, amta tho i chanchanin pidithen chen manbalin na ari cha. Isonga, iyamtik a chakos et sa-sa-ki thon timiyed chiwa chontog.
Iyan-ahad Si Jesus Cha Tapow Na Chanom
(Matthew 14:22-33; Mark 6:45-52)
16Idi emangkedagwi, chimalong ira ma disipolos Jesus chiwa kilig na baybay, 17et iyankeb-ong ired bangken bima-sil cha Capernaum. Enbolinget mala, nem aneng ali onmothok si Jesus. 18Et pimekes i chahem et kimayang ngoy chalojon. 19Idi iyanbangka ira ingkathod dima ono enem a kilomitro, mita res Jesus a man-aahad cha tapow na chanom a man-eesop alid bangka ra. Et timahot iren pasiya. 20Nem kigwan Jesus cha si-kara i “Si-kak iyay. Enog i tahot.” 21Et kaimdeng iren mekidogan si Jesus chiwa bangka. Et biglen mimothok ired ma konan cha.
22Idi gwa-gwa tho, sema chakel a toon imeket chiwa piig na baybay, mita ren sa-sa-ki liy bangked man, et amta ra i nat ekiolop si Jesus cha disipolos to, no diket sema iren disipolos to bengat i iyandogan chiwa bangka. 23Nem gwara iriy echom a bangken ahay mothok alid siyodad na Tiberias. Simalcheng ira ma bangked askang na enganan na too na tinapay nonta iyansalamat si Jesus cha Afo Chiyos. 24Isonga, idi mita iren ma too i nagwares Jesus tan disipolos tod man, iyankeb-ong ired ma bangken bima-sil ired Capernaum say anafen ches Jesus.
May-arig Si Jesus Cha Mekan A Naengi-kan Na Biyag
25Idi sipol na toos Jesus chiwa piig na baybay, kigwan ched si-katho i “Maistoro, empiyan i inmothok mod jay?” 26Et insongbat Jesus i “Sejay a konen kod si-kayo, podnon jowan anafaak tep engan kayo na tinapay et iyapsel kayo, nat kagol a igwathan jo ira ma milagron sini-neng jo. 27Say ipahat jo komen obdaen, nat sema mekan a mebojok, no diket sema mekan a onbayag a naengi-kan na biyag a nagwariy pengingkaan to. Sema mengi-kan niwa mekan cha si-kayo, si-kak a Anak na Too tep si Afo Chiyos a Awak, in-i-kan toy karebengan kon mengemag niwan a sinjal a iyapolbaran toak.”
28Et inbaga na too i “Ngoy obden a-magen mi say a-magen miy piyan Afo Chiyos?” 29Insongbat Jesus i “Sema obden piyan Afo Chiyos a a-magen jo, sejay a memati kayod si-kak a into-no tho di.”
30Et inbaga ra mowan i “Ngoy sinjal a ibiybiy mod si-kawi say memati kawid si-kam? Ngoy a-magen mon mas kaskasdaaw iy say pahan na too? 31Tep angken si Moses, idi nainbalnay toy afo-afo thayo led ma dogad a nagwariy toon naiyan-iya-iyan, pikan to ira na manna. Tep kigwan tod ma esel Afo Chiyos i ‘Pikan to ira na mekan a edafo did dangit.’ ” #6:31 Exodus 16:4 #6:31 Sema manna, si-kathoy inpahan Afo Chiyos cha Hodjos nonta iyan-aha-ahad ira na epat a polon tawen chiwa dogad a nagwariy toon naiyan-iya-iyan. Naedafo ma manna cha iyaykayang na edagwi. No agsapa, nasiya-nop na Hodjos i kakanen cha nontan a akow. Sema kasi-neng na manna, maingpis tan polaw a inges toy angchap. Sema namnam to, inges toy tinapay a edaohan na chanom na dinowan tan maltiha. Mebedin a maychekchek i manna ono maydothon inges toy tinapay. Sema istoriya na manna, naebased Exodus 16 tan Numbers 11:7-9.
32Insongbat Jesus i “Sejay a konen kod si-kayo, podnon nat si Moses i engi-kan ired ma afo-afo thayo la na mekan a edafo did dangit, no diket si Awak. Et sema kiyakan na afo-afo thayo nontan den edafod dangit, nat sema podnon mekan a nain-i-kan Afo Chiyos cha si-kayo niman. 33Tep sema podnon mekan a nain-i-kan Afo Chiyos, si-katho ma sima-kod alid dangit a mengi-kan na biyag cha too.” 34Et kigwan na too i “Afo, pangaasim i-kani mo kawi na olay nitha mekan.”
35Et kigwan Jesus i “Si-kak iwa mekan a naengi-kan na biyag a nagwariy pengingkaan to. Sema naematid si-kak, nat maofa-ofa tan nat ma-ma-kow. 36Nem podnoy kigwan kod si-kayo nontan a angken mita yoak, nat naemati kayo pay laeng cha si-kak. 37Emiin a toon inpiyal Awak cha si-kak, memati ired si-kak. Et emiin a mematid si-kak, nat chagchagen ko ira. 38Tep sima-korak alid dangit, nat say a-magen koy piyan ko, no diket a-magen koy piyan Awak a engito-nod si-kak. 39Et si Awak a engito-no did si-kak, sema piyan ton a-magen ko, kajoan kon emiin i toon inpiyal tod si-kak say nagwaren polos i ma-tiw, no diket panpawil ko ira na kaonoran a akow. 40Tep sejay i piyan Awak a emiin a toon meni-neng tan mematid si-kak a Anak to, gwara did si-kariy biyag a nagwariy pengingkaan to. Tan panpawil ko ira na kaonoran a akow.”
41Et iyanriri ira ma Hodjos maypangkep Jesus tep kigwan to i “Si-kak i mekan a sima-kod alid dangit.” 42Kigwan cha i “Nat sejay ayes Jesus a anak Joseph? Sigoradon amta thayos aweto tan ineto. Apay nga kigwan to i sima-kod alid dangit?”
43Insongbat Jesus i “Enog i riri. 44Say too, mebedin bengat a mematid si-kak no si Awak a engito-nod si-kak, siya-dathan toy nemnem niwa too say mebedin a memati. Et sema iren memati, panpawil ko ira na kaonoran a akow. 45Tep gwariy insolat iren ma profiten kigwan to i ‘Emiin a too, toroan iren Afo Chiyos.’ Et emiin a mengi-ngel na nakigwan Awak say metoroan ira ket, memati ired si-kak. 46Nem nat piyan kon a-seden i gwariy eni-neng Afo Chiyos a Awak tep nagwariy eni-neng cha si-katho, malaksid cha si-kak bengat a edafod si-katho. 47Sejay a konen kod si-kayo, podnon sema mematid si-kak, gwara did si-kathoy biyag a nagwariy pengingkaan to. 48Tep si-kak i mekan a naengi-kan na biyag. 49Sema iren afo-afo yo nontan da, nakiyakan chiy manna chiwa dogad a nagwariy toon naiyan-iya-iyan, nem etiy ngorechan ira. 50Nem seja mekan a sima-kod alid dangit, no kakanen na too, eg meti-metiy. 51Si-kak iwa sibibiyag a mekan a sima-kod alid dangit. No kakanen na too ja mekan, manbiyag na ingked ingka. Seja mekan, si-kathoy angel kon i-kan ko say mebedin a manbiyag i tothoo na ingked ingka.”
52Idi inki-ngelan iren ma Hodjos i kigwan Jesus, iyansosongbat iren kigwan cha i “Apay nga i-kan niwa tooy angel to say kakanen tayo?” 53Isonga, kigwan Jesus i “Sejay a konen kod si-kayo, podnon si-kak a Anak na Too, no nat kakanen jo ja angel ko tan nat inomen joy chalak, nagwared si-kayoy biyag a nagwariy pengingkaan to. 54Tep sema mengan na angel ko tan menginom na chalak, si-kathoy gwariy biyag ton nagwariy pengingkaan to, et panpawil ko na kaonoran a akow. 55Tep sema angel koy podnon mekan tan sema chalak i podnon mainom. 56Sema mengan na angel ko tan menginom na chalak, on-onong cha si-kak tan on-onongak cha si-katho. 57Si Awak a engito-no did si-kak, si-kathoy naedafoan na biyag, et gwared si-kak i podnon biyag kagol cha si-katho. Sema toon mengan na angel ko, inges to ngod si-katho tep gwared si-kathoy podnon biyag kagol cha si-kak. 58Si-kak i podnon mekan a sima-kod alid dangit a nat inges to ma kiyakan na afo-afo thayo nontan da. Tep sema iren afo-afo thayon engan niwa manna, etiy ngorechan ira. Nem sema toon mengan niyay a podnon mekan, manbiyag na ingked ingka.” 59Kigwan Jesus ira man nonta mantotorod synagog cha Capernaum.
60Idi inki-ngelan iren ma disipolos Jesus i kigwan to, chakel cha si-kariy engowan i “Enbel-at ira ja naintoro-toro tho. Nagwara emoy mematin man.” 61Amten Jesus i naiyanriri ira, isonga inbaga thod si-kara i “Iyasnit kayo kagol niya intorok? 62No setan ngarod, nengoy gwared nemnem jo no si-nengen joak a Anak na Toon mankakayang cha edafoan ko? 63Sema Ispirito Santoy naengi-kan na biyag. Sema biyag, nat naedafod kabaalan na too. Sema iren kigwan kod si-kayo, edafon emiin cha Ispirito Santo, isonga sema kigwa-kigwan ko, nain-i-kan toy biyag a nagwariy pengingkaan to no memati kayo. 64Nem gwariy echom cha si-kayon nat naematid si-kak.” Kigwan Jesus iwan tep amta tho wa ira ma nat ematid si-katho tan sema menraidor cha si-katho. 65Et kigwan ngon Jesus i “Seman i kagol a engowanan kod si-kayo i say too, mebedin bengat a mematid si-kak no itolok Awak.”
66Kagol na engowanan Jesus niwan, bintihan na chakel a disipolos to, et nat nakiyadgwaan cha wa. 67Isonga, kigwan Jesus ired ma sawal na chegwen disipolos to i “Piyan jo ngon onbetik?” 68Et insongbat Simon Peter i “Afo, siyay onoran mi no nat si-kam? Si-kam bengat iwa engipaamta na ese-esel a naengi-kan na biyag a nagwariy pengingkaan to. 69Agpayson emati kawi wa tan amta wi i si-kam iwa Esantoan a into-no din Afo Chiyos.” 70Et kigwan ngon Jesus i “Ahow, pinispis tahejon sawal na chegwen disipolos ko, nem gwariy sa-kid si-kayon dimonyo.” 71Sema engibanagan Jesus, si Judas a anak Simon Iscariot. Tep angken si Judas i sa-kin sawal na chegwen disipolos, si-katho di met laeng i menraidor cha Jesus.
ទើបបានជ្រើសរើសហើយ៖
John 6: KAR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023 Wycliffe Bible Translators, Inc. All rights reserved.
