John 7
7
Sema Iren Aahin Jesus, Nat Emati Pay Nin Ired Si-katho
1Idi iyakcheng iwan, iyan-aha-ahad si Jesus cha Galilee bengat. Nat kimowan cha Judea tep amta tho i sema iren naengibalnay na Hodjos chiwan, piyan chen bonoen si-katho. 2Idi chanchaniy piyasta na Hodjos a nakigwan cha i Piyasta na Siroman, #7:2 Sema Piyasta na Siroman, piyasta na Hodjos. Nasinilibrar iren ma Hodjos na ingkakcheng na ani a pan-salamat ched Afo Chiyos. Nasinilibrar cha ngon penginemnemneman na tolong Afo Chiyos nonta iyan-aha-ahad ira ma afo-afo ra la na epat a polon tawen cha dogad a nagwariy toon naiyan-iya-iyan nontan da. Sema kebejag na timpo na piyasta, pithon akow. No timpo na piyasta, naiyan-iyan ira ma Hodjos cha siroman a aamag na panga-panga tan bolo-bolong. 3sema iren aahin Jesus, kigwan ched si-katho i “Betik ked jay et kowan ka led Judea say si-nengen iren ma disipolos mo ma kaskasdaaw a naima-imag mo. 4Tep sema toon piyan ton maychamag, nat otikel a siyodad i pan-iyanan to tep sema naima-imag to, nat maypaamted chakel a too. No gwariy naima-imag mon kaskasdaaw, ibiybiy mod emiin a too.” 5Kigwan iren ma aahin Jesus iwan tep angken si-kara ngo, nat emati ired si-katho.
6Et kigwan Jesus cha si-kara i “Aneng nin ali onmothok i timpo na pengibiybiy ko na angel ko. Nem no si-kayo, angken nengon akow, mebedin cha si-kayo. 7Sema iren tood ja dobong, nat mebedin a owesen cha kayo, nem si-kak, en-owes chaak tep piyaneknekan ko i ngaaw i naima-imag cha. 8Tahejon mekipiyasta. Ekak mekipiyasta tep aneng nin ali onmothok i timpok.” 9Seman i kigwan Jesus, et imeket cha Galilee.
Sema Intoron Jesus Chiwa Piyasta Na Siroman
10Idi kimowan ira ma aahin Jesus a mekipiyasted Jerusalem, timened si Jesus, nem sa-sa-ki thon kimowan say nagwariy mengamta. 11Sema iren naengibalnay na Hodjos, naina-inap ches Jesus chiwa piyastaan a kigwan cha i “Toy kad-an to la i?” 12Sema iren toon esa-sa-nop chiwan, natiyabtabtabal ches Jesus. Kigwan na echom i “Mapteng i ogadin Jesus,” nem kigwan ngo na echom i “Enchi tep nasiyaol toy too.” 13Nem nat inpekes iren ma tooy tabtabal cha tep entahot cha ira ma naengibalnay na Hodjos.
14Idi kawa na piyasta, simekep si Jesus chiwa timplo, et iyantorod man. 15Et iyasdaaw ira ma naengibalnay na Hodjos a kigwan cha i “Toy engalaan niyay a too na daing to iy nat iyan-achal?”
16Et insongbat Jesus i “Sema naintorok, nat naedafod nemnem ko, no diket naedafod nemnem Afo Chiyos a engito-no did si-kak. 17Sema toon piyan ton a-magen i piyan Afo Chiyos, amtaen to no sema naintorok, naedafod nemnem Afo Chiyos ono naedafo ngod nemnem ko bengat. 18Sema toon naengowan niwa naedafod nemnem to bengat, naina-inap toy chayaw na tood si-katho. Nem no si-kak, say piyan ko, si Afo Chiyos a engito-no did si-kak i maychejaw. Et seman i mengipaneknek i podnoy ogadik tan nagwariy doho-dohod si-kak. 19Inni-kanan to kayon Moses na dinteg, anya? Nem nagwared si-kayoy naengonod na dinteg. Tep no naiyonoran jo komiy dinteg, eg joak piyan a bonoen.” 20Et insongbat na tothoo i “Iya-janan ka na dimonyo! Siyay mahapiyan a memonod si-kam?”
21Kigwan pay Jesus i “Pinsak bengat i inpangimapteng ko na mansekit na Sabbath, et iyasdaaw kayo tep imag ko man na akow na pan-inana. 22Diningding jo aya i inbilin Moses i kogithen joy anak jon dahi na maykagwalon akow na ingkay-anak to? Nat si Moses chechan i engi-kan niwa bilin, no diket sema iren afo-afo ton edagwas iy say si-katho. Isonga, no onmothok aliy maykagwalon akow, angken no akow na pan-inana, kogithen jo ngorechan i anak jon dahi. 23No kogithen joy anak jo na akow na pan-inana say nat chechalen jo ma dinteg Moses, niyana kebonget kayod si-kak tep inpamapteng koy too na akow na pan-inana? 24Sema pengowis jo, nat ibasar jo komed si-nengen jo nin, no diket ibasar jod kosto tan mapteng.”
Sejay I Cristo?
25Et sema echom a toon i-Jerusalem, kigwan cha i “Nat sejay i toon piyan chen bonoen? 26Ajed jay a man-eesel cha sangoanan na chakel a too, et nagwariy kigwa-kigwan iren ma naengibalnay cha si-katho. Mebedin a amta ra emo i si-kathoy Cristo? 27Nem enchi emo tep no onmothok aliy Cristo, nagwara konoy mengamta na kedepoan to. Nem sejay a too, amta thayon emiin i edafoan to.”
28Gwara pay nin si Jesus chiwa timplon mantotoro, et inpekes toy esel ton kigwan to i “Kigwan jo i amta yoak tan amta yoy edafoan ko. Nem say podno, nat kimowanak alid jay tep seman i nemnem ko, no diket into-no thoak alin Afo Chiyos, et podnoy ogadi tho. Nat amta yos Afo Chiyos. 29Nem si-kak, amtak tep edafoak cha si-katho, et si-kathoy engito-no did si-kak.”
30Idi kigwan Jesus iwan, sema iren naengibalnay na Hodjos, piyan chen chedmethen, nem nagwariy engaled si-katho tep aneng nin ali onmothok i timpo na ketiy Jesus. 31Nem angken seman, chakel i toon ematid si-kathon kigwan cha i “Agpayson si-kathoy Cristo. Tep nagwariy mahaamag na chakel pay a milagro no nat seja too bengat.”
Engito-no Ira Na Kowadjen Menmet Jesus
32Idi inki-ngelan iren ma Pharisees i kigwan na too maypangkep Jesus, si-kara tan sema iren aafo na papari, into-no riy kowadja na timplon menmet Jesus. 33Et kigwan Jesus i “On-onongak pay nin cha si-kayo na kemtang, et on-oliak cha engito-no did si-kak. 34Anafen joak, nem nat sepolen joak tep nat mebedin a onkowan kayod ma konan ko.” 35Et iyanbinaga ira ma naengibalnay na Hodjos a kigwan cha i “To emoy konan niya too say nat mahasafol mi? Onkowan emod kad-an na echom tayon Hodjos a iyaygwala-gwalak ired ma aragwin ilin naiyan-iyanan na Greeks? Itoroan to emo ira ma Greeks chiwan? 36Ngoy piyan ton a-seden nonta kigwan to i ‘Anafen joak, nem nat sepolen joak,’ tan ‘Nat mebedin a onkowan kayod ma konan ko’?”
37Nonta kaonoran a akow na piyasten kainportantian a akow to, imakgwat si Jesus, et inpekes toy esel ton kigwan to i “No gwared si-kayoy iya-kow, onkowan koma did si-kak say man-inom. 38Tep kigwan tod ma esel Afo Chiyos maypangkep na toon naematid si-kak i ‘Singen gwared si-kathoy temtem a nabimo-dayan na chanom a naengi-kan na podnon biyag.’ ” 39Say engibanagan Jesus niwan, sema Ispirito Santon ito-non Afo Chiyos a man-iyan cha poso iren ma naemati. Nem nontan a timpo, aneng nin mayto-no di ma Ispirito Santo tep nat mechejaw pay nin si Jesus babaen na ketiy tan ioli thod dangit.
40Idi inki-ngelan na tooy kigwan Jesus, kigwan na echom i “Agpayson sejay i profiten singsingked tayo.” 41Sema echom pay, kigwan cha i “Sejay i Cristo.” Nem kigwan ngo na echom i “Enchi tep edafod Galilee, et nat chiwan i kedepoan na Cristo. 42Tep kigwan tod ma esel Afo Chiyos i sema Cristo, poli konon David et may-anak konod Bethlehem a siyodad a iyay-anahan David.” 43Isonga, nat man-iringes i nemnem na too maypangkep Jesus. 44Piyan na echom a chedmethen si-katho, nem nagwariy engaled si-katho.
45Et imoli ira ma kowadja na timplod kad-an na aafo na papari tan sema iren Pharisees, et inbaga iren ma aafo tan sema iren Pharisees i “Niyana nat ida yo did jay?” 46Et insongbat na kowadja i “Nagwariy naiyankasaben inges toy nainpankasaba niwa too.” 47Kigwan mowan iren ma Pharisees i “Siyaol to kayo ngo? 48Si-kawin aafo tan sema iren Pharisees, nagwaren polos cha si-kawiy ematid si-katho. 49Nem sema iren tothoon naematid si-katho, si-kariy eg mahaamta na dinteg tayo, et chosaen iren Afo Chiyos.”
50Gwariy toon sa-ki iren ma Pharisees a si Nicodemus. Sejay a Nicodemus, si-kathoy kimowan a ekitbal cha Jesus nontan. Kigwan tod echom to i 51“Cha dinteg tayo, nat mebedin a mekowis i too no nat bistigalen tayo nin say amtaen tayoy imag to.” 52Et insongbat iren ma echom to i “Edafo ka ngo did Galilee? Basam nin a chili ma esel Afo Chiyos, et amtaen mo i nagwaren polos i profiten medepod Galilee.” [53Et bimetik ma iren emiin. #7:53—8:11 Sema iyaysolat cha kawa niya malka […], nat iyayka-chom cha gwa-gwa-chen Greek a sola-solat.
ទើបបានជ្រើសរើសហើយ៖
John 7: KAR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023 Wycliffe Bible Translators, Inc. All rights reserved.
