John 8
8
Sema Biin Esokalan A Naenarog Na Nat Imbaliy To
127 Nem si Jesus, kimowan cha Chontog na Olivas. 2Idi gwa-gwa tho, bimowas mowan chiwa timplo. Emiin a toon gwared man, biyo-ngolan chen timokkong si Jesus et intoroan to ira. 3Sema iren mamaistoro na dinteg tan sema iren Pharisees, mimothok iren engitahin na biin siyokalan chen naenarog na nat imbaliy to. Inpaakgwat ched sangoanan na chakel a too. 4Et kigwan ched Jesus i “Maistoro, siyokalan mi ja biin naenarog na nat imbaliy to. 5Kigwan tod ma dinteg Moses i sema biin inges to jay, medtog ingkathod metiy. Ngoy konen mo?” 6Kigwan cha man tep piyan chen saolen si Jesus say osalen cha ma songbat ton pengicharoman ched si-katho. Nem si Jesus, jimekok et insolat toy kalomot tod pithek. 7Idi nainbaga-bagaan cha, imakgwat si Jesus a kigwan to i “Angken siyen tood si-kayon nagwariy basol to, si-kathoy medebas a mentog niwa bii.” 8Et jimekok mowan a iyansolat cha pithek.
9Idi inki-ngelan chiy kigwan Jesus, sansa-ki iren bimetik a iyanchogid ma kaamaan. Et ebay-anan bengat si Jesus tan sema biin man-ak-akgwat cha sangoanan to. 10Et imakgwat si Jesus a kigwan tod ma bii i “To la ira i? Nagwariy ebay-anan a menosed si-kam?” 11Insongbat niwa bii i “Nagwara, Afo.” Et kigwan Jesus i “Nat chosaen taha ngo. Taha wa, nem enog i basol mowan.”]
May-arig Si Jesus Cha Silow
12Et imesel mowan si Jesus ired ma toon kigwan to i “Si-kak i silow a naenilow na nemnem na tood ja dobong. Sema toon naengonod cha si-kak, nat naiyan-ahad cha kawad-an na enbolinget, no diket gwared si-katho ma silow a naengi-kan na biyag.” 13Et kigwan na Pharisees cha si-katho i “Mowan tistigoiy angel mo. No tistigoan na tooy angel to, nagwariy memati i podnoy kigwan to.” 14Insongbat Jesus i “Angken natinistigoan koy angel ko, podno ja kowan kona tep amtak i edafoan ko tan amtak i konan ko. Nem si-kayo, nat amta yoy edafoan ko tan nat amta yoy konan ko. 15Sema nainpangowis jo, nat kosto tep naedafod nemnem na too. Nem si-kak, nagwariy kowisen ko. 16Nem no gwariy kowisen ko koma, kostoy pengowis ko tep nat si-kak bengat i mengowis, no diket si-kak tan si Awak a engito-no did si-kak. 17Tep iyaysolat chiwa dinteg jo i no man-inges i konen na chegwen tistigo, podnoy kigwan cha. 18Si-kak i pilmiron tistigo tep natinistigoan koy angel ko, tan si Awak a engito-nod si-kak, si-kathoy maykadgwa tep natinistigoan toak ngo.” 19Sema iren naiyanki-ngel, kigwan cha i “To les awam i?” Et insongbat Jesus i “Nat amta yoak tan nat amta yo ngos Awak. Tep no amta yoak koma, amta yo ngos Awak.”
20Kigwan Jesus a emiin ira jay nonta naiyantorod ma timplon askang niwa iyaykamiran na pilak. Nem nagwariy iyanmet cha si-katho tep aneng nin onmothok i timpo na ketiy to.
Sema Kigwan Jesus Cha Hodjos A Nat Ematid Si-katho
21Et kigwan Jesus mowan ired ma too i “Onmothok aliy akow no onbetihak. Anafen joak, nem metiy kayod basol jon nat epakawanan. Et nat mebedin a onkowan kayod konan ko.” 22Et iyankinowan ira ma naengibalnay na Hodjos i “Niyana nakigwan to i nat mebedin a onkowan kiyed konan to? Bonoen to emoy angel to?” 23Kigwan ngon Jesus i “Si-kayo, edafo kayod dobong, nem si-kak, edafoak cha dangit. Iyayka-chom kayod ja dobong, nem nat iyayka-chomak chiya dobong. 24Isonga, kigwan kod si-kayo i metiy kayod basol jon nat epakawanan. Tep no nat patien jo i si-kak iwa nakigwan ko, metiy kayod basol jon nat epakawanan.” 25Et kigwan iren ma naengibalnay i “Siya ka?” Et insongbat Jesus i “Nakigwa-kigwan tahejo no siyaak manipod nonta kapkapoanan ingkathod niman. 26Si-kayo, chakel koma iriy konen ko maypangkep cha si-kayo, tan chakel koma iriy ipabasol kod si-kayo. Nem sema sa-sa-ki bengat a ipaamtak cha tood ja dobong, sema inki-ngelan kon naedafod ma engito-no did si-kak, et podnoy ogadi tho.”
27Nem nat igwathan iren ma too i sema engibanagan Jesus, si Afo Chiyos a Aweto. 28Isonga, kigwan Jesus cha si-kara i “Si-kak a Anak na Too, no ikayang joak chiwa koros, amtaen jo i si-kak iwa nakigwan ko. Amtaen jo ngo i nagwariy naimag kon edafod nemnem ko, no diket nakigwan ko bengat iwa inbili-bilin Awak cha si-kak. 29Et si Awak a engito-no did si-kak, si-katho na olay i kadgwak. Nat in-olay toak tep naimag ko na olay i piyan to.” 30Idi inki-ngelan na tooy kigwan Jesus, chakel miy ematid si-katho.
Sema Iren Bagaen Tan Sema Nat Bagaen
31Et kigwan Jesus ired ma Hodjos a ematid si-katho i “No memasig kayon mengemag na nakigwan ko, agpayson disipolos tahejo. 32Amtaen joy podno, et sema kinapodno, si-kathoy mengidibchid si-kayo.” 33Et insongbat iren ma Hodjos i “Poli tho kawin Abraham. Nagwariy mengipabalin cha si-kawi na bagaen. Apay nga kigwan mo i maydibchi kawi?”
34Insongbat Jesus i “Sejay a konen kod si-kayo, podnon angken siyen toon manbesol, si-kathoy bagaen na basol. 35Sema bagaen, mebedin a maybo-day cha baliy na amo tho, nem sema anak niwa mahabaliy, nat mebedin a maybo-day tep anak to na ingked ingka. 36Isonga, no si-kak a Anak Afo Chiyos i mengidibchid si-kayo, podnon medibchi kayo. 37Amtak i poli tho kayon Abraham, nem piyan joak pay laeng a bonoen tep nat naigwat joy kowan kona. 38Nakigwan ko ma maypangkep na sini-neng ko nonta gwaraak cha Awak, nem naimag jo ma kigwan na awejod si-kayo.”
39Et kigwan iren ma Hodjos i “Si Abraham i awa wi.” Nem insongbat Jesus i “No agpayson si-kayoy polin Abraham, onoran jo komiy ima-imag to. 40Nem sema piyan jo, bonoen joak tep kigwan kod si-kayoy podnon kigwan Afo Chiyos cha si-kak. Sema imag Abraham, nat inges to man. 41Sema naima-imag jo, inges to ma naima-imag na awejo.” Et kigwan mowan iren ma Hodjos i “Nat iyayka-daw kawi tep sa-sa-kiy Awa win si Afo Chiyos.”
42Et kigwan Jesus cha si-kara i “No si Afo Chiyos komiy podnon Awejo, ensemek joak tep edafoak cha si-katho nonta kimowanak alid ja dobong. Nat kimowanak alid jay tep seman i piyan ko, no diket into-no thoak alin Afo Chiyos. 43Nat egwathan joy nakigwan ko tep nat piyan jon mengi-ngel na naintoro-torok. 44Sema Diabloy awejo, et say piyan to, seman i piyan jon a-magen. Manipod kapkapoanan, naemonoy Diablo. En-owes toy kinapodno tep nagwared si-kathoy podno. No man-itek, seman i ogadi tho tep maite-itek tan si-katho ngoy naedafoan na itek. 45Nem si-kak ngo, nakigwan koy podno, et setan i kagol na nat pematian jod si-kak. 46Siyed si-kayoy mengipaneknek i iyanbasolak? Nagwara. Emiin a nakigwan ko, podno. Apay nga eg joak pay laeng patien? 47No iyayka-chom i tood Afo Chiyos, nainki-ngelan toy nakigwan Afo Chiyos et naimag to. Nem si-kayo, nat iyayka-chom kayod Afo Chiyos, isonga nat nainki-ngelan jo ma nakigwan to et nat naimag jo.”
Mas Ekayang Si Jesus Iy Say Si Abraham
48Et kigwan iren ma naengibalnay na Hodjos cha Jesus i “Podno ma kigwan min i-Samaria ka tan iya-janan ka na dimonyo.” 49Et insongbat Jesus i “Nat iya-jananak na dimonyo. Nachijaw kos Awak, nem nagwariy rispiktar jod si-kak. 50Nem nat kowan anafiy pengichejaw jod si-kak. Si Awak i mahaamta maypangkep na kaychejaw ko, tan si-kathoy mengowis iren ma nat naiyanrispiktar cha si-kak. 51Sejay i konen kod si-kayo, podnon angken siyen toon naengamag na nakigwan ko, nat meti-metiy.”
52Et kigwan mowan na Hodjos i “Sigorado kawi wen iya-janan ka na dimonyo. Tep si Abraham tan sema iren profita nontan da, iyangketiy iren emiin. Nem kigwan mo i angken siyen toon naengamag na nakigwan mo, nat meti-metiy. 53Mas ekayang ka aya iy say si Abraham a afo thayon etiy? Tan sema iren profita, iyangketiy ngo ira. Ampay siya ka aya?”
54Et insongbat mowan Jesus i “No si-kak i manchejaw na angel ko, nagwariy silbi tho. Nem si Awak a nakigwan jo i Chiyos jo, si-kathoy naiyanchayaw cha si-kak. 55Nat amta yos Awak, nem si-kak, agpayson amtak si-katho. No konen ko koma i nat amtak si-katho, maitekak a inges jo. Nem agpayson amtak si Afo Chiyos, et naimag koy nakigwan to. 56Si Abraham a afo yo la, imimdeng nonta inpanbiyag to tep iyamta tho i si-nengen toy akow na imothok ko di, et agpayson iyaybiybiy cha si-katho et banay i chadsak to.” 57Et kigwan iren ma Hodjos i “Aneng pay i dimen polon tawen mo. Isonga, nancha-ki mitam si Abraham?” 58Et insongbat Jesus i “Sejay a konen kod si-kayo, podnon nonta aneng pay may-anak si Abraham, sigod a gwaraak.” 59Et engopkop ira ma Hodjos na bathon ichetog ched si-katho tep piyan chen bonoen. Nem iyaydaok des Jesus cha chakel a too say nat si-nengen cha, et bintihan to ma timplo.
ទើបបានជ្រើសរើសហើយ៖
John 8: KAR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023 Wycliffe Bible Translators, Inc. All rights reserved.
