San Marcos 12
12
Seña-c'op te j'at'eletic te amen yo'tanique
(Mt 21.33-46; Lc 20.9-19)
1Jesús jajch' yalbey yaiyic seña-c'opetic. Jich la yal:
—Ay jtul winic te la sts'un ts'usubiltic,#Is 5.1-2. soc la sjoy ta ts'ajc'. La sjoc'bey xch'enal spits'jibal sit te sts'usube, soc la sts'ajc'uy moel iljibal-q'uinal na swenta yu'un ya yich' canantayel tey a te ts'usubiltique.
“La yac' jilel ta wentainel yu'un j'at'eletic te ts'usubiltic yu'une, soc bajt' ta c'ubul q'uinal. 2C'alal la staix yorail tulel sit te ts'usube, la sticun bael jtul abat, swenta yu'un ya xba sc'anbey te j'at'eletic te jayeb ya xc'ot ta swenta te sts'usube. 3Ja'uc me to, la stsaquic, soc la smajic. Ma'yuc bi la yac'beyic bael xujt'uc. 4Jich te yajwal ts'usubiltique, la sticun bael yan abat, ja'uc me to, te j'at'eletique la xch'ojic ta ton, soc la yejch'entesbeyic sjol. Xujt' ma la yich'ic ta muc'. 5Te yajwal ts'usubiltique, la sticun xan bael yan abat, ja'uc me to, laj ta milel yu'unic. Soc bayal xan yan abatetic la sticun bael. Ay la smajic, soc ay la smilic.
6“Ja'uc me to, ay jtul snich'an te bayal c'ux ta yo'tane. Ja' slajibalix la sticun bael. Yu'un la yal ta yo'tan: “Te jnich'ane ya me yich'bonic ta muc'”, xi' ta yo'tan. 7Te j'at'eletique la yalbey sbaic: “Ja' in to ja' te mach'a ya xjil ta swenta te q'uinale. La'ic, ya jmiltic, yu'un jo'otic me ya xjil ta jwentatic te q'uinale”, xiic. 8Jich la stsac smilic, soc la xch'ojic loq'uel ta spat te ts'usubiltique.
9“¿Bila ya spas te yajwal ts'usubiltique? Ya calbeyex te ya me xtal smil jilel te j'at'eletique soc ay me yan j'at'eletic ya yac'bey swentainic. 10¿Ma bal awilojuc te jich ya yal ta Sjun Dios:
“Te ton te ma xtuun la yilic te albañiletique,
ja' yiptajib chiquin-na c'otix stuquel.
11Ja' la yac' c'otuc ta pasel te Cajwaltique.
Jelawen yutsil ya quil ta jsitic”,#Sal 118.22-23. te xie? —xi' te Jesuse.
12Jich c'an stsaquic, yu'un c'ot ta yo'tanic te ja' sc'oplalic te seña-c'op la yale. Ja'uc me to, la xi'ic te ants-winiquetique. Jich la yijq'uitayic jilel, bajt'ic.
Bit'il ay sc'oplal te patanile
(Mt 22.15-22; Lc 20.20-26)
13Jich la sticunic ta stojol Jesús cha'oxtul fariseoetic soc te mach'atic jun yo'tan sbaic soc te Herodese, swenta yu'un ya stabeyic smul ta swenta sc'op. 14Jich tal yalbeyic:
—Maestro, jna'ojtic stojol te puro smelelil te bila ya awale. Ma'yuc mach'a te ya xiwat ta c'op ta stojol te melel ma tsabiluc nax awu'un te mach'a ya awich' ta muq'ue. Melel jamal ya awac' ta nopel te smandal te Diose. ¿Ya bal stac' te ya jtojtic jpatantic yu'un te muc' ajwalil Cesare o ma stac'? ¿Ya bal cac'tic o ma xcac'tic? —xiic.
15Te Jesuse la sna' stojol te cha'lam te yo'tanique. Jich la yalbey yaiyic:
—¿Bi yu'un ya awilbonic co'tan? Ich'bonic tel quil jsejpuc te denario-taq'uine —xi'.
16Jich la yich'beyic tel. C'alal la yil te Jesuse, la sjojc'obey yaiy:
—¿Mach'a yelaw te ya awilic tey a, soc mach'a sbiil te nacal tey a? —xi'.
La yalic:
—Ja' te Cesare —xiic.
17Te Jesús la yalbey yaiyic:
—Te bila ja' yu'un te Cesare, ac'beyaic me jiche, soc te bila ja' yu'un te Diose, ac'beyaic me uuc —xi' te Jesuse.
Bayal ayan yo'tanic yu'un te bila la yale.
Jesús jojc'obot bit'il ay te cha'cuxele
(Mt 22.23-33; Lc 20.27-40)
18Ay saduceoetic te tal sc'oponic te Jesuse. Ya yalic te ma'yuc cha'cuxele.#Hch 23.8. Jich la sjojc'obeyic in aiyej to:
19—Maestro, te Moisese la sts'ibubotic jilel: “Teme ay laj jtul winic te cuxul jilel te yiname, teme ma'yuc jilel snich'ane, ja' ac'a yic' yinamin te yijts'ine, swenta yu'un jich me ay sts'umbal ya xc'ot a te sbanquile,”#Dt 25.5. te xie. 20Ja'uc me to, ay juctul winiquetic te sjoy sbaic ta alatayele. Te banquilale la yic' yinamin jtul ants, ja'uc me to, laj. Ma'yuc jtuluc jilel snich'an. 21Jich te xchebale, la yic' yinamin te me'ba antse, ja'uc me to, laj uuc. Ma'yuc jtuluc jilel snich'an. Jich nix uuc te yoxebale. 22Ta sjuctululic ma'yuc jilel jtuluc snich'anic. Patil laj uuc te antse. 23Te c'alal ya sta yorail te cha'cuxele, ¿mach'a me yinam ya xc'ot te antse? Melel ta sjuctululic la yinaminic ta spisilic —xiic.
24Te Jesús la yalbey yaiyic:
—Te ja'exe jowejemex ta c'op, yu'un ma ba c'oem ta awo'tanic te bila ts'ibubil jilel ta Sjun te Diose, soc te bit'il ay yu'el te Diose. 25Melel te c'alal ya xcha'cuxic tel spisil te animaetique, ma ba ya xnujbiniquix, soc ma'yuquix nujbinel, yu'un jich ya xc'otic te bit'il te ch'ul abatetic te ayic ta ch'ulchane. 26Te bit'il ya xcha'cuxic tel te animaetique, ¿yu'un bal ma ba awilojic te bila ts'ibubil jilel yu'un Moisés ta bay c'oponot yu'un Dios ta bay jpejt' ch'ix te yac ta tilele? Jich la yal tey a te Diose: “Jo'on Dioson yu'un te Abrahame, te Isaaque, te Jacobe”,#Ex 3.6. te xie. 27Te Diose ma ja'uc Dios yu'un te mach'atic lajemique. Ja' Dios yu'un te mach'atic cuxulique. Ya calbeyex te bayal jowejemex ta c'ope —xi' te Jesuse.
Te mandalil te muc' sc'oplale
(Mt 22.34-40)
28Ay jtul jts'ibojom tal ta stojol te Jesuse, yu'un la yaiy stojol te bila la yalbey sbaique. La yil te lec la sujt'esbey sc'opique. Jich la sjojc'obey uuc:
—¿Bi mandaliluc te muc' sc'oplal yu'un spisil te mandaliletique? —xi'.
29Jich la yal te Jesuse:
—Te sbabial mandalil te muc' sc'oplale ja' in to: “Aiya awaiyic stojol, israeletic, jun nax Cajwaltic ay cu'untic, ja' te Cajwaltic Diose. 30C'ux me x'awaiy te Cajwaltic Dios soc spisil awo'tan, soc spisil ach'ulel, soc spisil ap'ijil, soc spisil te awipe”,#Dt 6.4-5. te xie. 31Te xchebal mandalil te pajal soque, ja' in to: “C'ux me x'awaiy ta awo'tan te apat-axujq'ue, jich nix te bit'il c'ux ya awaiy aba atuquel te ja'ate”,#Lv 19.18. te xie. Ma'yuc yan mandalil te c'ax muc' sc'oplal jich bit'il in to —xi' te Jesuse.
32La yal te jts'ibojome:
—Lec te bila la awal, Maestro. Melel xawal te bit'il jun nax Dios aye te ma'yuc yane.#Dt 4.35. 33Soc te bit'il c'ux me ya caiytic ta spisil co'tantic, soc spisil jp'ijiltic, soc spisil te quiptique; soc te bit'il c'ux me ya caiytic te jpat-jxujc'tique jich te bit'il c'ux ya caiy jbajtic jtuqueltique. Ja' c'ax muc' sc'oplal ta pasel stuquel a te bit'il ya cac'beytic smajt'an te Diose soc spisil smajt'an te ya yich' chiq'uel ta bay xchic'jibal te smajt'ane#Os 6.6. —xi' te winique.
34La yil Jesús te ay sp'ijil yo'tan ta yalele. Jich la yalbey:
—Jteb sc'an ya awajwalin te Diose —xi'.
Spisilic ma'yuc mach'a ju' xan yu'un sjojc'oyel ta stojol yan aiyej.#Lc 10.25-28.
¿Mach'a sts'umbal te Cristoe?
(Mt 22.41-46; Lc 20.41-44)
35Te c'alal yac ta p'ijubteswanej ta templo te Jesuse, jich jajch' yal:
—¿Bit'il ay te ya yalic te jts'ibojometic te ja' sts'umbal David te Cristoe? 36Melel ja' nix David te jich la yal ta swenta te Ch'ul Espiritue:
“Te Cajwaltic Dios la yalbey te Cajwale:
‘Naclan ta swa'el jc'ab
ja' to teme la cac'bat apech' ta teq'uel te acontrotaque’,#Sal 110.1. xi' te Diose”, te xie.
37¿Bit'il ay a te ja' sts'umbal David te Cristoe? Melel “Cajwal”, xi' te Davide —xi' te Jesuse.
Te ants-winiquetic bin nax yo'tanic ta yaiyel stojol spisil te bila la yale.
Jesús la yalbey ta jamal smulic te jts'ibojometique
(Mt 23.1-36; Lc 11.37-54; 20.45-47)
38Te c'alal yac ta p'ijubteswanej te Jesuse, jich la yal:
—Tsajtaya abaic yu'un te jts'ibojometique. Melel toyol yo'tanic yu'un te ya slapic ta beel te snajt'il c'u'ique soc toyol yo'tanic yu'un te ya xpatbot yo'tanic ta comonsitil ta bay yolil ch'iwich. 39Soc toyol yo'tanic yu'un te ya snajc'an sbaic tey a ta bay sbabial nactijibaletic ta bay te sinagogaetique. Soc ya smaquic ta ora te sbabial nactijibaletic ta bay ya stsob sbaic ta we'ele. 40Soc ya spojbeyic sna sbiluc te me'ba antsetique. Ja'uc me to, jal ya sc'oponic Dios ta comonsitil, yu'un jich me ya xcuyotic ta lec. Ja'ic me te c'axem to xan castigo ya x'ac'botique —xi' te Jesuse.
Te smajt'an Dios la yac' te me'ba antse
(Lc 21.1-4)
41Jesús la snajc'an sba ta templo ta bay nopol xcaxail smajt'an te Diose. Yac ta yilel te bit'il yac ta yaq'uel ochel staq'uinic tey a te lume. Ay tsobol c'ulejetic te bayal staq'uinic la yaq'uic ochel tey a. 42Soc tal jtul me'ba ants te ma'yuc bila ay yu'une. La yac' ochel ta xcaxail cheb ch'in saquil-taq'uin te ma'yuc bi ay ta manel bayal a. 43Te Jesús la yic' tel te jnopojeletic yu'une. Jich la yalbey:
—Jamal ya calbeyex, te me'ba ants to te ma'yuc bila ay yu'une c'ax jich la yac' c'oem stuquel te bit'il la yaq'uic te yantique. 44Melel sobrail staq'uinic te la yaq'uic stuquelique. Yan te me'ba antse, manchuc teme ma'yuc bi ay yu'une, ja' la yac' ochel spisil stuquel te bila ja' xanix ya smac'lin sba a —xi' te Jesuse.
ទើបបានជ្រើសរើសហើយ៖
San Marcos 12: TZOXCH
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblia en Tzeltal de Oxchuc y Tenejapa © Sociedad Bíblica de México, A.C., 2001.