San Marcos 11
11
Och bael ta Jerusalén te Jesuse
(Mt 21.1-11; Lc 19.28-40; Jn 12.12-19)
1Te c'alal nopol ayiquix ta Jerusalén la staic te Wits Olivailtic ta bay cheb ch'in lumetic te Betfagé soc Betania. Te Jesús la sticun bael cha'tul te jnopojeletic yu'une:
2—Baanic ta bay in ch'in lum to te ya quiltique. Tey chucul ya xc'o ataic cojt' burro te ma to ayuc mach'a scajtibinej ni junuc buelta. Tilaic, nitaic tel. 3Teme ay mach'a jich ya yalbeyexe: “¿Bistuc jich ya apasic in to?”, teme xie, albeyaic: “Ja' ya xtuun yu'un te Cajwaltique. Ya laj sujt'esbat tel ta ora”, ya me awutic —xi' te Jesuse.
4Jich c'o staic alal burro te chucul ta ti'calle ta bay nopol ti'nail, soc la snitic tel. 5Ay mach'atic tey ayic a te jich la yalic:
—¿Bistuc awu'unic te alal burroe? —xiic.
6Te jnopojeletic jich la yalic te bila albotic bael yu'un te Jesuse, jich ac'botic tel. 7La snitic bael tey a ta bay te Jesuse. La slimbey sc'u'ic ta spat te alal burroe. Jich mo scajtibin te Jesuse. 8Ay tsobol mach'atic la slim sc'u'ic ta be. Ay yantic la sbojic tel sc'ab te'etic te la slimic bael ta bee.
9Te mach'atic te neel yacalic ta beele soc te mach'atic patil ayique la yawtayic:
—¡Jelawen yutsil! ¡Bin nax yutsil te mach'a talemix ta swenta te Cajwaltique!#Sal 118.25-26. 10¡Bin nax yutsil te Muc' Ajwalil te sts'umbal te namey q'uinal jtatic Davide! ¡Jelawen yutsil te Mach'a ay ta ch'ulchan! —xiic ta aw.
11Jich och bael ta Jerusalén te Jesuse, soc och ta templo. La yil ta sjoyobal spisil te bitic ay tey ae. Te c'alal malix te c'aale sujt' bael ta Betania soc te lajchaytul jnopojeletic yu'une.
Te higo-te' te ma'yuc site
(Mt 21.18-19)
12Ta sacubel q'uinal loq'uic bael ta Betania. Ay ta wi'nal te Jesuse. 13C'ubul to la yil pejt' higo-te' te ay yabenale. Ba yil teme ay site, ja'uc me to, ma'yuc la stabey. Ja' nax puro yabenal, yu'un ma to yorailuc te site. 14Te Jesús jich la yalbey te higo-te':
—Ma me ayuc mach'a ya slo'bat asit ta sbajt'el q'uinal —la yut.
Te jnopojeletic yu'une, la yaiyic stojol te bila la yalbey te te'e.
Jesús la yac' ta ich'el ta muc' te temploe
(Mt 21.12-17; Lc 19.45-48; Jn 2.13-22)
15C'otic ta Jerusalén. Och ta templo te Jesuse, soc caj sten loq'uel te mach'atic yacalic ta chonbajel manbajel tey a. La sbot'q'uinbey smesaic te jel-taq'uinetique, soc la sbot'q'uinbey snactijib te mach'atic yacalic ta xchonel te stsumute. 16Ma la yac' te ya xc'axic bael soc sbiluquic te ants-winiquetic ta bay te temploe. 17Jich la yal ta p'ijubteswanej te Jesuse:
—Jich ts'ibubil jilel ta Sjun te Diose: “Te jnae snail sc'oponel Dios sbiil yu'un spisil te nacionetique”,#Is 56.7. te xie. Ja'uc me to, te ja'exe la ac'atp'uniquix ta xch'en j'eleq'uetic#Jer 7.11. —xi' te Jesuse.
18Te wolwanej-sacerdoteetique soc te jts'ibojometique la yaiyic stojol te bila la yale. Jich caj sleic te bi ya yut ya smilique, melel la xi'ic te Jesuse scaj te spisil lum jchajp nax la yaiyic te p'ijubtesel yu'une. 19C'alal yaquix ta ijc'ubel a te q'uinale, te Jesús soc te jnopojeletic yu'une la yijq'uitayic jilel te muc'ul lume.
Taquej te higo-te'e
(Mt 21.20-22)
20Ta sacubel q'uinal la yilic c'axel te higo-te' te taquinajemix soc te yisime. 21Te Pedro jul ta yo'tan te bila albot te te'e. Jich la yal:
—Maestro, ilawil te higo-te' te la awut jilele. Taquejix —xi'.
22La yal te Jesuse:
—Ac'a xch'uunjel awo'tanic ta stojol te Diose. 23Jamal ya calbeyex, teme ya awalbey in wits to: “Loc'an bael li'to. Ch'oja aba ochel ta mar”, teme ya awute, jich me ya xc'ot ta pasel teme ma xawal ta awo'tan te ma jichuc ya xc'ote soc teme jich xch'uunej awo'tan ta melele.#Mt 17.20; 1 Co 13.2. 24Ja' swentail te ya calbeyexe, te bila ya ac'anic ta sc'oponel Dios, ac'a xch'uunjel awo'tanic te ya yac'beyexe. Jich me ya awich' te bila ya ac'anique. 25Te c'alal yacalex ta sc'oponel te Diose, pasbeya perdón neeluc teme ay mach'a ay falta yu'un ta atojole. Jich me ya spasbeyex perdón yu'un amulic uuc te Jtatic te ay ta ch'ulchane.#Mt 6.14-15. [ 26Yan teme ma xapasic perdón te ja'exe, ja' nanix jich uuc te Jtatic te ay ta ch'ulchane, ma ba ya spasbeyex perdón yu'un amulic uuc] —xi' te Jesuse.
Yich'oj tulan yat'el te Jesuse
(Mt 21.23-27; Lc 20.1-8)
27Jich c'otic yan buelta ta Jerusalén. C'alal yac ta beel ta templo te Jesuse, talic ta stojol te jwolwanej-sacerdoteetique soc te jts'ibojometique soc uuc te principaletic yu'un te lume. 28La sjojc'obeyic te Jesuse:
—¿Banti la awich' awat'el ta spasel spisil in to? ¿Mach'a la yac'bat awat'el? —xiic.
29La yal te Jesuse:
—Jichon uuc, ay bila ya jojc'obeyex. Teme ya awalbonique, jo'on uuc ya me calbeyex te bila cat'el quich'oj ta spasel in to. 30¿Mach'a la yac'bey yat'el ta yaq'uel ich'ja' te Juane? ¿Ja' bal te Diose, o ja' te winiquetique? Albonic caiy —xi' te Jesuse.
31Jich jajch' yaanic stuquelic:
—Teme ya caltic te ja' ac'bot yat'el yu'un te Diose, ya me yalbotic: “¿Bistuc ma la ach'uunic te bila la yale?”, ya me yutotic. 32Soc teme ya caltic te ja' ac'bot yat'el yu'un winiquetic, ya me jxi'tic te lume, yu'un ay ta yo'tanic te ja' j'alwanej yu'un Dios te Juane —xiic ta yaanel. 33La yalbeyic ts'iin te Jesuse:
—Ma jna'tic —xiic.
La yal uuc te Jesuse:
—Jichon uuc, ma xcalbeyex te mach'a la yac'bon cat'el ta spasel spisil in to —xi'.
ទើបបានជ្រើសរើសហើយ៖
San Marcos 11: TZOXCH
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblia en Tzeltal de Oxchuc y Tenejapa © Sociedad Bíblica de México, A.C., 2001.