San Marcos 13
13
Jesús la yal te ya xjinot te temploe
(Mt 24.1-2; Lc 21.5-6)
1C'alal yac ta loq'uel bael ta templo a te Jesuse, jich la yal te jtul jnopojel yu'une:
—Maestro, ilawil, t'ujbil nax te tonetique soc t'ujbil nax ts'ajc'ubil a te naetic yu'un te temploe —xi'.
2La yal te Jesuse:
—¿Yacat bal ta yilel in muc'ul ts'ajc'ubil naetic to? Ya calbat, spisil me ya yich' jinel. Ma me ayuc jp'ijuc ton te cajal ya xjil ta sba te yan tone —xi' te Jesuse.
Señailetic ta nopol slajibal c'aal
(Mt 24.3-28; Lc 21.7-24; 17.22-24)
3Jich bajt'ic ta Wits Olivailtic. Tey la snajc'an sba a te Jesús ta bay yelawinej sba soc te temploe. Te Pedro, te Jacobo, te Juan, soc te Andrés stuquelic nax tal sc'oponic. 4Jich la yalic:
—Albotic caiytic te bi ora ya xc'ot ta pasel te bila la awale. ¿Bi señail ya xchicnaj te c'alal ya xc'ot ta pasel spisil in to? —xiic.
5La yal te Jesuse:
—Tsajtaya me abaic, ma me mach'a ya slo'layex. 6Melel ay me tsobolic ya xtalic te ya slotbonic jbiile. Ya me yalic: “Jo'on Cristoon”, xiic me. Ay me tsobolic ta jtul te ya xlajic ta lo'layel yu'unique.
7“Yan te ja'exe te c'alal ya awaiyic stojol te ay guerra lum to soc te ay guerra ta c'ubule, ma me xnijc' awo'tanic yu'un. Melel puersa me jich ya xc'ot ta pasel, ja'uc me to, ma to ja'uc te slajibal c'aale. 8Melel te nacionetique ya me scontroin sbaic, soc te muc' ajwaliletique ya me xjajch' scontroin sbaic ta guerra. Ya me xtal tulan nijq'uel ta yantic q'uinal, soc bayal wi'nal. Ja' in to, xjajch'ibal to nax xc'uxul te woclajel ya xtale.
9“Te ja'exe tsajtaya me abaic. Melel ya me x'ac'otex ta sc'ab te muc'ul tsobleje, soc ya me awich'ic majel ta bay te sinagogaetique. Ya me awich'ic tejc'anel ta stojol ajwaliletic soc ta bay muc' ajwaliletic ta scaj te ach'uunejonique. Jich me testigo ya xc'oex cu'un ta stojolic. 10Puersa me ya yich' cholel ta stojol spisil ta jchajp nacionetic ta spamal balumilal te lec yach'il c'op swenta te scolelique. 11Te c'alal ya x'ac'otex ta c'abale, ma me xanopilay ta awo'tanic te bila ya xc'o awalique. Ma me xanop ta awo'tanic xujt'uc. Ja' me ya awalic te bila ya yalbeyex ta awo'tanic te Diose te c'alal ayatix tey a, melel ma ja'uquex te ya xc'opojexe. Ja' ya xc'opoj stuquel te Ch'ul Espiritue.#Mt 10.17-20; Lc 12.11-12. 12Ay me ya yac' sbaic ta milel te mach'atic jun nax sme'-statique. Soc ay me ya yac' ta milel yal-snich'an te state. Soc ay me alnich'anetic ya xjajch' scontroinic te sme'-statique, soc ya me yaq'uic ta milel. 13Ya me awich'ic ilayel yu'un spisil ants-winiquetic ta jwenta. Te mach'a ya xcujch' yu'un c'alal ta slajibal, lec me ayix abi.#Mt 10.22.
14“Te j'alwanej yu'un Dios te Daniel sbiile la yalbey jilel sc'oplal te jinwanej te ya sboltes te ch'ul awilale.#Dn 9.27; 11.31; 12.11. (Te mach'a ya yil te bila ts'ibubil li'to, ac'a me sna' stojol.) Te c'alal ya awilic te ochemix tey a te banti ma ja'uc yawile, ac'a me anuquic bael ta witstiquil te mach'atic ayic ta sq'uinal Judea. 15Te mach'a ay ta yamac'ul sba te snae, teme coj tele, ma me x'och xan ta yutil sna yich'el loq'uel te sbiluque. 16Soc te mach'a ay ta sc'ale, ma me sujt' xan yich'el ta sna te sc'u'e.#Lc 17.31. 17Ay me swocolic te antsetic te yic'ojic alal ta xch'ujt'ique soc te ay chu'ul-alaletic yu'unique. 18C'oponaic Dios te manchuc yorailuc invierno a te ya x'anex baele. 19Melel ma'yuc bay jich woclajel ay tel te c'alal la yich' pasel yu'un Dios te balumilale.#Dn 12.1; Ap 7.14. Soc ta patil ma'yuquix jich ya xc'ot ta pasel. 20Te manchuc yacuc scombey sc'aalelal te Cajwaltique, ma'yuc mach'a ya xcol te jichuque. Ja'uc me to, chapalix yu'un te ya yich' comel ta scaj te mach'atic tsabilic yu'une.
21“Teme ay mach'a jich ya yalbeyexe: “Aiya awaiy, li' ayix to te Cristoe”, teme xie, o ya yal te yane: “Lum ayix to”, teme xie, ma me xach'uunic. 22Melel ay ya xchicnaj lotil cristoetic soc lotil j'alwanejetic. Ya me spasic señailetic soc jchajp at'eliletic. Ya me slo'layic uuc te mach'atic tsabilic yu'un te Diose te yacuc xju' yu'unique. 23Ich'a me atsaic jiche. La me calbeyex neeluc.
Te bit'il ya xtal te Nich'anile
(Mt 24.29-35,42-44; Lc 21.25-36)
24“Ja'uc me to, teme c'axix yorail a te woclajele, ya x'ijc'ub te c'aale,#Is 13.10; Jl 2.10,31; 3.15; Ap 6.12. jich ma xyac' xojobil te ue,#Is 13.10; Ez 32.7; Jl 2.10; 3.15. 25soc ya xch'ay coel ta ch'ulchan te eq'uetique.#Is 34.14; Ap 6.13. Soc ya yich' tijel te bitic ay yipic ta yolil te ch'ulchane.#Jl 2.10. 26Jich me ya xchicnaj tel ta tocal#Dn 7.13; Ap 1.7. ta sjamalul ch'ulchan te Nich'anile. Ay me bayal yu'el soc xojobil te yutsilale. 27Ya me sticun bael te ch'ul abatetic yu'une. Ya xba stsobic tel ta bay xchanjejch'elul q'uinal ta spisil ta sjoyobal ch'ulchan balumilal te mach'atic tsabilic yu'une.
28“Te bila la calbeyexe, nopaic ta swenta bit'il ay te higo-te'e: Melel teme yaquix ta ach'ubel te sc'abc'abe, soc teme yaquix ta yaxubel te yabenale, jich me ya ana'ic stojol te nopolix tel te veranoe. 29Ja' nanix jich teme la awilic te yac ta c'oel ta pasel spisil te bila la calbeyexe, jich me ya ana'ic stojol te nopol ayix, ayonix ta ti'naile. 30Jamal ya calbeyex, ma to xlajic a te mach'atic cuxajtic ta q'uinal ta ora to te spisil ya xc'ot ta pasel te bila la calbeyexe. 31Ya xlaj te ch'ulchane soc te balumilale. Yan te jc'ope, ma xlaj sc'oplal stuquel.
32“Ja'uc me to, ma'yuc mach'a ya sna' stojol te bi ora soc te bi c'aalil ya xc'ot ta pasele. Ma sna' uuc te ch'ul abatetique, soc ma sna' uuc te Nich'anile. Ja' nax ya sna' stuquel te Jtatic Diose.#Mt 24.36.
33“Jich yu'un tsajtaya me abaic. Wiq'uiluc me asitic, soc c'oponaic me Dios, yu'un ma na'biluc awu'unic te bi ora ya xc'ot te yoraile. 34Jich me c'oem te bit'il jtul winic te bajt' ta c'ubul q'uinale. C'alal ma to xloc' bael ta sna, la spas jilel ta mandal te abatetic yu'une. Juju-jtul la yac'bey jilel yat'el, soc la yalbey jilel mandal te mach'a scanantayej te sti' snae te ma me xwaye.#Lc 12.36-38. 35Jich yu'un wiq'uiluc me asitic, yu'un ma na'biluc awu'unic te bi ora ya xjul tel te yajwal nae, teme yijc'ubel q'uinal, teme olil ajc'ubal, te c'alal ya x'oc' mut, o ta sacubel q'uinal. 36Teme ay bit'il tal ta orae, ma me wayaluc ya xjul staex. 37Ya calbeyex te ja'exe, soc uuc te yantique: Wiq'uiluc me asitic ta apisilic —xi' te Jesuse.
ទើបបានជ្រើសរើសហើយ៖
San Marcos 13: TZOXCH
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblia en Tzeltal de Oxchuc y Tenejapa © Sociedad Bíblica de México, A.C., 2001.