Genesis 11
11
Otjiretundu tja Babilon
1Oviwaṋa avihe kombanda yehi aavi hungire eraka rimwe nomambo yemwe. 2Nowo tji va tjindira kuṱa komuhuka, otji ve ya porutjandja mehi ra Sinar; noku va katura. 3Nowo ve rihungirira oveni ave tja: “Indjeye tu ungure ozohima nu tu ze nyose nomuriro kutja ze kare nomasa!” Nowo otji va ungura ozohima okutunga na zo, nave rungu omunoko wokuzeṱizira kumwe. 4Nowo va tja: “Indjeye tu ritungire otjihuro tji ma tji kara notjiretundu tjohonga, ndji mai vaza keyuru, kokutja ena retu ririre enene nu ri tjiukwe akuhe, nokutja atu ha rimbara kombanda yehi arihe.”
5 Muhona wa rauka pehi okutara ihi otjihuro notjiretundu ovandu mbo tji va tunga. 6Nu Muhona wa tja: “Nambano ovandu mba owo omuhoko umwe, navehe ve hungira eraka rimwe. Nu indji oyo ombutiro yovitjitwa vyawo; nambano ve ri pokuyenena okutjita atjihe tji mave vanga. 7Indjeye tu heruke nu tu pambauze eraka rawo kutja owo ave ha zuvasana.” 8Nu Muhona otje ve haṋa ne ve rimbi mehi arihe. Nowo otji va isa okutunga ihi otjihuro. 9Otjo opu tja rukirwa Babilon, orondu imbo Muhona opa pambauzira eraka rovandu avehe kombanda yehi; nokuzambo Muhona ope ve rimbira kombanda yehi arihe.
Ozondekurona za Sem
(1Eku 1:24-27)
10Inḓa ozo ozondekurona za Sem: Ozombura mbari kombunda yomupupo, Sem tja ri nozombura esere rimwe wa kwata omuzandu Arpaksad. 11Kombunda yanao wa hupa ozombura ozongwao omasere yetano. Neye wa ri novanatje ovazandu novakazona.
12Nu Arpaksad tja ri nozombura omirongo vitatu nandano wa kwata omuzandu ne mu ruku Selak. 13Nu Arpaksad wa hupa ozombura omasere yane nandatu kombunda yongwatero ya Selak. Neye wa ri novanatje varwe.
14Nu Selak tja ri nozombura omirongo vitatu otja kwata omuzandu Heber. 15Nu Selak wa hupa ozombura omasere yane nandatu kombunda yongwatero ya Heber; neye wa ri novanatje ovazandu novakazona.
16Nu Heber tja ri nozombura omirongo vitatu na ine wa kwata omuzandu Peleg. 17Nu Heber wa hupa ozombura omasere yane nomirongo vitatu kombunda yongwatero ya Peleg. Neye wa ri novanatje ovazandu novakazona.
18Nu Peleg tja ri nozombura omirongo vitatu wa kwata omuzandu Reu. 19Nu kombunda yongwatero ya Reu, Peleg wa hupa ozombura omasere yevari na muvyu. Neye wa ri novanatje varwe.
20Nu Reu tja ri nozombura omirongo vitatu na mbari wa kwata omuzandu Serug. 21Nu kombunda yongwatero ya Serug, Reu wa hupa ozombura omasere yevari na hambombari. Neye wa ri novanatje ovazandu novakazona.
22Nu Serug tja ri nozombura omirongo vitatu wa kwata omuzandu Nahor. 23Nu Serug wa hupa ozombura omasere yevari kombunda yongwatero ya Nahor. Neye wa ri novanatje varwe.
24Nu Nahor tja ri nozombura omirongo vivari na muvyu wa kwata omuzandu Terak. 25Nu kombunda yongwatero ya Terak, Nahor wa hupa ozombura esere nomurogo na muvyu. Neye wa ri novanatje varwe.
26Nu Terak tja ri nozombura omirongo hambombari wa kwata ovazandu ooAbram na Nahor na Haran.
Ozondekurona za Terak
27Nu inḓa ozo ozondekurona za Terak: Terak wa kwata ovazandu vetatu: OoAbram na Nahor na Haran, nu Haran wa ri ihe ya Lot. 28Nu Haran wa kokera mehi rongwatero ye Ur mOkaldea, ihe Terak ngunda e nomuinyo. 29Abram na Nahor va kupa ovakazendu. Ena romukazendu wa Abram ra ri Sarai, nena romukazendu wa Nahor ra ri Milka, omusuko wa Haran; ooMilka na Jiska omba za ihe imwe. 30Sarai wa ri ongandji.
31Nu Terak wa toora omuzandu we Abram, na Lot, ondekurona ye, omuzandu wa Haran, nomukwe we omusuko Sarai, omukazendu womuzandu we Abram. Nowo va tjinda pamwe okuza motjihuro tja Ur mOkaldea okuyenda kehi ra Kanaan, nave katura mOharan. 32Nu Terak wa kakokera ngo, e nozombura omasere yevari nandano.
Currently Selected:
Genesis 11: HRR-UNI
Highlight
Share
Copy
Want to have your highlights saved across all your devices? Sign up or sign in
Herero Revision Bible © Bible Society in Namibia, 2021.