JOŊRE 10
10
Piyer waate Kel pəsaŋ kəmarwaŋ a Korney
1Kəya hulum kəman a jəŋ giidə vil də Sezareŋa, yə məntu minti Korney#10.1 Korney haa hulum bə Rom, wə paapa hulum bə Ziwifi ba.. Wə haa kumna bə sooto kəsaŋ. Wə a jəŋ ha'aŋ aduubə də sooto kəsi kənkəyiŋa də minti yə manta minti «Sooto də minti bəŋ Itali daŋ.» 2Wə haa hulum bə minti bə ɗe haa də ku Pepeŋ, bə kaw awalna wəra də gə girduŋ keɗe. Kəəsu aye ablaw a kaanə Ziwifi gə caacaŋ, wə tooste Pepeŋ saksaki gəm.
3Dəyaŋ hõy məna, də cəwa də minti yə le kaaraŋ aker da dəərəŋ, karman vəɗaŋ duru. Kəya wə asaŋ *hulum bə digi kə Pepeŋ wəra anə ɗal-ɗal caw bə kele da girdu da. Hulum bə digiŋ məntunu də səmu anə rati minti: «Korney!» 4Kəya Korney əsəŋ bə gulu tew-tew-tew. Də walka ku tərmuyu, wə ləənu ku minti: «Kumnaŋ, kel maa mo?» Hulum bə digi kə Pepeŋ hərnu kel minti: «Pepeŋ əskəŋ toose nəmtiŋ daana wə asaŋ bele bə minti tam bə jəwa sar kaa kə caacaŋaŋ. Gud teŋa ta, wə ɗəkəŋ cəərəma. 5Hebkəna ha'aŋ, vaa kaa la giidə vil də Zopeŋ bə ɗe a tepe hulum kəman da, yə məntu minti Simoŋ, səmu bə tokɗeŋ minti Piyer. 6Wə haa irku ger hulum kəmana yə məntu minti Simoŋ gəm, hulum bə koyte golgoŋ, kuli nuutuŋ ku kan kəmtəŋa.»
7Də ko bə minti hulum bə digi kə Pep bə minti a jəŋ bə wəətu kela kooroŋ anəkay, Korney mantaŋ kaa ɓasi gud kaa kə joŋre nuutuŋa, də sooto məna gud kaayaŋ gə cuuruŋa. Sooto toŋ bə ɗe haa də ku Pepeŋ gəm. 8Korney tupnuy bəlam də kel gə minti hulum bə digi kə Pepeŋ a wəətunu duŋ, kəya wə vəənəy Zope faɗi.
9Ɗeŋ a deye dibiinim, də ko bə minti kaa teŋ kəm a kəkəy naŋ daana yə bə tuli wəra Zopeŋ, Piyer luŋ apəya cəərə kuli bə minti wə həəti adaŋ bə ɗe a toose. Cəwaŋ máŋ wəra maŋ bə kole daaway ɗeker-ker. 10Kəya tay ɗəlnu, caadə karman bə hame duunu gəm. Də ko bə minti yə bə jəw kar kə hameŋ daŋ, karman bəŋ cuuru, kəya wə nəŋəŋ a koŋa je'i. 11Wə ɗe a goleŋa, tarmə pepeŋ warna də bəŋə-biŋi, karman kəman bə ziiri da. Karman toŋ akas ladəra mooto ana də topə-tope kaasa kəna gəm kəna gəm waaɗe keɗe, wə nuutu bə zeede da adawra da anə faɗ-faɗ-faɗi. 12Giidə ladəra taŋa ha'aŋ, gidiirə kar wəra ada keɗe: anə kar gə kəmpəri waaɗe-waaɗe'iŋ, də kar gə si tara cəərə giidi daana də kaskoŋ gəm. 13Kəya dordə karman əsəŋ bə wəətu da faɗi minti: «Piyer, faa la apəya! Awə kar teŋ la, həməy la!» 14Səma Piyer hərnu kel minti: «Həə! Barkaŋ, kel teŋ ji kaasəna ba! Kar kə zeɓə-zeɓeŋ, də kar gə minti *ku gili kə Moyisiŋ a haŋ ku kaŋ wəra ciiriŋ, ten həmnəy hõy ba.» 15Səma dordə karman toŋ haraŋ bə wəətu da minti: «Karman bə minti Pepeŋ waataŋ wəra cuuru minti wə *cetcetiŋ, tam paapa kirka kulu baymele tam ba.» 16Wə dogtoŋ bə əski kel teŋa kampa soope. Adoro, karman bə minti a ziiriŋ warda tarmə pepeŋ daŋ haraŋ warna anə fiw apəy na faɗi.
17Kəya Piyer bəsaŋ máŋ bə ɗiki gil, bə le ku kusru minti gud kel teŋ haa minti harmə mo? Də ko bə minti wə bə ɗiki bədoona gila taŋ, kaa gə minti Korney a vəənəy daŋ a mantaŋ gud kuli kə Simoŋ də ne, yə máŋ laka doloy haa ku kəsarkaw nuutuŋa ɗaw. 18Kəya yə mantaŋ warda anə koloŋ laki ku kuli da minti: «Simoŋ bə minti yə məntu minti Piyer həəti nuutu haa giidə kuli toŋa laki kənaŋ mo?»
19Ana Piyer ha'aŋ kəm saksaki bə ɗiki cəərə karman bə minti a vəɗaŋ duruŋ. Kəya Tiiru Cetcetaŋ wəətunu minti: «Golə la, kaa yaŋ kəna soope laki bə goldoma. 20Faa la apəya, vaa la wəra adawra siri. Tapə la guudi, a girmi ba, gud bə minti vəənəy da haa ten.» 21Kəya Piyer vaŋ warda siri da, wə bəŋ, wə əsəŋ tiiniya gil, wə wəətənəy minti: «Haa gil kəna ten hulum bə minti aŋ bə gulduŋ. Kel gə minti aŋ bəŋ guudiŋ, aŋ topon bəlam di la kəm mo?» 22Kəya yə hərnu kel minti: «Vaŋ are da haa Korney, sooto bə saamaŋ. Wə haa hulum ɗekeri, wə bə humi kosoŋa cəərə Pepeŋa daana kaanə Ziwifiŋ keɗe bə əŋku minti wə hulum pisi gəm. Bədoona pa, hulum bə digi cetceti kə Pepeŋ wəətunu minti wə mantam na girdu na kir minti wə ɗee la a jeɓre kel gə minti tam ɗe yaŋ a həru duŋ.» 23Kəya Piyer məntənəy aləwa, wə duuniy irku di warna hãã də ko bə duugŋ.
Ɗeŋ a deye dibiinim kəyaŋ, yə kooroŋ nuutu də kumsi keɗe faɗi. Sərdə kəsəənu gə doo-de gə Zope təpaŋ guudi bə ɗe a məlu gəm. 24Ɗeŋ a deye dibiinim ayna kəyaŋ, yə tuluŋ warna Sezare na faɗi. Korney wəra bə məya də kəmnuŋ daana gədəəru gə agŋ-agŋ gə minti wə a məntənəy daŋ keɗe. 25Bə minti Piyer co'oŋ sar kuliŋa anəkay, Korney faŋ da bə bi a jəmu duru, wə vaŋ də gəgəəru tiinu faɗi. 26Səma Piyer fəənu apəya, wə wəətunu minti: «Faa la apəya, ten haa kumsum toki gəm.» 27Kəya yə vaŋ máŋ aker na lam bə nele na də kumsi. Piyer ɗeŋ a fele kaa kə ablaw gə minti a jəŋ bə məwaŋ ada gil keɗe. 28Kəya wə wəətənəy minti: «Aŋ wəra gə asə-ase minti ku gili kə kaanə Ziwifiŋ wəra bə waatə-waate minti: hulum bə minti paapa bə Ziwifi baŋ, a de jaa duuru ba, a kele girdu bə gəm. Səma Pepeŋ gaanan dərən wəra cəərə karmana anə kaŋkaŋ minti ten a gole hulum anə məna baahãy#10.28 Kaanə Ziwifi a jəŋ bə gole kaa kaayaŋ gə minti paapa Ziwifi baŋ baahãy gud bə minti kaa teŋ yə paapa kaa kə Pepeŋ ba. Kaa kə Pepeŋ, teŋ wəra gə ŋamə-ŋeme dəra a Pepeŋ. ba daana damdi hulum bə zeɓə-zeɓe ana bə gəm. 29Də ko bə minti aŋ vaŋ kaŋ guudən na bə ɗe a goldon daŋ, ten faŋ da anə faɗi bay girmi ku tarmana haa sə teŋ. Hebkəna ha'aŋ, kel gə minti aŋ mantənan ciiri daŋ, aŋ waatan dən la kəm mo?» 30Kəya Korney hərnu kel minti: «Hətəŋ wəra hebkəna soope, də cəwa taŋ gila derra pa, də minti yə le kaaraŋ aker da dəərəŋ, ten a jəŋ bə toose akera gerdəna. Ɗe a goleŋa, hulum kəman bə tarə-tere dəməəmə də humti dər kaa bəre'-bəre'a suru, əsəŋ tiinən da anə gil. 31Wə waatənan minti: ‹Korney, Pepeŋ əskəŋ toose nəmtiŋ ne. Cuuru ɗəki a keye bə minti tam bə keye kaa kə caacaŋa duuruŋ. 32Bədoona ta, vaa kaa la giidə vil də Zopeŋ bə ɗe a tepe Simoŋ da, səmu bə tokɗeŋ minti Piyer. Wə haa irku ger hulum kəmana yə məntu minti Simoŋ gəm, hulum bə koyte golgoŋ, kuli nuutuŋ ku kan kəmtəŋa.› 33Bə minti ten əskəŋ kel teŋ kəya, ten məŋ ba, ten vaŋ kaa na cəlam bə ɗe a goldom faɗi. Gud bi nəmtiŋa ta, ten jəm suuse. Bə hebkəna, are keɗe kəna bə mi bə jeɓre kel gə minti Barkaŋ Pepeŋ a bəlaŋ minti tam hərəy la wəra a areŋ.»
34Kəya Piyer əsəŋ bə wəətiya gəm ta, wə minti: «Ten wəra bə asə-ase hebkəna gəəzi minti Pepeŋ ɓarse dər kaa ba. 35Ana doloy ha'aŋ, hulum jəə la nuutu bə seŋka məntə ɗaw, wə jəəne bə humi kosoŋa cəərə Pepeŋa, bə ji kar gə minti ɗeker tiinuŋ gəm, wə de dər Pepeŋ pisi faɗi. 36Pepeŋ waataŋ kel nuutuŋ wəra a kaanə *Israyel, kel teŋ haa *Kel pəsaŋ kəmarwaŋ gə minti waate minti yə neke bə fele kəkaɓi gud Yeesu Kristuŋ; wə haa Barkaŋ kə kaŋ keɗe. 37Aŋ wəra gə asə-ase kar gə minti jəŋ giidə seŋka də Zudeŋaŋ keɗe. Yə məlaŋ gud jiŋ anə faɗi haa Galile, adordə hiti bə minti Zaŋ a waataŋ kel a kaŋ minti yə jəə batem la. 38Aŋ wəra gə asə-ase pa minti Pepeŋ a ŋəmaŋ Yeesu bə Nazaretiŋ wəra, wə ɗusnu wəra də səɓaki kə Tiiru Cetcetaŋ gəm. Bədoona ta, Yeesu toŋ gəryəŋ giidə seŋkaŋ lama keɗe'i ha'aŋ, bə ji pisiŋa sar kaŋa daana bə pi kəwal gə minti cəərə kaŋa bə ləsəya wəraŋ, gud bə minti Pepeŋ duuru saksaki.
39Áŋ kəmnə də kəkəy də kar gə minti wə jiiniy giidə seŋka kə kaanə Ziwifiŋa daana Zeruzalema keɗe'iŋ. Kaŋ ɓəlnu wəra a kəbaŋ gə largaŋa, yə əwnu wəra. 40Səma wə haa hulum bə minti Pepeŋ hərnu wəra dədərgə adordə meŋa dər hi bə soopeŋaŋ. Wə bəlaŋ haa minti Yeesu bəə la a ge dər áŋ cəərə kusru minti tó dədərgə gəəzi. 41Səma wə gaŋ gud kusru haa paapa a kaanə Ziwifiŋ keɗe ba, kəm ha'aŋ a are kaayaŋ gə minti Pepeŋ a ŋamtaŋ are warda hãã minti are jəə la kəmnə də kəkəy də kel teŋ. Də ko bə minti wə haraŋ wəra dədərgə adordə me duŋ, are hamaŋ, are saŋ də kumsə are. 42Yeesu waataŋ are minti aŋ waatə kel la a kaanə Ziwifiŋ bə gay diri wəra anə pasyak-pasyaki cəərə kusru minti Pepeŋ ŋəmaŋ da haa tó bə bi a isi bə jeme kəəti də kaa kə dədərgəŋa, də kaa kə mee-meŋ keɗe. 43*Kaa kə jogte ku mini kə Pepeŋ keɗe waataŋ kel cuuru haa a kəkəy bə minti yə waataŋ minti: gud səɓaki də sam Yeesu, mindi mo bə minti doŋ ne guudu fele vəəgə bə giidu cəərə baymele nuutuŋa.»
Kaa gə minti paapa gə Ziwifi baŋ fele Tiiru Cetcetaŋ gəm
44Də ko bə minti Piyer kəm bə waate kel teŋaŋ, Tiiru Cetcetaŋ bəŋ cəərə kaa gə minti a bə jeɓre kel kə Pepeŋa ku Piyeraŋ. 45Kaanə Ziwifi gə doo-de gə minti a bəŋ a mele Piyer, ŋələŋ ablaw gud bə minti yə asaŋ haa Tiiru Cetcetaŋ də minti Pepeŋ ayaŋ, doloy bə tuli cəərə kaa gə minti teŋ paapa gə Ziwifiŋ baŋ gəm. 46Gud maa mo yə asaŋ ha'aŋ, kaa teŋ bə waate ku karman bə minti kaŋ uskunu hõy ba daana yə bə tokɗe boblo kə Pepeŋa pa. Kəya Piyer haraŋ bə lay kuya minti: 47«Kaa té laki gə minti fəlaŋ Tiiru Cetcetaŋ akas áŋa ana gəm, hulum neke bə hay kuy wəra bay jəy batem pə mo?» 48Kəya wə minti yə jəy batem la wəra də sam Yeesu Kristu. Adordə teŋa kəya, anə Korney waataŋ Piyer minti wə hətə la kəm sar té ada laki.
Currently Selected:
JOŊRE 10: KERNT05
Highlight
Share
Copy
Want to have your highlights saved across all your devices? Sign up or sign in
Texte de la Bible: Kera © Alliance Biblique du Tchad, 2004.