JOŊRE 11
11
Piyer tope bəlam də kel nuutuŋ a kaa kə doo-de gə Zeruzalem
1*Kaa kə vaa-veŋ də kaa kə doo-de gə minti də kuliŋ giidə seŋka də Zudeŋa əskəŋ warna minti kaa gə minti teŋ paapa gə Ziwifiŋ baŋ doŋ ne wəra gud kel kə Pepeŋa gəm. 2Də ko bə minti Piyer haraŋ Zeruzalem da kay daŋ, kaa kə doo-de gə minti waŋ wəra Ziwifi faɗiŋ, ŋoryoŋ wəra suru. 3Yə əsəŋ bə wəətu minti: «Hayya! Tam bə ɗeŋ a kele ger kaa gə minti *təntəri bay cemeŋ, gə minti paapa gə Ziwifiŋ baŋ, bə ɗe a hame kar diiri keɗe'iŋ naanaanə pə mo!»
4Bədoona kəyaŋ, Piyer əsəŋ bə tupuy bəlam də kel gə minti a jəətəŋ a niini wəra a kuɗiŋa məna-məna keɗe. 5Wə minti: «Bə minti ten a jəŋ Zope daŋ, ten əsəŋ hõy bə toose. Də ko bə minti ten bə tooseŋ, karman kəman bəŋ cəərəna, ten nəŋəŋ a koŋa je'i. Kəya karman kəman vəɗaŋ wəra dərəna faɗi. Karman toŋ akas ladəra mooto ana də topə-tope kaasa kəna gəm, kəna gəm waaɗe keɗe bə ziiri da adawra da. Wə bəŋ a mele wəra anə rusi sarəna. 6Kəya ten əsəŋ bə gole giidə wəra anə kartaŋ-kartaŋ. Ten ɗeŋ a ase haa anə kar gə kəmpəri waaɗe-waaɗe'iŋ, kar gə waraŋ, kar gə fi tara cəərə giidi, də kaskoŋ ada keɗe gəm. 7Kəya ten əskəŋ dordə karman kəman bə waatan da minti: ‹Piyer, faa la apəya, awə kar teŋ la, həməy la!› 8Ten hərnu kel minti: ‹Həə! Barkaŋ, kel teŋ ji kaasəna ba! Kar kə zeɓə-zeɓeŋ də kar gə minti *ku gili kə Moyisiŋ a haŋ ku kaŋ wəra ciiriŋ, ten həmnəy hõy ba.› 9Kəya ten əskəŋ dordə karman toŋ apəy da pa bə waatan da minti: ‹Karman bə minti Pepeŋ waataŋ wəra cuuru minti wə *cetcetiŋ, tam paapa kirka kulu baymele tam ba.› 10Karman toŋ dogtoŋ bə ji kampa soope, adoro kar teŋ haraŋ warna anə fiw apəy na faɗi.
11Kəya, də ko toŋ məna bə minti karman toŋ a bə jiŋ, kaa tuluŋ soope lam a ko bə minti are bə həəti adaŋ. Vəənəy sarən da haa kaa gə giidə vil də Sezareŋ.
12Kəya Tiiru Cetcetaŋ waatənan minti: ‹A girmi ku tarməyama ba, faa la guudi faɗi.› Kəsaanan kənkəyi gə doo-de gə minti aŋ laki hebkəna bə əsəyaŋ, yə a bəŋ a məlan ger Korneya. Are vaŋ girdu haa diiri keɗe gəm. 13Kəya wə əsəŋ bə waate are minti *hulum bə digi kə Pepeŋ vəɗaŋ kusru wəra a tó akera ger tó gəm ŋaanaanə mo. Wə waataŋ tó minti: ‹Vaa kaa la, yə ɗee la giidə vil də Zopeŋa bə ɗe a mantam Simoŋ da, səmu bə tokɗeŋ minti Piyer. 14Wə bi yaŋ a waatam kel gə minti tam fele seereŋ yaŋ guudiŋ, tam də gə gerdem keɗe'i gəm.› 15Bə minti Korney təwaŋ kel kə waate nuutuŋ, ten əsəŋ bə wəətəy kela, Tiiru Cetcetaŋ bəŋ ciiri a ko toŋa ada faɗi damdi a a bəŋ cəərə áŋa ajew ana gəm#11.15 Tiiru Cetcetaŋ a bəŋ cəərə kaa kə ajew haa dər hi bə Pantəkotiŋ (Joŋ. 2.1-4).. 16Kəya cəərən ɗəkəŋ cəərə kel gə minti Barkaŋ a wəətənəy wəra minti: ‹Zaŋ jəŋ batem a kaŋ də kan. Səma aŋ, yə bə jəŋ batem yaŋ də Tiiru Cetcetaŋ.› 17Bədoona ta, Pepeŋ əynəy Tiiru Cetcetaŋ tá də minti wə ayna a áŋ bə minti áŋ a doŋ guudu gəm səm moŋ, ten haa mindi gəm tə mo bə minti he ku Pepeŋ wəra bay ji karman bə minti wə bele jəw mo?» 18Bə minti kaa gə minti a ŋoryoŋ suruŋ əskəŋ kel teŋ kəyaŋ, ku tərməyi arsaŋ wəra, yə əsəŋ bə tokɗe Pepeŋa bə waate minti: «Pepeŋ jəŋ doloy haa minti kaa gə minti teŋ paapa gə Ziwifi baŋ nakə la bə kole kirki a baymele neeteŋ bə fele dədərgə də gəəzə-gəəzi gəm!»
Kaanə Antiyosi gə minti paapa gə Ziwifi baŋ əski kel kə Pepeŋ
19Də ko bə minti kaŋ əsəŋ bə lese kaa kə doo-deŋa adordə me də Etiyenaŋ, yə meereŋ wəra zetzet giidə koŋa. Kuy ɗeŋ a de warna hãã giidə seŋka də Fenisi na, sirdiŋ warna ajomga də Sipərəŋ na, daana giidə vil də Antiyosi na gəm, bə waate kel kə Pepeŋa wəra a kaanə Ziwifiŋ təwa. 20Sərdə kaa kə doo-de gə Sipərəŋ daana gə Siren, kooroŋ Antiyosi na gəm. Kaa teŋ ha'aŋ, yə waataŋ *Kel pəsaŋ kəmarwaŋ gə cəərə Barkaŋ Yeesu wəra a kaa gə minti paapa gə Ziwifi baŋ gəm. 21Səɓaki kə Barkaŋ bə kəyəya səm moŋ, kaa doŋ ablaw guudu. Yə koloŋ kirki a baymele neeteŋ, yə əsəŋ máŋ bə ɗe guudu faɗi gəm.
22Bə minti kaa kə Tapi gə Zeruzalem əskəŋ kel gə minti bə ji Antiyosiŋ anəkay, yə gaŋ Barnabasi ada na. 23Də bə minti wə ɗeŋ a tuli kay ada naŋ daana wə asaŋ minti Pepeŋ a jəŋ pisi nuutuŋ sar kaa kə doo-deŋa ŋaanaanə moŋ, waale duunu ablaw. Kəya wə tiŋniy diri ada də kel, minti yə əsə la ŋəŋ bə ɗe gud Barkaŋa də ku tərməyi ɗaaməna faɗi. 24Barnabasi haa hulum pisi, wə bə ɗosə-ɗose də Tiiru Cetcetaŋ, daana wə bə doo-de ŋəŋ gəm səm moŋ, kaa əsəŋ bə de gud Barkaŋa ablaw.
25Kəya Barnabasi kooroŋ Tarsə, wə cutuŋ koŋ ada bə golde Sola. 26Də ko bə minti wə ɗeŋ a fəlu kəyaŋ, wə təpnu, yə kooroŋ gud kumsi Antiyosi na keɗe. Yə laŋ a joŋreŋa də kumsi adəwaldə kaa kə Tapi teŋa ada, yə hataŋ kaa ada ablaw gəm. Kaa gə minti doŋ a sam Yeesuŋ fəlaŋ sam bə «kaa kə Kristuŋ» ateŋa ajew haa Antiyosi.
27Də ko toŋ ateŋa ha'aŋ, *kaa kəman kə jogte ku mini kə Pepeŋ pətəŋ Zeruzalem da, yə kooroŋ Antiyosi. 28Hulum kəman ada məna'i guudi, səmu minti Agabusi, wəətənəy də səɓaki kə Tiiru Cetcetaŋ wəra ciiri acekjewa ɗe'i minti tay mooto bə awe yaŋ wəra giidə seŋkaŋa keɗe'i. Kel teŋ doŋ kuy wəra də tay də minti awaŋ dər ko bə minti Kolodi bə əsə-isi kumna bobloŋ. 29Kəya kaa kə doo-de gə Antiyosiŋ məlaŋ ɗiki di bə taare soloya minti té əyu la bə keye kəsaanə té gə doo-deŋ gə giidə seŋka də Zudeŋ. Yə taaraŋ soloy ha'aŋ, mindi mindi mo ayaŋ də aŋar də karman bə minti wə nəkaŋ kir fəluŋ. 30Kəya yə jəŋ haa damdi yə a məlaŋ ɗiki di wəraŋ ana. Yə taaraŋ soloy taara, yə əynu kasi anə Barnabasi də Sol minti yə ɗee la a əyu a kaa kəmtəŋ gə tiinə kaa kə Tapi gə Zeruzalem.
Currently Selected:
JOŊRE 11: KERNT05
Highlight
Share
Copy
Want to have your highlights saved across all your devices? Sign up or sign in
Texte de la Bible: Kera © Alliance Biblique du Tchad, 2004.