JOŊRE 9
9
Sol de gud Yeesu
1Də ko toŋ ateŋa ha'aŋ, Sol nuutu saksaki bə lese kaa gə minti doŋ gud Barkaŋa, bə cəməy walka giidi minti tó bəsəy wəra. Kəya wə ɗeŋ sar *kumna boblo bə keere Pepeŋ, 2wə wəətunu minti: «Ayan kefter la kaasəna bə ɗe a kalte giidə *kuli bə toose kə kaanə Ziwifi gə Damasiŋa minti ten faŋ haa səram da.» Bədoona ana, də kefter toŋ kəəsu kəya taŋ, wə fəlaŋ kaa kaŋkar ne mo, kəram mo, gə haa-he kəkəy bə minti Barkaŋ a gəənəy gədəəgi duŋ, wə neke bə humuy, wə pəŋtəy, bə ɗe diiri Zeruzalem.
3Kəya wə kooroŋ nuutu Damasi faɗi. Də ko bə minti wə a kəkəy na máŋ maŋ sar Damasiŋ, pəɗaki kəman faŋ nuutu da anə jiɗiɗ apəy da faɗi, wəlnu koŋ wəra cuuru ɓəki. 4Kəya wə awaŋ adawra anə mufi, wə əskəŋ dordə karman bə wəətu minti: «Sol! Sol! Tam ləsan haa səm mo?» 5Sol ləənu ku minti: «Kumnaŋ, tam haa mindi mo?» Dordə karman toŋ hərnu kel da minti: «Haa kəna ten, ten Yeesu tó bə minti tam bə ləsuŋ. 6Bə hebkənaŋ, faa la apəya, kalə la giidə vilaŋ na aker na. Kəya hulum waatam kel gə minti tam bə jəy yaŋ.»
7Kaa gə minti a ɗeŋ a mele Sol, meŋ a ko toŋa sə kampa səm gil. Yə bə əski dordə karman toŋa bə waate kela, səma hulum bə waate kel paapa gil ba. 8Kəya Sol faŋ wəra apəya anə patəkaw faɗi. Wə gəyaŋ kasi ho'te duru minti tó ase yaŋ mo, səma duru máŋ bə anə təfləŋ ta'i. Kəya yə duunu kəəsu máŋ de bə ɗe duuru Damasiŋ. 9Wə jəŋ hiti soope bə bəwə-bəwi caw, wə hamaŋ karman bə gəm, wə saŋ kan bə gəm.
10Kəya hulum kəman bə doo-de gud Yeesu a jəŋ Damasi, səmu minti Ananiyasi. Barkaŋ bəŋ suru, wə vəɗaŋ wəra duru, wə məntunu minti: «Ananiyasi!» Ananiyasi hərnu kel minti: «Barkaŋ, ten kəna, ten bə əski!» 11Barkaŋ haraŋ bə wəətu minti: «Faa la, ɗee la, haa kəkəy bə minti yə məntu minti ‹Kəkəy Ɗekeriŋ› la. Ɗee la ger Zudasa, mantə la ada minti yə gam dərəm la cəərə Sol hulum bə Tarsəŋa. Wə yaŋ ada bə toose. 12Dər kel gə minti vəɗaŋ duruŋ, wə asaŋ hulum kəman, yə məntu minti Ananiyasi. Wə bəŋ suru da bə bi a mele kəəsu cuuru minti duru harə la bə ase.» 13Kəya Ananiyasi hərnu kel minti: «Barkaŋ, ten əskəŋ sam hulum toŋ wəra bə waate ablaw. Daŋge də kaŋ bə waate kel kə bayməlaŋ gə minti wə jəŋ kaa nəmtiŋ diiri Zeruzalem daŋ keɗe. 14Bədoona pa, wə bəŋ hebkəna caw kəna də abay də minti kəkamnaŋ kə *kaa kə keere Pepeŋ a əynu du kəəsu, bə bi a paŋte kaa gə minti bə mantam səmama a kəkəy bə toose neeteŋaŋ keɗeŋ.» 15Səma Barkaŋ wəətunu minti: «Ɗee la nəmti. Hulum toŋ cawaŋ, ten ŋəmnu wəra bə jən digi. Wə waatan səman yaŋ wəra a kaa gə minti teŋ paapa gə Ziwifi baŋ, a kəkamnaŋ neeteŋ daana a kaanə *Israyel gəm. 16Ten də kusrən, ten bə gaw duru yaŋ cəərə lasi də minti wə bə saara yaŋ gud səmanaŋ keɗe.»
17Kəya Ananiyasi kooroŋ faɗi. Wə ɗeŋ a tuuki sar kuli bə minti Sol ada kəyaŋ, wə kəlaŋ aləw na guudu na faɗi. Kəya wə məlaŋ kəəsu cəərə Sola, wə wəətunu minti: «Sol seenenti, Barkaŋ Yeesu bə minti vəɗaŋ dərəm da a kəkəy bə minti tam bə bi daŋ, gaanan da haa tó, kir minti dərəm harə la bə ase daana Tiiru Cetcetaŋ ɗosom ku tarməyam la wəra keɗe gəm.» 18Hebkən-hebkəna faɗi, kətpər əsəŋ bə awte da warda duru da akas tiirə aska ana. Kəya duru haraŋ bə ase wəra pasa a koɗoŋa faɗi. Kəya wə faŋ, yə juunu batem wəra faɗi gəm. 19Wə hamaŋ so hamə, wə haraŋ bə fele səɓaki faɗi.
Sol waate kel wəra cəərə Yeesu Kristu giidə kuli bə Damasiŋa
Kəya Sol jəŋ hiti aduubə də kaa kə doo-deŋ gə Damasiŋa ada maki. 20A ko toŋa kəya, wə məŋ ba, wə əsəŋ bə waate kela giidə *kuli bə toose kə kaanə Ziwifi bə minti Damasi adaŋ faɗi. Wə wəətənəy kel cəərə Yeesu Kristu, minti wə haa Kormə Pepeŋ. 21Kaa gə minti bə jiɓru ku gila keɗeŋ ŋələŋ ablaw. Kəya yə əsəŋ bə le ku kumsi minti: «Aŋ golə la kəm pisiŋ! Ləsaŋ kaanə Zeruzalem gə minti mante sam Yeesu a kəkəy bə toose neeteŋa haa kəna paapa tó bə mo? Wə bəŋ gila paapa re'i bə bi a pəŋtəy daana bə hare diiri a kəkamnaŋ kə *kaa kə keere Pepeŋ kə kaanə Ziwifiŋ bə mo?»
22Səma Sol fəlaŋ səɓaki pisi falə a kəkəy bə hate nuutuŋa. Kaanə Ziwifi gə minti də kuli Damasi adaŋ paapa gə nakə-neke kir həru kel wəra pəda, gud bə minti wə bə wəətiya wəra anə kaŋkaŋ minti Yeesu haa *Hulum bə minti Pepeŋ ŋəmnuŋ.
23Bə ɗeŋ a hiti laki kəyaŋ, kaanə Ziwifi teŋ təpaŋ kuy wəra ɗaaməna cuuru minti té əwu la wəra. 24Səma kel teŋ kəlaŋ kosnə Sola. Kəya kaanə Ziwifiŋ vaŋ kaa bə ɗe a ame cəərə ku kəsarkaw gə vil, daaway də duugŋ keɗe, minti té daw la bə ɗe a əwu wəra. 25Səma, dər duugŋ kəmana, kaa kə doo-de gə minti Sol a bə hətəyaŋ ɗeŋ duuru warna sar giligi bə ɓəkə-ɓiki bə cəərə vil na. Kəya yə gəənu giidə titiki boblo, yə cəkɗunu wəra cəərə giligiŋaŋ, yə ziirunu na warna adawra na.
Sol hare Zeruzalem
26Də ko bə minti Sol tuluŋ Zeruzalema kəyaŋ, wə ɗəlaŋ minti tó ɗe a tapte də kaa kə doo-deŋ. Səma yə jəŋ walka kəəsu ablaw gud bə minti yə paapa kir de haa minti wə hebkəna bə kolə-kole hulum bə doo-de gəəzə-gəəzi ba. 27Kəya Barnabasi ɗeŋ suru, wə kooroŋ duuru sar *kaa kə vaa-veŋ. Wə əsəŋ bə tupuy bəlam də kela minti Sol asaŋ Barkaŋ a kəkəy bə Damasi da ŋaanaanə moŋ, daana Barkaŋ wəətunu kel gəm. Wə wəətənəy gəm minti Sol a waataŋ kel wəra cəərə Yeesu giidə vil də Damasiŋa bay walka ŋaanaanə mo. 28Də ko toŋ a teŋa kəyaŋ, Sol təpaŋ wəra diiri faɗi, yə máŋ lam bə gəryi də kumsi Zeruzalema. Sol bə waate kela wəra a kaŋ də sam Barkaŋ bay walka. 29Kəya yə nalte daana yə caate awəy saksaki də kaanə Ziwifi gə minti waate ku Gerekiŋ. Səma, yə golde neeteŋ ha'aŋ, kəkəy bə əwu wəraŋ gəm. 30Bə minti kəsəənu gə doo-deŋ əskəŋ kel teŋ kəyaŋ, yə kooroŋ bə ɗe a məlu warna Sezare na. A ko toŋa ada kəyaŋ, yə wəətunu minti wə raawə la Tarsə soki.
Piyer koore Lida daana Zope
31Giidə seŋka də Zudeŋa, də Galileŋa, daana Samariŋa keɗeŋ, kaa kə Tapiŋ nuutu bə anə kəkaɓi zugi, walka paapa bə jiya pəda. Tiiru Cetcetaŋ bə kəyəya səm moŋ, yə bə si a de neeteŋa, bə humi kosoŋa cəərə Barkaŋa, daana yə əsəŋ bə zuli ablaw gəm.
32Kə Piyer ha'aŋ, wə bə gəryi wəra giidə seŋkaŋa keɗe. Kəya wə ɗeŋ a tuuki hõy giidə vil də Lidaŋa, wə kəlaŋ bə helɗe kaa kə Pepeŋa. 33Wə fəlaŋ hulum kəman bəy a kəɓər nuutuŋa, yə məntu minti Ene. Hulum toŋ laataŋ azəgən bə hətə-hiti hurufi. 34Kəya Piyer wəətunu minti: «Ene, Yeesu Kristu seerem yaŋ wəra hebkəna. Faa la apəya, ɗampə kəɓər nəmtiŋ la!» Kəya wə faŋ nuutu anə kaɓəraw faɗi. 35Bə minti kaa gə minti giidə vil də Lidaŋa gila keɗe'i daana gə giidə seŋka də Saroŋ wəra cəərə Lida ɓəkiŋ əsnu kəyaŋ, yə koloŋ kirki a baymele neeteŋ, yə doŋ wəra gud Barkaŋa faɗi.
36Kəya həlgə kəman a jəŋ giidə vil də Zopeŋa, a həlgə də doo-de gud Yeesu. Yə manta minti Tabita, də ku Gerekiŋ minti «Dorkasi», gud sam toŋ haa minti «taŋka». A jəəti kaa pisi ablaw, a kayte kaa kə caacaŋ gəm. 37Dər ko toŋa kəyaŋ, ɗeme doona, a meŋ wəra faɗi. Kəya yə haana, yə baadəna wəra baada, yə ɗeŋ a gaara aləwa gerda giidə kuli bə hərsə-hərsi bə cəərə kumsu na apəy na bə mi geŋ. 38Zope paapa tooto kə ablaw sar vil də Lidaŋa bə tə bə moŋ, kaa kə doo-de gə Zopeŋ əskəŋ minti Piyer ada. Kəya yə vaŋ kaa ɓasi bə ɗe a jəw kamkam minti: «Are də caadə minti tam bəəda cəlam ger are da kəm mo.» 39Bə minti yə ɗeŋ a waate kel teŋ a Piyer kəyaŋ, wə təpaŋ guudi da faɗi gəm. Wə tuluŋ anəkay, yə kooroŋ bə ɗe a məlu giidə kuli bə hərsə-hərsi bə cəərə kumsuŋa. Kəya kəram gə bay neŋneŋ keɗe jəmnu duru bə hage, yə əsəŋ bə vəɗtu anə jambaŋa daana dəməəmə də tere də cəərə kumsə də minti Tabita a jəŋ bə zoorəta də ko bə minti a kəm caw aduubə diŋ. 40Kəya Piyer waataŋ kaa kə aləwaŋ neŋneŋ keɗe minti yə vaa la wəra tiilima. Wə vaŋ də guguuru bə toose faɗi. Wə təwaŋ toose nuutu wəra kəyaŋ, wə haraŋ duru cəərə titiŋa, wə waatəna minti: «Tabita, faa la apəya!» Ɗe a goleŋa, a vaŋ dərə wəra bəjər! A ɗeŋ a ase Piyer kəyaŋ, a faŋ wəra cin sə guudə faɗi. 41Wə raawaŋ bə doora kaasa bə kaya bə fe apəya sə kampa gil. Adoro kəyaŋ, wə mantaŋ kaa kə Pepeŋ da də kəram gə bay. Wə wəətənəy minti: «Tabita gil sarəŋa wəra dədərgəŋ!» 42Kəya kaa gə giidə vil də Zopeŋ neŋneŋ keɗe əskəŋ kel teŋ wəra. Sərdə kaa ablaw guudi doŋ wəra gud Barkaŋa faɗi gəm. 43Kəya Piyer hətəŋ ada ablaw giidə vil də Zopeŋa ger hulum bə koye golgo kəmana, yə məntu minti Simoŋ.
Currently Selected:
JOŊRE 9: KERNT05
Highlight
Share
Copy
Want to have your highlights saved across all your devices? Sign up or sign in
Texte de la Bible: Kera © Alliance Biblique du Tchad, 2004.