Luka 18
18
Hala ya mgane yompula mtagusi mponda
1Kawalongela hala kamba viwandame kumpula Mulungu sikuzose, sukuwadonhe. 2Kalonga, “Kukala na mtagusi kukiwambo kimonga, hamdumba Mulungu bule kuteganya wanhu aka. 3Na mkiwambo kicho kukala na mtwanzi mgane yakalile yomgendelagendela, kuno yolonga, Ninghe ichangu kulawa kwa mndumu wangu! 4Na heyo kidami goya kakala yolema, avija kalonga munda na kitupe, Ona iyo vivo, simdumba Mulungu, siteganya wanhu bule, 5kwa mzoko mgane ino konigaza nghani, leka nimwinghe ichake cha ihoko, kwiza sukuyandonheze kwa kunizila.”
6Mndewa kalonga, “Tegelezeni viyolonga yuja mtagusi mponda! 7Na Mulungu he! honda yawenghe ihoko waja wasagulwa wake womlilila imisi na ikilo, na heyo yuyo yabanzile kwazaganya kumwao? 8Nomulongelani, kowagwelela mbwisa ihoko; bali heyo, vonda yezile Mwana wa Munhu kowona wanhu wombeta muisi?”
Fariseo mwene kitopa, kuno yozela wayagwe
9Kawalongela hala dino wanhu wokiidundula wokitopa kilumbo hewo wawo wene ihoko, kuno owazela wayagwe wose. 10“Wanhu wabili wakwena wagenda kudingʼanda da Mulungu kusali, imonga Fariseo, waikabili muwila kodi. 11Yuja Fariseo kema wima, kapula vino mmoyo mmwake, Gweye Mulungu, nokutunila kwa mzoko niye si kamba wanhu yungwa wabokonyo, waponela, wagoni, hebu kamba ino muwila kodi. 12Niye ndekaga kuja miyanza mibili kwa juma imwe, ndavaga nhosa kulawa ivyangu vimhataga vyose. 13Bali ija muwila kodi kema kutali wala hagesile kwinula meso gake kuulanga, komu kaitowatowa muli imhambaga kalonga, Go Mulungu, nyonela bazi niye mwene matozo! 14Nimulongelani, yuja kahulumuka kagenda kungʼanda yake, kapetigwa muihoko kubanza ija. Kilumbo munhu yonda yaitope kogwa kinyala, na yuja yokibweza hasi, kwiza kokwinuligwa.”
Yesu kawamoteza iwana
15Wamgalila wana wadodo giladi yawakwase, komu wanahina vuwawawene wawakomhokela. 16Bali Yesu kawakema weze kumwake, kalonga, “Walekeni wana wadodo weze kumwangu, sukumuwagomese, kilumbo awo wali kamba vino, undewa wa Mulungu uwo wawo. 17Ihoko nomulongelani, munhu wowose kamba haubokele undewa wa Mulungu kamba mwana mdodo, honda yawingile ngʼo.”
Mkulu yozahila ugima wa digunge
18Imala baho Mkulu wa Lukolo imonga kamuuza kalonga, “Mulangulizi unogile, nhende kilihi giladi ningile kuugima wa idigunge?” 19Yesu kamulongela, “Vilihi vunikema nina loho inogile; haduhu yali na Loho inogile komu yumwe, na heyo yuyo Mulungu. 20Kuzitanga ndagizi, Sukuutende ugoni, sukuukome, sukuwibe, sukuusindile uvwizi, uwatange tataako na mamo wako!” 21Kamulongela, “Ago gose nigagoga kulawa haudodo wangu.” 22Yesu viyagahulike ago kamulongela, “Kuhungukilwa tanhu na mbuli imwe, guliza vuuli navyo vyose, ukawagolele wakiwa, na gweye kokuwa na siga kuulanga, ilawa baho izo uminze! 23Bali heyo viyagahulike ago, kanyunyuwala nghani, kilumbo kakala na mali bwando.
Nzuwilo za mali muisi; kulihilwa kuulanga
24Yesu viyawene vija kalonga, “Kwa mgayo ulihi wene mali wokwingila muundewa wa Mulungu! 25Kwa mzoko vibuha ngamiya kubita mkizonzo cha msonga, vigambile mwene mali kwiza kwingila muundewa wa Mulungu!” 26Na hewo vuwahulike walonga, “Yuyo yalihi kwiza yonda yaho-nyokwe?” 27Kalonga, “Galekaga kudahika kwa wanhu, gadahikaga kwa Mulungu.”
28Petro kalonga, “Lola tweye tuvileka vinhu vyetu vyose, tukukoleleleza.” 29Kawalongela, “Ihoko nomulongelani, haduhu munhu yalekile ngʼanda bule sano jake, bule ndugu bule wanage kwa kilumbo cha undewa wa Mulungu, 30yalekile kubokela nghani mulumwengu uno miyanza bwando, na muna ulumwengu ukwiza ugima wa digunge.”
Migazo yake Kristo, lwekadatu
31Kawasola waja Longo dimwe na Wabili, kawalongela, “Loleni tokwela kuchola Yerusalemu, na magweka gose gokwenela, Mwana wa Munhu gayandikilwe na Watulandagu. 32Kwa mzoko kogeligwa mmikono ya wanhu, wonhendela uponela, womtendela chodo na kumtemela mizite. 33Na hewo womtowa vibongho, imala baho womkoma, na siku ja ikadatu kozuka.”
34Komu hawatangile ulonzi uja hata kidodo; mbuli hiyo ikala iifisile kumwao, wala hawavimanyile viyalongile.
Bartimeo kimbugumbugu wa Yeriko
35Viyakalile yokwenhukila Yeriko, hakala na munhu yali bule gameso, kakala mumngwazo wa inzila yopula. 36Viyahulike matinghanilo gobita kauza, “Hiko kuna choni?” 37Wamulongela, “Yesu wa Nazareti kobita.” 38Mhunde katowa nyangi yolonga, “Yesu Mwanage Daudi, umbonele bazi!” 39Na waja walongole wamgomesa, yanyamale. Bali heyo kagogelela nghani kutowa nyangi, “Mwanage Daudi, umbonele bazi!” 40Yesu kema, yomana kulagiza wamgale bahaja hayali heyo; avija viyamkwenhukila kamuuza, 41“Kolonda nikutendele choni?” Kamulongela, “Mndewa, nonda kulola.” 42Yesu kamulongela, “Winghigwe meso ulole; kugoga kwako kukuhonya.” 43Mhunde kapata kulola goya kamkoleleza, kuno yomtogola Mulungu, na wanhu wose vuwaviwene wamgwelela Mulungu nhogolwa.
Currently Selected:
Luka 18: ZAM75
Highlight
Share
Copy
Want to have your highlights saved across all your devices? Sign up or sign in
New Testament in Zaramo © United Bible Societies, 1975.