Luka 19
19
Zakeo imguhi yakwelile umkuyu
1Na heyo viyengile Yeriko, kabita hagatigati yake. 2Lola kukala na munhu twaga jake Zakeo, mkulu imonga wao wawila kodi, ayo kana mhiya bwando. 3Kakala yozahila nzila ya kumona Yesu, munhu ayo yalize, avo hadahile, kilumbo cha wanhu wakala bwando, na heyo kakala mguhi. 4Kakimbila kuulongozi, kakwela uchana mumkuyu yamone, kilumbo kwiza kobitila nzila iija. 5Yesu viyavikile hanhu haja, kalola uchana kamulongela, “Zakeo, hulumuka chambwisa, giladi lelo vilumba kusinda kungʼanda yako!” 6Yomana kuhulumuka mbwisa, kamgomela na kuno yodenghelela. 7Avija wanhu vuwawene, wakala wodugudika wose walonga, “Kengila na kukala na munhu mwene matozo.” 8Zakeo kema wima kamulongela, “Mndewa lola, nusu ya mhiya zangu niwengha wazumbale, na ihawa kamba nimboka munhu kinhu kwa uzenzeleganye, nombwezela miyanza mine.” 9Yesu kamulongela, “Lelo uhozi uvika muno mngʼanda ino, kilumbo yuno nayo kumbe msongolo wa Abrahamu. 10Kwa mzoko mwana wa Munhu keza kuzahila na kwihula kija kipotele.”
Hala ja vibugulu vya mhiya
11Vuwagahulike higo, kongeza kulonga hala diyagwe, kilumbo kakala habehi na Yerusalemu, na hewo wagesa kamba undewa wa Mulungu mhunde wokoneka. 12Kalonga, “Munhu imonga wa lukolo lwa kindewa kachola isi ya kutali, giladi yakaisolele undewa, kwiza yabwele. 13Kawakema waja nyakadala zake longo dimwe, kawengha vibugulu kumi vya mhiya, kawalongela, Tendeni uchuluzi mpaka vonda mbwele! 14Bali wanhu wa diwambo jake wamwihila, wawagala wasenga kuchugu kumwake, wamsimange na kulonga, Hatumlonda yuno yatutawale.
15Komu ija viyabwelile yoziga kuubokela undewa, kalava lwamu wakemigwe waja nyakadala wayenghile zimhiya, giladi yatange kibanzile chayapatile kila munhu muuchuluzi wake. 16Keza wa ichanduso kalonga, Mndewa, fungu jako dibanza, dilava vibugulu kumi viyagwe. 17Kamulongela, Gweye nyakadala unogile, kutenda goya; kwa vija vuuli mkungulufu kwa mbuli ndodo, kokuwa mkulu wa viwambo kumi. 18Keza waikabili kalonga, Mndewa, fungu jako dilava mafungu matano gabanzile. 19Kamulongela yuja na heyo, Na gweye kokuwa mkulu wa viwambo vitano. 20Keza iyagwe kamulongela, Mndewa, dino dijo fungu jako, senhambo nidika umbili mkitambala. 21Kilumbo nghala nikudumba kwa munhu mgaga; kosegeza chuulekile kukika, kohuna chuulekile kuhanda. 22Kamulongela, nokukwesula kilumbo cha mulomo wako, nyakadala gweye mwene dizoyo ditoboke; kunhanga kamba na munhu mgaga, segeza gaja sigekile, na kuhuna gaja sigahandile? 23Habali huzikile mhiya zangu benki, giladi niheza niisole hamonga na nyongeza yake? 24Kawalongela wemile habehi, Mbokeni ajo difungu, mkamwinghe yuja mwene mafungu kumi! 25Wamulongela, Mndewa, kanago mafungu kumi! 26Avo nomulongelani, Aija yali na kinhu, kogolelwa; komu yuja yali bule na kinhu, kobokigwa na kija chayali nacho. 27Bali waja iwandumu zangu walemile sukuniwatawale, wagaleni hano, muwakehe hameso gangu!”
Yesu viyengile Yerusalemu
28Yomala Yesu kawalongolela yokwena kuchola Yerusalemu. 29Avo viyakwenhukile Betifage na Betania hadigongo ja mizeituni, yomana kugala wanahina wabili kuulongozi. 30Kawalongela, “Gendeni mvike ikibuga kija kimlolani; mhunde muhakingila momona mwana mhunda yafungigwe, hanakweligwa na munhu yoyose; mdoholeni mngalile! 31Na kamba munhu yahamuuzani, Habali mumdohola? longeni, Mndewa komulonda.” 32Waja watumigwe wachola, wavyona kamba vija kamba viyawalongele Yesu. 33Vuwamdohole mwana mhunda, wenyecho wawauza, “Habali mumdohola mwana mhunda?” 34Wedika, “Mndewa komulonda.” 35Wamgala kwa Yesu, wazika nguwo zao uchana mwa mwana mhunda, wamkweneza Yesu uchana. 36Na vija viyakalile yochola, wazikunzula nguwo zao mnzila. 37Na viyavikile hana ingehemo ya idigongo ja mizeituni, dale gima da wanahina wake wasonga kumtogola Mulungu kwa dizwi kulu, kilumbo woidenghelela misanghano yose ya magweka gawawene. 38Walonga, “Yatunizwe Mndewa Yokwiza kwa tagwa ja Bwana, tindiwalo kuulanga, na nhunizo zivike uchana!”
39Baho Mafariseo wayagwe mumuja muna umtinghano wamulongela, “Mkulufunzi, wagomese wanahina wako!” 40Bali heyo kedika, “Nomulongelani, wahanyamala wano, mabwe gotowa nyangi!”
Yesu kaulilila Yerusalemu
41Avija viyakwenhuke kajona diwambo, kadililila. 42Kalonga, “Fadali uhatangile na gweye lelo dino galumbile tindiwalo jako! Komu vino sambi gafisigwa hameso gako. 43Kwa mzoko mazuwa gokwiza vonda wakuzengele luwigo wandumu wako lukuzunguluke, na hewo wokugaza kwa nzila zose. 44Wokugwisa hasi gweye na wanago mgati, sukuwakulekele dibwe uchana hadibwe, kilumbo hukimanyile kipigiti cha kwingililwa gweye.”
Kadingʼaza Hekalu
45Kengila Hekalu, kasonga kuwasegeza wakalile woguliza. 46Kawalongela, “Yandikigwa Ngʼanda yangu iyo ngʼanda ya nhambiko, komu mweye mwitenda hango ja wabokonyo.”
47Kakala yowalanguliza mdihekalu mazuwa gose, bali Watambika Wakulu na Wana Nzuma hamonga na Walala wa Lukolo wazahila nzila ya kumkoma. 48Wala hawaviwene vonda watende, kilumbo wanhu wose waigoga hamonga nayo kumtegeleza.
Currently Selected:
Luka 19: ZAM75
Highlight
Share
Copy
Want to have your highlights saved across all your devices? Sign up or sign in
New Testament in Zaramo © United Bible Societies, 1975.