Luka 17
17
Nghwalo zohumigwa na ndekeselo
1Kawalongela wanahina wake, “Vinghwaso havilekaga kulawilila, komu janga hijo jake munhu hiyo, kamba diheza kwa mzoko wake! 2Maza vihawile goya, munhu kamba hiyo, dibwe da kusagila wahadikakaliza mungosi wake, ilawa baho wakamwase mbahali, sembuse kumkoseza yumwe wa wadodo kamba wano. 3Itunzeni viyema ndugu yahakutozela, mzume; na heyo yahayona imbuli kamba kaitoza, che, na gweye galeke baho. 4Na kamba yahakutozela miyanza Saba kwa siku dimwe, yahalonga, Nhoza, miyanza saba siku dija, na gweye galekese!
Ngogelo yene mhiko yokibweza hasi
5Wanahina wamulongela mndewa, “Twinghe mhiko bwando za kumgoga Mulungu!” 6Mndewa kawalongela, “Kamba muwile na ngogelo igambile nzele ya mbeyu ya mvule, muhaulongele mkuyu uno, Winyozole ukaihande mwibahali! na uno uhatogole.
7Yuyo yalihi kumwenu mwene nyakadala yolima hebu yochunga, kwiza yamulongele baho honda yabwele kulawa kumgunda, Izo mbwisa, kala hano uje chakuja? 8Che! Yaleke kumulongela, Nhendela chakuja mbwisa, ndiye; kwesa ikibindu usanghanile, hata honda nizige kuja na kungʼwa, ilawa baho na gweye kileka uje na kungʼwa! 9Haya kwiza komwingha hongelaga yuja nyakadala, kilumbo kasanghana goya gayalagizwe? 10Vivo na mweye, kamba muhaziga kugasanghana gose gamlagizwe, longeni, Tweye twa watumigwa wali bule na mzoko; tusanghana tu gatwandame kusa-nghana.”
Wanhu kumi wene dikulu
11Viyakalile mnzila yogenda Yerusalemu, kabita hagatigati ya Samaria na Galilea. 12Na viyakalile yokwingila kibuga kimonga, kawatinghana wanhu kumi wene dikulu, wema kumwande. 13Na hewo watowa nyangi wolonga, “Agweye Yesu, Mndewa Mkulu, utonele bazi!” 14Viyawawene kawalongeia, “Gendeni mkailagusile kwa wakulu wa nhambiko!” 15Avija vuwakalile wochola, wamana kuhona. Imonga miyao viyawene kamba kahona, kabweleganya kuchugu yomtuniza Mulungu kwa dizwi kulu. 16Yomana kugwa kingubanguba ha migulu yake yomtogola; na heyo kakala Msamaria. 17Yesu kedika yolonga, “Si waja wose longo dimwe wahonile? waja kenda wali kwahi? 18Haduhu wabwelile weze kumwingha Mulungu nhogolwa yake, kumbe hivo ino imuhenza yali yeka?” 19Yomana kumulongela, “Inuka wigendelele; ngogelo yako iyo ikuhonyile.”
Undewa wamumo mmiyoyo
20Na viyakalile youzigwa na Mafariseo, Hambwe utawala wa Mulungu okwiza zuwa gani? Kawedika kalonga, “Utawala wa Mulungu hawiza kwa kuloleswa. 21Wala honda walonge, Lola auno kuno, hebu auja kuja; Undewa wa Mulungu wamumo mgati mmwenu.”
Kristo vondayoneke; Wanhu vondawabagulwe siku ja ubwelo wa Kristo
22Kawalongela wanahina, “Kiwango chokwiza, vonda msulukile kuyona siku imwe mzisiku za Mwana wa Munhu, viyemela honda muyone. 23Avo wahamulongelani, Lola kuja! Lola kuno! sukumsegele haja hamkale, wala sukumuwakole! 24Kilumbo kamba vija lumwemwe vilumwelukaga kulawa mwambu uno hasi ya ulanga hata umwambu uja, hasi ya ulanga, vivo yondayawe Mwana wa Munhu hadisiku jake. 25Komu vino tanhu vimwandama yenghigwe mgaduko bwando na kulemigwa mulukolo luno.
26Kamba vija viikalile milongo ya Noa, vivo vonda viwe mkikomo chake Mwana wa Munhu. 27Wakala woja na kungʼwa, wakala wosola na kusoligwa hata siku dija Noa viyengile muna imeli; gubika ja mazi dingila, dimana kuwagubikiza wose. 28Avo vivo ili kamba vija viikalile milongo ya Loti, wakala woja na kungʼwa, wakala wogula na kuguliza, ohanda na kuzenga. 29Komu siku dija Loti viyalawile Sodoma, umana kugwa moto wa kikwatulo kulawa kuulanga, uwasakaza wose. 30Avo mina vivo vonda viwe siku dija vonda yagubulilwe Mwana wa Munhu.
31Disiku hijo yali kukano, na viya vyake vya kugati mngʼanda sukuyahulumuke kuvisola; yogamba yali kumgunda sukuyabweleganye kuchugu! 32Gelegezeni sano jake Loti! 33Munhu yoyose yahalonda kuihonya mwenyecho, senhambo kokwangamila; na ayo yonda yaigwasike mwenyecho giladi, hiyo kokihonya. 34Nomulongelani, ikilo dijo wanhu wabili wokuwa mkisazi kimwe; imonga kosoligwa, imonga kolekigwa. 35Watwanzi wabili wotwanga hamonga; imonga kosoligwa, imonga kolekigwa. 36Wanhu wabili wali kumgunda, yumwe kosoligwa, yumwe kolekigwa.
37Wedika wamuuza, “Kwahi, Mndewa?”
Kawalongela, “Hauli mtufi, baho honda waitinghanile mhungu.”
Currently Selected:
Luka 17: ZAM75
Highlight
Share
Copy
Want to have your highlights saved across all your devices? Sign up or sign in
New Testament in Zaramo © United Bible Societies, 1975.