MARKOS 8
8
U Jisu u bsa ïa ki saw hajar ngut
(Mat. 15:32-39)
1Ym slem hadien, u paidbah uba bun u la ïawanlang. Haba ki briew kim don ei ei shuh ban bam, U Jisu u la khot ïa ki synran sha u bad u la ong, 2“Nga sngewsynei ïa kine ki briew, namar ki la don bad nga la lai sngi bad mynta kim don ei ei shuh ban bam. 3Lada nga phah ïa ki sha ïing khlem bsa ïa ki, kin ïapler katba ki dang ïaid, namar katto katne ngut na ki, ki la wan na ka lynti bajngai.”
4Ki synran jong u ki la kylli ïa u, “Nangno, ha kane ka ri shyiap ba uno uno u lah ban ïoh jingbam ka ban dap ban bsa ïa kine ki briew baroh?”
5“Katno tylli u kpu phi don?” U Jisu u la kylli.
“Hynñiew tylli ki kpu,” ki la jubab.
6U la hukum ïa u paidbah ban shong ha madan. Nangta u la shim ïa ki hynñiew tylli ki kpu bad u la ainguh ïa U Blei, u kdiah ïa ki, bad u la ai ïa ki ha la ki synran ban sam ha ki paidbah; bad ki synran ki la leh kumta. 7Ki la don ruh katto katne tylli ki dohkha rit. U Jisu u la ainguh na ka bynta kine bad u la ong ïa ki synran ban sam ïa ki ruh. 8-9Uwei pa uwei u la bam ha ban da kdang — la don kumba saw hajar ngut ki briew. Nangta ki synran ki la ïalum hynñiew tukri kiba la dap da ki lyngkhot lyngkhai ba la sah tam. U Jisu u la phah noh ïa ki briew 10bad mar kumta hi u la kiew halor ka lieng ryngkat bad ki synran jong u bad u la leit sha ka distrik Dalmanutha.
Ki Pharisi ki kyrpad ban ïohi ïa ka kambah
(Mat. 16:1-4)
11 #
Mat. 12:38; Luk. 11:16 Katto katne ngut ki Pharisi ki la wan ha U Jisu bad ki la sdang ban ïania bad u. Ki la kwah ban riam ïa u, kumta ki la ong ïa u ban leh kambah ban pynshisha ba U Blei u la mynjur ïa u. 12#Mat. 12:39; Luk. 11:29Hynrei U Jisu u la ud jylliew bad u la ong, “Balei ba ki briew mynta ki kwah ban ïohi kambah? Em, nga ong ïa phi! Yn ym ai kum kata ka jingpynshisha ha kine ki briew!”
13U la iehnoh ïa ki, u la kiew pat halor ka lieng bad u la sdang ban leit sha shiliang jong ka duriaw.
U thiat jong ki Pharisi bad jong u Herod
(Mat. 16:5-12)
14Ki synran ki la klet ban wallam kpu kat ban dap, bad ki la don tang uwei u kpu bad ki. 15#Luk. 12:1“Sumar bha,” U Jisu u la maham ïa ki, “bad sumar ïa lade na u thiat jong ki Pharisi bad u thiat jong u Herod.”
16Ki la ïasdang ban ïakren para ma ki: “U ong ïa kane namar ngim don kpu.”
17U Jisu u la tip ïa kaei kaba ki dang ïakren, kumta u la kylli ïa ki, “Balei phi ïakren shaphang ka jingbymdon kpu? Hato phim pat tip lane sngewthuh? Hato ki jingmut jong phi ki dang dum? 18#Jer. 5:21; Ese. 12:2; Mrk. 4:12Phi don ki khmat — hato phim lah ban ïohi? Phi don ki shkor — hato phim lah ban ïohsngew? 19Hato phim kynmaw mynba nga la kdiah ïa ki san tylli ki kpu na ka bynta ki san hajar ngut ki briew? Katno tukri kiba da ki lyngkhot kpu kiba sah tam kiba phi la ïalum?”
“Khat-ar,” ki la jubab.
20“Bad haba nga la kdiah ïa ki hynñiew tylli ki kpu na ka bynta ki saw hajar ngut ki briew,” U Jisu u la kylli, “katno tukri kiba da ki lyngkhot kpu ba sah tam kiba phi la ïalum?”
“Hynñiew,” ki la jubab.
21“Bad phim pat shemphang?” u la kylli ïa ki.
U Jisu u pynkhiah ïa u briew bamatlah ha Bethsaida
22Ki la wan sha Bethsaida, ha kaba katto katne ngut ki briew ki la wallam ha U Jisu ïa u briew uba matlah, bad ki la kyrpad ïa U Jisu ban ktah ïa u. 23U Jisu u la shim ïa uta u briew uba matlah na ka kti bad ïalam ïa u shabar ka nongrit. Hadien ba u la bynthiew ha ki khmat jong uta u briew, U Jisu u la buh ïa la ki kti halor jong u bad kylli ïa u, “Me lah ban ïohi ei ei?”
24Uta u briew u la khmied bad ong, “Ho-oid, nga lah ban ïohi ïa ki briew, hynrei nga ïohi kum ki dieng kiba ïa-ïaid.”
25U Jisu u la buh biang ïa la ki kti ha ki khmat jong uta u briew. Ha kane ka por uta u briew u la peit shaiñ, ka jingïohi jong u ka la wan phai pat, bad u la ïohi shai ïa kiei kiei baroh. 26U Jisu te u la phah ïa u sha ïing ryngkat bad ka hukum, “Wat leit phai pat sha ka nongrit.”
Ka jingpynbna u Petros shaphang U Jisu
(Mat. 16:13-20; Luk. 9:18-21)
27Nangta U Jisu bad ki synran jong u ki la leit noh sha ki nongrit kiba hajan ka Kaisaria Philippi. Katba u dang ïaid ha lynti u la kylli ïa ki, “Ïathuh ïa nga, ki briew ki ong ba nga dei uei?”
28 #
Mrk. 6:14,15; Luk. 9:7,8 “Katto katne ngut ki ong ba me long u Ïoannis u Nongpynbaptis,” ki la jubab; “kiwei pat ki ong ba me long u Elijah, katba kiwei pat ki ong ba me long uwei na ki nongïathuhlypa.”
29 #
Ïoan. 6:68,69 “Ma phi pat phi ïa-ong kumno?” u la kylli ïa ki. “Phi ïa-ong ba nga long uei?” U Petros u la jubab, “Me long U Messaïah.”
30Te U Jisu u la hukum ïa ki, “Wat ïathuh hano hano ruh shaphang jong nga.”
U Jisu u kren shaphang ka jingshah shitom bad ka jingïap jong u
(Mat. 16:21-28; Luk. 9:22-27)
31Nangta U Jisu u la sdang ban hikai ïa ki synran jong u: “U Khun U Briew u dei ban shahshitom shibun bad ban shah kyntait da ki tymmen ki san, ki rangbah lyngdoh, bad da ki nonghikai ka Hukum. Un sa shah pynïap, hynrei hadien lai sngi yn sa pynmihpat ïa u.” 32U la ong shai bha ïa kane ha ki. Kumta u Petros u la shim kyrpang ïa u bad u la sdang ban sneng ïa u. 33Hynrei U Jisu u la phai, u la khmih ïa ki synran jong u, bad u la sneng ïa u Petros. “Khie noh na nga, me u Soitan,” u la ong. “Ki jingpyrkhat jong me kim shym wan na U Blei hynrei na u briew!”
34 #
Mat. 10:38; Luk. 14:27 Nangta U Jisu u khot ïa u paidbah bad ïa la ki synran sha u. “Lada uno uno u kwah ban wan bad nga,” u la ong ïa ki, “u dei ban klet noh ïa lade, bah ïa la ka diengphna, bad bud ïa nga. 35#Mat. 10:39; Luk. 17:33; Ïoan. 12:25Naba uno uno uba kwah ban pynim ïa la ka jong ka jingim un duh noh ïa ka; hynrei uno uno u ban duh noh ïa la ka jingim na ka bynta jong nga bad na ka bynta ka Gospel un pynim ïa ka. 36Hato u briew u ïoh jingmyntoi ei ei lada u ïoh ïa ka pyrthei baroh kawei hynrei u duh noh ïa la ka jingim? Em, un ym ïoh jingmyntoi ei ei! 37Ym don kano kano kaba u lah ban ïa-peiñ na ka bynta la ka jingim. 38Lada u briew u lehrain ïa nga bad ïa ka jinghikai jong nga ha kane ka sngi jong ka jingbymriewblei bad ka jingbymman, te U Khun U Briew un lehrain ïa u haba un wan ha ka burom jong U Kpa jong u ryngkat bad ki angel bakhuid.”
Currently Selected:
MARKOS 8: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.