MARKOS 9
9
1Bad u la ong shuh shuh, “Nga ong ïa phi, ki don katto katne ngut hangne ki ban ym ïap haduh ba kin da ïohi ïa ka Hima U Blei ba ka wan ha ka bor.”
Ka jingpynkylla dur
(Mat. 17:1-13; Luk. 9:28-36)
2 #
2 Pet. 1:17,18 Hynriew sngi hadien, U Jisu u la shim bad u ïa u Petros, u Jakob, bad u Ïoannis, bad u la ïalam ïa ki sha u lum uba jrong, ha kaba ki la ïalong tang ma ki hi. Haba ki dang ïakhmih, ka jingkylla dur ka la wan ha U Jisu, 3bad ki jaiñ jong u ki la kylla phyrnai lieh — kham lieh ban ïa kaba uno uno ha ka pyrthei u lah ban sait ïa ki. 4Nangta, ki lai ngut ki synran ki la ïohi ïa u Elijah bad ïa u Moses ba ki ïakren bad U Jisu. 5U Petros u la kren bad ong ïa U Jisu, “Ko Nonghikai, katno ka long kaba bha ba ngi ïadon hangne! Ngin thaw noh lai tylli ki ïingjaiñ, kawei ïa me, kawei ïa u Moses, bad kawei ïa u Elijah.” 6Ma u bad kiwei pat ki la sheptieng katta katta haduh ba um tip ïa kaei ban ong.
7 #
Mat. 3:17; Mrk. 1:11; Luk. 3:22 Nangta u lyoh u la paw bad u la tap ïa ki da ka syrngiew jong u, bad ka sur ka la wan na u lyoh, “Une u long U Khun ba-ieit eh jong nga — to shahshkor ïa u!” 8Ki la phai stet sawdong hynrei kim shym la ïohi ïano ïano pat; tang U Jisu u la don bad ki.
9Katba ki dang wan hiar na u lum, U Jisu u la hukum ïa ki, “Wat ïathuh hano hano ïa kaei kaba phi la ïohi, tad haduh ba U Khun U Briew u la mihpat na ka jingïap.”
10Ki la kohnguh ïa ka hukum jong u, hynrei para ma ki, ki la sdang ban ïakren shaphang kane, “Aïu kane ‘kaba mihpat na ka jingïap’ ka mut?” 11#Mal. 4:5; Mat. 11:14Bad ki la kylli ïa U Jisu, “Balei ba ki nonghikai ka Hukum ki ong ba u Elijah u hap ban wan nyngkong?”
12Ka jingjubab jong u ka long, “U Elijah u wan shisha nyngkong khnang ban pynkhreh ïa kiei kiei baroh. Pynban balei ba ki Jingthoh Bakhuid ki ong ba U Khun U Briew un hap shahshitom shibun bad shah kyntait? 13Pynban, nga ong ïa phi, ba u Elijah u la lah wan bad ba ki briew ki la leh ïa u kumba ki mon, kat kumba ki Jingthoh Bakhuid ki ong shaphang jong u.”
U Jisu u pynkhiah ïa u khynnah uba don u mynsiem bymkhuid
(Mat. 17:14-21; Luk. 9:37-43)
14Haba ki la ïadon bad kiwei ki synran, ki la ïohi ïa u paidbah babun sawdong jong ki bad katto katne na ki nonghikai ka Hukum ki ïania bad ki. 15Haba ki briew ki la ïohi ïa U Jisu, ki la sngewlyngngoh shikatdei eh, bad ki la wan mareh sha u ban khublei ïa u. 16U Jisu u la kylli ïa ki synran jong u, “Shaphang kaei phi ïania bad ki?”
17Uwei u briew hapdeng u paidbah u la jubab, “Ko Nonghikai, nga la wallam ïa u khun jong nga sha me, namar u don u mynsiem bymkhuid ha u bad um nang kren. 18Haba u mynsiem u tur ïaleh ïa u, u bret ïa u sha madan, bad u sei tyrtho ha ka shyntur, u kyr-iat ki bniat, bad u eh tnen baroh shi rynïeng. Nga la ong ïa ki synran jong me ban beh noh ïa u mynsiem bymkhuid, hynrei kim shym la lah.”
19U Jisu u la ong ïa ki, “Haduh katno phi long ki briew ki bymngeit! Haduh katno ngan don bad phi? Haduh katno ngan ïaishah bad phi? Wallam ïa u khynnah ha nga!” 20Ki la wallam ïa u ha U Jisu.
Tang shu ïohi ïa U Jisu, u mynsiem bymkhuid u la pynring kyrthat ïa uta u khynnah, haduh ba u la kyllon ha madan bad u la tyllun, u da sei tyrtho ha ka shyntur, 21“Slem katno u la long kumne?” U Jisu u la kylli ïa u kpa jong u.
“Naduh ba u dang rit,” u la jubab. 22“Bunsien u mynsiem bymkhuid u la pyrshang ban pynïap ïa u da ka bret ïa u ha ka ding bad ha ka um. To isynei ïa ngi bad ïarap ïa ngi, lada me lah!”
23“Ho-oid,” U Jisu u la ong, “lada ma me hi me lah. Kiei kiei baroh ki long kiba lah ïa u briew uba don ka jingngeit.” 24U kpa mar kumta hi u la pyrta, “Nga don ka jingngeit, hynrei kam da biang. To ïarap ïa nga ba ngan don shuh shuh!”
25U Jisu u la ïohi ba u paidbah u la nang kyntur ïa ki, kumta u la hukum ïa u mynsiem bymkhuid. “Mynsiem bakyllut bad bymnang kren,” u la ong, “Nga hukum ïa me ban mihnoh na u khynnah bad wat ju rung shuh hapoh jong u!”
26U mynsiem bymkhuid u la lynñiar, u la pynring kyrthat jur ïa u khynnah, bad u la mihnoh. U khynnah u la i kum uba ïap, bad baroh ki la ïa-ong, “U la ïap!” 27Hynrei U Jisu u la shim ïa uta u khynnah na ka kti bad u la ïarap pynïeng ïa u, bad u la ïeng joit.
28Hadien ba U Jisu u la rung shapoh ïing, ki synran jong u ki la kylli jar jar ïa u, “Balei ba ngim lah ban beh noh ïa u mynsiem bymkhuid?”
29“Tang da ka jingduwai lah ban beh noh kum ïa une,” U Jisu u la jubab; “ym don kawei pat kaba lah.”
U Jisu u la kren biang shaphang ka jingïap jong u
(Mat. 17:22-23; Luk. 9:43-45)
30U Jisu bad ki synran jong u ki la mihnoh na kata ka jaka bad ki la ïaleit lyngba ka Galilaïa. U Jisu um shym la kwah mano mano ruh ban tip hangno u don, namar u dang hikai ïa ki synran jong u: 31“Ïa U Khun U Briew yn sa ai noh ha ki briew ki ban pynïap ïa u. Pynban hadien lai sngi, un sa mihpat.”
32Hynrei kim shym la sngewthuh aïu kane ka jinghikai ka kit jingmut, bad ki la sngewsheptieng ban kylli ïa u.
Uei uba khraw tam?
(Mat. 18:1-5; Luk. 9:46-48)
33Ki la wan sha Kapernam, bad hadien ba u la rung shapoh ïing U Jisu u la kylli ïa ki synran jong u, “Shaphang kaei phi la ïatainia hapdeng jong phi ha lynti?”
34 #
Luk. 22:24
Hynrei kim shym la jubab ïa u, namar ha lynti ki la ïatainia para ma ki shaphang uei uba khraw tam. 35#Mat. 20:26,27; 23:11; Mrk. 10:43,44; Luk. 22:26U Jisu u la shong, u la khot ïa ki khat-ar ngut ki synran, bad u la ong ïa ki, “Uno uno uba kwah ban long nyngkong u dei ban buh khatduh eh ïa lade bad u dei ban long u shakri ïa baroh.” 36Nangta u la shim ïa u khynnah rit bad pynïeng ïa u ha khmat jong ki. U la buh ïa la ki kti sawdong jong u bad u la ong ïa ki, 37#Mat. 10:40; Luk. 10:16; Ïoan. 13:20“Uno uno uba pdiang sngewbha ha ka kyrteng jong nga ïa uwei na kine ki khynnah rit, u pdiang sngewbha ïa nga; bad uno uno uba pdiang sngewbha ïa nga, u pdiang sngewbha ym tang ïa nga hynrei ïa uta ruh uba la phah ïa nga.”
Uno uno u bym pyrshah ïa ngi u long ha ka liang jong ngi
(Luk. 9:49-50)
38U Ïoannis u la ong ïa u, “Ko Nonghikai, ngi la ïohi ïa u briew uba beh ïa ki ksuid ha ka kyrteng jong me, bad ngi la ong ïa u ban sangeh, namar um long satia ha ka kynhun jong ngi.”
39“Wat pyrshang ban pynsangeh ïa u,” U Jisu u la ong ïa ki, “namar ym don uba leh ïa ka kambah ha ka kyrteng jong nga, ba shen hadien un ong kiei kiei kiba sniew shaphang jong nga. 40#Mat. 12:30; Luk. 11:23Naba uno uno u bym long pyrshah ïa ngi u long ha ka liang jong ngi. 41#Mat. 10:42Nga ong skhem ïa phi ba uno uno uba ai ïa phi ka um ban dih namar ba phi long ha ka liang jong nga, un ïoh da shisha ïa la ka bainong.
Ki jingpynshoi ban leh pop
(Mat. 18:6-9; Luk. 17:1-2)
42“Lada uno uno un pynlong ïa uwei na kine kiba rit ban duh noh ka jingngeit jong u ha nga, kan kham bha ban teh ïa uta u briew da u mawtylliat baheh sawdong ïa ka ryndang jong u bad ban bret ïa u sha ka duriaw. 43#Mat. 5:30Kumta lada ka kti jong me ka pynlong ïa me ban duh noh ïa la ka jingngeit, ot noh ïa ka! Ka kham bha ïa me ban rung sha ka jingim khlem ka kti, ban ïa kaba don ki kti baroh ar tylli bad ban leit sha dujok, sha ka ding bym ju lip. 44Hangta ‘ki ksaiñ kiba bam ïa ki, kim ju ïap, bad ka ding kaba thang ïa ki, kam ju lip.’ 45Bad lada ka kjat jong me ka pynlong ïa me ban duh noh ïa ka jingngeit, ot noh ïa ka! Ka kham bha ïa me ban rung sha ka jingim khlem ka kjat, ban ïa kaba don baroh ar tylli ki kjat bad ban shah bret sha dujok. 46Hangta ‘ki ksaiñ kiba bam ïa ki, kim ju ïap, bad ka ding kaba thang ïa ki, kam ju lip.’ 47#Mat. 5:29Bad lada ka khmat jong me ka pynlong ïa me ban duh noh ïa ka jingngeit jong me, khlaw noh ïa ka! Ka kham bha ïa me ban rung sha ka Hima U Blei tang da kawei ka khmat, ban ïa kaba don baroh ar tylli ki khmat bad ban shah bret sha dujok. 48#Isa. 66:24Hangta ‘ki ksaiñ kiba bam ïa ki, kim ju ïap, bad ka ding kaba thang ïa ki, kam ju lip.’
49“Ïa baroh yn pynkhuid da ka ding kumba ïa ka jingkñia la pynkhuid da ka mluh.
50 #
Mat. 5:13; Luk. 14:34,35 “Ka mluh ka long kaba bha; hynrei lada ka duh noh ïa ka jingbang jong ka, kumno phi lah ban pynbang pat ïa ka?
“To don ïa ka mluh jong ka jingïalong paralok hapdeng jong phi, bad para ma phi, to im hapdeng ka jingsuk.”
Currently Selected:
MARKOS 9: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.