MARKOS 7
7
Ka jinghikai jong ki kpa tymmen
(Mat. 15:1-9)
1Katto katne ngut ki Pharisi bad ki nonghikai ka Hukum kiba la lah wan na Jerusalem ki la ïalum sawdong ïa U Jisu. 2Ki la ïohi ba katto katne ngut ki synran jong u ki dang ïabam ïa la ki jingbam da ki kti ki bym khuid kat kum ka jinglehniam — kata, kim pat sait ha kata ka rukom kaba ki Pharisi ki ong ba ki briew ki dei ban leh.
3(Na ka bynta ki Pharisi, kumjuh ruh na ka bynta ki Jiw baroh, ki bud ïa ka jinghikai kaba ki la ïoh na ki kpa tymmen jong ki: Kim ju bam lymda ki sait ïa la ki kti ha ka rukom kaba dei; 4lymne kim ju bam ïa kaei kaei kaba wanrah na ïew lymda ki sait shuwa ïa ka. Bad ki bud ïa kiba bun kiwei ki aiñ kiba ki la ïohpdiang, kum kaba sait ha ka rukom kaba dei ïa ki khuri, ki khiew, ki pliang rnong, bad ki jingthiah.)
5Kumta ki Pharisi bad ki nonghikai ka Hukum ki la kylli ïa U Jisu, “Balei ba ki synran jong me kim bud ïa ka jinghikai ba la ai pateng da ki kpa tymmen jong ngi, hynrei pynban ki bam da ki kti bym khuid kat kum ka jinglehniam?”
6 #
Isa. 29:13
U Jisu u la jubab ïa ki, “A katno kaba dei ba u Isaïah u la ïathuhlypa shaphang jong phi! Phi long kiba arsap, thik kumba u la thoh:
“ ‘Kine ki briew, ong U Blei, ki burom ïa nga
da ki ktien jong ki,
hynrei ka dohnud jong ki,
ka long jngai shisha na nga.
7Ka long ka bymmyntoi ïa ki ban mane ïa nga,
namar ki hikai ïa ki aiñ ba la thaw da ki briew
kumba ki dei ki aiñ U Blei!’
8“Phi la kyntait noh ïa ka hukum U Blei bad phi kohnguh ïa ki jinghikai jong ki briew.”
9Bad U Jisu u la bteng da kaba ong, “Phi don ka rukom basian jong ka jingkyntait ïa ka hukum U Blei ban pynneh ïa la ka jong ka jinghikai hi. 10#Eks. 20:12; Deut. 5:16; Eks. 21:17; Leb. 20:9Naba u Moses u la hukum, ‘Burom ïa la u kpa bad ïa la ka kmie,’ bad, ‘uno uno uba tim ïa la u kpa bad ïa la ka kmie yn pynïap.’ 11Hynrei phi hikai ba lada u briew u don ei ei, kaba u lah ban pyndonkam ha kaba ïarap ïa u kpa lane ka kmie, hynrei u ong, ‘Kane ka long ka Korban’ (kaba mut, ka long sha U Blei), 12u la lait na kaba ïarap ïa la u kpa lane ka kmie. 13Ha kane ka rukom ka jinghikai ba phi ai pateng sha kiwei pat ka pynduh noh ïa ka ktien jong U Blei. Bad don bun kiwei kiei kiei kum kane kaba phi leh.”
Kiei kiei kiba pynlong bymkhuid ïa u briew
(Mat. 15:10-20)
14Nangta U Jisu u la khot ïa u paidbah sha u sa shisien bad ong ha ki, “To shahshkor ïa nga, baroh na phi, bad to long kiba shemphang. 15Ym don kano kano kaba rung shapoh u briew na shabar kaba lah ban pynlong bymkhuid ïa u kat kum ka jinglehniam. Pynban, ka long kaei kaba mih shabar na u briew kaba pynlong bymkhuid ïa u. 16Uno uno uba don ki shkor ban sngew, to un sngew.”
17Haba u la iehnoh ïa u paidbah bad leit sha la ïing, ki synran jong u ki la ong ïa u ban batai ïa kane ka jingong. 18“Phim long kiba kham stad ban ïa kiwei pat,” U Jisu u la ong ïa ki. “Hato phim shemphang? Ym don kaba rung shapoh u briew na shabar kaba lah shisha ban pynlong bymkhuid ïa u, 19namar kam rung sha ka dohnud, hynrei, shapoh ka kpoh jong u bad nangta ka mih shabar na ka met.” (Ha kaba u ong ïa kane, U Jisu u la pynbna ba baroh ki jingbam ki long kiba bit ban bam.)
20Bad u la ong shuh shuh, “Ka long kaei kaba mih na u briew kaba pynlong bymkhuid ïa u. 21Naba na shapoh, na ka dohnud u briew, ki wan ki jingmut basniew kiba ïalam ïa u ban leh ki kam awria, ban lute, ban pynïap, 22ban klim, ban lalot, bad leh baroh kiei kiei kiba sniew; ka jingshukor, ka jingbymdon-burom, ka jingbishni, kaba kren sniew shaphang kiwei, ka jingsarong, bad ka jingbieit — 23baroh kine kiei kiei ki wan napoh u briew bad pynlong bymkhuid ïa u.”
Ka jingngeit jong ka briew
(Mat. 15:21-28)
24Nangta U Jisu u la mih bad leit noh sha ka jaka kaba hajan ka nongbah Tyros. U la leit sha kawei ka ïing bad um shym la kwah mano mano ban tip ba u don hangta, hynrei ba u lah ban shong ha kaba rieh. 25Kawei ka briew, kaba ka khun jong ka, ka don u mynsiem bymkhuid hapoh jong ka, ka la ïohsngew shaphang U Jisu bad mar kumta hi ka la wan sha u bad ka la dem ha ki kjat jong u. 26Kata ka briew ka la long ka Jentil, ba la kha ha ka thain Phoenisia ha Syria. Ka la kyrpad ïa U Jisu ban beh noh ïa u ksuid na ka khun jong ka. 27Hynrei U Jisu u la jubab, “Ai ba ngin bsa nyngkong shuwa ïa ki khun. Kam long kaba dei ban shim ïa ka jingbam jong ki khun bad ban bret ïa ka ha ki ksew.”
28“Ko Kynrad,” ka la jubab, “wat ki ksew ha khrum ka miej ki bam ïa ki jingbam ba la sah tam na ki khun!”
29Kumta U Jisu u la ong ïa ka, “Namar kata ka jubab, khie leit phai pat sha ïing, ha kaba phan shem ba u ksuid u la mihnoh na ka khun jong pha!”
30Ka la leit sha ïing bad ka la shem ïa ka khun jong ka ba ka thiah ha ka jingthiah; u ksuid u la lah mihnoh shisha na ka.
U Jisu u pynkhiah ïa u briew uba kyllut bad bymnang kren
31U Jisu nangta u la mihnoh na ka thain jong ka Tyros bad u la ïaid lyngba ïa ka Sidon sha ka duriaw Galilaïa, da kaba ïaid lyngba ïa ka Dekapolis. 32Katto katne ngut ki briew ki la wallam ha u ïa u briew uba kyllut bad u bymnang kren, bad ki la kyrpad ïa U Jisu ban buh ïa ki kti jong U halor jong u. 33Kumta U Jisu u la shim ïa u tang marwei na u paidbah, U la buh ïa la ki shympriah kti ha ki shkor jong uta u briew, U la biah, bad U la ktah ïa u thylliej jong uta u briew. 34Nangta U Jisu u la khmied sha bneng, U la ud jylliew, bad u la ong ha uta u briew, “Ephphatha.” Kaba mut, “To plie!”
35Shisyndon uta u briew u la lah ban ïohsngew, bad la weng noh ïa kata kaba teh ïa ka jinglah kren jong u, bad u la sdang ban kren khlem kano kano ka jingeh. 36Te U Jisu u la hukum ïa ki briew ban ym kren shaphang kata hano hano ruh; hynrei katba u nang hukum ïa ki ban ym ïathuh, katta ki nang ïathuh. 37Bad baroh kiba la ïohsngew ki la sngewlyngngoh shikatdei eh. “Kumno u lah ban leh ïa kiei kiei baroh!” ki la ïa-pyrta. “U lah wat ban pynlong ïa uba kyllut ban ïohsngew bad ïa u bymnang kren ban kren!”
Currently Selected:
MARKOS 7: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.