MARKOS 12
12
Ka pharshi ki nongshimwai ïa ka bri sohwaiñ
(Mat. 21:33-46; Luk. 20:9-19)
1 #
Isa. 5:1,2 Nangta, U Jisu u la kren ha ki ha ki pharshi: “Shisien la don u briew uba don ka bri sohwaiñ, u la thaw ka jingker baroh sawdong jong ka, u la tih ka thliew ban khñiot sohwaiñ, bad u la thaw ka jaka ap phira. Nangta u la aiwai ïa ka bri sohwaiñ sha ki nongshimwai bad u la mih na ïing ban leit jingleit. 2Haba ka por ka la poi ban lum ïa ki sohwaiñ, u la phah ïa u mraw sha ki nongshimwai ban ïohpdiang ïa la ka bynta na ka jinglum soh. 3Ki nongshimwai ki la kem ïa uta u mraw, ki la shoh ïa u, bad phah kylla ïa u khlem ai ei ei. 4Nangta u trai u la phah ïa uwei pat u mraw; ki nongshimwai ki la tied ïa u na ka khlieh bad ki la leh khlem akor ïa u. 5U trai u la phah ïa uwei pat u mraw, ki la pynïap ïa u; bad ki la leh ïa kiwei pat kiba bun ha kajuh ka rukom, da kaba shoh ïa ki katto katne ngut bad pynïap ïa kiwei pat. 6Uba dang sah ïa uba yn phah u long u khun ba-ieit jong u trai hi. Ha kaba khatduh, te, u la phah ïa la u khun sha ki nongshimwai. ‘Nga ngeit skhem kin burom ïa u khun jong nga,’ u la ong. 7Hynrei kita ki nongshimwai ki la ïa-ong para ma ki, ‘Une u dei u khun jong u trai. Ale, to ngin ïa-pynïap ïa u, bad ka jingdon jingem jong u kan sa long ka jong ngi!’ 8Kumta ki la kem ïa uta u khun bad ki la pynïap ïa u bad bret ïa ka met jong u shabar ka bri sohwaiñ.
9“Kaei te, kaba uta u trai jong ka bri sohwaiñ un leh?” la kylli U Jisu. “Un sa wan bad pynïap ïa kito ki briew bad ai noh ïa ka bri sohwaiñ sha kiwei pat ki nongshimwai. 10#Salm. 118:22,23Hato da shisha phi la pule ïa kane ka Jingthoh Bakhuid?
“ ‘U maw ïa uba ki nongtei ki la kyntait kum u bymmyntoi,
u la kylla long uba donkam eh na baroh.
11Kane ka long kaba la leh da U Trai;
A haduh katno ka long kaei kaei kaba iphylla!’ ”
12Ki nongïalam jong ki Jiw ki la pyrshang ban kem ïa U Jisu, namar ki la tip ba u la ong ïa kane ka pharshi pyrshah ïa ki. Hynrei ki la sheptieng ïa u paidbah, kumta ki la iehnoh ïa u bad ki la leit noh.
Ka jingkylli shaphang kaba siew khajna
(Mat. 22:15-22; Luk. 20:20-26)
13Ïa ki katto katne ngut ki Pharisi bad katto katne ngut ki dkhot na ka kynhun u Herod, la phah sha U Jisu ban riam ïa u da ki jingkylli: 14Ki la wan sha u bad ki la ong, “Ko Nonghikai, ngi tip ba me kren ïa ka jingshisha, khlem da khuslai ïa kaei kaba ki briew ki pyrkhat. Mem ñiew ïa ka kyrdan u briew, hynrei me hikai ïa ka jingshisha shaphang ka mon U Blei na ka bynta u briew. To ïathuh ïa ngi, hato ka long pyrshah ïa ka Hukum jong ngi ban siew ki khajna sha u Patsha ka Rom? Hato ka dei ïa ngi ban siew ne ban ym siew?”
15Hynrei U Jisu u la ïohi ïa ka buit bashapoh jong ki bad u la jubab, “Balei ba phi ïapyrshang ban riam ïa nga? Wallam ïa ka sbai rupa, bad ai ba ngan khmih ïa ka.”
16Ki la wallam ïa kawei ka sbai rupa, bad u la kylli, “Ka durkhmat bad ka kyrteng jongno kine?”
“Ka jong u patsha,” ki la ong.
17Kumta U Jisu u la ong, “Te kumta, siew sha u patsha ïa kaei kaba long ka jong u patsha, bad siew sha U Blei ïa kaei kaba long ka jong U Blei.”
Bad ki la sngewlyngngoh ïa U Jisu.
Ka jingkylli shaphang kaba mihpat na ka jingïap
(Mat. 22:23-33; Luk. 20:27-40)
18 #
Ki Kam. 23:8
Te katto katne ngut na ki Saddusi, kiba ong ba ki briew kin ym mihpat na ka jingïap, ki la wan ha U Jisu bad ki la ong, 19#Deut. 25:5“Ko Nonghikai, U Moses u la thoh ïa kane ka hukum na ka bynta jong ngi: ‘Lada u briew u ïap bad u iehnoh ïa ka tnga khlem don khun, u para jong uta u briew u dei ban shongkurim ïa ka khnang ba ki lah ban don ki khun ïa kiba yn ñiew kum ki khun jong uta u briew uba la ïap.’ 20Shisien la don hynñiew ngut shi para ki shynrang; uba nyngkong eh u la shongkurim bad u la ïap khlem don khun. 21Nangta uba ar u la shongkurim ïa kata ka briew, bad u la ïap noh ruh khlem don khun. Ka la jia kumjuh ïa u para uba lai, 22bad nangta ïa baroh ki para shynrang: Baroh hynñiew ngut shi para ki la shongkurim ïa kata ka briew bad ki la ïap noh khlem don khun. Khatduh, kata ka briew ka la ïap. 23Mynta, haba baroh kiba la ïap, kin sa mihpat ha kata ka sngi ka jingmihpat, ka tnga jongno kan long? Baroh kita ki hynñiew ngut ki la lah shongkurim ïa ka.”
24U Jisu u la jubab ïa ki, “Katno phi la bakla! Bad phi tip balei? Ka long namar ba phim tip ïa ki Jingthoh Bakhuid lane ïa ka bor jong U Blei. 25Naba haba kiba la ïap kin mihpat, kin long kum ki angel ha bneng ba kin ym shongkurim shuh. 26#Eks. 3:6Mynta, na ka bynta kita kiba la ïap ki ban sa mihpat: Hato phim pat ju pule ha ka Kitab u Moses ïa ka bynta kaba dei shaphang ka 'lawlynnong kaba ing? Hangto la thoh ba U Blei u la ong ïa u Moses, ‘Nga long U Blei jong u Abraham, U Blei jong u Isaak bad U Blei jong u Jakob.’ 27U long U Blei jong kiba im, ym jong kiba ïap. Phi la bakla shikatdei eh!”
Ka Hukum bakhraw
(Mat. 22:34-40; Luk. 10:25-28)
28Uwei u nonghikai ka Hukum uba don hangta u la ïohsngew ïa ka jingïakren. U la ïohi ïa U Jisu ba u la ai ïa ki Saddusi ka jubab kaba dei, kumta u la wan ha u ryngkat bad ka jingkylli: “Kano ka hukum kaba long kaba kongsan tam na baroh?”
29 #
Deut. 6:4,5 U Jisu u la jubab, “Kaba kongsan eh ka dei kane, ‘Shahshkor, ko Israel! U Trai U Blei jong ngi u long tang ma u, U Trai. 30Men ieit ïa U Trai U Blei jong me da ka dohnud jong me baroh, da ka mynsiem jong me baroh, da ka jingmut jong me baroh, bad da ka bor jong me baroh.’ 31#Leb. 19:18Kaba ar na ki hukum bakongsan tam ka dei kane: ‘Men ieit ïa la u paramarjan kumba me ieit ïa lade.’ Ym don kawei pat ka hukum kaba kham kongsan ban ïa kine ar tylli.”
32 #
Deut. 4:35
Uta u nonghikai ka Hukum u la ong ïa U Jisu, “Kaba dei, ko Nonghikai! Ka long kaba shisha, kumba me la ong, ba tang U Trai u long U Blei bad ym don uwei pat u blei hynrei tang ma u. 33#Hos. 6:6Bad u briew u dei ban ieit ïa U Blei da ka dohnud jong u baroh bad da ka jingmut jong u baroh bad da ka bor jong u baroh; bad u dei ban ieit ïa la u paramarjan kumba u ieit ïa lade. Ka long kaba kham donkam ban kohnguh ïa kine ki ar tylli ki hukum ban ïa kaba ai jingainguh da ki mrad bad kiwei ki jingkñia sha U Blei.”
34 #
Luk. 10:25-28
U Jisu u la ïohi katno u la long uba stad ha ka jingjubab jong u, bad kumta U la ong ïa u, “Mem long jngai na ka Hima U Blei.”
Hadien kane, ym don shuh mano mano ba nud ban kylli kino kino ki jingkylli ïa U Jisu.
Ka jingkylli shaphang u Messaïah
(Mat. 22:41-46; Luk. 20:41-44)
35Katba U Jisu u dang hikai ha ka Templ, u la kylli ka jingkylli, “Kumno ki nonghikai jong ka Hukum ki ong ba U Messaïah un long uba hiarpateng na u Dabid? 36#Salm. 110:1U Mynsiem Bakhuid u la pynkhih ïa u Dabid ban kren:
“ ‘U Trai u la ong ïa U Trai jong nga;
shong hangne sha ka liang kamon jong nga
haduh ba ngan da pyndem ïa ki nongshun jong me
hapoh ki kjat jong me.’
37“U Dabid hi da lade u la khot ïa u ‘U Trai’; te kumno U Messaïah u lah ban hiarpateng na u Dabid?”
U Jisu u la maham pyrshah shaphang ki nonghikai ka Hukum
(Mat. 23:1-36; Luk. 20:45-47)
U paidbah babun u dang shahshkor ïa U Jisu da ka jingkmen. 38Katba u dang hikai ïa ki, u la ong, “Sumar bha na ki nonghikai ka Hukum, kiba sngewtynnat ban leit kylleng ha ki jaiñkup jynsur bad ba yn khublei ïa ki da ka jinglehburom ha ka jaka ïew, 39kiba jied ban buh jaka lypa ha ki synagog bad jied ïa ki jaka babha tam ha ki jingkhawai. 40Ki shim kabu ïa ki riewkynthei bad knieh noh na ki, ïa ki ïing jong ki, bad nangta pat ki duwai jlan ha khmat ki briew. Ka jingpynshitom ïa ki kan long kaba khraw!”
Ka jingai ka riewkynthei
(Luk. 21:1-4)
41Katba U Jisu u dang shong hajan ka jaka lum jingkynshew ha ka Templ, u la khmih ïa ki briew katba ki dang pynnoh ïa ka pisa jong ki. Bun kiba riewspah ki la pynnoh shibun ka pisa; 42nangta, ka riewkynthei ka wan bad ka la noh ar tylli ki sbai tama, kiba shongdor kumba shi pisa. 43U la khot lang ïa ki synran jong u baroh bad u la ong ïa ki, “Nga ong ïa phi ba kane ka riewkynthei kaba duk, ka la pynnoh kham bun ha ka synduk jingainguh ban ïa baroh kiwei pat. 44Naba kiwei ki la pynnoh ïa kaei kaba tam na ka spah jong ki; hynrei ma ka, ha ka jingduk jong ka, ka la pynnoh ïa baroh kaba ka don — ka la ai ïa baroh kaba kyrshan ïa ka jingim jong ka.”
Currently Selected:
MARKOS 12: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.