MARKOS 11
11
Ka jingrung badonburom sha Jerusalem
(Mat. 21:1-11; Luk. 19:28-40; Ïoan. 12:12-19)
1Haba ki la jan poi ha Jerusalem, hajan ki shnong Bethphage bad Bethania, ki la wan sha u lum ki Olib. U Jisu u la nang phah ar ngut na ki synran ha shuwa jong u bad kine ki jingbthah: 2“Leit sha ka nongrit hangta ha shuwa jong phi. Phi tang shu poi hangta, phin shem ïa u khun kada ba la teh ïa u, u bym pat ju don uba shong halor jong u. Law ïa u bad wallam ïa u hangne. 3Bad lada uno uno u kylli ïa phi balei phi leh ïa kata, ong ïa u ba U Kynrad u donkam ïa u bad ban pynphai mar mar pat ïa u.”
4Kumta ki la leit bad ki la shem ïa u khun kada ha ka lynti bah, ba la teh ha ka jingkhang jong ka ïing. Katba ki dang law noh ïa u, 5katto katne ngut na kiba ïa-ïeng hangta ki la kylli ïa ki, “Phi ïaleh aïu ba phi ïalaw ïa u khun kada?”
6Ki la jubab kumba U Jisu u la ïathuh ïa ki, bad kita ki briew ki la shah ïa ki ban leit. 7Ki la wallam ïa uta u kada ha U Jisu, ki la tap ïa ki jaiñkup jong ki halor uta u khun kada, bad U Jisu u la shong halor jong u. 8Bun ki briew ki la siang ïa ki jaiñkup ha lynti. Katba kiwei pat ki dang ïa-ot ïa ki tnat dieng ha ki lyngkha bad ki la siang ïa ki ha ka lynti. 9#Salm. 118:25,26Ki briew kiba don ha khmat bad kito kiba bud nadien ki la sdang ban pyrta, “Ïaroh ïa U Blei! U Blei u kyrkhu ïa uta uba wan ha ka kyrteng jong U Trai! 10U Blei u kyrkhu ïa ka jingwan ka hima jong u syiem Dabid, u kpa jong ngi! Ïaroh ïa U Blei!”
11U Jisu u la rung sha Jerusalem, u la leit sha ka Templ, bad u la khmih sawdong ïa kiei kiei baroh. Hynrei namar ba ka la dier eh ha kata ka sngi, u la mih bad leit sha Bethania ryngkat bad ki khat-ar ngut ki synran.
U Jisu u tim ïa u dieng Dumbur
(Mat. 21:18-19)
12Ha ka sngi kaba bud, katba ki dang wan phai pat na Bethania, U Jisu u la sngew thngan. 13U la ïohi na jngai ïa u dieng Dumbur ba la tap da ki sla, kumta u la leit ban peit la u lah ban shem ki soh ha u. Hynrei haba u la wan sha uta u dieng, u la shem tang ki sla, namar kam pat dei ka por ban mih soh. 14U Jisu u la ong ha uta u dieng Dumbur, “Yn ym don shuh lano lano u ban bam soh na me!”
Bad ki synran ki la ïohsngew ïa u.
U Jisu u rung sha ka Templ
(Mat. 21:12-17; Luk. 19:45-48; Ïoan. 2:13-22)
15Haba ki la poi ha Jerusalem, U Jisu u la rung shapoh ka Templ bad u la sdang ban beh noh shabar ïa baroh kito kiba dang ïathied bad ïadie. U la pynkylla khongpong ïa ki miej jong ki nongïapeiñ pisa bad ïa ki jaka shong jong kito kiba ïadie paro, 16bad um shah ïano ïano ruh ban rah ei ei lyngba ki phyllaw jong ka Templ. 17#Isa. 56:7; Jer. 7:11Nangta u la hikai ïa u paidbah: “La thoh ha ki Jingthoh Bakhuid ba U Blei u la ong, ‘Ïa ka Templ jong nga yn khot ka ïing jingduwai ïa ki briew jong ki jaitbynriew baroh.’ Hynrei phi la pynlong ïa ka, ka jakarieh jong ki nongtuh!”
18Ki rangbah lyngdoh bad ki nonghikai ka Hukum ki la ïohsngew ïa kane, kumta ki la sdang ban ïawad da kano ka lad ban pynïap noh ïa U Jisu. Ki la sheptieng ïa u, namar uta u paidbah baroh u la sngewphylla ïa ka jinghikai jong u.
19Haba la janmiet, U Jisu bad ki synran jong u ki la mihnoh na ka nongbah.
Ka jinghikai na u dieng Dumbur
(Mat. 21:20-22)
20Dang step bha ha ka step kaba bud, katba ki dang ïaid ha kata ka lynti, ki la ïohi ïa uta u dieng Dumbur. U la ïap baroh shi rynïeng haduh ki thied. 21U Petros u la kynmaw ïa kaei kaba la lah jia bad u la ong ha U Jisu, “Khmih, ko Nonghikai, u dieng Dumbur uba me la tim u la ïap!”
22U Jisu u la jubab ïa ki, “To don ka jingngeit ha U Blei. 23#Mat. 17:20; 1 Kor. 13:2Nga ong skhem ha phi ba uno uno uba ong ha une u lum ban ïeng bad pynnoh ïa lade sha ka duriaw bad u bym don jingartatien ha ka dohnud jong u, hynrei ba u da ngeit ïa kaei kaba u ong kan long, yn leh na ka bynta jong u. 24Namar kane ka daw nga ong ïa phi: Haba phi duwai bad pan ïa kaei kaei, ngeit ba phi la ïohpdiang ïa ka, bad yn ai ïa phi ïa kaei kaei kaba phi pan. 25#Mat. 6:14,15Bad haba phi ïeng bad duwai, to map ïa kaei kaei kaba phi lah ban don pyrshah ïano ïano, khnang ba U Kpa jong phi uba ha bneng un map ïa ki jingleh bymdei kiba phi la leh. 26Lada phim map ïa kiwei, U Kpa jong phi uba ha bneng un ym map ïa ki jingbakla kiba phi la leh.”
Ka jingkylli shaphang ka hok U Jisu
(Mat. 21:23-27; Luk. 20:1-8)
27Ki la poi biang sa shisien ha Jerusalem. Katba U Jisu u dang ïaid ha ka Templ, ki rangbah lyngdoh, ki nonghikai ka Hukum, bad ki tymmen ki san ki la wan ha u 28bad ki la kylli ïa u, “Me don hok aïu ba me leh ïa kine kiei kiei baroh? Mano ba ai ha me ïa kane ka hok?”
29U Jisu u la jubab ïa ki, “Ngan kylli ïa phi tang kawei ka jingkylli, bad lada phi ai ïa nga ïa ka jubab, ngan ïathuh ïa phi da kaei ka hok ba nga don ban leh ïa kine kiei kiei. 30Ïathuh ïa nga, nangno u Ïoannis u la ïoh ïa ka hok ban pynbaptis: Ka la long na U Blei ne na u briew?”
31Ki la sdang ïatainia para ma ki: “Kaei ngin ong? Lada ngi jubab, ‘Na U Blei,’ un sa ong, ‘Balei te, phim shym la ngeit ïa u Ïoannis?’ 32Hynrei lada ngi ong, ‘Na u briew’ ” (Ki la sheptieng ïa u paidbah, namar baroh ki la ngeit ba u Ïoannis u la long u nongïathuhlypa.) 33Kumta ka jubab jong ki ïa U Jisu ka la long, “Ngim tip.”
U Jisu u la ong ïa ki, “Nga ruh ngan ym ïathuh ïa phi te, da kaei ka hok ba nga leh ïa kine kiei kiei.”
Currently Selected:
MARKOS 11: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.