لَاتَانٛوجِ 43
43
بٜنْيَمِنْ يَحْدِ بٜى دٜىٰرْطِرَاࢡٜ مُوطُمْ حَا مِصْرَ
1وٜىٰلٛ ࢡٜسْدِ سَاتُغٛ ندٜرْ لٜسْدِ کَنَانَ؞ 2ندٜ يِمْࢡٜ سَارٜ يَعْقُوبُ تِمِّدِنِ ࢩَامُغٛ عَلْکَمَارِ ندِ ࢡٜنغَدّٛيْنٛ دِغَ مِصْرَ، يَعْقُوبُ وِعِ ࢡِيُمْعٜنْ: «نجٜحٜ کَدِبٛو، شٛودَنٜ عٜنْ ࢩَامْدُ سٜطَّ؞» 3يَحُودَ وِعِمٛ: «غٛطّٛ عٛو رٜىٰنْتِنِ مِنْ لَاࢡْطُمْ، عٛوِعِ: عٛنْ نغِعَتَا يَمْ سَمْ تٛ دٜىٰرْطِرَاوٛ مٛنْ وَرْدَايْ بٜى مٛوطٛنْ؞ 4تٛ عَجَࢡِ نٜلْدُغٛ دٜىٰرْطِرَاوٛ عَمِنْ بٜى عَمِنْ، ندٜنْ کَمْ مِنْ نجَحَنْ سٛودَنٛيْغٛ مَ ࢩَامْدُ؞ 5عَمَّا تٛ عَجَࢡَايْ، مِنِنْ بٛو مِنْ نجَحَتَا تٛنْ؞ نغَمْ غٛطّٛ عٛو وِعِ: عٛنْ نغِعَتَا يَمْ سَمْ تٛ دٜىٰرْطِرَاوٛ مٛنْ وَرْدَايْ بٜى مٛوطٛنْ؞» 6إِسْرَاءِيلَ وِعِ: «کٛنِ کُووَنْطٛنْ يَمْ کَلُّطُمْ طُعُمْ بٜى عَنْدِنْغٛ غٛطّٛ عٛو عٛنْ نغٛودِ دٜىٰرْطِرَاوٛ ڢٜىٰرٜ ڢَحِنْ؟» 7ࢡٜنجَابِ: «عٛࢨَمِ مِنْ بٜى تُکُّ حَالَ کٛعٜ عَمِنْ عٜ سَارٜ عَمِنْ، عٛوِعِ: بَابَ مٛوطٛنْ طٛنْ بٜى يٛنغْکِ نَ؟ عٛنْ نغٛودِ دٜىٰرْطِرَاوٛ غٛطّٛ نَ؟ مِنْ جَابِمٛ ڢٛدّٜ ࢨَمْطٜ طٜعٜ؞ مِنْ عَنْدَانٛ عٛوِعَنْ: نغَرْدٜ بٜى دٜىٰرْطِرَاوٛ مٛوطٛنْ؞» 8يَحُودَ وِعِ بَابَ مُوطُمْ إِسْرَاءِيلَ: «عَشُّ دٜرْکٜىٰجٛ يَحْدَ بٜى عَمْ؞ مِنْ عُمّٛتٛ، مِنْ ندِلَّ، بَنَ نٛنْ عٜنْ تَمِّ وُرْدُغٛ، عٜنْ مَايَتَا، مِنِنْ بٜى مَاطَ عٜ ࢡِکّٛيْ عَمِنْ ڢُو؞ 9مِنْ ڢِيِ دَمَّانَ نغَمْ مَاکٛ، عَࢨَمَمِّ تٛ مِوَرْتِرَايْ مٛ حَا کٛمْبِ مَاطَ؞ لِمَنَمْ طُمْ عَيْبٜ حَا ڢٛرٛيْ؞ 10تٛ مِنْ نٜىٰࢡَايْنٛ حَا تٛنْ، مِنْ نغَرْتَنّٛ جٛنْتَ ندٜ طِطِ؞»
11إِسْرَاءِيلَ، بَابَ مَࢡّٜ وِعِ ࢡٜ: «تٛ طُمْ لَاتَکٜ نٛنْ، مبَطٜ طُعُمْ: کٛوعٜ ࢡُرْطُمْ وٛوطُغٛ حَا لٜسْدِ مٜنْ ندٜرْ بٛورٛوجِ مٛنْ، نجَحْرَنٜ غٛطّٛ عٛو دٛکَّلْ: طَشّٜرٜ عُورْندٜ سٜطَّ عٜ نجُمْرِ سٜطَّ عٜ عُورْلٜ عٜ تَمْرٜ عُورْدِ عٜ ࢡِࢡّٜ لٜطّٜ بٜلْطٜ جٛورْطٜ دِغَ لٜطّٜ ڢٜىٰرٜ ڢٜىٰرٜ؞ 12کٛوعٜ شٜىٰدٜ حَا جُوطٜ مٛنْ؞ نٛنْ بٛو شٜىٰدٜ بَاتَاطٜ حَا حُنْدُکٛ بٛورٛوجِ مٛوطٛنْ، کٛوعٜ طٜ ڢَحِنْ، تٜىٰمَ طُمْ نغٛويْتُ؞ 13کٛوعٜ دٜىٰرْطِرَاوٛ مٛوطٛنْ، عُمّٜ، لٛرْتٜ حَا غٛطّٛ عٛو؞ 14اَللَّه بَاوْطٛ حٜࢡْنَنَ عٛنْ مٛعّٜرٜ حَا غٛطّٛ عٛو، عٛيٛوڢْتَ دٜىٰرْطِرَاوٛ مٛوطٛنْ عٛيَ عٜ بٜنْيَمِنْ؞ مِنْ بٛو، تٛ نِي دٛولٜ مِسٛويَ ࢡِکّٛيْ عَمْ، سٜيْ مِسٛويَ کٛيْ!» 15دٜىٰرْطِرَاࢡٜ کٛوعِ دٛکَّلْ مَاجُمْ، ࢡٜ شٛوِ شٜىٰدٜ حَا جُوطٜ مَࢡّٜ، ࢡٜکٛوعِ بٜنْيَمِنْ بٛو؞ ࢡٜعُمِّ، ࢡٜندِلِّ مِصْرَ؞ تٛنْ ࢡٜنغَرِ يٜىٰسٛ يُوسُڢُ؞
يُوسُڢُ وٜىٰرْنِ دٜىٰرْطِرَاࢡٜ مُوطُمْ
16ندٜ يُوسُڢُ يِعِ بٜنْيَمِنْ بٜى مَࢡّٜ، عٛوِعِ کَلِيڢَاجٛ سَارٜ مَاکٛ: «نَسْتِنْ وٛرْࢡٜ ࢡٜعٜ ندٜرْ سُودُ، حِرْسُ ندَبَّاوَ، دٜڢُ نغَ، نغَمْ ࢡٜࢩَامْدَنْ بٜى عَمْ شَکَ ࢩَلَوْمَ؞» 17غٛطّٛ غٛ وَطِ کٛ يُوسُڢُ عُمْرِمٛ؞ عٛيَحْرِ ࢡٜ ندٜرْ سَارٜ يُوسُڢُ؞ 18ندٜ ࢡٜطٛنْ نجَحْرَ ࢡٜ ندٜرْ سَارٜ يُوسُڢُ، ࢡٜکُلْتٛرِ، ࢡٜمبِعِ: «ࢡٜطٛنْ نجَحْرَ عٜنْ دَلِيلَ شٜىٰدٜ لٛرِيطٜ ندٜرْ بٛورٛوجِ مٜىٰطٜنْ عَرَنْ غٛ؞ ࢡٜعُکَّنْتٛ عٜنْ، ࢡٜنجَرْنَ عٜنْ بٛنٜ، ࢡٜمبَطَ عٜنْ مَشُّࢡٜ بٜى بَمْطٜ مٜىٰطٜنْ ڢُو؞» 19ࢡٜࢡَدِتِ کَلِيڢَاجٛ سَارٜ يُوسُڢُ، ࢡٜمبٛلْوَنِمٛ حَا دَمُّغَلْ سَارٜ؞ 20ࢡٜمبِعِ: «عُسٜنِ، نَيْوَ، مِنْ نغَرِنٛ عَرَنْ سٛودُغٛ ࢩَامْدُ؞ 21ندٜ مِنْ نجٛتِّ حَا مِنْ مبَالَتَ جٜمَّ، مِنْ مَࢡِّتِ بٛورٛوجِ عَمِنْ؞ کٛو مٛيْ عَمِنْ تَوِ شٜىٰدٜ مُمْ حَا حُنْدُکٛ بٛورٛ مُمْ؞ ڢَکَتْ طُمْ سَمَنْ شٜىٰدٜ طٜ مِنْ نجٛࢡْنٛ؞ عَمَّا مِنْ نغَرْتِرِ طٜ حَا جُنغٛ عَمِنْ؞ 22مِنْ نغَدِّ شٜىٰدٜ غٛطّٜ بٛو نغَمْ سٛودُغٛ ࢩَامْدُ؞ مِنْ عَنْدَا مٛيْ وَاتِ شٜىٰدٜ عَمِنْ ندٜرْ بٛورٛوجِ عَمِنْ؞» 23عٛجَابِ: «ندٜعِّتٜ، تَا کُلْتٛرٜ! طُمْ اَللَّه مٛوطٛنْ، اَللَّه بَابَ مٛوطٛنْ وَاتَنِ عٛنْ ندٜسَارِ ندٜرْ بٛورٛوجِ مٛوطٛنْ؞ شٜىٰدٜ مٛنْ جٛتِّيطٜ يَمْ؞» ندٜنْ عٛوُرْتِنِ سِمٜيٛنْ حَا مَࢡّٜ؞ 24عٛنَسْتِنِ ࢡٜ ندٜرْ سَارٜ يُوسُڢُ؞ عٛوَدَّنِ ࢡٜ ندِيَمْ حَا ࢡٜلٛوتَ کٛسْطٜ مَࢡّٜ؞ عٛحٛکِّ بَمْطٜ مَࢡّٜ بٛو حُطٛ؞ 25ࢡٜتَاسْکِتِنِ دٛکَّلْ غٛ حِدّٜکٛ يُوسُڢُ وَرَ شَکَ ࢩَلَوْمَ؞ نغَمْ ࢡٜنَنِ، تٛنْ ࢡٜࢩَامْدَتَ بٜى مَاکٛ؞
26ندٜ يُوسُڢُ وَرْتِ سَارٜ، ࢡٜلِيعَنِمٛ دٛکَّلْ نغَلْ ࢡٜنجٛغِ، ࢡٜشُجِدَنِمٛ حَا لٜسْدِ؞ 27عٛࢨَمِ نجَمُ مَࢡّٜ، عٛوِعِ: «نٛيْ بَابَ مٛوطٛنْ ندٛتِّيجٛ مٛ مبِعْطٛنْ يَمْ حَالَ مُمْ، عٛطٛنْ يٜىٰطَ نَ؟» 28ࢡٜنجَابِمٛ: «مَشُّطٛ مَ، بَابَ عَمِنْ عٛجَمٛ، عٛطٛنْ يٜىٰطَ؞» ࢡٜتُرِ، ࢡٜشُجِدِ ڢَحِنْ؞ 29يُوسُڢُ لَارِ، يِعِ بٜنْيَمِنْ، دٜىٰرْطِيکٛ، ࢡِي دَادَ مُمْ؞ عٛࢨَمِ: «عٛو وٛنِ مِࢩِرَاوٛ مٛوطٛنْ، مٛ مبِعْطٛنْ يَمْ حَالَ مُمْ نَ؟» عٛوِعِ بٜنْيَمِنْ: «اَللَّه مٛعَّنٜ، ࢡِنغٜلْ عَمْ!» 30ندٜ يُوسُڢُ يِعِ بٜنْيَمِنْ، ࢡٜرْندٜ مَاکٛ حٜىٰوِ نغٜنْکَ دٜىٰرْطِيکٛ؞ عٛوُرْتِ لَوْ، عٛنَسْتِ سُودُ مَاکٛ، عٛوٛيِ تٛنْ؞ 31ࢡَاوٛطٛنْ، عٛسُلْمِ غِتٜ مَاکٛ، عٛوُرْتِ، عٛتِطِّتِنِ، عٛعُمْرِ: «نغَدّٜ ࢩَامْدُ!» 32ࢡٜنجٛعِّنَنِمٛ ࢩَامْدُ مَاکٛ دٛوْ تَابَلْ ڢٜىٰرٜ، دٜىٰرْطِيکٛعٜنْ حَا تَابَلْ غٛطْنغَلْ عٜ مِصْرَعٜنْ ࢩَامْدٛتٛوࢡٜ بٜى مَاکٛ بٛو ڢٜىٰرٜ مَࢡّٜ؞ نغَمْ مِصْرَعٜنْ ࢩَامْدَتَا بٜى عِبْرَنِنغْکٜعٜنْ، نغَمْ طُمْ کَرَمْطُمْ حَا دِينَ مَࢡّٜ#تٛوکْتَاکِ تَوْرٜىٰتَ 7:25؞؞ 33دٜىٰرْطِرَاࢡٜ مَاکٛ نجٛوطِ تِيتٛتِرِ بٜى مَاکٛ؞ دِغَ عَڢٛ ڢٛدّٜ عَڢَاکُ مُمْ حَا غَاجِيجٛ ڢٛدّٜ دُوࢡِ مُمْ؞ ࢡٜندَارْندَارْتِرِ، ࢡٜکَيْطِنِ؞ 34عٛنٜلْدِ ࢡٜ غٜطٜ حَا ࢩَامْدُ مَاکٛ؞ عَمَّا غٜطَلْ بٜنْيَمِنْ ࢡُرِ طٜ مَࢡّٜ طُوطُغٛ شٛوِ جٛوِ؞ ࢡٜنجَرْدِ، ࢡٜشٜيٛدِ بٜى مَاکٛ؞
Currently Selected:
لَاتَانٛوجِ 43: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.