لَاتَانٛوجِ 44
44
يُوسُڢُ جَرِّبِ دٜىٰرْطِرَاࢡٜ مُوطُمْ
1يُوسُڢُ عُمْرِ کَلِيڢَاجٛ سَارٜ مُوطُمْ: «حٜبِّنْ بٛورٛوجِ وٛرْࢡٜ ࢡٜعٜ بٜى ࢩَامْدُ ڢٛدّٜ کٛ ࢡٜمبَاوَتَ رٛونْدَاغٛ؞ وَاتُ شٜىٰدٜ کٛو مٛيْ حَا حُنْدُکٛ بٛورٛ مُمْ؞ 2عَوَاتَ جَرْدُغٜلْ عَمْ نغٜلْ شَرْدِ ندٜرْ بٛورٛ غَاجِيجٛ، حَوْتَادٜ بٜى شٜىٰدٜ عَلْکَمَارِ مَاکٛ؞» کَلِيڢَاجٛ وَطِ بَنَ يُوسُڢُ عُمْرِمٛ؞ 3ندٜ وٜىٰتِ، ࢡٜعَشِّ ࢡٜ، ࢡٜندِلِّ بٜى بَمْطٜ مَࢡّٜ؞ 4ندٜ ࢡٜنغُرْتِ بٜرْنِوٛلْ، ࢡٜندَايَاکِ تَوٛنْ، يُوسُڢُ وِعِ کَلِيڢَاجٛ سَارٜ مُوطُمْ: «يَاوْطَ، تَاسْنُ ࢡٜ، جٛکُّ ࢡٜ! وِعْ ࢡٜ: کٛنِ مبَرْجِرْطٛنْ بٛوطُّمْ بٜى کَلُّطُمْ؟ 5نَا بٜى مَاغٜلْ جَاغٛرْطٛ عَمْ يَرْدَتَ عٜ عٛلَارْدَتَ سِرِّيجُمْ نَ؟ کٛ مبَطّٛنْ طٛ طُمْ کَلُّطُمْ!» 6کَلِيڢَاجٛ جٛکِّ ࢡٜ، وِعِ ࢡٜ بٛلّٜ طٜعٜ؞ 7ࢡٜمبِعِمٛ: «نَيْوَ! نٛيْ نٛيْ مبِعْرَتَ عِرِنْ طُعُمْ؟ مَشُّࢡٜ مَ ݠٛتَايْ مبَطَ بَنَ نٛنْ! 8مِنْ نغَرْتِرِ شٜىٰدٜ طٜ مِنْ تَوْنٛ حَا کُنْدُطٜ بٛورٛوجِ عَمِنْ دِغَ لٜسْدِ کَنَانَ؞ نٛيْ مِنْ نغُجِّرْتَ شَرْدِ مَلَّ کَنغّٜىٰرِ حَا سَارٜ جَاغٛرْطٛ مَ؟ 9مٛ نغٜلْ تَوَ حَا مُوطُمْ شَکَ مَشُّࢡٜ مَ، مَايَ! مِنِنْ بٛو مِنْ لَاتٛ مَشُّࢡٜ مَ؞» 10کَلِيڢَاجٛ وِعِ: «نغَطٜنْ بَنَ مبِعْطٛنْ؞ مٛ نغٜلْ تَوَ حَا مُوطُمْ، لَاتٛ مَشُّطٛ عَمْ، عَمَّا عٛنٛنْ لُتُّࢡٜ عٛنْ رِمْࢡٜ؞» 11کٛو مٛيْ يَاوْطِ رِڢْتِ بٛورٛ مُمْ حَا لٜسْدِ، مَࢡِّتِ نغٛ؞ 12کَلِيڢَاجٛ ڢُطِّ لِࢩُغٛ دِغَ بٛورٛ حَمِّرَاوٛ حَا عٛتِمِّنِرِ دٛوْ غَاجِيجٛ؞ جَرْدُغٜلْ تَوَامَ ندٜرْ بٛورٛ بٜنْيَمِنْ؞ 13ࢡٜشٜىٰکِ لِمْشٜ مَࢡّٜ، کٛو مٛيْ رِمْندِ وَمْندٜ مُمْ، ࢡٜلٛرْتِ حَا بٜرْنِوٛلْ؞
14يَحُودَ عٜ دٜىٰرْطُمْعٜنْ نَسْتِ سَارٜ يُوسُڢُ؞ يُوسُڢُ دِلَّايْنٛ تَوٛنْ؞ ࢡٜشُجِدَنِمٛ؞ 15يُوسُڢُ ࢨَمِ ࢡٜ: «کُوغَلْ نغَلٜ کُووْطٛنْ طٛ؟ عٛنْ عَنْدَا غٛطّٛ بَنَ عَمْ عَنْدِ لَارُغٛ سِرِّيجُمْ نَ؟» 16يَحُودَ جَابِ: «کٛ مِنْ مبِعَتَ مَ، بَرْکَامَ؟ طُمٜ مِنْ مبٛلْوَتَ؟ نٛيْ نٛيْ مِنْ نغٛونغْطِنْتَ کٛعٜ عَمِنْ؟ اَللَّه وَنغِنِ عَيْبٜ مَشُّࢡٜ مَاطَ؞ ندَا، مِنْ مَشُّࢡٜ مَ، بَرْکَامَ، مِنِنْ عٜ مٛ جَرْدُغٜلْ مَ تَوَ حَا مُوطُمْ ڢُو؞» 17يُوسُڢُ وِعِ: «وٛودَا! مِوَطَتَا طُمْ؞ مٛ جَرْدُغٜلْ تَوَ حَا مُوطُمْ، کَنغْکٛ لَاتٛتٛ مَشُّطٛ عَمْ؞ عَمَّا عٛنٛنْ لُتُّࢡٜ، کٛوتٜ جَمْ حَا بَابَ مٛنْ؞»
18ندٜنْ يَحُودَ ࢡَدِتِ يُوسُڢُ، وِعِ: «عُسٜنِ، بَرْکَامَ، عَشُّ مَشُّطٛ مَ وٛلْوَ وٛلْدٜ وٛورٜ يٜىٰسٛ مَ؞ تَا تِکّٜرٜ مَ سَاتَ دٛوْ مَشُّطٛ مَ، نغَمْ عَلَاتِ بَنَ ڢِرْعَوْنَ؞ 19بَرْکَامَ، عَࢨَمْنٛ مَشُّࢡٜ مَ: بَابَ مٛوطٛنْ طٛنْ نَ مَلَّ دٜىٰرْطِرَاوٛ مٛوطٛنْ غٛطّٛ طٛنْ؟ 20مِنْ نجَابِ مَ: مِنْ نغٛودِ بَابَ ندٛتِّيجٛ عٜ دٜرْکٜىٰجٛ ݠَمَرٛ، دَࢩَنَاطٛ مٛ ندٜرْ ندٛتَّاکُ مَاکٛ؞ دٜىٰرْطِرَاوٛ دٜرْکٜىٰجٛ مَنْ بٛو مَايِ، عٛلُتِّ ڢٜىٰرٜ مَاکٛ حَا دَادَ مَاکٛ، بَابَ مَاکٛ بٛو يِطِمٛ مَسِنْ؞ 21عَوِعِ مَشُّࢡٜ مَاطَ: نغَدَّنٜىٰطَمْ مٛ، حَا غِتٜ عَمْ ندَارَ مٛ؞ 22مِنْ نجَابِ مَ: دٜرْکٜىٰجٛ وَاوَتَا طَلُغٛ بَابَ مُوطُمْ؞ تٛ عٛطَلِمٛ، عٛمَايَنْ؞ 23عَمَّا عَوِعِ مَشُّࢡٜ مَ: تٛ مِࢩِرَاوٛ مٛنْ وَرْدَايْ بٜى مٛوطٛنْ، عٛنْ مٜىٰتَتَا يِعُغٛ يَمْ؞ 24ندٜ مِنْ کٛوتِ حَا مَشُّطٛ مَ، بَابَ عَمِنْ، مِنْ نغٜشِّمٛ بٛلّٜ مَاطَ، بَرْکَامَ؞ 25بَابَ عَمِنْ وِعِ: لٛرْتٜ، شٛودَنٜ عٜنْ ࢩَامْدُ سٜطَّ؞ 26عَمَّا مِنْ مبِعِ: مِنْ ݠٛتَايْ يَحُغٛ تٛنْ بِلَا مِࢩِرَاوٛ عَمِنْ يَحْدَ بٜى عَمِنْ؞ نغَمْ مِنْ ݠٛتَايْ يِعُغٛ غٛرْکٛ عٛو، تٛ مِࢩِرَاوٛ عَمِنْ وٛنْدَايْ بٜى عَمِنْ؞ 27مَشُّطٛ مَ، بَابَ عَمِنْ وِعِ مِنْ: عٛنْ عَنْدِ دٜبّٛ عَمْ دَࢩَنِ يَمْ ࢡِࢡّٜ طِطٛ؞ 28غٛوتٛ مَࢡّٜ مَجِّ؞ مِنُمِ حُوندٜ لَدّٜ ڢَطِّمٛ، نغَمْ مِمٜىٰتَايْ يِعُغٛ مٛ سَمْ حَا وَرْغٛ حَنْدٜ؞ 29تٛ عٛنْ کٛوعَنِ يَمْ عٛو بٛو، تٛ سَرُّ حٜࢡِمٛ، عٛنْ نَسْتِنْتَمْ ندٜرْ جٛوندٜ مَايْࢡٜ بٜى مٜتَّمْࢡٜرَمْ؞ 30-31جٛنْتَ، تٛ مِلٛرْتَکٜ حَا مَشُّطٛ مَ، بَابَ عَمْ، تٛ دٜرْکٜىٰجٛ وٛنْدَايْ بٜى عَمِنْ، بَنَ عٛطَکّٛتِرِ بٜى مَاکٛ طٛ، عٛمَايَنْ تٛ عٛيِعَايْ مٛ؞ بَنَ نٛنْ مَشُّࢡٜ مَ نَسْتِنَنْ مَشُّطٛ مَ، بَابَ عَمِنْ ندٜرْ جٛوندٜ مَايْࢡٜ بٜى مٜتَّمْࢡٜرَمْ؞ 32بَرْکَامَ، مِنْ مَشُّطٛ مَ، مِڢِيِ دَمَّانَ يٜىٰسٛ بَابَ عَمْ نغَمْ دٜرْکٜىٰجٛ عٛو بٜى وِعْغٛ: تٛ مِوَرْتِرَايْ مٛ حَا مَاطَ، لِمَنَمْ طُمْ عَيْبٜ حَا ڢٛرٛيْ؞ 33جٛنْتَ کَمْ، بَرْکَامَ، عَشُّ مِجٛوطٛ بَنَ مَشُّطٛ مبَتُّدِ دٜرْکٜىٰجٛ، کَنغْکٛ بٛو عٛحٛوتِدَ بٜى دٜىٰرْطِيکٛعٜنْ#غُرْتَاکِ 32:32؛ رٛمَعٜنْ 5:7؛ 9:3؞؞ 34نٛيْ مبَاوْرَنْمِ حٛوتُغٛ حَا بَابَ عَمْ، تٛ دٜرْکٜىٰجٛ وٛنْدَايْ بٜى عَمْ؟ مِيِطَا لَارُغٛ سَرُّ نغُ حٜࢡَتَ بَابَ عَمْ!»
Currently Selected:
لَاتَانٛوجِ 44: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.