Marc 15
15
Jésus amatsundédu na Pilate
(Bono na Matt. 27:1–2,11–14, Luc 23:1–5, Jean 18:28–38)
1N’ongôngôe wetso, tsesuye yadeekedi adigondoku amaduga tungu épo na peeye, n’anigôi amige, n’asi kundu épôni éAjuif gôésevoa môsônda gôékatéda Jésus. Ahmakea n’edi gôéétsa angô gôndé Pilate, môtômi atsenge. 2Pilate ameevôa Jésus mbe: ?Ewe te môtômine aAjuif‐a? Jésus amamôaabéa mbe: Otsimi. 3Tsesuye yadeekedi adigondoku ahmatsua misunda miyekani gô mane mameendaka Jésus. 4Vane Pilate amoomba éévôa Jésus mbe: ?Ewe ôsaabéa‐a? ?Osookô gayeka misundamie gô mane mameendewe‐a? 5Ivô Jésus asibiké ta n’ebégô évo. Pilate amatsapéô pepe.
Jésus ameesédu n’oma gôéyôhu
(Bono na Matt. 27:15–26, Luc 23:13–25, Jean 18:39—19:16)
6Te gésima saPilate gô sueti yetso yaPâque akuséda môvo môsi gô tsôgôô. Akuséda te ône anganyôngéô géômbége. 7Gômabaka môma môvo, inedi Barabbas. Ameengedu gô eba atsôgôô gômakinangô ôtômu amôtômine atsenge na gômayôhangô môma. 8Géômbége soma ayekani ahmawesea na va komu eba aPilate. Avo ahmaduka angô mbe: Inda éne ééndaka éwe kuka yetso gô Pâque. 9Pilate amabambéa géômbége mbe: ?Nônyôngéô mbe nanzeegeda môtômine aAjuif‐a? 10Gôébégô Pilate asibômu mbe tsesu yadeekedi adigondoku ameetsa angô Jésus gô ngusune yaô. 11Ivô tsesu yadeekedi adigondoku amoonguma ne géômbége mbe: Nôénda te Pilate mbe: Kuséda Barabbas gô tsôgôô. 12Pilate amoomba évovo na géômbége mbe: Na ône atetanye mbe môtômine aAjuif ?nônyôngéô neenda angô nayee? 13Ahngô ahmaadôngana mbe: Komeda angô va gésumu sowa. 14Pilate ameevôa ahngô mbe: ?Ebégô ndé ébévani émeendangô? N’ahngô amoomba éadôngana mbe: Ayôhu te gô gésumu sowa. 15Gôévooto géômbége, Pilate amakusédéa ahngô Barabbas. Na amabitéda Jésus. Ameetsa angô na gôndé migodemie mbe ahngamôkomeda va gésumu géyôhu oma.
Migode mimakeenga Jésus
(Bono na Matt. 27:27–31, Jean 19:2–3)
16Migodemie mimakea na Jésus na gô wene môkii. (Te môkii ôndé gô gatse eba amôtômi atsenge.) Na géômbége samigode gémakôvana. 17Ahmaatéda Jésus ngoyine éatsoo. Ahmadipa ngundu éamingoo gôémôaatéda yangô gô môtsé ga gépôkôdô sokumaka. 18Gô deti éaô amamôkômbôa mbe: Sambaa. Sambaa, môtômine aAjuif. 19Ahmamôyôgô na péndé gô môtsé. Ahmamôtuéa mate. Ahmasiba mabongo maô. Ahmakotomo va mbene edi gôémôdeta. 20Vamamanahngô émôdeta, ahmamôsasa ngoyine éatsoo. Ahmamônikéa éaatéda môkandedi. Vane amamôkuséda na gô mbadi gôémôkomeda va gésumu sowa.
Jésus amakomedu va gésumu sowa
(Bono na Matt. 27:32–44, Luc 23:26–43, Jean 19:17–27)
21Vamakeahngô ahmawanya na mômôgôô inedi Simon, amaviga gô tsagedi. Simon nene amabaka môsi tsenge étetu mbe Cyrène. Angô tétene aAlexandre na Rufus. Vamadengahngô Simon gô nzéa, migodemie ahmamôtindéga gôétsua gésumuge géngayôhu Jésus. 22Ahmakea na Jésus na gô tungu étetu mbe Golgatha. Evéndégéô mbe kokoh amôtsé. 23Ahmanyôngéô émôétsa maduku mamagésu na maganga magéôkô pievia, matetu mbe myrrhe. Ivô Jésus amakina. 24Vane ahmamôkomeda va gésumu. Ahmakabana maduani medi. Ahmatséva na nzéké gôésevoa ône angadiia éduanie énganyôngéô ahngô. 25Emabaka n’ongôngô, nyee ômatsanya vamakomedahngô Jésus va gésumu. 26Gô gésumuge gômatendu môtsundue ômayôhu angô. Gômatendu mbe: Odôô te môtômine aAjuif. 27Ahmakomeda dôta asi môkôbé abaé va gésumu sowa va kôbangô aJésus. Môvo gésa gémôgôô. Môvo gésa gégeto. 28[Te gamadugédu Matendeo MaNzambé mane matôbeenda mbe: Angô amamenyanganôkô g’ôtangôe oma abévani.]
29Ane ahmootaka v’angô ahmadogima miôtsé miaô na ahmadeta Jésus mbe: Ehee. Ewe, ka te ômeendaka mbe, me nangapanzéda eba aNzambé nasaa wene gô pitsi ditatô. 30Tambô yuuéga gô panda yoo vôyé vandé éwe va gésumu sowa vane. 31Te mônongovo tsesu yadeekedi adigondoku, n’anigôi amige miaNzambé amadeta Jésus na ahmavovo anguene n’anguene mbe: Amanôtôa akedi gô panda yaô, géé amuene ?asangaanôtôa‐a? 32Tambô Christ, ône eendô mbe môtômi aIsraël, asutuméké va gésumu vandé angô vane. Okô tôeni angô asutuméa we tôsangadôtsuma paga. N’ahngô abaé ahmakomedu kukepo n’edi ahmamôtoko te nane.
Jésus amawa
(Bono na Matt. 27:45–56, Luc 23:44–49, Jean 19:28–30)
33Ndéône émabaka kômbéne ématsakama, évitsi émakukéga tsengene nyetso. Evitsie émaba ngu na ndéône étengama kômbéne. 34Va ndéône étengama kômbéne, Jésus amabambéa n’ogi agô ngongo mbe: ?Eloi, Eloi lema sabachthani? Evéndégéô mbe Nzambé ami. Nzambé ami. ?Otsiki me nayee? 35Avo ahmadenganô vangô ahmookô Jésus aadôngana, ahmavovo mbe: ?Nôôkiô‐a? Abambéa môpandôédi amatasa maNzambé, ône ambeego eendô mbe Elie. 36Môvo va gatse aô amabongo sôma géndé ga ébuyo géviva meba. Amayavôga ékuya sangô gô meba manganye. Amapatéga sangô gô péndé. Amabôgôa sangô na va mônya aJésus mbe aviva sangô. Amavovo mbe: Nôvénga. Tôbéena gômahviga Elie gôémôpotoo va gésuma sowa. 37Ivô Jésus amaamugana na gô ngongo. Te n’angô wakaga.
38Ombo agô eba aNzambé ômaatéga bandôa gô ngongo ngu na gô tsina. 39Môsi Rome, môtômi amigode amatema tsimatsima na Jésus. Amookô gamaamugana Jésus na ameena gamawa angô tsina na tsina. Amavovo mbe: mômôgôô noo, ti na gô pie Muana ANzambé.
40Avo ageto ahmabaka vangô ahmabono ahndé gôdagôda. Va gatse aô gômabaka Salomé na Marie môsi Magdala, na Marie yeene aJoses na aJacque ône amabaka mônzambu. 41Ahngô muetso ahmakea na Jésus géômbé gévo, bandôa vamabakangô gô Galilée gôémôyanzéa. Na gômabaka ageto ayekani ahngô dôta ahmakea n’edi na gô Jérusalem, ahmadenganô va tungune éagésumuge sowa.
Jésus amagunyu gô ngii
(Bono na Matt. 27:57–61, Luc 23:50–56, Jean 19:38–42)
42Nyee ômabaka te ômeeda. Te pitsine ékônza Ajuif éômee éaô éasueti. Nyee ôdundaka Ajuif ômabaka madeo ôsigiia. 43Gômabaka gévovi sAjuif gémanyônganéôni, inedi Joseph. Amabaka môsi Arimathée. Ameenéa ôkumu aNzambé ôviga. Gô ngeba yedi amabaka na bôkédé gôékea na gôndé Pilate gôémôduka ôtô aJésus. 44Vamookô Pilate nane amatsapéô gôsidingé Jésus éwa. Amabambéa môtômi môvo amigode gôéôkô n’edi ôkô mbe Jésus awaki te mbeego. 45Vamookô angô na môgode mbe awéyi, amasingéa Joseph gôébongo nzumbine. 46Joseph amasômba môkanda avembo osunu ôvôni. Amapotoo nzumbine gô gésumu sowa. Ahmamôdipôa na môkanda avembo. Amamôgunya gô éduku éamôdungutu émasigô gô tsina amôkôdi. Amakandanganéda étaé évôni gôékukéga ngiine. 47Marie môsi Magdala na Marie yeene aJoses, ahmakea ahmanyôngéô éena gôgunyu nzumbine.
Alliance Biblique du Gabon (Bible Society in Gabon) 1983
