Marc 14
14
Peeye amavangéa Jésus gépangô
(Bono na Matt. 26:1–5, Luc 22:1–2, Jean 11:45–53)
1Ndéône émabaka émasanéa pitsi dibaé na gô sueti éaPâque, te sueti éaakô môpemba ôsigésu na levure. Tsesu yadeekedi adigondoku n’anigôi amige miaNzambé ahmabuta ôési gôépatéa Jésus mbe amôtsôpéda gôéyôhu. 2Ahngô mbe: Tôsangoongôa émôtsôpéda gô tsina asueti kabaga gôba môyungéda gôébégô oma ayeka gô sueti.
Môgeto môvo amasôga Jésus môombo
(Bono na Matt. 26:6–13, Jean 12:1–8)
3Jésus amabaka gô Béthanie gô eba aSimon môsi ébeea éagega. Vamabakangô digaa gô aakaga gômeengéa môgeto. Angô amaviga na gévaa gémapakôni setaé étetu mbe albâtre.#14:3 Te gatôénda mbe étaé éamikunduku Gévaa gémayôa na môyombo amôsôba ôtetu mbe nard. Te môyombo osunu ôvôni. Amakitsa gémenoge sagévaage na ameetéa môyomboe gô môtsé aJésus gôémôneegeda. 4Avo ane amadenganôni ahsiené buedi na ahmavovo anguene n’anguene mbe: ?Abuda môyomboe osunu ôvôni nane nayee? 5Mbe amasômbéda angô mbe amadiia ôsunu ôvôni. Dodeye mbe ameetsa yangô misuga. Oma ahmatsuava môgeto nône te nane. 6Vane Jésus amavovo mbe: Tsikani angô. ?Nôyungéda angô môtémedi nane nayee? Ene ééndi angô me éndé éamôsôba. 7Misugamie mindéké n’anyô pitsi yetso. Kuka yetso nôndé na ngudi yeendéa ahngô mamisôba. Géé me tsangaba n’anyô pitsi diyekani. 8Môgeto noo eendéyi me éne ébaki n’edi gôéendéa me. Amani ésôga me môyombo gôékônza ôtô ami, ti me madeo tsigunyu gô ngii. 9Nanôbeenda na gô pie mbe tsinane nyetso éngatsanzabana Tsangô Eami Eamôsôba, oma ahnganigôa dôta éne ééndi môgeto noo gôékôngéda angô.
Judas amanyôngéô ékaba Jésus
(Bono na Matt. 26:14–16, Luc 22:3–6)
10Vane môvo va gatse aneengie nzima n’abaé, inedi Judas Iscariote amakea. Amabuéa na gôndé tsesu yakeekedi adigondoku gôévangéa Jésus gépangô. 11Tsesuye ahmanyôngéô gômookô ahngô nane. Ahmavanga gôévanéa Judas. Na Judas amabuta ndéô éakuanakue gôékaba Jésus na gôndé ahngô.
Jésus amaa sueti éaPâque n’aneengie
(Bono na Matt. 26:17–25, Luc 22:7–14,21–23, Jean 13:21–30)
12Nyaa amapanga asueti éamôpemba ôsigésu na levure ômabuéa, te nyaa ômayôhu mandombo magô Pâque. Aneengie amabambéa Jésus mbe: ?Onyôngéô mbe tôkekônza suetine éasô n’anyô gôni? 13Na Jésus amatôma aneengie abaé mbe: Kiakani na gô môsenge na nôngawanya na mômôgôô atsua kiekie éameba. Nôaanda angô. 14Gôngeengéangô te n’anye muetso. Nôbeenda kumu eba mbe: Môékédi éévôi mbe: ?Tsongone éngaa wa n’aneengie ami suetine éaPâque yangôéni? 15Na anganôtubéda tsongo épôni gô môgényé agô ngongo. Nôngadenga éetso kuanakue wangô. Nôkekônza sueti éasô n’anyô te gône. 16Aneengie ahmakea na gô môsenge. Ahmadenga éetso te gamavovo Jésus. Ahmakônza suetine éaPâque te wangô.
17Vameeda nyee, Jésus n’aneengi edi ahmakea. 18Vamabahngô va tabudé gôéaa, Jésus angô mbe: Nanôbeenda na gô pie mbe va gatse anyô nôaa n’ami, môvo angakaba me. 19Mitéma mianeengie mimadita. Ameevôa Jésus môvo môvo mbe: ?Kumu, te me‐a?
20Jésus amaabéa ahngô mbe: Va gatse anye nzima n’abaé te ône awanyéa n’ami gôétsuéta môpemba gépede gévo. 21Na gô pie, me Muana Amôma nangawa mônogovo gamabeenda Matendeo MaNzambé mbe nangawa. Ivô ngeba épôni gô maguga mangeena ône angamôkabani. Mbe amabaka madeo asibôtu mbe émanyepa.
Môyakô eevamba na Kumu
(Bono na Matt. 26:26–30, Luc 22:15–20, 1 Corinthiens 11:23–25)
22Vamaakahngô, Jésus amabongo môpembee. N’emana ékuméda Nzambé gô angô, amoobukua. Ameetsa aneengi edi. Angô mbe: Ii, mani. Aakani. Odôô te ôtôe wami. 23Vane amabongo gébungu sameba mamiônda. Vamamanangô ékuméda Nzambé gô sangô ameetsa aneengie. Amanyua muetso. 24Jésus angô mbe: Edi te nzina yami. Te nzina divambéda oma na Nzambé. Yangô dimaaga g’ôwa gôndé oma ayekani. 25Me nanôbeenda na gô pie mbe me tsangadônyuadô mebame mamiôndee éma ngu na vangoomba me ényua mane mawene mônongo gô tsenge éaNzambé. 26Vane amatôa mimbô masueti na amakea na gô môkôdi ôtetu mbe Olivier.
Jésus ameevéda gétônéô saPierre
(Bono na Matt. 26:31–35, Luc 22:31–34, Jean 13:36–38)
27Jésus ameevéda aneengi edi mbe: Ti gô éne éngabuéa gôndé me na pitsine, gô gomoe wanyô anye nôngatsika me. Te gatôtanga gô Matendeo MaNzambé mbe: Môkeneyi amandombo angayôhu. Na mandombome mangapanzangana metso. 28Menyani mbe vangakunduga me nangoobégéa na gô Galilée. 29Pierre angô mbe: Buéyé mbe akasô agôtsikéké, gôndé me tsangagôtsika. 30Jésus amaabéa angô mbe: Nagôbeenda na gô pie mbe na pitsine, tsôsône n’egékôkaka mabaé, éwe Pierre ôngatôna me kuka ditatô mbe: Me tsamenya ône. 31Pierre amoomba évovo mbe: Ti me gôégôtôna, viaa. Buéyé mbe ayôhéyee na me muetso, tsangoongôa égôtôna. N’akedi muetso amaabéa te mônongovo.
Jésus amavovo na Nzambé gô Gethsémané
(Bono na Matt. 26:36–46, Luc 22:39–46)
32Jésus n’aneengie ahmabuéa gô tungu étetu mbe Gethsémané. Vane Jésus ameenda aneengi edi mbe: Digaakani éva. Me nakevovo na Nzambé. 33Vane amabambéa Pierre na Jacques na Jean gôékea n’edi. Môtémedi ômatuna na ômookô pievia. 34Jésus amavovo n’ahngô mbe: Môtémami ôena panda épôni ganakeewa. Sanéani éva. Bakani géembemba géebogé. 35Amawesea amuene pesu na gô mbene. Amagudama na gô tsina gôéduka Nzambé ôkô anyôngéyéô mbe ndôéne éamaguga amôgôngéda gô yangô. 36Jésus angô mbe: Ah Téta, ôsadagéô ébégô. Nôtôa me gébunguge samaguga égé. Ivô béyé nane, kaka éne ényôngéô me ééndôni, ivô te éne ényôngéô éwe.
37Jésus amoomba énika na vandé aneengie atatô. Amadenga ahngô ahndé gô vio. Amavovo na Pierre mbe: ?Simon, ôeboga vio? ?Osoongôa ésipa géebogé ta na pesu andéô‐a? 38Bakani géembemba géebogé. Vovoni na Nzambé anye muetso kabaga nôkuba vangakanégu anye gô mabégô mabévani. Gédidi samôma gényôngéô éénda mane manyôngéô Nzambé, ivô ôtôe ôdeeda.
39Jésus amoomba étongonéa n’ahngô. Amavovo na Nzambé ébégôe te évo. 40Amoomba énika na vandé aneengie. Amadenga ahngô ahndé gô vio. Miso maô mamabaka na ndondinda na viovie. Ahsibé n’ebégô gôébika.
41Vamoomba Jésus éviga kukane éamôtatô ameevôa ahngô mbe: ?Nômbi te éeboga‐a? ?Nôdigaayi‐a? ?Nôgogi‐a? Nôeni, ndéône ébuéyi. Me Muana Amôma namani ékabô na gôndé oma abévani. 42Timôgani. Okani. Nôeni, ône akabi me avigi.
Jésus amatsôpu
(Bono na Matt. 26:47–56, Luc 22:47–53, Jean 18:3–12)
43Vamaba Jésus madeo asisutuméda ta na ôgie, Judas amabuéa. Judas amabaka g’ôtangô anzima n’aneengie abaé. Ahmaviga na géômbé gévôni gématsua ékeeyi, te makongo na mabaga na événzô. Ahngô muetso ahmatômu na tsesu yadeekedi adigondoku, n’anigôi amige miaNzambé, na peeye yAjuif. 44Judas, môkabine aJésus amabeenda géômbége gémbégéage géngatubéda angô. Angô mbe: One angasambanéa n’ami te ône abuta anye. Tsôpani angô. Baani n’ekena gôébuéda angô na gôndé ane atôtômini. 45Vamabuéa Judas va tungu nene, amawesea na vandé Jésus. Angô mbe: Kumu ami. Amasambanéa na Jésus. 46Avo oma ahmatsôpa Jésus gôékea n’edi. 47Môvo amadenganô vangô amayuua yengane yedi gô kôtô. Na amakitsa éatô éamôyanzine éapene adeekedi adigondoku. 48Jésus angô mbe: Anye nôviga gôétsôpa me na mabaga na péndé. ?Nômenya mbe me môsi môkôbé‐a? 49Pitsi yetso namabaka n’anyô gô eba aNzambé gôéékéda anye. N’anye nôsitsôpé me. Tambô me kaka môsi môkôbé. Mabégôme metso éma te mane mookanô gô Matendeo MaNzambé mbe éngaba te nane. 50Aneengi edi muetso amabusuga amatsika Jésus amuene.
51Na mônzambu môvo amaanda Jésus gô ngima na môkanda ôtévo ditéga. Avo oma ahmanyôngéô étsôpa angô. 52Mônzambune ône amasasa môkandee amabusuga mônyenge.
Jésus ameesédu n’asi kundu épôni éAjuif
(Bono na Matt. 26:57–68, Luc 22:54–55,63–71, Jean 18:13–14,19–24)
53Ahmakea na Jésus na gôndé pene adeekedi adigondoku. Ahmadenga tsesuye yetso yadeekedi adigondoku na peeye n’anigôi amige miaNzambé ahndé vavo. 54Pierre amaanda Jésus gô ngima aka gôdagôda. Amabuéa gô môkii gô tungu eba apene adeekedi adigondoku. Pierre amakea gôédenga migodemie va gébéké gôéôkô épiô.
55Tsesu yadeekedi adigondoku n’asi kundu épôni éAjuif ahmadigaa gôébuta ébégô gôétsundéda Jésus gôémôyôa. Ivô ahsidenge ébégôe. 56Ayekani ahmakea na mitangô miaô gôépatéa Jésus. Ahsidenge ébégô. Buéyé anguene ahmatsumana paga. 57Mbangi ahmatimôga gôénigôa mabégô maô. Ahmapatéa Jésus mbe: 58Tômookô mômôgôô noo amavovo mbe: Me nangapanzéda eba aNzambé ôdôô ômasaô n’oma. Gô pitsi ditatô nangatemeda wene, ôsangasaaô n’oma. 59Buéyé gô ébégôe éne mbangiye ahmatsumana paga anguene n’anguene.
60Pene amatema va mbene oma muetso gôéévôa Jésus nyivô mbe: ?Ewe ôsasiia gôvovo akoo‐a? ?Osookô gasunda omeaa éwe‐a? 61Jésus asibubué. Asisiié ta n’evo. Pene amoomba émôbambéa mbe: ?Ewe te Christ‐a? Nzambé, ône aneegeduni ?éwe te muanedi‐a? 62Jésus amaabéa angô mbe: Ii, te me. Anye muetso nôngeena Muana Amôma andé digaa gô géeyo gémôgôô saNzambé, Kumu angudi yetso. Nôngeena dôta Muana Amôma aviga va gatse adibôngé yag’ôba. 63Pene, n’opisa ôvôni amakaka ngoyine éaamuene. Angô mbe: Wedô tôsabutadô mbangi. 64Anye nôôkiô gaabéyi angô, eenza Nzambé. ?Nônyôngéô nayee? Na muetso amasinganéa mbe gô ôésie wedi ôvôni awa te wakaga.
65Avo va gatse aô amabandôa étuéa Jésus mate. Ahmamôibéda miso na ahmamôbômôa ébôdé. Ahmavovo n’edi mbe: Beenda we ône abômôyi éwe ébôdé. Migode mimatsôpa Jésus na ahmabômôa angô ôtôe wetso.
Pierre amatôna Jésus
(Bono na Matt. 26:69–75, Luc 22:56–62, Jean 18:15–18,25–27)
66Pierre amabaka te agébaka va môkii. Môgeto môvo te môyanzine apene, amaviga. 67Ameena Pierre andé digaa gôéôkô épiô. Amamôbono na nzôô. Amavovo n’edi mbe: N’ewe ômabaka na Jésus, mômôgôône agô Nazareth. 68Ivô Pierre amatôna mbe: Me tsamenya mane. Tsookô éne évovo éwe. Vane Pierre amanôtôga vamabaka angô amakea na v’ombaa amôgômba. Tsôsône émakôka. 69Na môgeto nône ameena angô amoomba évovo amatubéda akedi mbe: Nôeni mômôgôô nône, môvo môsi géômbége géne. 70Vane Pierre amoomba étôna mbe: Kaka me. Géyéngéyéngé ane ahmadenganôni ahmavovo na Pierre mbe: Na gô pie, éwe môvo môsi gô géômbége géne. We tôsabômu mbe éwe te môsiGalilée. 71Pierre amasongéa mbe: Ti me, ôkô napati Nzambé asoséda me. Me nanôbeenda mbe me tsamenya mômôgôône atetanye ône. 72Tsina na tsina tsôsône émakôka kukane amôbaé. Na Pierre amakôngéda mane mamavovo Jésus n’edi mbe: Tsôsône n’egékôkaka mabaé ôngatôna me kuka ditatô mbe: Me tsamenya ône. Na vamabangôa angô nane, Pierre amadéa.
Alliance Biblique du Gabon (Bible Society in Gabon) 1983
